This site has features that require javascript. Follow these simple instructions to enable JavaScript in your web browser.
විස්තර ලුහුඩු දැන්වීම්
කොලෙස්ටරෝල් නැති අලුත් බිත්තරේ
null

බිත්තර කන්න ගොඩක් අය බයයි. බිත්තර දෙකක් දවසකට කන්න එපායි කියලත් මතයක් තිබෙනවා. ඒකට ප්‍රධාන හේතුව බිත්තරවල කොලෙස්ටරෝල් තිබෙනවයි කියලා අපේ ජනතාව බය වෙලා තිබීමයි. එහෙත් බිත්තර ගුණ කෑමක්. ඔන්න ඔය වගේ විවිධ කතාබහ නිසාම දැන් අපේ කාර්මික තාක්ෂණ ආයතනයේ ආහාර තාක්ෂණ අංශයේ විද්‍යාඥයන් පිරිසකගේ මෙහෙයවීම යටතේ ශරීරයට අහිතකර කොලෙස්ටරෝල් අඩුකරන ශරීරයට අත්‍යවශ්‍ය මේද අම්ල ලබාදෙන මොළයේ වර්ධනය හා ස්නායුවල ක්‍රියාකාරිත්වය වැඩි කරන පෝෂණ ගුණයෙන් වැඩි බිත්තරයක් රටටම හඳුන්වා දී තිබෙනවා. මේ පිළිබඳව අපට කරුණු පැහැදිලි කළේ කාර්මික තාක්ෂණ ආයතනයේ ආහාර තාක්ෂණ අංශයේ පර්යේෂණ විද්‍යාඥ සමන්ත මැදගේ මහත්මය. 

ලෝකයේ සමහර රටවල් කිකිළියන්ට විවිධ පෝෂ්‍ය ගුණයෙන් යුත් ආහාර දීලා පෝෂ්‍ය ගුණය වැඩි ශරීරයට අත්‍යවශ්‍ය අසන්තෘප්ත මේද අම්ල ඇති බිත්තර හදනවා. ඒ අනුව මමත්, කාර්මික තාක්ෂණ ආයතනයේ තාක්ෂණික නිලධාරි දර්ශන මේදිස් පර්යේෂණාගාර තාක්ෂණවේදී ශ්‍රියානි රාජපක්ෂ හා කාර්මික සහකාරවරුන් වන ඉදුනිල් රාමසිංහ හා පුබුදු පෙරේරා යන අය සමඟ මේ අයුරින් අලුත් බිත්තරයක් අපේ රටේ හදන්න පුළුවන්ද කියලා පර්යේෂණයක් කළා. අවුරුදු දෙකක් තිස්සේ විවිධ ගොවිපළ ආශ්‍රයෙන් රටේ විවිධ පළාත්වල මේ පර්යේෂණය කළා. ඒ පර්යේෂණය අනුව අපි උත්සාහ කළේ මොන විධියේ ආහාර වේලක් කිකිළියන්ට දුන් විට ද අපට වැඩි පෝෂණයෙන් යුත් බිත්තරයක් හදාගන්න පුළුවන්ද කියලා බැලීමයි. ඒ අනුව අපිට අපේ රටේ ම තිබෙන ද්‍රව්‍යවලින් හදන අලුත් විශේෂ ආහාර වට්ටෝරුවක් කිකිළියකට ලබාදුන් විට පෝෂණ ගුණය වැඩි ශරීරයට හිතැති මේද අම්ලවලින් පරිපූර්ණ ශරීරයේ අහිතකර කොලෙස්ටරෝල් අඩු කරන අලුත් බිත්තරයක් කිකිළියන්ගෙන් ගන්න පුළුවන් බව අපට තහවුරු වුණා. ඒ අනුව අර අලුත් ආහාර වට්ටෝරුව කාර්මික තාක්ෂණ ආයතනය මගින් තවත් පර්යේෂණ කරලා ඒවා දෙන කිකිළියන්ට අහිතකර ද කියලා හොයලා බැලුවා. නමුත් කිසි ප්‍රශ්නයක් නැති බව වැටහුණා ම ඒ ආහාර වට්ටෝරුවට අපි මේ වන විටත් පේටන්ට් බලපත්‍රයක් ලබාගෙන පවා තිබෙනවා. 

