''මම හෙව්වෙ ආදරය.. ඒත් මට නොලැබුණෙත් ආදරයමයි'' - පියුමි බොතේජු
පියුමි බොතේජු ජනප්‍රිය වගේ ම දක්‍ෂ රංගන ශිල්පිනියක්. ලැබෙන ඕනෑ ම චරිතයකට අපූරුවට පණ පොවන ඇය සිය තතු මව්බිම 'හදගැස්ම' හා පවසන්නට එකතු වුණා.
පියුමිගේ රංගන ජීවිතයේ අලුත් වැඩ මොනව ද?
ඉරේෂ් ලොකුබණ්ඩාර සහ සඳරුවන් ජයවික්‍රමගෙ අලුත් නිර්මාණවල වැඩ කරගෙන යනවා.
ප්‍රහසන චරිතවලට වැඩිපුර කොටුවීම ඔයා ඔබට ම කර ගන්න හානියක් නෙවෙයි ද?
අපේ
ක්‍ෂේත්‍රය තුළ තියෙන වරදක් තමයි ප්‍රහසන චරිතයක් කළොත් දිගට ම ගන්නේ ඒ
වගේ චරිතවලට. මටත් එහෙමයි. දිගින් දිගට ම ප්‍රහසන චරිත ලැබෙන කොට හොඳ චරිත
ලැබෙන්න තියෙන අවස්ථාව නැති වීම හානියක් තමයි. ඒත් සඳරුවන් ජයවික්‍රමගෙ
ටෙලි නාට්‍යයෙ මම රඟපාන්නෙ හාස්‍යයෙන් මිදුණු චරිතයක්. එක පැත්තකින් මම
හිතනවා මට කොමඩි වගේ ම සීරියස් චරිතත් කරන්න හැකියාව ලැබීම වාසනාවක් කියලා.
මොක ද මට කවදාවත් වැඩ නැති වෙලා නැහැ. දෙයියනේ කියලා වැඩ තියෙනවා.
කලාකරුවෙකුට මාධ්‍ය මොන තරම් වැදගත් දෙයක් ද?
අපි
ගැන දැනගන්න කැමැති අපේ ආදරණීය රසිකයන්ට අපේ තොරතුරු දැනගන්න පුළුවන්
වෙන්නෙ මාධ්‍ය නිසා. ඉතින් ඇත්තට ම කලාකාරයෙකුට මාධ්‍ය කියන්නෙ ඉතා ම
වැදගත් දෙයක්.
වර්තමානයේ සමාජ මාධ්‍ය ජාල තුළ බොහෝ විට අසත්‍ය තොරතුරු පළවෙනවා. එවැනි දේට මුහුණ දීලා තිබෙන ශිල්පිනියක් විධියට ඒ ගැන අදහස?
සමහරු
වෙබ්සයිට්, යූටියුබ් චැනල් කරන්නෙ කරන්නන් වාලේ කිසි ම ප්‍රමිතියක් නැතිව.
කවුරු හරි කියන පළියට ජනප්‍රිය අයගෙ කුණු හොය හොය ප්‍රචාරය කරනවා කීයක්
හරි හොයා ගන්න. මාධ්‍යය කියන්නෙ හරි උතුම් රස්සාවක්. නමුත් අද වෙනකොට සමහර
පහත් වෙබ්සයිට්, යූ ටියුබ් චැනල් නිසා ඒ උතුම් බව නැති වෙලා ආටිස්ට්ලා
ඉන්ටර්වීව් එකක් දෙන්න දෙවරක් හිතන තැනට පත්වෙලා.
පියුමි හැම අවුරුද්දක ම උපන් දිනය විශේෂ විධියට සමරන කෙනෙක්. මෙවර අගෝස්තුවෙ උපන් දිනයට මොනව ද කරන්න හිතාගෙන ඉන්නේ?
මං
හැම අවුරුද්දෙ ම මගේ උපන් දිනයට පින් අතේ දෙයක් කරපු කෙනෙක්. මේ සැරෙත්
කරනවා. වෙන දාට නම් මම උපන් දිනය සැමරුවෙ විශේෂ අවශ්‍යතා තියෙන දරුවොත්
එක්ක. නමුත් මේ අවුරුද්දෙ කොරෝනා තත්ත්වය එක්ක මට එයාල එක්ක උපන් දිනය
සමරන්න පුළුවන් කමක් නැහැ. මගේ තාත්තිත් අසනීපයෙන් ඉන්නෙ. ඉතින් ඒ වෙනුවෙන්
වගේ ම මගේ රටට, රටේ සියලු දෙනාට සහ මුළු ලෝක වාසීන්ට ම සෙත් පතලා පත්තිනි
මෑණියන්ට කිරි දානයක් දෙන්න බලාපොරොත්තු වෙනවා.
