This site has features that require javascript. Follow these simple instructions to enable JavaScript in your web browser.
Sithmal Yaya
වැඩිහිටියන් ළඟ ඉද්දී දරුවන් අනතුරට ලක්වීම වැඩිලු

හදිසි අනතුරුවලට ලක්වී කරාපිටිය රෝහලෙන් ප්‍රතිකාර ගැනීමට පැමිණෙන දරුවන්ගෙන් සියයට 94.6ක්ම අනතුරට ලක්වී ඇත්තේ වැඩිහිටියන් සමග සිටියදී බව සමීක්ෂණයකින් සොයාගෙන ඇතැයි කරාපිටිය වෛද්‍ය පීඨයේ ජ්‍යෙෂ්ඨ කථිකාචාරිනී ළමාරෝග විශේෂඥ වෛද්‍ය නයනා ලියනාරච්චි මහත්මිය පවසන්නීය. මාස තුනක කාලයක් ඇතුලත රෝහලෙන් ප්‍රතිකාර ගැනීමට පැමිණි අවුරුදු 18ට අඩු දරුවන් 368ක් සමීක්ෂණයට ලක්කිරීමෙන් මෙම තොරතුරු සොයාගෙන ඇත. මෙම දරුවන් වැඩිපුර අනතුරට ලක්වී ඇත්තේ ඇද වැටීම් හේතුවෙන් බවත් එම ප්‍රමාණය සියයට 59.3ක් බවත් ඇය පවසයි. මාර්ග අනතුරු හේතුවෙන් සියයට 16.3ක්ද කැපීම් හා තැලීම් හේතුවෙන් සියයට 10.5ක්ද දරුවන් අනතුරට ලක් විය. පහරදීම් හා පිළිස්සුම් හේතුවෙන් සියයට 3.3 බැගින් අනතුරට ලක් වී තිබේ. සති අන්තයට වඩා සතියේ  දිනවලදී දරුවන් වැඩිපුර අනතුරට ලක්වී ඇති අතර එම ප්‍රමාණය 75.5කි. විශේෂඥ වෛද්‍යවරිය තවදුරටත් පවසන්නේ නාගරික දරුවන්ට වඩා ගම්බද දරුවන් අනතුරට ලක් වීමේ වැඩි ප්‍රවණතාවයක් දක්නට ලැබුණු බවයි. වයස අවුරුදු 12ට අඩු දරුවන් අතර මාර්ග අනතුරු වලට ලක් වූවන් වැඩි වශයෙන් සිටින අතර අවුරුදු 12ත් 18ත් අතර දරුවන් වැඩිපුර අනතුරට ලක් වී ඇත්තේ ඇද වැටීම් හේතුවෙනි. නයනා ලියනාරච්චි මහත්මියගේ ප්‍රධානත්වයෙන් ජ්‍යෙෂ්ඨ කතිකාචාරිණී ප්‍රජා වෛද්‍ය විශේෂඥ චම්පා විජේසිංහ මහත්මිය ඇතුළු වෛද්‍යවරු පිරිසක් සමීක්ෂණය සිදු කර ඇත.

ලංකාදීප