ආමාශය කතා කරන හඩට ඇහුම් කන් දෙන්න
ඇතැම් විද්‍යාඥයන් ආමාශය හඳුන්වන්නේ දෙවැනි මොළය කියායි. මිලියන සියයක ස්නායු ෙසෙල ආමාශය ආවරණය කරන පටලයේ තිබීම ඊට හේතුවයි. සාමාන්‍ය කෙනෙකුට නම් පුංචි උදරය දවස පුරාම හිතෙන හිතෙන දේ පුරවන භාජනයක් වගෙයි. ඒත් දෙවැනි මොළය එනම් ආමාශය කියන මේ කතාව ඇහුවොත් ඔබට එසේ නොසිතේවි. "මමත්, උදෑසන ආරම්භ කරන්නේ හරිම ප්‍රබෝධයෙන්. කැමැතිම ආහාර වේලකින් කුස පිරුණා. යෝගට්, ඕට්ස්, පලතුරු ප්‍රෝබයොටික්වලින් පිරිලා. ඒවා මගේ ආස්තරණය නිරෝගීව තබන ජීවි බැක්ටීරියා සාගරයේ පැවැත්මට, සුරක්ෂිත භාවයට අත්‍යවශ්‍යයි. ආහාර ජීර්ණයටත් මේවා නැතිවම බැහැ." බැක්ටීරියා ගහනය සමතුලිතව නිරෝගීව ඇතිවිට ආහාර රුචිය උපරිමයි. ඒත් චීන කෑමකින් උදරය පිරෙව්වොත් නම් ලෙඩම තමයි.
ඇයට (මගේ හිමිකාරිය) කාර්යාලයේ ප්‍රධානියාගෙන් උදේ 8.30 ට හමුවෙන ලෙසට විද්‍යුත් පණිවුඩයක් ලැබිලා. ඇය මාර්ග තදබදයට අහුවෙලා. ඉන්නේ හිතේ අසහනයෙන්. ආතති හෝර්මෝනය ගලාගෙන එනවා. කෝටිසෝල් වගේ ආතති හෝර්මෝන මගේ පරම සතුරන්. ඇයගේ අධික කාර්යබහුලකමට වන්දි ගෙවන්නට සිදුවී ඇත්තේ මටයි. ආතති හෝර්මෝනය උපරිම ලෙස ඉහළ ගොස් ඇතිවිට මොළයෙන්, මගේ විශේෂ ෙසෙලවලට සංඥා ලැඛෙනවා. ඒ අනුව ප්‍රතිප්‍රදාහ රසායන නිකුත් වෙනවා.
ඇත්තටම ආසාදනයක් ඇත්නම් මේ රසායන ඒ සතුරන් සමග සටන් කරනවා. එහෙත් එවැනි තර්ජනයක් නැතිව සංඥ ලැඛෙන විට සිදුවන්නේ මගේ මාංශ පේශී කෙළවරක් නැතිව හැකිලීමයි. එවිට උදරයේ නොරිස්සුම් සහගත බවක් සහ මල බුරුලට යාමක් සිදුවෙනවා. ඉරිටබල් බවල් සින්ඩ්‍රෝම් තත්ත්වයටත් මග පාදන්නේ මේ කාරණාමයි.
ට්‍රිලියන 100ක් තරම් වූ ක්ෂුද්‍ර ජීවී ක්‍රියාකාරිත්වය මගේ සමබරතාවයට අත්‍යවශ්‍යයි. පෝෂක කුඩා කොටස්වලට කඩා ජීර්ණයට උපකාරී වීම විසබීජ ගැන සෝදිසියෙන් සිටීම ඒ අයගෙන් සිදුවන ප්‍රධාන කාර්යයක්. මොවුන්ගේ මේ වැදගත්කම නිසාමයි මගේ හිමිකාරියගේ තන්තු, යෝගට් පිරි උදේ ආහාරය වගේ ආහාර වැඩිපුර ගන්න කියන්නේ. උදරාබාධ නැති නිරෝගී ජීවිතයකට මඟ පාදා ගන්න පුළුවන් එවිටයි. නරක බැක්ටීරියාවන්ද ආස්තරණයේ ජීවත් නොවනවාම නොවෙයි. නරක බැක්ටීරියා සිරුර තරබාරු කරනවා. ප්‍රතිශක්තිකරණ සම්බන්ධ රෝග ඇති කරනවා. විශාදයටත් හේතු වෙනවා. මේවා මට්ටු කරන්න නම් හිතකර බැක්ටීරියාවන් වැඩි කළ යුතුයි.
