වකුගඩුවක් නොමැතිව ජීවත් වෙන්නට ආයුර්වේදයෙන් උපදෙස්
වකුගඩු රෝගය හමුවේ හෙළ වෙදකමේ හෝ ආයුර්වේදයේ විස්මිත ප්‍රතිකාර වෙත ප්‍රමාණවත් ආකාරයෙන් අප යොමුව නැති බව කණගාටුවෙන් වුවත් සඳහන් කළ යුතුය. එබැවින් ආයුර්වේදයේ නියමයන්ට අනුව වකුගඩු ආශ්‍රිතව ඇතිවන රෝග සම්බන්ධ ප්‍රතිකාරත්, වකුගඩු නිරෝගිව පවත්වාගෙන යෑමට ආයුර්වේද වෛද්‍ය විද්‍යාත්මක උපදේශ මොනවාද යන්නත් විමසා බැලීම කාලීන අවශ්‍යතාවයකි. මේ කරුණු අළලා බස්නාහිර පළාත් ආයුර්වේද කොමසාරිස්, ආයුර්වේද වෛද්‍ය ම.හේ. නිමල් කරුණාසිරි මහතා දැක්වූ අදහස් අනුසාරයෙන් මේ ලිපිය සැකසේ.
සෞඛ්‍ය ක්ෂේත්‍රයේ ප්‍රවර්ධනයට වාර්ෂිකව ශ්‍රී ලංකාව කෝටි ගණන් මුදල් වැය කරයි. එහෙත් ශ්‍රී ලංකාව තුළ වකුගඩු ආශ්‍රිත රෝග නිසා සිදුවන මරණ සංඛ්‍යාව වාර්ෂිකව ඉහළ යමින් පවතියි. චිරකාලීන වකුගඩු ආසාදිත තත්ත්වයක් (C.K.D.) ලෙස රජරට ප්‍රදේශයේ පැතිර යන වකුගඩු රෝගී තත්ත්වය ගැන දිනපතා අප සාකච්ඡා කළද ඉදිරි දශකයක කාලය තුළවත් එයට විසඳුමක් දැක ගන්නට නැති බව කනගාටුවෙන් හෝ සඳහන් කළ යුතුව ඇත. විසි දහසකට වැඩි පිරිසක් කෙටි කලක් තුළ මරු වසඟයට යැවූ, තවත් දහස් ගණනක් දින රහිත මරණ සහතික අතැතිව වකුගඩු බද්ධයකට ආසන්නව දුක්විඳින වර්තමානයේ දී වත් මේ මහා ගැටලුව දෙස නව ප්‍රවේශයකින් බැලීමට අප දිරිමත් විය යුතු බව අවිවාදිතය. 1980 දශකයේ රටතුළ මොළයේ උණ වසංගත මට්ටමින් පැතිර ගිය අවස්ථාවේදීත් මෑත භාගයේ ඩෙංගු රෝගය වේගයෙන් පැතිර ගිය අවස්ථාවේදීත් බටහිර වෛද්‍ය ක්‍රමයට නොදවෛනි සහයක් එම රෝග මර්දනය උදෙසා ආයුර්වේද වෛද්‍ය ක්‍රමයෙන් සැලසුන බව නොරහසකි. හෙළයාගේ ඉපැරණි වෛද්‍ය කර්ම වූ හෙළ වෙදකමේ මෙන්ම ආයුර්වේද වෛද්‍ය ක්‍රමයේත් වකුගඩු හා ඒ ආශ්‍රිත රෝග පිළිබඳ පුළුල් විග්‍රහයන් සිදුකර ඇත. වකුගඩු ආශ්‍රිත රෝග හඳුනා ගැනීමට ආයුර්වේදයේ එන දසවිධ පරීක්ෂණ යටතේ මුත්‍රා පරීක්ෂණ පවා සිදුකර ඇත. මෙම මුත්‍රා පරීක්ෂණයන්හිදී, මුත්‍රා නියැදියේ වර්ණය, ගන්ධය ඝනත්වය පමණක් නොව විවිධ ශාක සහ ඒවායේ සාරයන්, මුත්‍රා හා මුසුකරගනිමින් සිදුකරන නිරීක්ෂණද යොදාගෙන සිදුකර ඇත. ඊට අමතරව විවිධ කෘමි සතුන් මුත්‍රා නියදියට දක්වන ආකර්ෂණයද සලකා බලා තිබේ. මේ ආකාරයේ පරීක්ෂණ මගින් රෝගීන්ගේ වකුගඩුවල තත්ත්වය හඳුනාගෙන ප්‍රතිකාර සිදුකර ඇති බවට සාක්ෂි ඇත.
