🛍️   Business Directory
📣   Classifields
🛍️   Business Directory
📣   Classifields

තිස්පහෙන් පසු ගැබ් ගැනීමේ අවදානම් අවස්ථා

තිස්පහෙන් පසු ගැබ් ගැනීමේ අවදානම් අවස්ථා

දරුවෙක් කියලා කියන්නේ හැම අම්මා කෙනෙක්ගෙම හීනයක්. දරුවෙක් හදන්න හොඳම කාලය මේකයි කියලා සීමා මායිම් දාලා පෙන්වා දෙන්න බැරි වුණත් අවුරුදු තිස්පහට කලින් තමන්ගේ පවුලට අවශ්‍ය දරුවෝ බිහි කරනවා නම් හොඳයි කියලා තමයි වෛද්‍යවරු කියන්නෙ. අවුරුදු තිස්පහට පසුව දරුවෝ හදන්න එපා කියලා තහංචි දාන්න බැහැ. ඒත් අවුරුදු තිස්පහෙන් පස්සේ ගැබ් ගන්නා අම්මලා සංකූලතා ඇතිවීමේ අවදානම නම් ඉතා ඉහළයි.

දරුවො ප්‍රමාද කිරීම
විවාහක යුවළ විවිධ හේතු නිසා ගැබ් ගැනීම් ප්‍රමාද කරවනවා. බොහෝ විට එය ස්වාමියාගේ හෝ බිරියගේ හේතුවක් නිසාත් විය හැකියි. තවත් සමහර විටෙක බිරිය හා ස්වාමිපුරුෂයා යන දෙදෙනාටම සම්බන්ධ හේතු නිසාත් දරු උපත් පමා කරනවා. විදේශ ශිෂ්‍යත්ව, උසස් අධ්‍යාපන කටයුතු, රැකියාවේ උසස්වීම්, විදේශගතවීම්, නව නිවාස ගොඩනැඟීම, යාන වාහන මිලදී ගැනීම්, රැකියාවේ ස්ථාන මාරුවීම්, ව්‍යාපාර කටයුතු ආදී විවිධ හේතු නිසා බොහෝ විවාහක යුවළ තම ප්‍රථම දරු උපත පමා කරයි.

තිස්පහෙන් පසු අවදානම
දරු උපත් පමා කිරීම යොදා ගන්නා උපත් පාලන ක්‍රම නිසාද මඳසරු බව ඇතිවිය හැකිය. දරු උපත් පමා කරන කාන්තාවට ඇතිවන ප්‍රධානම ගැටලුව වන්නේ ගැබ් ගැනීම ප්‍රමාද වීමයි. විශේෂයෙන් අවුරුදු තිස්පහ පසුවී ගැබ් ගැනීමට බලාපොරොත්තු වන කාන්තාවන්ට මඳසරු බව ඇතිවීමේ හැකියාව ඉහළ අගයක් ගනී. උදාහරණයක් ලෙස ගත හොත් අවුරුදු 45ට වැඩි විවාහක කාන්තාවන් 1000කගෙන් ගැබ් ගැනීමේ හැකියාව ඇත්තේ 40 දෙනකු පමණි. මැදි වියේ විවාහක කාන්තාවන් 1000කගෙන් 400කට පමණ ගැබ් ගැනීමේ හැකියාව ඇත. වයස්ගතවන විට තරුණ වියේ විවාහක කතුන්ට වඩා මැදිවියේ විවාහක කතුන් ගැබ් ගැනීමේ ප්‍රවණතාව ක්‍රමයෙන් අඩු බව වෛද්‍ය පරීක්‍ෂණවලින් හෙළිවී ඇත.

ගබ්සා වීමේ වැඩි ඉඩක්
වයස් ගත වී ගැබ් ගත්තත් ගබ්සා වීමේ ප්‍රවණතාව ඉහළ අගයක් ගනී. තරුණ වියේ මවුවරුන්ට සාපේක්‍ෂව අවුරුදු තිස්පහට වැඩි වයස්වල ගර්භණී වූ මවුවරුන්ගේ කුසේ වැඩෙන බිලිදා ස්වාභාවිකවම ගබ්සා වීමේ ඉඩකඩ වැඩිය. බොහෝ විට මළ දරු උපත් සිදුවනුයේ මෙවැනි මවුවරුන් වෙතිනි. ගර්භණී කාලය තුළ අන් මවුවරුන්ට සාපේක්‍ෂව ගර්භාෂය තුළ වැඩෙන දරුවාගේ වර්ධන වේගය අඩු අගයක් ගනී.

