පිළිකාවට එරෙහි අලුත් බෙහෙත්
මේ වන විට ලොව පුරා පාලනය කළ නොහැකි වසංගතයක් ලෙසින් පැතිර යන රෝගයක් ලෙස පිළිකාව හඳුන්වා දිය හැක. පිළිකා සෛල ඉතා හිතුවක්කාර ලෙස මිනිසාගේ ප්‍රතිශක්තිකරණ පද්ධතිය ආක්‍රමණය කිරීම සිදුකරයි. මේ නිසා ශරීරය තුළ වන ආගන්තුක හා විකෘතිතාවයන්ට ලක්වූ පිළිකා සෛල ප්‍රතිශක්තිකරණ පද්ධතියේ සුදු රුධිර සෛල මගින් විනාශ කිරීමේ හැකියාව අවම වී යයි. දිනෙන් දින නවතම පිළිකා මර්දන ප්‍රතිකාර ක්‍රම සොයා ගත්තද ඒවායේ සාර්ථකත්වය කෙටි කලකට සීමාවීමට බලපාන හේතු කීපයකි. පිළිකා සෛල පිළිකා මර්දන ඖෂධවලට ඔරොත්තු දෙන ලෙස විශේෂ ආරක්ෂිත ආවරණයකින් සැඟවී ගනී. සාමාන්‍ය තත්ත්ව යටතේ ප්‍රතිශක්තිකරණ පද්ධතිය හොඳින් ක්‍රියාත්මක වන විට පිළිකා සෛල හැකිලී ගොස් පිළිකාවේ වර්ධනය නතර වෙයි. මෙවැනි රෝගීන් ඉතා වාසනාවන්තය. කුමන වර්ගයක පිළිකාවක් වුවද අපගේ ප්‍රතිශක්තිකරණ පද්ධතිය ඉතා ඉහළින් ක්‍රියාත්මක වන්නේ නම් පිළිකාව සම්පූර්ණයෙන්ම පරාජය කිරීම අපහසු නැත.
ඖෂධීය ක්‍රම මගින් ප්‍රතිශක්තිකරණ පද්ධතියේ ක්‍රියාකාරිත්වය ඉහළ දැමීමට අමතරව ඇතැම් ආගමික විශ්වාසයන් , මානසික ඒකාග්‍රතාවය ඉහළ නංවන භාවනා ක්‍රම, ආයුර්වේද ශාක සාර ගුණ ආදිය හමුවේ ඇතැම් රෝගීන් සම්පූර්ණයෙන්ම වාගේ පිළිකාව පරාජයකොට නැගී සිටින්නේ මේ නිසාය. ඇතැම් පිළිකා රෝග විශේෂ වෛද්‍ය ප්‍රතිකර්ම ක්‍රම නැතත් රෝගියාගේ ප්‍රතිශක්තිකරණ පද්ධතිය හොදින් ක්‍රියාත්මක වේ නම් සම්පූර්ණයෙන් සුවපත් වේ. මෙවන් පිළිකා රෝගීන්ට වෛද්‍ය ප්‍රතිකාර කරන ඇතැම් සාම්ප්‍රදායික යන්ත්‍ර මන්ත්‍ර කරුවන් පවසන්නේ එය තමාගේ ප්‍රතිකර්මවල හාස්කමක් බවයි. එමගින් ඔවුන් විශාල වෙළෙඳ ප්‍රචාරයක්ද ලබාගනී. එහෙත් සත්‍ය ලෙසම සිදුවී තිබෙන්නේ අදාළ පිළිකාව වෛද්‍ය හාස්කමකින් නොව රෝගියාගේ සිරුර තුළින්ම ස්වභාවික ලෙස යටපත් වීමයි. මේ දක්වා සමේ ඇති වන මෙලනෝමා වකුගඩු සහ ඇතැම් පෙණහලු පිළිකා , ඇතැම් පියයුරු පිළිකා , ඩිම්බ කෝෂ පිළිකා ආහාර මාර්ගයේ හා ආමාශගත පිළිකා, හිස හා ගෙල ආශ්‍රිත පිළිකා ආදියට එරෙහිව ඖෂධීය ප්‍රතිකර්ම ක්‍රම අත්හදා බලා ඇත. ඇතැම් රෝගීනේ මෙම ඖෂධීය ප්‍රතිකර්මවලින් සුවය ලබා ඇති අතර තවත් සමහර රෝගී කොට්ඨාසයකට සුවය ලැබි නැත. මෙම වෙනසට හේතුව කුමක්දැයි . විද්‍යාඥයෝ පරීක්ෂණ පවත්වමින් සිටී. නව ඖෂධ ප්‍රතිකර්මවලින් යටපත් වන පිළිකා සෛල කෙතරම් කලක් අක්‍රියව පවතීදැයි විමසා බැලීම වටී. මේ සම්බන්ධව අදහස් දක්වන ජෝන් හොප්කින්ස් වෛද්‍ය විද්‍යාලයේ වෛද්‍ය පාඩොල් සඳහන් කරන්නේ තම පර්යේෂණ වෛද්‍ය විද්‍යා ඉතිහාසය සම්පූර්ණයෙන් වෙනස් කිරීමට සමත්වන බවය.