ඔයාට ජීවිතයේ ලැබුණු අමතක නොවන ආදරය කාගෙන් ද ලැබුණේ?
රංගන
ජීවිතයෙන් එහා බැලුව ම මමත් සාමාන්‍ය ගැහැනියක්. අම්මා, තාත්තාගේ ආදරය මගේ
ම කියන අයගෙ ආදරය මට ලැබිලා තියෙනවා. එතැනින් මිදුණා ම මට අමතක නොවන
ආදරයක් ලැබුණෙ, අදටත් ලැබෙන්නෙ මගේ රසිකයන්ගෙන්. ඒ තරම් වටින දෙයක් මට වෙන
නැහැ.
විවාහය කියන්නෙ කාන්තාවකට අවශ්‍ය දෙයක් ද? එහෙමත් නැත්නම් අත්‍යවශ්‍ය දෙයක් ද?
විවාහය
කියන්නෙ කාන්තාවකට අත්‍යවශ්‍ය දෙයක් නෙවෙයි. කසාද බැඳලා ඇත්තට ම සතුටින්
සැනසීමෙන් ඉන්න අයට වඩා කසාදය පීඩනයක් වුණ කාන්තාවන් වැඩියි කියලයි මං
දැකලා තියෙන්නේ. දරුවෝ නිසා එහෙමත් නැත්නම් පවුලෙ අයට ලැජ්ජ වෙයි කියලා
විවාහය එල්ලගෙන යන කාන්තාවෝ අපේ සමාජයෙ ඕන තරම්.
සමහර මවුපියෝ ඉන්නවා දරුවෝ කසාද බන්දලා දීලා ප්‍රශ්න දැක්ක ම කියන්නෙත් කසාද බැන්දනම් මොන දේ වුණත් වෙන් වෙන්න එපා කියලා. මං හිතන්නෙ නැහැ කිසි ම කෙනෙක් විවාහ වෙන්නෙ වෙන් වෙන්න බලාගෙන කියලා. ඒත් ඒ ජීවිතය තුළ සැනසීමක් නැත්නම් තියෙන්නෙ ම පීඩනය ම විතරක් නම් වෙන්වෙන එක හොඳයි. එහෙම බලද්දී මං හිතන්නෙ විවාහය කියන්නෙ අත්‍යවශ්‍ය දෙයක් නෙවෙයි.
ජනප්‍රිය
ශිල්පිනියන්ගෙ රුව එඩිට් කරලා නිරුවත් වීඩියෝ දර්ශන සහ ඡායාරූප විධියට
සංසරණය වීම අද වැඩි වශයෙන් දකින්න ලැබෙනවා. ඔබත් අඩුවැඩි වශයෙන් මුහුණ දුන්
කෙනෙක් විධියට ඒ ක්‍රියාවන්ට විරුද්ධව පියවර ගැනීමට කටයුතු කරලා තියෙනවා
ද?
මෙහෙමයි ඔය වගේ දේකට විරුද්ධව දේවල් කරන්න කවුරුත් එකතු
වෙන්නෙ නැහැ. මටත් ඔහොම දේවල් හැදුණා. නමුත් මගේ ගෙදර අය, මට ආදරය කරන අය ඒ
මම නොවෙයි කියන එක දැනගෙන හිටියා. මම කවදාවත් ඒ වගේ තුට්ටු දෙකේ වැඩ කරන
තැනකට පත්වෙන්නෙ නැහැ කියලා දන්නවා.
ඒ හින්දා ඒ කිසි කෙනෙක් මගෙන් ඒ ගැන ඇහුවෙවත් නැහැ. මං ඒ ගැන හිතන්නෙ මෙහෙම නොහික්මුණු කාම ආශාවන් පිරුණු මිනිස්සු අපිව දකින්න කැමැති විධියට අපේ ෆොටෝස් එඩිට් කරලා දානවා. ඒවා බලන්න ආස අය ඒවා බලලා සතුටු වෙනවා. ඒවා හරි ම පහත් වැඩ.
කෙනෙක් ජානවලින් අරන් එන ඒ වගේ කමකට නැති ගතිගුණ අපිට වෙනස් කරන්න බැහැ. හැබැයි මම නම් ඒවට නිකන් ඉන්නේ නැහැ. මම නීති මාර්ගයට යොමු වුණා. මට කරපු දේ කරලා ඉවර වුණාට මගෙන් පස්සේ කෙනෙක්ට එහෙම දෙයක් නොවෙන්න ඕන කියන චේතනාව එක්ක මම ඒකට විරුද්ධව පියවර ගත්තා. මොක ද මේ වගේ දේවල් නිසා හොඳට ඉන්න පවුල් පවා කැඩෙන තැනට පත්වෙනවා.