මන්ද මානසික දරුවන්
බොහෝවිට වයස්ගතව ගැබ් ගන්නා මවුවරුන්ට මන්ද මානසික දරුවන් බිහිවීමේ හැකියාව අන් මවුවරුන්ට සාපේක්‍ෂව ඉහළ අගයක් ගනී. බොහෝ විට මෙවැනි දරුවන් ගර්භාෂය තුළ වැඩෙන විට පිටරටවලදී නම් ගබ්සා කළ හැකිය. නමුත් ලංකාව තුළ එවැනි ගබ්සා කිරීම් සඳහා අවකාශයක් නොමැති නිසා නිරන්තර ස්කෑන් පරීක්‍ෂණ සහ රුධිර පරීක්‍ෂණ ඔස්සේ ඒ පිළිබඳ තහවුරු කරගෙන කල් තියා සූදානම් විය හැකිය. මෙවැනි දරුවන් සාමාන්‍ය දරුවන්ට වඩා වෙනස් නිසා එය අම්මාටත් තරමක් කම්පනය ඇති කරවන දරු උපතක් විය හැකි නිසා කල්තියා සූදානම් වීම වඩා වැදගත්ය. තවද දරුවන්ට වර්ණ දේහ පිළිබඳ ගැටලුද මතුවිය හැකියි.

සංකූලතා රැසයි
අවුරුදු 35ට වැඩියෙන් වයස් ගතවී ගැබ් ගන්නා මවුවරුන්ට සංකූලතා බොහොමයක් ඇතිවීමේ හැකියාව ඇත. ප්‍රධානකොටම අන් අයට සාපේක්‍ෂව රුධිර පීඩන මට්ටම ඉහළ යා හැකියි. එවිට මුත්‍රා සමඟ ප්‍රෝටීන් පිටවීමේ සිට වලිප්පුව දක්වා තත්ත්වයන් ඇතිවීමේ හැකියාවක් පවතී.

ගර්භණී සමයේ දියවැඩියාව
ගර්භණී සමයේ දියවැඩියාවට බොහෝ විට ගොදුරු වන්නේ කල්ගතව ගැබ්ගන්නා මවුවරුන්ය. මේ නිසා ප්‍රශ්න රාශියක් ඇතිවිය හැකිය. රුධිරගත සීනි ප්‍රමාණය ඉහළ යෑමෙන් ගර්භාෂය තුළ වැඩෙන දරුවා මියයෑමට පවා හැකියාව ඇත. සමහර විට ගර්භාෂය තුළ වැඩෙන දරුවා අසාමාන්‍ය ලෙස වර්ධනය විය හැකිය. දරු ප්‍රසූතියෙන් පසුව දියවැඩියා තත්ත්වය සුව වුවත් පසුකාලීනව දියවැඩියාව ඇතිවීමේ අවදානම ඉහළ අගයක් ගන්නා නිසා ඒ පිළිබඳ නිරන්තර අවධානය යොමුකළ යුතුය.

ප්‍රසූතියේ සංකූලතා
දරු උපතකට පසුව වයස් ගත මවුවරුන්ගේ ගර්භාෂය සංකෝචනය වීම පමා වන නිසා දරු උපතින් පසුව අධික ලෙස රුධිරය වහනය විය හැකිය. සමහර විටෙක පිටතින් රුධිරය ශරීරගත කිරීමට පවා සිදුවිය හැකිය. මෙවැනි මවුවරුන්ට නිසැකවම සිසේරියන් සැත්කමකින් දරු ප්‍රසූතිය සිදුකෙරනවා යැයි කිව නොහැකි වුවත් මෙවැනි මවුවරුන් අවදානම් සහිත කාණ්ඩයට වැටෙන නිසා බොහෝ විට සිසේරියන් සැත්කමක් මඟින් දරු ප්‍රසූතිය සිදු කරයි. සමහර විට අඬු සහ වැක්‍යුම් ක්‍රමයටත් දරු ප්‍රසූතිය සිදු කළ හැකිය. මෙවැනි ක්‍රම බොහෝ විට සිදුකරනුයේ ප්‍රසූතියේ සංකූලතා වැඩිකම නිසාය.

නිවුන් දරුවන්
මෙවැනි වයස්වල පසුවන කාන්තාවන් බොහෝ විට ගැබ් ගනුයේ ගැබ් ගැනීම් ප්‍රමාද වී ඒ පිළිබඳ සිදුකරන ප්‍රතිකාර හා ඔෟෂධ නිසාය. ඒ නිසාම වයස්ගතව ගැබ් ගන්නා මවුවරුන්ට ශරීරගතවන ඔෟෂධ නිසාම නිවුන් දරුවන් ලැබීමේ වැඩි හැකියාවක් පවතී. එක් දරුවකු ගැබ් ගත් විට ඇතිවන සංකූලතාවලට වඩා වැඩි අවදානමක් එවිට ඇතිවිය හැකිය. ස්වාභාවිකවම වුවද වයස් ගතවී ගැබ්ගන්නා අයට නිවුන්දරු උපත් සිදුවිය හැකිය. මෙවැනි මවුවරුන්ට වැදෑමහ පිළිබඳවද ප්‍රශ්න ඇතිවිය හැකිය. ඒ නිසා අවුරුදු තිස්පහට පෙර පවුලට දරුවන් ගණන සම්පූර්ණ කරගැනීම නුවණට හුරුය. අවුරුදු 35න් පසුව ගැබ් ගත්තත්, ඇතිවිය හැකි සංකූලතා පිළිබඳ නිරන්තර අවධානයෙන් සිටිය යුතුය.

ප්‍රසව හා නාරිවේදය පිළිබඳ වෛද්‍ය තරිඳු එදිරිසූරිය ද සොයිසා කාන්තා රෝහල
සවනි ශේශාධි
මව්බ්ම