මවටත් නළවාගන්නට නොහැකි ලෙස දරුවා හඬනවා
“දොයි දොයි දොයි දොයිය බබා”
“බයි බයි බයි බයිය බබා”
දරුවන් හඬන විට නළවා ගන්නට අතීතයේ සිට මව්වරුන්ගේ මුවඟ රැඳෙන එකම සුගායනයට කුමන දරුවෙක් වුවද නැළවෙන්නේ මහා පුදුමයකට වගේ. නමුත් මවටවත් නළවාගත නොහැකි ආකාරයට දරුවා නොනවත්වාම දිගින් දිගටම හඬනවා නම් එහි යම් අස්වාභාවික තත්ත්වයක් ඇති බව කාටත් හොඳින් වටහා ගත හැකියි. මෙවැනි හේතු අතර සුලබව දැකගත හැක්කේ කායික රෝග අවස්ථාවන්ය. මේ පිළිබඳව පසුගිය සතියේදීත් අපි බොහෝ තොරතුරු පිළිබඳව කතාබහ කරන ලදී.
මෙවර ළමා රෝග පිළිබඳ සාකච්ඡාව යටතේත් දරුවන් නොනවත්වා හඬන්නට බලපාන තවත් හේතු මොනවාද යන්න පිළිබඳව විමසා බලමු. දරුවන් දිගින් දිගටම හඬන්නට බලපාන හේතු මොනවාද?
මුත්‍රා ආසාදනයක් ඇති විටෙක දරුවෙකුට ඒ නිසා ඇතිවන උදරයේ අපහසුතාව ප්‍රකාශ කිරීමට හැකියාවක් නොමැති අතර මේ සඳහා ඔවුන් හැඬීම මඟින් ප්‍රතිචාර දක්වනු ලැබේ. ඒ වගේම බඩේ කැක්කුමට අමතරව මුත්‍රා පිට කිරීමේදී ඇතිවන දැවිල්ල නිසාද ඔවුන් අධික ලෙස හැඬීමට හැකි නිසා මව්වරු ඒ පිළිබඳ හොඳ අවධානයකින් කටයුතු කළ යුතුයි. මීට අමතරව දරුවන්ගේ හැඬීම සඳහා තවත් සුලබ වශයෙන් බලපාන හේතුවක් ලෙස කනේ ඇතිවන ආසාදිත තත්ත්වයන් පිළිබඳ කතාබහ කළ හැකියි. යම් අවස්ථාවකදී දරුවෙකුට කනේ ආසාදනයක් ඇති වූවොත් එය කැස්ස එසේත් නැත්නම් සෙම්ප්‍රතිශ්‍යා තත්ත්වයක් මෙන් පිටතට පෙන්නුම් නොකරන නිසා මව්පියන්ට දරුවාගේ රෝගී තත්ත්වය හඳුනාගැනීමේ හැකියාවක් නොමැතිවිය හැකියි. කෙසේ වෙතත් මෙසේ කන ආශ්‍රය කරගෙන දරුවෙකුට ඇතිවිය හැකි ආසාදිත තත්ත්වයන්වලදී ඉතා අධික වේදනාවක් ඇතිවිය හැකි නිසා දරුවා ඉතා තදින් හැඬීමට හැකියි. ඒ නිසාවෙන් අප වෙත රැගෙන පැමිණෙන දරුවන් ඉතා අධිකව හඬනවා නම් ඔවුන්ගේ කන් පරීක්ෂා කර යම් ආසාදිත තත්ත්වයක් තිබෙනවාද නැද්ද යන බව අදාළ වෛද්‍ය උපකරණ භාවිතා කරමින් මූලිකව විමසා බලනු ලැබේ. ඇතැම් විට මාසක් පමණ ගත වීමෙන් පසුව දරුවෙක් කායික රෝග හේතුවක් නොමැතිව වූවද හැඬීමට හැකියි. එහිදී අදාළ දරුවාට ඒකාකාරී බව නිසා ඇතිවන නොරිස්සුම් සහගත බව ඇඬීම මඟින් බොහෝදුරට