කුද්දටි එන්නෙ ඇයි?
අභ්‍යන්තර සහ බාහිර රෝග පිළිබඳ ශරීරය දැනුම්වත් කිරීමට තමයි කුද්දටි එන්නේ. කුද්දටි කියන්නේ තරමක් වේදනාකාරී දෙයක්. ඒ වගේම කුද්දටි ආවාම ඒ ගැන බයවෙන බොහෝ අයට කුද්දටි ගැන නිසි අවබෝධයක් නැහැ. කුද්දටි එන්නේ ශරීරයේ සිදුවන ලේ විෂවීමක් නිසා. ලේ විෂ වීමට හේතු තිබෙනවා. ආහාර විෂ වීමක් නිසා ලේවලට විෂබීජ ඇතුළු වීම හේතුවනවා. ඒ හැර කකුලේ ගල් තැල්මක්, සුව නොවන තුවාලයක්, ලේ ගෙඩියක් නිසාත් කුද්දටි එන්න පුළුවන්. පියයුරු පිළිකා, පියයුරුවල ඇතිවන ගෙඩි නිසාත් කුද්දටි එනවා. තදබල උණ නිසා, බෝවන රෝග වන සරම්ප, කම්මුල්ගාය, පැපොල නිසාත් කුද්දටි ඇති වනවා. සාමාන්‍යයෙන් තුවාලයක්, ගෙඩියක් ඇති වුණාම එහි ඇතිවන විෂ රුධිරයට මිශ්‍ර වෙනවා. ඉන් ලේ ගමනාගමනය සිදුවන මාර්ගය අවහිර වීම නිසා රුධිරයේ තිබෙන ප්‍රෝටීන් ඝන වීමක් සිදුවනවා. එහි ප්‍රතිඵලයක් ලෙස කුද්දටි හටගන්නවා. උණ නිසා කුද්දටි ඇතිවනවා වගේම කුද්දටි නිසාත් උණ සෑදෙනවා. ශරීරයේ කුද්දටි ඇතිවන ප්‍රදේශ ලෙස ඉකිලිය, කිහිල්ල හා බෙල්ල හඳුන්වා දෙන්න පුළුවන්. ඒ වගේම ඉතාම කලාතුරකින් තට්ටම්වලත් එන්න පුළුවන්. ඒ වගේම තමයි තවත් කෙනකුට රෝගයකදී කුද්දටි නොඑන්න පුළුවන්. එය ගැටලුවක් නොවේ. නමුත් ඉන් ඔබට අභ්‍යන්තර රෝග තත්ත්වයක් ඇතිව තිබුණොත් එය හඳුනා ගැනීමට ඇති එකම මඟ ඇහිරෙනවා.
ප්‍රතිකාර
- සියඹලා කොළ, කොහොඹ කොළ, හීන් නිදිකුම්බා, අමු කහ තම්බලා කුද්දටි ආ තැන් තවන්න. එම කොළ වර්ගම කොටා කුද්දටි ආ ප්‍රදේශවල තවරන්න.
- සිතාරාමවතිය කොත්තමල්ලි තැම්බූ වතුර සමඟ බොන්න.
- කාංචනාර ගුග්ගුල ගුළිය උණු වතුර සමඟ බොන්න.
- නෙල්ලි, රසකිඳ තම්බා බොන්න.
ප්‍රධානම වශයෙන් කුද්දටි සෑදීමට හේතු වූ රෝගය සොයාගෙන හැකි ඉක්මනින් සුදුසුකම්ලත් වෛද්‍යවරයකු ලවා ප්‍රතිකාර ලබාගන්න.
මුතු ඇටවන් දත් පෙළක්
පංච කල්‍යාණියේ තවත් එක අංගයක් විදියට ගැනෙන්නේ දන්ත කල්‍යාණිය. දන්ත කල්‍යාණිය දන්ත සම්පත් වෙන්න නම් ආයුර්වේදයේ සඳහන් ලක්‍ෂණ දත්වල තිබෙන්න අවශ්‍යයි. ආයුර්වේදයේ සඳහන් වන පරිදි දත් ඇඳි දෙක එකිනෙක මත පිහිටීම, දත් එක සමානව පිහිටීම, නියමිත සංඛ්‍යාවෙන් තිබීම, විකෘතිහැඩ හා විකෘති ස්ථානවල පිහිටා නැත්නම්, හිදැස් නැත්නම්, දීප්තිමත් සුදු පැහැ නම්, රෝගාබාධවලින් තොර වේ නම් එම දත් දන්ත සම්පත්ති ලෙස හැඳින් විය හැකිය.