වකුගඩු ආශ්‍රිත රෝග සඳහා ප්‍රතිකාර ප්‍රධාන වශයෙන් ශෝදන, සමන, තර්පන යන තුන් ආකාරයෙන් ආයුර්වේදයේ දක්වා ඇත. ඊට අමතරව වකුගඩු හොඳ තත්ත්වයෙන් පවත්වා ගෙන යෑමට මුත්‍රා කාරක ගුණයෙන් යුත් ඔසු පැන් සහ ආහාර වර්ගද ආයුර්වේද වෛද්‍ය ක්‍රමයේ දක්වා ඇත. මෙතරම් දියුණු චිකිත්සක ක්‍රමයක් වසර දහස් ගණනක ඉතිහාසය මගින් තහවුරුව ඇතත්, වර්තමාන ව්‍යසනකාරී වකුගඩු අර්බුදය හමුවේ අපට උරුම වෛද්‍ය ක්‍රම සහ උපදේශන මුළුමනින්ම අමතක කර දමා ඇත්තේ ඇයි දැයි විමසා බලනු වටී. ඊනියා උගතුන් වකුගඩු අර්බුදයේ වගඋත්තරකරුවන් දැන දැනත්, ඒවා වසන් කරමින් නෙළුම් අලයට, සත්සඳ පැළයට චෝදනා කරයි. එහෙත් වකුගඩු ආසාදන සඳහා මූලික වන්නේ ජලය බව නාවින්න ආයුර්වේද පර්යේෂණ ආයතනයේ පී. හේවාගමගේ සහ පරාක්‍රම හේමචන්ද්‍ර සිදුකළ මූලික පරීක්ෂණවලින් තහවුරුව ඇත. අවිධිමත් කෘෂි රසායන භාවිතය නිසා රජරට ජලමූලාශ්‍ර දූෂණය වීම එම ප්‍රදේශවල වකුගඩු ආසාදනවලට මූලික හේතුව බව කුඩා දරුවන් පවා දනී. මෙකී ජල දූෂණයට නිසි පිළියම් නොයෙදීම නිසා ඉදිරි දශක කිහිපය තුළ මුළු රටම වකුගඩු ආසාදන කලාපයක් විය හැකි බව නොරහසකි. Kidney ජලමූලාශ්‍ර දුර්ලභ රජරට ප්‍රදේශයේ වැව් ජලය එහි වැසියනට පානීය ජලයද සපයන බව නොරහසකි. වර්තමානයේ දී වැව්වලින් ජලය ලබා ගැනීමේ දී අතීත වැව්ගම් සංස්කෘතියේ වූ නියමයන් සියල්ල නොසලකා හරියි. එදවස පානීය ජලය ලබාගත් පැන්තොට වැව ඉහළම විය. දිය නෑමට යොදාගත් නානතොටත්, රෙදි සේදූ රදාතොටත්, ගවයන් ආදී සතුන් දියබිව්, ගෙරිතොටත් පිළිවෙළින් වැවේ පහළට වන්නට පිහිටා තිබුණි. එහෙත් වර්තමානයේ නළ මගින් වැව් ජලය, පානීය ජලය ලෙස ලබා දීමේ දී ජලය පොම්ප කරනුයේ වැවේ පහළම තැනින් වීම නිසා නිකල්, කැඩ්මියම්, ඊයම් වැනි බැර ලෝහත් ජලය සමගම පාරිභෝගිකයාට නොමි‍ලේම ලැබේ. වකුගඩු රෝග වසංගතයක් වීමට මේ සියල්ල සමග කවුරුත් දන්නා හඳුනන කෘෂි හා පළිබෝධනාශක අවිධිමත් ලෙස භාවිතා කිරීමද බලපානා බව ප්‍රසිද්ධ රහසකි. එහෙත් අවාසනාවකට මෙන් රජරට ගොවියාට පමණක් නොව මෙරට කිසිම පුද්ගලයෙකුට මෙහි ප්‍රවණතාවන්ට එරෙහිව