අම්මලා දරුවන්ට නොකිවයුතු කතා 10ක්...

පුංචි දරුවන් දඟකාරකම් කරනවා. සමහරවිට ඒ මවුපිය අවධානය ගන්න අවශ්‍ය නිසා වෙන්න පුළුවන්. අනෙක් අය දරුවන්ට තරවටු කරන නිසා ඔබත් දරුවන්ට තරවටු කරන්න හිතන්න එපා. දරුවකුගේ සිතක් පෑරුණොත් එය ඒ දරුවාගේ අනාගතයටත් බලපානවා. ඒ නිසා වචන පිට කරන්න පෙර ටිකක් හිතන්න.

සම්පූර්ණ කෙනෙක් වෙන්න
මෙහෙම කිව්ව ගමන්ම දරුවා ආතතියට ලක්වෙනවා. කිසිම කෙනකුට එහෙම සම්පූර්ණ වෙන්න බැහැ. අඩුපාඩු සිදුවෙන්න පුළුවන්. මෙවැනි වදන්වලින් දරුවාගේ මනසට වැරැදි පණිවුඩ ඇතුළු වනවා. ඒ මඟින් ඔවුන් අතිශයින් පරිපූර්ණ වීමට ගොස් අමාරුවේ වැටෙන්නත් පුළුවන්.

ඔයාට ඒක වැදගත් නැහැ
පුංචි දරුවන් අලුත් අලුත් දේවල් ඉගෙන ගන්න ආසයි. ඒ නිසාම ඔවුන් නිතර නිතර ප්‍රශ්න අසනවා. ඒ වගේ වෙලාවට අම්මලා හුඟක් කියන්නේ 'ඔයාට ඒක වැඩක් නැහැ, ඒ පණ්ඩිතකම් ඔයාට ඕන නැහැ' වගේ දේවල්. එවැනි වචන පුංචි දරුවන් අඩපණ කරනවා. එවිට ඔවුන් අවශ්‍ය දෙයවත් ප්‍රශ්න කරන්නේ නැහැ. සමහර විට හොර රහසේ කුතුහලය අත්හදා බලන්න ගිහින් අමාරුවේ වැටෙනවා.

කෑම කන්නේ නැතිව අතුරුපස දිහා බලන්න එපා
පුංචි දරුවන්ව වැඩිහිටියන් වගේ නිසි නීති පද්ධතියකට හදන්න බැහැ. ආහාර ගත් පසුව අතුරුපස ගන්න ඕන කියන දේ වැඩිහිටියන් දන්නවා. නමුත් පුංචි අය දන්නේ නැහැ. ඒ අයට පිළිවෙළ කියා දෙන්න. නමුත් තරවටු කරන්න එපා. දරුවාට තරවටු කළාම හිතුවක්කාර වීම නිසා ඔබ නොදුන්නත් හොරෙන් හරි අතුරුපස ටික ගන්න ඉඩ තිබෙනවා.

ඉක්මන් කරන්න
උදේ ආහාර ගනිද්දී, සූදානම් වෙද්දී අම්මලා, තාත්තලා හදිසියට 'ඉක්මන් කරන්න' කියලා පුංචි බබාලට හදිසි කරනවා. සමහරවිට තරවටු කරනවා. ඒ නිසාම දරුවා බියට පත්වනවා. එයින් ආතතිය, කේන්තිය ඇතිවන්න පුළුවන්. මෙය පසු කාලයක දරුවාගේ පෞරුෂ වර්ධනයටත් බාධා මතු කළ හැකියි.

තාත්තා එනකල් ඉන්න
අද ඔබ ශක්තිමත් ස්වාධීන කාන්තාවක්. ඔබ ඔබේ දරුවාත් එලෙසම ස්වාධීන වනවාට කැමැති ඇති. එසේ නම් කිසිම විටක ඉහත වගන්තිය දරුවාට කියන්නට එපා. ඇයට හෝ ඔහුට තනිව යම් යම් දේ කිරීමට උගන්වන්න. ඉඩ දෙන්න. එවිට යම් දවසක අද ඔබ මෙන්ම දරුවන්ද ස්වාධීන පුද්ගලයෙක් වෙයි.

මම අද මේක කරන්න ඕන
ඔබ කාර්යාලයක කුමන මට්ටමේ තනතුරක් දැරුවත්, කෙතරම් කාර්යබහුල වුණත් දරුවන් සමඟ සිටීමට වගකීමක් තිබෙනවා. දරුවන් ඔබට සමීප වන විට 'මට වැඩ තියෙනවා,' 'අද මම මේක ඉවර කරන්න ඕන' ආදී වචනවලින් දරුවාව අපහසුතාවට පත් කරන්න එපා.

අඬන්න එපා
දරුවන්ට රිදුණාම, අසනීප වුණාම, දුක හිතුණාම කියන්න වෙන භාෂාවක් නැහැ. ඒ නිසා ඔවුන් අඬනවා. අඬන වෙලාවට 'අඬන්න එපා' කියලා තරවටු කරන්න කලින් අඬන්න හේතුව සොයා බලන්න.

අපිට මේක දරාගන්න බැහැ
ඔබ සමහර විට දරුවන්ට හුඟක් වටිනා, මිල අධික නමුත් අත්‍යවශ්‍ය නොවන දෑ මිලට ගෙන දෙනවා ඇති. ඒ බව මතක තබා ගන්න. දරුවා මුදලක් අතේ නැති විටත් ඔබෙන් යම් යම් දෑ ඉල්ලා කරදර කරන්න ඉඩ තිබෙනවා. ඒ නිසා අවස්ථාවක් ලද විගස ප්‍රයෝජනවත් දේ පමණක් දරුවාට මිලට ගෙන දෙන්න. එසේම මුදලේ වටිනාකම දරුවාට පවසන්න.

තදින් කතා කරන්න එපා
දරුවන් අතින් වැරැදි සිදුවන්නට පුළුවන්. එවැනි අවස්ථාවල දරුවන්ට තදින් කතා කරන්න එපා. විශේෂයෙන් මොනම හේතුවක් මත හෝ ඔබට මතුවන කේන්තිය දරුවන් පිටින් යැවීම නම් එතරම් සුදුසු නැහැ.

පරෙස්සම් වන්න
සෙල්ලම් කරන්න ගියාම, පුංචි පුංචි අභ්‍යාස කරන විට හැම තිස්සේම අම්මලා 'බලාගෙන, ඔයා වැටෙයි' ආදී දේ කියමින් දරුවාව බියට පත් කරනවා. එය එතරම් සුදුසු නැහැ. අනතුරක් නොවී වැඩ කරන විදිය දරුවාට ආදරයෙන් කියා දෙන්න.

හංසි ආටිගල
මව්බිම