කලා ජීවිතයේ සමීපතමයන් කවුද?
නිරෝෂා විරාජිනී, ජයනි සේනානායක වගේම දර්ශන පෙරේරා (රූපලාවණ්‍ය ශිල්පී)
පියුමි මෙච්චර සුදු, ඉන්ජෙක්ෂන් විදගෙන නිසා කියලා සමහරු කියනවා?
කිසි
ම දවසක මම ඉන්ජෙක්ෂන් එක පාවිච්චි කරලා නැහැ. එහෙම කියන අයට මං කියනවා ඒක
ඔප්පු කරලා පෙන්නන්න කියලා. අනික මගේ අම්මව දකින කෙනෙක් මට ඔය දේ කියන්නෙ
නැහැ. මං පුංචි කාලෙත් ගොඩක් සුදු කෙනෙක්. ඒක ලොකු වෙන කොට පාසලේ ක්‍රීඩා
කටයුතුවලට ගොඩක් සහභාගි වුණ නිසා ටිකක් කළු වුණා. මම විතරක් නෙවෙයි ඉස්කොලෙ
යන කාලෙට ඕන කෙනෙක් එහෙමයි. ඊට පස්සේ ආයෙ ඉතින් මගේ තිබුණ පාට ආයෙ ඉස්මතු
වෙලා තියෙනවා. මම ක්ලීන් අප් එකක් එහෙම කරලා මගේ පෙනුම රැක ගන්නවා. අනික
ඉන්ජෙක්ෂන් එකට සුදු වුණා ම හොයන්න පුළුවන්. මට තියෙන්නෙ එහෙම කෘත්‍රිම
පැහැයක් නෙවෙයි.
ජීවිතයෙ අමතක නොවන ම අත්දැකීම් ලැබුණෙ කාගෙන් ද? ඒ මොකක් ද?
මගේ
ජීවිතයේ අමතක නොවන ම අත්දැකීම තමයි මේ ඉන්න ගේ හදාගත්ත එක. පොඩි කාලෙ ඉඳලා
අම්මා, තාත්තා, අයියලා තුන්දෙනා එක්ක ගෙවල් කීපෙක ම කුලියට හිටියා. ඒ කාලෙ
ඉඳල ම මගේ තිබුණු හීනයක් තමයි ගෙයක් හදාගන්න එක. හම්බ කරන දේවල් කොහොම හරි
ඉතුරු කරගෙන කැපවීමෙන් හරිම මහන්සියෙන් මං ලස්සන ගෙයක් හදාගත්තා. ඒක තමයි
මං ලබපු අමතක නොවෙන ම අත්දැකීම.
මේ වෙනකොට ආදරවන්තියක් ද?
නැතෝ.
ආදරය ගැන හැඟීම?
හිඳීවි
කොතැනක හෝ හිමිකාරයා කියලා හිතාගෙන ඉන්නවා. මං ආදරය නිසා බැටකාපු කෙනෙක්. ඒ
හින්දා මං කණාමැදිරි එළියටත් බයයි. මං කැමැති ආදරයට මං හෙව්වෙත් ආදරය. ඒත්
මට නොලැබුණෙත් ඒකමයි.
ගැහැනියක් විධියට තවත් ගැහැනියකට දෙන්න කැමැති පණිවුඩය මොකක් ද?
ගැහැනිය
කියන්නෙ පුදුම හයියක් තියෙන කෙනෙක්. මහ පොළොවට සියල්ල දරාගන්න පුළුවන් වගේ
ම තමයි ගැහැනියටත් දරා ගන්න බැරි දෙයක් නැහැ. හැම ගැහැනියක් ම එකට එකතු
වුණොත් කරන්න බැරි දෙයක් නැහැ. ඒත් ගොඩක් වෙලාවට ගැහැනියට කෙණෙහිලිකම්
කරන්නෙත් ගැහැනියමයි. එතැනදී මං හිතන්නෙ ප්‍රතිරූපයක් නැති අය තමයි තවත්
කෙනෙක්ගෙ ප්‍රතිරූපය විනාශ කරන්න හදන්නෙ. කිසි ම කෙනෙක්ගෙ හව්හරණක් නැති
වුණත් තමන් වෙනුවෙන් නැගී සිටින්න ශක්තිය ගැහැනියකට තියෙනවා. මං ගැහැනියක්
විධියට අනෙක් කාන්තාවන්ට කියන්නෙ තමන්ගෙ ශක්තිය හඳුනාගන්න කියලයි.
උපුටා ගැනීම මව්බිම
