මලපහ පරීක්ෂණයෙන් මහා අන්ත්‍රයේ රෝග ගණනාවක් සොයා ගත හැකියි
අප ශරීරයේ අවයව අතරින් ආහාර ජීර්ණ පද්ධතියට හිමිවන්නේ සුවිශේෂි ස්ථානයක්. ශරීරයේ නිරෝගී පැවැත්මට මෙන්ම රෝගී වීමටත් මෙම පද්ධතිය වැදගත් වෙනවා. නමුත් මෙම පද්ධතිය කලක් ගතවද්දී රෝගී වීමට පුළුවන්. එහෙත් එම රෝගී තත්ත්වයන් එක්වරම හඳුනාගත නොහැකියි. මේ සඳහා විිවිධ පරීක්ෂණ කළ යුතුයි. ආහාර ජීර්ණ පද්ධතිය රෝගී වීම සොයා ගැනීමට කෙරෙන පරීක්ෂණ අතරින් මලපහ පරීක්ෂාව වැදගත් තැනක් ගන්නවා. විශේෂයෙන් මලපහ සමඟ රුධිරය පිට වෙනවා ද යන්න සොයා ගැනීමට මලපහ පරික්ෂණය කෙරෙනවා. මලපහ සමඟ රුධිරය පිටවීමට බලපෑහැකි ප්‍රධාන හේතුවක් වන්නේ ආහාර ජීර්ණ පද්ධතිය ආශි‍්‍රතව ඇතිවන පිළිකාමය තත්ත්වයක් හෝ රුධිර ගලනය වන තුවාලයක් විය හැකියි. මෙය සොයා ගැනීම සඳහා මලපහ පරික්ෂණය කළ යුතුයි. මලපහවල පවතින රුධිරය මෙවැනි රෝගී තත්ත්වයකදී පියවි ඇසට නොපෙනී තිබිය හැකියි. නමුත් මලපහ පරීක්ෂණයකදී මලපහවල රුධිරය ඇත් ද යන්න නිවැරදිව තහවුරු කරගත හැකි වෙනවා. මලපහ සම්පූර්ණ පරික්ෂණයේදී (FR) ආහාර ජීර්ණ පද්ධතියේ පණු බිත්තර, පණුවන්, රතු රුධිර සෛල, සුදු රුධිරානු සෛල වෙනත් ආසාදන හෝ මහා අන්ත්‍රය ආශි‍්‍රත රෝගී තත්ත්ව ඇත් ද යන්න සොයා බැලිය හැකියි. සාමාන්‍යයෙන් වයස අවුරුදු 45 ඉක්මවූ පසු මහා අන්ත්‍රයේ පිළිකා අවදානම වැඩි වෙනවා. මහා අන්ත්‍රයේ පිළිකා අවදානම හෝ තුවාල ඇත්ද යන්න සොයා බැලීම සඳහා මලපහවල රුධිරය ඇත්දැයි යන්න සොයා බැලෙන පරීක්ෂණය කළ යුතුයි. රෝගයක් මුල් අවස්ථාවේදීම හඳුනා ගැනීම මඟින් බොහෝවිට නිට්ටාවට සුව කළ හැකියි. එහිදී රෝගයක් මුල් අවස්ථාවේදී හඳුනා ගැනීමට සිදු කරන පරීක්ෂණ ස්ක්‍රීනින් ටෙස්ට් (Screening tests) ලෙස හඳුන්වනවා.
මලපහවල සැඟවුණු රුධිරය ඇත්දැයි සොයා බැලීම සඳහා ඔකල්ට් බ්ලඩ් ටෙස්ට් (Occult blood test) නම් පරීක්ෂාව කෙරෙනවා.
මහා අන්ත්‍රයේ ඇතිවන පිළිකාමය තත්ත්වයකදී මුල් අවස්ථාවේදී රුධිරය පිටවීමක් පියවි ඇසට දැකගත නොහැකියි. මේ නිසා මලපහවල රුධිරය ඇත්දැයි මේ මඟින් සොයා බැලෙනවා. මෙහිදී රුධිරයේ ඇති යකඩ හඳුනා ගැනීම කෙරෙනවා. මෙම පරීක්ෂණය සිදු කිරීමේදී රෝගියා, පැය 48කට පෙර සත්ව ආහාර ගැනීමෙන් වැළකී සිටිය යුතුයි. රෝගියාගේ මලපහ සාම්පල වාර තුනකදී ලබා ගැනීම කෙරෙනවා. පළමු දින, දෙවැනි දින සහ තුන්වන දින ලෙස මෙම සාම්පල ලබා ගැනීම කෙරෙනවා. දින තුනකදී මලපහ සාම්පල ලබා නොගන්නේ නම් පළමු සාම්පලය ලබාගෙන ඊළඟ සාම්පලය ලබා ගැනීම සඳහා පැය 06ක් ඉක්ම විය යුතුයි. මෙම සාම්පල කුඩා බෝතලයකට ලබා ගැනීමෙන් පසු රසායනාගාරයේදී යකඩ සමඟ ප්‍රතික්‍රියා කරන රසායනික ද්‍රව්‍යයක් මලපහ සමඟ එක් කරනවා. මල පහවලට යොදන රසායනික ද්‍රව්‍යයේ වර්ණය වෙනස් වන්නේ නම් ඊට අනුව මලපහවල හීම් යකඩ ඇත්දැයි සොයා ගත හැකියි. එම පරීක්ෂණය පොසිටිව් නම් මලපහවල රුධිරය අන්තර්ගතව ඇතැයි නිගමනය කරනවා. එම නිගමනයෙන් පසු රුධිරය වහනය වන තුවාලය හෝ ගැටිත්ත සොයා ගැනීම සඳහා කොලොනස් කොපි පරීක්ෂාවකට රෝගියා යොමු කරනවා. එමඟින් ලබා ගන්නා පරීක්ෂණයෙන් පිළිකාමය තත්ත්වයක් ඇත්දැයි සොයා බලනවා. මේ වනවිට දියුණු තාක්ෂණය යොදා ගනිමින් සිදු කරන පරීක්ෂණ ද තිබෙනවා. (රේඩියෝ ඉමිනොඇසේ (Radioimmunoassay) මෙම පරීක්ෂණයේදී රෝගියා සත්ව ආහාර ගැනීම ගැටලු සහගතත වන්නේ නැහැ.
උපුටා ගැනීම දිණමින
