This site has features that require javascript. Follow these simple instructions to enable JavaScript in your web browser.
Sithmal Yaya
ඉඟුරු

ඉඟුරු ආයුර්වේදයේ මෙන්ම හෙළ වෙදකමේද විශ්ව ඔෟෂධය ලෙස නම් කර ඇත. ඒ වගේම සියලු රෝගී තත්ත්ව සඳහා භාවිත කළ හැකි පොදු ඔෟෂධයක් ලෙස පෙන්වාදී තිබේ. මහා ඔෟෂධය, ඉෂ්ට භේසජ්ජය යන නම්වලින් ඉඟුරු හඳුන්වනුයේ එය අතීතයේ සිටම ප්‍රබලතම ඔෟෂධයක් වූ නිසාය. ඉඟුරු ප්‍රභේද 2කින් භාවිත කරනු ලබයි. මෙසේ භාවිත කරනු ලබන්නේ ඔෟෂධ වශයෙන් යොදා ගැනීමේදීය. එය අමු ඉඟුරු සහ වියළි ඉඟුරු වශයෙනි. වා, පිත්, සෙම් යන තුන් ‍දොස් සමනයට ගුණදායකය. එළකිරි බීමෙන් සෙම වැඩි වන අයට එළකිරි උණු කිරීමේදී ඉඟුරු කැබැල්ලක් දමා උණු කර පානය කිරීමෙන් සෙම සමනය කර ගැනීමට හැකිය. 2003 වසරේදී ඇමෙරිකා එක්සත් ජනපදයේ මිනසෝටා විශ්වවිද්‍යාලයේ ඉඟුරු පිළිබඳ පර්යේෂණයක් සිදු කළ අතර ඉඟුරුවල පිළිකා නාශක ගුණය ඇති බවත් පිළිකා ඇතිවීමේ හැකියාව වළක්වන බවත් සොයාගන්නා ලදී. ඉඟුරු උෂ්ණය ඇති ඔෟෂධයක් ලෙස හඳුන්වන නමුත් එය ශරීරයට එක් කරගැනීමෙන් පසු එහි සිදුවන ක්‍රියාවලිය නිසා සීත ගුණයක්ද ඇති වන බව සඳහන්ය. ශ්‍රී ලංකාව තුළ වැඩිපුර දක්නට ලැබෙන තවත් ඉඟුරු විශේෂයක් වන වල් ඉඟුරු ඔෟෂධ වශයෙන් භාවිත කරනු ලබන්නේ ශරීරයේ ඉදිමුම් තත්ත්වයන් ඇති වූ විට බාහිර ආලේපයක් ලෙස පමණි.

  1. වා, පිත්, සෙම් ආදී තුන් ‍දොස් සමනය කළ හැකියි.
  2. ශරීරයේ ඉදිමුම් අවස්ථාවලට භාවිත කරයි.
  3. පිළිකා නාශක ගුණයෙන් යුක්තයි.
  4. වේදනා නාශක ගුණයෙන් යුක්තයි.
  5. වමනය, ඔක්කාරය පාලනය කරයි.
  6. රුධිරයේ ඝනත්වය අඩු කිරීමේ ගුණය ඇත.
  7. මේදය දහනය කිරීමේ හැකියාව ඉතා ඉහළ තත්ත්වයක පවතී.
  8. සමේ ඇති වන ආසාදන පාලනයට හැකියාව පවතී.
  9. රුධිරගත කොලෙස්ටරෝල් ප්‍රමාණය පාලනය කරයි.
  10. දියවැඩියාව පාලනය කිරීමේ හැකියාව ඇත.
  11. කාන්තාවන්ගේ මාසික වේදනාව සමනය කරයි.
  12. ලිංගික උත්තේජනයක් ලෙස භාවිත කරයි.
  13. වයිරස් ආසාදන වැළැක්වීමේ හැකියාව ඇත.
  14. ශරීරයේ හෝර්මෝනවල ක්‍රියාකාරිත්වය පාලනය කිරීමේ හැකියාව ඇත.
  15. කුසගිනි වඩවන ගුණයෙන් යුක්තයි.
  16. නිදිමත ඇති කිරීමට මෙන්ම නිදිමත පාලනය කිරීමේ හැකියාවද ඇත.