ඔන්න දැන් ඇය කාර්යාලයට ගිහින්. හරිම කාර්යබහුලයි. වතුර වීදුරුවක් වත් බොන්න වෙලාවක් නැති තරම්. වෙලාව පස්වරු 3.30යි. මීටිමත් අත ළග. ක්ෂණික කෑම දවල් කෑමට ඇති ඇයගේ ක්ෂණික විසඳුමයි. එකත් කටට දෙකට ගිල්ලා. හොඳින් සපා ආමාශයට එන කෑම දිරවීමට හරි පහසුයි. එවිට මගේ ක්‍රියාවලියෙම ක්‍රමානුකූලව හරිම ලතාවකට සිදුවෙනවා. මාව රෙදි සෝදන යන්ත්‍රයකට සමාන කරලා හිතන්න. රෙදි සෝදන යන්ත්‍රයෙන් රෙදිවල කහට ඉවත් කෙරෙනවා. මම කරන්නේ අත්‍යවශ්‍ය පෝෂක ආහාරවලින් ලබා ගැනීමයි.
ඉල ඇට කූඩුව යට දකුණු පසට වන්නට පහළින් ඇති මිට මෙලවූ අතක් තරම් කුඩා මගෙන් මෙතරම් දෙයක් සිදු කෙරෙනවා. ඒත් සති අන්තයට පුදුමාකාර ලෙස ඇදෙන්නට මේ මල්ලට සිදුවෙනවා. ඒ මුලින් කිව්වා වගේ හිතකර ආහාරවලින් නම් නොවෙයි. තෙල්, සීනි, ලුණු, පිටි, අධික ආහාරවලින් මගේ වැඩේ මේ බර ආහාර නිසා වඩාත් සංකීර්ණ වෙනවා. පැය ගණනක් ජීර්ණ ක්‍රියාවලියට ගත වෙනවා.
දැන් තේ වෙලාවත් ඇවිත්. ඒත් ඇය විද්‍යුත් තැපෑල නිරීක්ෂණයේ. ඇයට මගේ අවශ්‍යතාව ගැන කිසිදු සැලැකිල්ලක් නැහැ. උදරයෙන් පිටවන ශබ්ද සංඥ (පරිසරයට ඇසෙන තරම් ඝෝෂාකාරී හඬවල්) ගෙන එන්නේ මේ ආරංචියයි. ප්‍රධානියාගෙන් ඇය අනලස්ව වැඩි වේලාවක් සේවය කිරිම ගැන ප්‍රශංසාවක් ලැබුණා. ඒ සමගම ආතති හෝර්මෝන මට්ටමත් පුදුම විදිහට පහළට බැස්සා. හදිස්සියේම ඇති වූ සුබ වෙනස නිසා ඉක්මනින් ඉක්මනින් ඇය ගිල දැමු "බර්ගර්" වුණත් දිරවීම පහසු වුණා. මීටර් 6කට වඩා දිග සෙ.මි. 2 කට වඩා පළල කුඩා බඩවැලට දැන් අඩක් ජීර්ණය වුණු දිවා ආහාර ගලාගෙන යනවා.
කාර්යාල සේවයෙන් පසු ඇය ජිම් එකට ගිහින්. ඒත් ඇය තවත් ටික වේලාවක් සිටියා නම් හොඳයි කියලා හිතෙනවා. කාර්යාලයේ මිතුරියකගේ උපන් දිනයට ලැබුණු තඩි කේක් කෑල්ල දිරවන්න උත්සාහ ගන්නා අතරේයි ඇය ජිම් ගියේ. ව්‍යායාම කිරීමේදී මගේ ක්‍රියාකාරීත්වය අඩු වෙනවා. ඒ නිසයි කෑමට පසු පැයක්වත් වැඩිය ක්‍රියාකාරී නොවී සිටිය යුත්තේ. එයින් අදහස් වෙන්නේ නෑ ව්‍යායාම නොකළ යුතුයි කියලා. මං ව්‍යායාම ලෝලියෙක්. ව්‍යායාම කරන්න, කරන්න මගේ ක්‍රියාකාරීත්වය වඩාත් ක්‍රමවත් වෙනවා. පි්‍රයතම ව්‍යායාමය එයරොබික්. මාංසපේශිවල නිරෝගී භාවයට මනා ක්‍රියාකාරිත්වයට ව්‍යායාම අත්‍යවශ්‍යයි.
රාත්‍රියට සලාදයක් කන්න ඕන. ඇය කියනවා මට ඇසුණා. හොඳ වචන ටිකක්. රෑට සරලව කෑ තරමට මට වැඩ පහසු වෙනවා. ම්...... ඒත් එයා කාපු ගමන් නිදා ගත්තා. රෑ කෑම දිරවන්න මං සූදානම් කළ හයිඩ්‍රොක්ලෝරික් අම්ලය ඇය වැතිරී ඉන්න නිසා අග්න්‍යාශයට ගලා එනවා. ඔන්න උගුර දනවා. බඩ දනවා කියලා ඇයගෙන් චෝදනාවක්. කෑමක් කාලා අඩු වශයෙන් පැය 2ක් වත් යනතුරු වැතිරෙන්න හොඳ නෑ කියලා ඇය දන්නෙ නැහැ. ආමාශයේ දිග කතාවක් කෙටියෙන් කියා නිම කළා. මේ කතාව අප සැමටම බොහෝ පාඩම් උගන්වනවා නේද?
උපුටා ගැනීම දිනමිණ පුවත් පතඇසුරෙනි