දන්ත විකෘතිතා හා රෝගාබාධ
- දත් ඉදිරියට නෙරා ඒම.
- නළ දත් මතුවීම.
- දත් හිඩැස් සහිතව අෑතින් පිහිටා තිබීම.
- කහ පැහැ වීම.
- එනැමලයට හානි වීම.
- තැනින් තැන කැඩී ගොස් හෝ පිපිරී තිබීම.
- දත් දිරායෑම.
- විදුරුමසින් ලේ ගැලීම.
- තුවාල ඇතිවීම.
ආදියයි.
දන්ත රෝග හා විකෘතිකා ඇතිවීමෙන් වැළකීමට දිනපතා උදෑසන අවදි වූ සැණින් දත් මදින්න. ආයුර්වේදයට අනුව දැහැටි කූර වඩාත් සුදුසු වේ. මේ සඳහා කොහොඹ, රසකිඳ, කුඹුක්, අරළු වැනි ශක්තිමත්, එහෙත් සැපීමේදී සියුම් කෙඳි බවට පත්වන කසාය හා තිත්ත රස සහිත ශාක ගත යුතුයි. මෙයින් දත් මැලියම් බැඳීම වළකන අතර විදුරුමස් ශක්තිමත් වේ. දන්ත හා මුඛ ආශි්‍රත රෝගවලින් වැළකීමට හැකිය. දත් මැදීමෙන් අනතුරුව විදුරුමස් තෙල් ගා පිරිමදින්න. විදුරුමස් දියවීම, ලේ යෑම වැළැක්වීම හා දත් මුල් ශක්තිමත් වීම සිදුවේ. පිරිසුදු ඇඟිල්ලකින් තල තෙල් හා සූරියකාන්ත තෙල් යොදාගෙන පිරිමැදීම කළ හැකිය. යම් රෝගයකින් පෙළේ නම් පමණක් ඉරිමේදාදී තෛලය භාවිත කරන්න. දිනපතා තෙල් පිරිමැදීමෙන් විශිෂ්ට ප්‍රතිඵල අත්වේ. කට සේදීමද ආයුර්වේද ඔෟෂධ මඟින් කළ හැකිය. මූණමල් පොතු, පුවක් මුල්, අරළු, බුළු, නෙල්ලි, කුරුඳුපොතු තම්බා ගත් වතුරවලින් කට සෝදන්න.
විශේෂිතයි : මුඛයේ සෑදෙන පිළිකාවක රෝග ලක්‍ෂණයක් ලෙස දන්ත රෝග ඇතිවීම විදුරුමසින් ලේ ගැලීම සිදුවිය හැකිය. එම රෝග සඳහා ප්‍රතිකාර නොකිරීමෙන් දරුණු පිළිකා තත්ත්ව ඇතිවීමට ඉඩ තිබේ. දන්ත රෝග ඇති කරන ආහාරවලින් වළකින්න.
- පැණි රස ආහාර ගැනීම.
- හොඳින් දිනකට දෙවරක් දත් නොමැදීම.
- දත් මැදීමේ අඩුපාඩු (ක්‍රමය, කාලය, දත් බුරුසුව, දන්තාලේප)
- වැරැදි ආහාර පුරුදු.
- කටේ ඇලවෙන ආහාර වර්ග ගැනීම.
- ආරය.
යන හේතු මත දන්ත ගැටලු ඇතිවේ. මේ හැර කිරි දත් පරෙස්සම් කිරීම, කුඩා කල පටන් දන්ත සෞඛ්‍ය ගැන සැලකිලිමත් වීම වැදගත්. මසකට වරක්වත් දත් පරීක්‍ෂා කරවා ගැනීම වැදගත්.
මල් ගෝමරද? අළුහම්ද? මල් ගෝමර එහෙමත් නැත්නම් පෙති ගෝමර කියලා හඳුන්වන ලප විශේෂය එදා පැරැණි සමාජයේ නම් රූමත් බවේ සංකේතයක් විදියටයි සැලකුවේ. නමුත් වර්තමාන දියුණු සමාජය තුළ නම් අළුහම් විදියට හඳුන්වන මෙය චර්ම රෝග තත්ත්වයක්.
අලුහම් : අලුහම් කියන්නේ චර්මගත රෝග තත්ත්වයක්. මෙය බාහිර චර්මයේ හටගන්නවා. එයට හේතුව සම තුළ ක්‍රියාත්මක වන දිලීරයක්. ශරීරයේ බොහෝ ස්ථානවල පැල්ලම් වශයෙන් දක්නට ලැබෙන අළුහම් සුදු පැහැ සහ තද ගුරු පැහැයෙන් යුක්තයි.
