නොමේරූ දරුවන්ට ඇතිවන කායික සංකූලතා

ලොව පුරා වසරකට අඩු බර උපත් රැසක්ම වාර්තා වනවා. දරුවාට සහ මවට ඇතිවන සංකූලතා තාවකාලික හෝ සදාකාලිකව ඇතිවිය හැකි බැවින් සමාජයීය වශයෙන් අඩු බර නොමේරූ දරු උපත් සිදුවීම ඉතාම අනතුරුදායකයි.

අඩු බර දරුවන් සහ අඩු මාසයෙන් උපදින දරුවන් අතර විවිධ සංකූලතා ඇතිවනවා. ඒ වගේම එලෙස අඩු මාසයෙන් අඩු බර සහිතව ඉපදීමට හේතු ලෙස මවගේ ඇතිවන ගැටලු, වැදෑමහ ගැටලු, නිසි ලෙස දරුවාට රුධිරය නොලැබීම, එමෙන්ම හේතුවක් නැතිව වතුර බෑගය ඉරීයෑම, විවිධ අසනීප, මවගේ ජීවිතය අවදානමට ලක්වීම, නිවුන් දරුවන් හෝ දරුවන් දෙදෙනකුට වැඩියෙන් සිටීම ආදිය පෙන්වාදිය හැකිය.

අනමුත් මෙතැනදී ගැටලුව වන්නේ, අඩු බර හෝ අඩු මාසයෙන් බිහිවූ දරුවා, බිහි වූයේ කුමන වයස් ප්‍රමාණවලදීද යන්නයි. සති 37 සම්පූර්ණ කළ දරුවෙක් නම් ගැටලුවක් නැහැ. නමුත් සති 37ට අඩු නම් නොමේරූ සහ සති 28 අඩු නම් ඉතා නොමේරූ ලෙස සැලකෙනවා.

අමෙවැනි නොමේරූ දරුවන්ට විවිධ ගැටලු ඇතිවනවා. මේ දරුවන්ට ඇතිවන ශ්වසන ආබාධ එයින් ප්‍රධානයි. ඔවුන්ගේ පෙණහලු වර්ධනය වෙලා නැහැ. ඉතාම නොමේරූ දරුවන්ගේ පෙණහලු කෝෂවල ගැටලු නිසා හුස්ම ගැනීම අපහසු වෙනවා. එවිට පිටින් කෘත්‍රිමව ශ්වසනය ලබාදිය යුතුයි.

එසේම නොමේරූ දරුවන්ට, ශරීර උෂ්ණත්වය පාලනය කරගන්නට බැහැ. ඒ නිසා ඉන්ක්‍යුබ්ටරයක් තුළ දමා ඒ ආධාරයෙන් උෂ්ණත්වය ලබා දෙනවා. සති 32ක් පමණ යන විට දරුවාට තම උෂ්ණත්වය පාලනය කරගෙන සාමාන්‍ය තත්ත්වයට පත්වෙන්න පුළුවන්.

නොමේරූ දරුවන්ට කිරි උරා බීමේදී ගැටලු ඇති වනවා. සාමාන්‍ය දරුවකුට නම් උපතේදීම කිරි උරා බීමට පුළුවන්. තන පුඩුව කටට ළං කළාම ඉබේම දරුවා කිරි උරා බොනවා. නමුත් නොමේරූ දරුවන්ට ඒ හැකියාව නැහැ. ඒ නිසා මවගෙන් කිරි බටයක් ආධාරයෙන් කිරි දෙන්න වෙනවා. අනිවාර්යයෙන්ම මවගේ කිරි දරුවාට දිය යුතුයි. කොලෙස්ට්‍රම් නම් පෝෂකය දරුවාට ලබාදිය යුතුම වීම එයට හේතුවයි.

පැය 2කට වරක් ඇඟේ බර අනුව දරුවාට දිය යුතු කිරි ප්‍රමාණය තීරණය කරලා ඒ ප්‍රමාණය ලබාදීමට සිදු වනවා. දරුවාගේ වර්ධනය සමඟ ඒ කිරි ප්‍රමාණ වැඩි කරන්න පුළුවන්. සති 32ක් වගේ වෙද්දී දරුවාට කිරි උරලා බොන්න පුරුදු කරනවා. මේ කාලය තුළ බර වැඩි වෙනවද කියා බැලිය යුතුයි. එයින් දරුවාට අවශ්‍ය ප්‍රමාණයට මවුකිරි ලැබුණද කියන කරුණ මැනගන්න පුළුවන්.

අපපුවේ සහ හෘදය වස්තුවේ ගැටලු මතුවීම නොමේරූ දරුවන් තුළ ඇතිවන තවත් සංකූලතාවක්. සාමාන්‍ය දරුවෙක් ඉපදෙන විට වම් කර්ණිකාව සහ දකුණු කර්ණිකාව අතර තිබෙන සිදුරු වැසෙනවා. නමුත් නොමේරූ දරුවකුගේ එසේ වන්නේ නැහැ. එකෝ පරීක්‍ෂණයකින් එය තහවුරු කර බෙහෙත් දීලා සිදුරු වහන්න පුළුවන්. නැතිනම් සැත්කම් කරන්න පුළුවන්.

නොමේරූ දරුවන්ට ඇතිවන තවත් ගැටලුවක් විදියට මොළය පරිණත නොවීම හඳුන්වන්න පුළුවන්. මොළය වටා තිබෙන රුධිර නාළවලින් මොළයට ලේ ගලනවා. එමඟින් ස්නායුවලට හානි සිදුවී ගැටලු රැසක් ඇතිවිය හැකියි. ඇවිදීම, කතා කිරීම පමා වනවා. ඇස් පෙනීමේ සහ කන් ඇසීමේ දුර්වලතා මතුවෙන්න පුළුවන්. සමහර විට මුළු ජීවිත කාලය පුරාම ඇඳකට සීමා වෙලා ජීවත් වෙන්න සිදු වෙනවා. මේ දරුවන්ගේ ඔළුව විශාල වීම දකින්න පුළුවන්. ස්කෑන් පරීක්‍ෂණයක් මඟින් තත්ත්වය පරීක්‍ෂා කර බලලා ශල්‍ය ප්‍රතිකාර ලබාදීම එහිදී සිදු වෙනවා.

මව්බිම