අපේ ශරීරයට බහු අසංතෘප්ත මේද අම්ල අත්‍යවශ්‍ය දෙයක්. නමුත් මේක අපේ ශරීරය ඇතුළත හැදෙන්නේ නැහැ. හදන්නත් බැහැ. මෙහි සත්ව ආහාර සමඟම ගත යුතුයි. බිත්තරවල ශරීරයට වඩාත් හිතකර මේද අම්ල තුනක් තිබෙනවා. ඒවාට කියන්නේ "ඔමේගා 3 - මේද අම්ල" කියලා. නමුත් මේක බිත්තරවල ඇත්තේ ඉතා කුඩා ප්‍රමාණයක්. අලුතින් අපි සොයාගත් පර්යේෂණය අනුව නිපදවූ අලුත් ආහාර වට්ටෝරුව කිකිළියන්ට දුන්විට ලැබෙන බිත්තරයේ ඔමේගා 3 මේද අම්ල ප්‍රමාණය ඉහළ මට්ටමක පවතිනවා. ඒ ප්‍රමාණය සාමාන්‍ය බිත්තරයකට වඩා පස් ගුණයක් බව අපට පර්යේෂණ මගින් පෙනුණා. ඔමේගා 3 මේද අම්ල සහිත බිත්තරවලින් රුධිර පීඩනය පාලනය කරනවා. ඒ සමඟ ම ශරීරයට අහිතකර කොලෙස්ටරෝල් ශරීරය ඇතුළත වර්ධනය වීම අඩු කරනවා. මොළයේ වර්ධනය ක්‍රමවත් ව සිදු කිරීමටත් මොළයේ නිසි ක්‍රියාකාරිත්වයටත් මේ මේද අම්ල හේතු වෙනවා. විශේෂයෙන් මෙහිදී වැදගත් වන්නේ DHA නම් මේද අම්ල විශේෂයයි. මේ මේද අම්ල විශේෂය ශරීරයට ලැබුණු විට හෘද රෝග ඇතිවීමේ අවදානම අඩු කරනවා‍. ස්නායු සෛලවල වර්ධනය ඇස්වල පෙනුම වැඩි කරනවා. අකලට මහලුවීම අඩු කරනවා වාසි ගොඩක් තිබෙනවා. මේද අම්ල කාණ්ඩ රැසක් තිබෙනවා. ඉන් ඔමේගා - 3 මේද අම්ල හා ඔමේගා 6 මේද අම්ල අතර අනුපාතය 4:1 ක් විය යුතුයි. නමුත් එය සාමාන්‍ය බිත්තරවල තියෙන්නේ 15.1 ක අනුපාතයටයි‍. මෙම අලුත් පෝෂ්‍ය ගුණයෙන් යුත් බිත්තරවල ඇති ‍ඔමේගා 3 මේද අම්ල හා අලුත් ඔමේගා 6 මේද අම්ල අතර 4: 1 ක අනුපාතයක් තිබෙනවා. මේ බිත්තර ලබාගන්න පුළුවන් මේ ආහාර වට්ටෝරුව දැන් කාර්මික තාක්ෂණ ආයතනයේ ආහාර තාක්ෂණ අංශය මගින් දැන් පෞද්ගලික ගොවිපළකට ලබාදී තිබෙනවා. එම ගොවිපළ මගින් ඒ බිත්තර නිපදවා දැන් සුපිරි වෙළෙඳ සල්වලට දමා තිබෙනවා. ඕනෑම අයකුට මිලදී ගන්න පුළුවන්. මේ තාක්ෂණය එම පෞද්ගලික ආයතනයට ලබාදීමට සාම්ප්‍රදායික ජාතික ව්‍යවසාය සංවර්ධන අධිකාරිය සම්බන්ධීකරණ කටයුතු සිදු කරනු ලැබුවා. මේ අලුතින් නිපදවූ බිත්තර පැකට්වල කාර්මික තාක්ෂණ ආයතනයේ තාක්ෂණය අනුව නිපදවූ බව සඳහන් කර තිබෙනවා. කෙසේ වුවත් මෙම බිත්තරවල අඩංගු ඔමේගා 3 මේද අම්ල ප්‍රමාණය පිළිබඳව කාර්මික තාක්ෂණ ආයතනය නිරන්තරයෙන් මේ පිළිබඳව පර්යේෂණ පසු ඇගැයීම් සිදු කරනවා. මෙම කටයුතුවලදී කාර්මික තාක්ෂණ ආයතනයේ සභාපති මහාචාර්ය විමලධර්ම අබේවික්‍රම සම්ප්‍රදායක ජාතික ව්‍යවසාය සංවර්ධන අධිකාරියේ සභාපති එච්.එම්. සකිබ් හා අධ්‍යක්ෂ ලක්ෂ්මන් වි‍ෙජ්වර්ධන යන මහත්වරුන්ගෙන් ලැබුණු සහාය ඉතා වැදගත් වෙනවා.

නිහාල් පී. අබේසිංහ
උපුටා ගැනීම සිළුමිණ පුවත්පත
BenefitsofGinger.jpg
889 views