ස්වභාවය : බෙල්ල, මුහුණ හා පපුවේත්, පිට කොන්දේත් අළුහම් දක්නට ලැබේ. කසන ස්වභාවයක් සහිත වන අතර පිටි මෙන් ගැලවී යෑම සිදුවේ. මෙසේ පිටි මෙන් ගැලවී යන්නේ දිරාපත් වූ සම බව විශේෂයෙන් සඳහන් කළ යුතුය.
අළුහම් සෑදීමට හේතු :
- අපිරිසුදු බව.
- නිතර හිරු එළියට නිරාවරණය නොවන ස්ථානයක නිදන කාමරය පිහිටා තිබීම.
- තෙත් ගතියෙන් යුතු (භාගෙට වියළුණු) ඇඳ රෙදි හා කොට්ට උර භාවිතය.
- ඇඳුම් පැලඳුම්, නිදන කොට්ටයේ උරය ආදිය සතියකට වරක්වත් නොසේදීම.
- කෘත්‍රිම ආහාර, කෘත්‍රිම රසකාරක භාවිතය.
- ලේ විෂ වීම.
- ආසාත්මිකතා
- අම්ල පිත්තය (ගැස්ට්‍රයිටිස්)
- බ්ලීචිං අඩංගු ක්‍රීම් වර්ග ආලේපය.
- ප්‍රමිතියකින් තොර කෘත්‍රිම සබන් වර්ග.
ප්‍රතිකාර
- පේර දලු, දෙහි ඇඹුලින් අඹරා ගාන්න.
- කළුවා අල දෙහි ඇඹුලින් අඹරා ගාන්න.
- ඇත්තෝර දලු දෙහි ඇඹුලින් අඹරා ගාන්න.
- අලුහම් සඳහාම සෑදූ ආයුර්වේද ආලේපන වර්ග භාවිතය.
අතුරු ආබාධ
- දීර්ඝ කාලයක් අලුහම් සම මතුපිට තිබීම නිසා සම දිරාපත් වීම.
- අන් අයට බෝවීම.
- සුවකළ නොහැකි කුෂ්ඨ රෝග බවට පත්වීම.
මුහුණ පුරා කළු ලප ඇවිත්?
ප්‍රශ්නය : මගේ මුහුණේ අත් පාවල කළු ලප සෑදී තිබේ. කුමන බෙහෙතකින්වත් ඒවා සුව නොවේ. ආයුර්වේද ප්‍රතිකාර තිබේද? එම ලප කළු පැහැති දදවලට සමානය. තද බවින් යුක්ත වේ.
පිළිතුර : වයසට යන අයට නම් මෙය සුව නොවන තත්ත්වයක්. තරුණ වයසේ පසුවන කෙනකුට නම් සුව කිරීමට හැකියාව පවතී. මේ සඳහා කළු ලප සෑදුණු කාලය හා රෝගියාගේ වයස අවශ්‍ය වේ. සුදුසුකම් ලත් වෛද්‍යවරයකු ලවා ප්‍රතිකාර ලබා ගන්න. තොරතුරු මඳ බැවින් ඔෟෂධ පැවැසිය නොහැකියි.
උදේට ඇස් දැවිල්ල හැදෙන්නෙ ඇයි?
ප්‍රශ්නය : මට නිතර ඇස් දැවිල්ල සෑදේ. උදෑසනට දෑස් ඇරීමටවත් නොහැකි ලෙස කබ බැඳේ. මේ සඳහා ප්‍රතිකාරයක් තිබේද?
පිළිතුර : පීනස් රෝගයත් මෙයට එක් හේතුවකි. පීනස් රෝගියකු නම් පීනසයට බෙහෙත් ගන්න. අන්නාසි, තක්කාලි, විනාකිරි දැමූ ආහාර, අබ දැමූ ආහාර අගුණ වේ. දිනපතා නාන්න. ඔළුවට පීනස සුව කරන තෙලක් යොදන්න. මේ සඳහා විශාදී තෛලය, නිර්ගුන්දපාදී තෛල, පිනස් තෙල් වර්ගයක් සුදුසු වේ. නෑමෙන් පසු තෙල් දමන්න එපා.
කසාය : කොත්තමල්ලි, වළඟසාල්, සුදු පිටවක්කා මුල්, ඉඟුරු පියලි, සුදු ලූනු, කලං දෙකයි මදටිය ඇට බැගින් ගෙන වතුර පත අට එකට සිඳුවා මී පැණි දමා දෙවරකට බොන්න. කාල් 7ක් පමණ බීමට ගන්න. එය ප්‍රමාණවත්.
උපුටා ගැනීම මව්බිම පුවත්පත