පිළිකා රෝගය මර්දනය කිරීම සඳහා වෛද්‍ය පර්යේෂකයින් සහ ඖෂධ සමාගම් විශාල උනන්දුවකින් කටයුතු කරන බව පෙනේ. විශේෂයෙන් ප්‍රතිශක්තිකරණ පද්ධතිය උත්තේජනය කරන ඖෂධ නිපදවීම මෙහි ඉලක්කයයි. එහෙත් මේ සම්බන්ධව අදහස් දක්වන ඇතැම් වෛද්‍ය පර්යේෂකයින් පෙන්වා දෙන්නේ මෙම වෛද්‍ය පර්යේෂණ සම්බන්ධයෙන් රෝගීන් තුළ අනවශ්‍ය අන්දමේ ඉහළ බලා‍පොරොත්තු ඇති නොකළ යුතු බවයි. මේ අන්දමට මෙම ඖෂධ සොයා ගැනීමේ ප්‍රධාන අරමුණ රෝගීන් සුවපත් කිරීම නොව ඖෂධ සමාගම් අඩු කාලයකදී වැඩි ආදායමක් ලබා ගැනීමයි. මේ නිසා අලුතින් සොයාගන්නා ඖෂධයන් අප්‍රමාදව වෙළෙඳ‍පොළට එකතුකොට අධික ලාභ ලැබිම සිදුවේ. නව පිළිකා මර්දන ඖෂධ මගින් ප්‍රතිශක්තිකරණ පද්ධතිය උත්තේජනයට ලක් කරයි. එමගින් ප්‍රතිශක්ති කරණ පද්ධතියේ පවතින ඊ සෛල ක්‍රියාත්මක කිරීම වඩා පහසු වේ. ඇතැම් පිළිකා නාශක ඖෂධවල සාර්ථකත්වය තවමත් පෙන්නුම් කොට ඇත්තේ සත්වයින් සම්බන්ධ පර්යේෂණ හෝ මිනිසුන් ආශ්‍රිත නියැදිවලින් පමණි. මේ නිසා සත්වයින් සම්බන්ධ අත්හදා බැලීම් සාර්ථක වූ පමණින් එය මිනිසාට කොතෙක් දුරට සාර්ථක වී දැයි එකවර පැවසිය නොහැක. අපගේ ශරීරයේ පවතින සුදු රුධිරාණු වෙන් කරගෙන ජාන තාක්ෂණ යොදා පිළිකාවලට එරෙහිව සටන් කිරීමට හැකි ලෙස සකස් කොට යළි ශරීරයට ඇතුළත් කිරීම තවත් ප්‍රතිකාර ක්‍රමවේදයකි. එහෙත් මෙය මිල අධික කාලය වැය වෙන ක්‍රමයකි. ප්‍රතිශක්තිකරණ පද්ධතිය උත්තේජනය කොට පිළිකා මර්දනය කිරීමට දරන උත්සාහයන් අසාර්ථක වූ අවස්ථාද ඇත. එසේම මෙම ඖෂධ සාමාන්‍ය නිරෝගී සෛලවලට හානිකරන අවස්ථාද පවතී. එසේම ඇතැම් ඖෂධවල ප්‍රතිඵල කෙටි කලකට සීමාවේ. මෙම හේතුව නිසා අලුතින් පිළිකා මර්දන ඖෂධ සොයා ගත්තද ඒවා සම්බන්ධව අනවශ්‍යව ප්‍රචාරයක් හා ප්‍රසිද්ධියක් ලබාදීමට පෙර දෙවරක් සිතා බැලිය යුතු බව ඇතැම් වෛද්‍ය පර්යේෂකයින්ගේ මතයයි. පිළිකා සෛලවල වර්ධනය පාලනය කරන ප්‍රෝටීන වර්ග නිෂ්පාදනය අඩාල වීමත් සමග ආහාර මාර්ගයේ පිළිකා සෛල ක්‍රියාකාරී කරන අණු වළක්වන ඖෂධ අලුතින් සොයාගෙන ඇත. එහෙත් මේවා මිනිසුන් සම්බන්ධව යොදා ගැනීමට පෙර තව බොහෝ අත්හදා බැලීම් සිදුකිරීමට අවශ්‍යය. මේ අනුව පෙනී යන්නේ පිළිකා මර්දන ඖෂධ වෙළෙඳ‍පොළට පැමිණෙන වේගයටම අපට ප්‍රතිඵල ලබාගත නොහැකි බවයි. ඖෂධවල ගුණාත්මක භාවය, අතුරු ආබාධ, අධික මිල ගණන් හා ඒවායේ ක්‍රියාකාරිත්වය සම්බන්ධව කීපවරක්ම සිතිය යුතුවේ.
වෛද්‍ය ජී.ජී. චමල් සංජීව
උපුටා ගැනීම ලක්බිම පුවත්පත