තනිව සටන් වැද ජය ලැබිය නොහැක. එහෙත් වකුගඩු මාරයා හමුවේ ඔබ පරාජය පිළිගැනීමට ඉක්මන් විය යුතු නැත. ඒ මන්දයත් ආයුර්වේද වෛද්‍ය ක්‍රමයේ කියවෙන වෘක්ක ආශ්‍රිත රෝග පාලනයට යොදා ගත හැකි ක්‍රම සියල්ලම ඔබට පෞද්ගලිකව ක්‍රියාවට නංවා ප්‍රතිඵල ලබාගත හැකි ඒවාය. එබැවින් ඔබේ පුද්ගලික අවධානය ඒ දෙස යොමු කිරීම වඩාත් කාලෝචිත වෙයි. ඔබට වැව් ජලයට වසවිස මුසුවීම වැළකිය නොහැකි මුත් ඔබේ ළිඳ පිහිටි ගෙවත්ත සහ ඔබ අවට වට පිටාව රසායනික දූෂණයෙන් බේරා ගත හැක. ගෙවතු වගාවට රසායනික පොහොර, පළිබෝධ නාශක භාවිතා නොකිරීම එයට ඇති පිළියමයි. නිවසේ පරිභෝජනයට වවා ගන්නා කොළ පලා ටිකට සහ බටුමිරිස් පාත්තියටත්, බුදු පුදට මල් නෙලා ගන්නා වතුසුදු සේපාලිකා වැනි ගස් වලටත් යූරියා හෝ N.P.K. කැට පොහොර නොයොදා මුළුතැන්ගෙයි ඉවත ලන අපද්‍රව්‍ය කොළ රොඩු මගින් කාබනික පොහොර සාදා භාවිතා කළ හැක. කරල් විදින පණුවාට ගොළුබෙල්ලාට එරෙහිව සටන් වැදීමට ඇමෙරිකාවෙන් හෝ ජර්මනියෙන් රසානික ද්‍රව්‍ය ගෙන ඒම අතහැර ළිපේ අළු, කොහොඹ කොළ වතුර ආදී ස්වභාවික පළිබෝධ නාශක යොදා ගැනීමට ඔබට හැක.
වැවේ නානතොට සහ පැන්තොට අතර පරතරය ඇති කිරීමට ඔබට කළ නොහැකි මුත් වතුර බොන ළිඳ ළඟ රෙදි නොසෝදා සිටීමට ඔබට හැක. විවිධාකාර ෂැම්පු වර්ග නැතිවාට දෙහි ලෙල්ලකින්, ගොඩපර ගෙඩියකින් හිස කෙස් පිරිසිදුකර ගැනීමද ඔබේ සෞඛ්‍යයට හිතකරය. මේ ආකාරයේ සරල ක්‍රමෝපායන් මගින් ඔබේ ගෙවත්ත වස, විස මුක්ත කලාපයක් කරගැනීම ඔබේ වකුගඩු රැකගැනීමේ මූලික අඩිතාලම කරගන්නැයි අපි ඔබට පවසමු. එහි දවෛනි පියවර ලෙස ඔබේ මුළුතැන්ගෙය සෞඛ්‍යමත් ලෙස සකසා ගන්න. ඇළුමිනියම් හෝ නන්ස්ටික් බඳුන් වෙනුවට මැටි බඳුන් යොදා ආහාර පිසගන්න. මැටිබඳුන් යනු ආහාරයේ අඩංගු තෙල්, මේද, අම්ල වැනි කිසිම ද්‍රව්‍යයන් සමග ප්‍රතික්‍රියා නොකරන භාණ්ඩය. මැටි බඳුනේ බහාලන ආහාර රසයෙන්ද ඉහළය. මැටි කොරහක රතු කැකුළු බත් ටිකක් දමා යහමින් දෙහි ඇඹුල් දැමූ පොල් සම්බෝලය සමග උදේ ආහාරය ගෙන බලන්නැයි අපි ඔබට ඇරයුම් කරන්නෙමු. ඔබේ නිවසේ ඇති ළිඳෙන් ලබා ගන්නා ජලය