පිළිකාව සුව කළ හැකි විස්මිත කසායක්

  • වෙනිවැල්ගැට
  • අමු අඟුරු
  • දේවදාර
  • තිප්පිලි
  • කටුවැල්බටු
  • කටුපිල
  • කොත්තමල්ලි

කළං 1 මදටිය 14ක් බැගින් ගෙන පත අට එකට සිඳුවා වඩි 14ක් පානය කරන්න.

පීනසට කසායක්
ඉඟුරු, කටුවැල්බටු, රසකිඳ, සුවඳ කොට්ටං කළං 3 බැගින් ගෙන පත අට එකට සිඳුවා උදේ තිප්පිලි කුඩු දමා සවස සීනි දමා පත භාගය බැගින් පානය කරන්න.

අජීර්ණ සමඟ බඩ පිපුමට
ඉඟුරු, කොත්තමල්ලි, දේවදාර, එළබටු මුල්, කටුවැල්බටු කළං 2ක් මදටිය 8ක් බැගින් ගෙන පත අට එකට සිඳුවා දෙහි යුෂ, මීපැණි දමා උදේ, සවස පත භාගය බැගින් පානය කරන්න.

නොනවතින කැස්සට සහ උගුරේ සෙම බැඳීමට
මීපැණි හැඳි 4ක් සමඟ ඉඟුරු ඉස්ම හැඳි 01ක් කලවම් කර කෑමට පෙර ටික ටික පානය කරන්න.

සිරෝසිස් රෝගීන්ට ඇති වන අක්මාවේ ඉදිමුමට
අමු අඟුරු, සුදුලූනු, විනාකිරිවලින් අඹරා ඉදිමුම් සහිත ස්ථානයේ බාහිරින් ආලේප කරන්න.

සෙම්ප්‍රතිශ්‍යාවට

  1. ඉඟුරු, කොත්තමල්ලි, පත්පාඩගම්, වෙනිවැල්ගැට, තිප්පිලි තැම්බූ වතුර පානය කරන්න.
  2. රසකිඳ, පත්පාඩගම්, කොත්තමල්ලි, ඉඟුරු තැම්බූ වතුරට සීනි දමා පානය කරන්න.
  3. ඉඟුරු, කොත්තමල්ලි තැම්බූ වතුර පානය කරන්න.
  4. අමු ඉඟුරු යුෂ, ඇඹුල් දොඩම් යුෂ, සූකිරි, මීපැණි මිශ්‍ර කර ටික ටික පානය කරන්න.
  5. අමු ඉඟුරු යුෂ, ඇඹුල් දොඩම් යුෂ, උණු අළු පල්ලේ තම්බා සීනි, මී පැණි දමා ටික ටික පානය කරන්න.
  6. දෙහි දලු, ඇඹුල් ‍දොඩම් දලු, නික දලු, යකිනාරං දලු, අමු ඉඟුරු, සුදුලූනු සම සමව ගෙන වණ්ඩුවේ තම්බා මිරිකාගත් යුෂට තලතෙල්, සීනි දමා උදේ සවස පානය කරන්න.

තද බඩේ කැක්කුමකට

  1. අමු ඉඟුරු යුෂට ලුණු ස්වල්පයක් දමා කලවම් කර තේ හැදි 02ක් පමණ පානය කරන්න.
  2. අමු ඉඟුරු, ගම්මිරිස් සමඟ අඹරා ආහාරයට ගන්න.
  3. බුලත් කොළ නටු, ඉඟුරු යුෂයෙන් අඹරා ආහාරයට ගන්න.

හිසරදයට

  1. වදකහ, මුරුංගා මල්, වියළි ඉඟුරු, ගම්මිරිස් සමව ගෙන උණු දියෙන් අඹරා නළලේ ගාන්න.
  2. දෙහි ඇඹුලින් අමු ඉඟුරු ගලගා නළලේ පැලැස්තර දමන්න.
  3. වියළි ඉඟුරු තල තෙල්වලින් අඹරා නළලේ ගාන්න.

සමාධි ඕබඩආරච්චි
මව්බිම