තාත්තා වෙනුවෙන් සින්දුවක් කරන එක කාලෙක ඉඳලා තිබුණ බලාපොරොත්තුවක්…

තාත්තාගේ නමට හානියක් කරන්නෙ නැහැ…  තාත්තාගෙන් අහලා තමයි ගායනා කරන්නේ…

ජනප්‍රිය ගායන ශිල්පී පුන්සිරි සොයිසාගේ ආදරණීය දියණිය සත්මිණි සොයිසා. දිගු කාලයකට පසු ඇයගේ හඬින්ම ගීත කිහිපයක් නිර්මාණය කරලා. මෙහි විශේෂත්වය වන්නේ තම ආදර පියා වෙනුවෙන්ම ගීතයක් නිර්මාණය කර තිබීමයි. පිය සෙනෙහසට කවි ගී ලියැවුණා මදි කියන කාල වකවානුවක ඇය මේ ගත් උත්සාහය පිළිබඳ අපි ඇය සමග කතා කළා.

සත්මිණි දැන් ගායිකාවක් බවට පත්වෙලා නේද?

ඔව්… කාලෙක ඉඳලා මගේ හිතේ තිබුණා සින්දුවක් කරන්න. ඉතින් මේ හොඳම කාලය කියලා හිතුණා. මොකද මේ දවස්වල ජනතාව ගෙදරට වෙලා ඉන්න නිසා මම ගීත කිහිපයක්ම නිර්මාණය කරලා රසවිඳීමට ඉඩ සැලැස්සුවා.

ඔබ නිර්මාණය කළ ගීතවල වෙනසක් අපි දකිනවා?

ඔව්… එහෙම වෙනසක් කරන්න තමයි මට හිතුණේ. මගේ තාත්තාගේ ගීතවලටත් හානියක් නොවන විදියට වගේම තාත්තාගේ නමටත් හානියක් නොවන විදියට තමයි මම ගීත ඉදිරිපත් කළේ. මේ වැස්ස නුඹටත් වහිනවා ඇති, ඇවිත් වස්සානයේ, ඉවසන්න බැරි හුදකලාවක්, පියාණනි තමයි මගේ අලුත්ම ගීත පෙළහර.

ඔබ ගායනා කරන සියලුම ගීත එකම පද රචිකාවියගේ වීමට විශේෂ හේතුවක් ඇති?

මම ගායනා කරපු පළමු ගීතය තමයි ඉවසන්න බැරි හුදකලාව. ඒ ගීතයේ පද මාලාව මම දැක්කට පස්සේ මට හිතුණා සින්දුවක් කරන්න ඕනෑ කියලා. නදිරා නල්ලප්පෙරුම තමයි එය පද රචනා කරලා තිබුණේ. මම ඇයගෙන් ඉල්ලුවා මට දෙන්න කියලා. ප්‍රනීත් සාරංග තමයි මට එයට ගැලපෙන විදියට සරල තනුවක් වගේම සංගීතයක් නිර්මාණය කළේ. නදිරා නල්ලප්පෙරුමගේ පද රචනයට මම ගොඩාක් කැමැතියි.

ඔබේ පියාගෙන් ලැබුණු සහාය කොයි වගේද?

මගේ සෙවණැල්ල වගේ නිරන්තරයෙන්ම තාත්තා මම සමග ඉන්නවා. කවුරු මට ගීත නිර්මාණය කළත් මම තාත්තාගේ උපදෙස් අරගෙන සුදුසු නම් තමයි මම ගායනා කරන්නේ.

ඔබේ ආදරණීය පියා වෙනුවෙන් ගීතයක් නිර්මාණය කළා නේද?

කාලෙක ඉඳලා තිබුණු මගේ ඒ බලාපො රොත්තුවක් තමයි ඒ. තාත්තා අක්කාගේ , නංගීගේ මගේ නම් යොදාගෙන ගීත නිර්මාණය කළා. ඒ වගේම මගේ නම යොදාගෙන ගැසට් එකක් පවා නිර්මාණය කළා. ඉතින් තාත්තාට උපහාරයක් විදියට මම තාත්තා වෙනුවෙන් ගීතයක් නිර්මාණය කළා. ඒක අහලා තාත්තාගේ ඇස්වල කඳුළු පිරිලා තියෙනවා මම දැක්කා.

ඔබේ හඬින් අවදි කිරීමට ප්‍රමාද වුණා කියලා ඔබට සිතුණේ නැතිද?

මගේ අධ්‍යාපන කටයුතු නිසා පොඩ්ඩක් ප්‍රමාද වුණා. ඒ වගේම මගේ රැකියාවත් එක්ක මට නිර්මාණයක් කරන්න ලැබෙන කාලය අඩුයි. ලැබුණු විවේකයත් එක්ක තමයි මම ගීත නිර්මාණය කළේ.

වසන්ත විතාරණගේ
උපුටා ගැනීම මව් රට