ප්ලාස්ටික් හෝ වීදුරු බඳුන්වල ගබඩා නොකරන්න. ඉන් ජලය දූෂණය වෙයි. ජලය ගබඩා කිරීමට හොඳම බඳුන මැටිකළයයි. වර්තමානයේ මැටියෙන් නිපදවූ ජල පෙරහන පවා වෙළෙඳ පොළේ ඇත. මේ වායේ බහාලන ජලය පානයට සුදුසු බව ඔබට පසක් කර ගත හැක. අතීතයේ මැටි ගුරු‍ලේත්තුව මල් බඳුනක් කර ප්ලාස්ටික් ජෝගුවට, වීදුරු ඩිකැන්ටරයට මාරු වූ අපට, එම වරද නිවැරදි කර යළි මැටි ගුරු‍ලේත්තුවට මාරු වීමට කාලය එළඹ ඇත. මීට අමතරව ඔබේ වැව් ජල පෙරනයට හෝ ජලය රඳවා ගන්නා කළය තුළට ඉඟිනි ඇට, දැව අඟුරු, කපු ඇට, මුරුංගා ඇට වැනි හෙළ වෙදකමේ එන ස්වභාවික පෙරහන් කාරක යොදා ගැනීමද ඵලදායී වෙයි. ඔබ ගන්නා ආහාර වේලට එක් කරගත යුතු ආහාර අතර කැකිරි, පිපිඤ්ඤා, පතෝල, දැල් තිබ්බටු වැනි බෝග වර්ගත්, නීරමුල්ලිය වැනි පලා වර්ගත් යොදා ගන්න, මෙම බෝග වර්ග බහුල ලෙස වවනු ලබන්නේ හේන්වලය. විශේෂයෙන්ම කැකිරි සහ දැල් තිබ්බටු වැනි දෑ කිසිදු සාත්තුවක් හෝ පොහොර යෙදීමකින් තොරව හේන්වල ඉණිවැටට පවා වවනා බැවින් අදටත් මෙම බෝග රසායන දූෂණයට ලක්ව නැත. වකුගඩු රෝගීන් බහුල රජරට ප්‍රදේශයේ මෙම බෝග හොඳින් වැවීම තුළින් ආයුර්වේදයේ එන පුද්ගලයෙකුට වැළඳෙන රෝග සඳහා සුදුසු ඖෂධ ඔහුගේ පරිසරයේ තිබේ යන නියමයත් අප ගන්නා ආහාර දේශසාත්ම විය යුතුය යන නියමයත් තහවුරු වෙයි. මෙම ආහාර බෝගවලට අමතරව මුත්‍රා කාරක ගුණය ඇති පොල්පලා, රණවරා, කඩු ඉකිරිය දඬු වැනි දේ සතියකට වරක් දෙවරක් තම්බා පානය කිරීම මගින් මුත්‍රා මාර්ගය පිරිසිදු වී අශ්වරි තත්වය (මුත්‍රා ගල්) ඇතිවීම වැනි ආසාදනද වළකා ගත හැක. මෙකී ආයුර්වේද නිර්දේශයන් පිළිබඳ විස්තර සොයා ඔබ වෙහෙසිය යුතු නොවේ. ඔබේ වැඩිහිටියන් මෙකී ඔසු හා ආහාර කලාව හොඳින් දනිති. එමෙන්ම මෙකී ආයුර්වේද නියමයන්ට අනුව හැඩ ගැසී වකුගඩු රැක ගැනීමට ඔබට අමතර මුදල් වැය නොවන අතර මාසිකව යම් මුදලක් ඉතිරි කර ගැනීමටද ඔබට හැකිවනු ඇත. අවශ්‍ය වනුයේ බාහිර හේතු සාධක මත ඔබ විසින් අතහැර දැමූ අපගේ ජනාගත උරුමය පිළිගෙන ස්වාභාවික දිවි පවෛතකට නතුවීම පමණකි.
අරුණ ලක්ෂ්මන් ප්‍රනාන්දු
උපුටා ගැනීම ලක්බිම පුවත්පත