ප්‍රකාශ කරවිය හැකියි. ඒ නිසා ඔවුන්ගේ ඉරියව් නිතර මාරු කරමින් යම් උත්තේජනයක් ලබා දීමට කටයුතු කිරීම වැදගත්. ඒ සඳහා සෙල්ලම් බඩු ආදී දේ යොදා ගැනීම වැනි උපක්‍රම භාවිතා කළ හැකියි. ඉතා සරලව සුලබව දැකිය හැකි ඉහත හේතු හැරුණු විට කලාතුරකින් දරුවකුගේ හැඬීමට හේතුවන රෝග අවස්ථාද තිබිය හැකියි. ඒ අතර යම් අස්ථියක් හෝ සන්ධියක් ආශි‍්‍රතව ඇතිවන ඇතැම් ආසාදන තත්ත්වයන් පිළිබඳ මූලිකව හඳුනාගත හැකියි. මෙවැනි අවස්ථාවකදී ද දරුවා අධික ලෙස හැඬීමට හැකි අතර විශේෂයෙන්ම දරුවා වඩා ගැනීමේදී, නැපියක් මාරු කරන අවස්ථාවලදී මෙසේ විය හැකියි. ඒ සඳහා හේතුවන්නේ පෙර සඳහන් කරන ලද අස්ථියක හෝ සන්ධියක ඇතිවන ආසාදනය නිසා වඩා ගැනීමේදී නැපියක් මාරු කිරීම වැනි අවස්ථාවකදී අස්ථි හෝ සන්ධි තදින් ස්පර්ශ වීම හෝ නිතර නැවීමට ලක්වීම විය හැකියි.
කලාතුරකින් දරුවන්ට ඇතිවිය හැකි දරුණු රෝග අවස්ථා නිසාත් දරුවන් හඬන අවස්ථා මොනවාද?
මීට අමතරව මොළයේ උණ (මෙනිංජයිටීස්) වැනි තත්ත්වවලදී කුඩා දරුවන්ට වේදනාව ඇති වූවද එය ප්‍රකාශ කිරීමේ හැකියාවක් නොමැති විය හැකියි. ඒ නිසා ද හැඬීමට හැකිියි. මෙම රෝගී තත්ත්වයේදී දරුවන්ගෙන් ඇතැම් දෙනෙක් අධික නිදිමත ගතියකින් පෙළීම හෝ කිරි බීම ප්‍රතික්ෂේප කළ හැකි අතර තවත් කොටසක් කිසිදු හේතුවක් නැතිව හැඬීම පමණක්ම කළ හැකියි. මේ ආකාරයට දරුවෙක් හඬනවා නම් වෛද්‍යවරයෙකු හමු වී පරීක්ෂා කරවා ගැනීම වඩා වැදගත්. බොහෝවිට අලුතින් ඉපඳුණු දින 2ක,3ක වයසැති දරුවන් හඬන්නේ කුසගිනි ඇති වීමෙනි. ඇතැම් මව්වරු දරුවාට කුළුඳුල් වීම හා දරුවා මවට කුළුඳුල් වීම නිසා නිසිලෙස කිරි නොලැබී යාම මෙම හැඬීමට බොහෝදුරට හේතු වේ. මෙවැනි විටෙක දරුවාව පරීක්ෂා කිරීමෙන් දරුවාගේ විජලන තත්ත්වයන් තිබෙනවා ද මව පරීක්ෂා කර මවට ඇති තරම් කිරි තිබෙනවාද සහ දරුවාට මුත්‍රා පිටවන ප්‍රමාණය පිළිබඳ පරික්ෂා කර බලා යම් අවබෝධයක් ලබාගෙන දරුවා හැඬීමට හේතුව පිළිබඳ නිගමනයට වෛද්‍යවරුන්ට පැමිණිය හැකියි. එහිදී කුසගින්න නිසා නොඅඬන බව තේරුම් ගියහොත් වෙනත් රෝග සඳහා පරීක්ෂා කරනු ලබනවා.
නුවන්ති කුලරත්න
උපුටා ගැනීම - දිනමිණ
