සුව කළ නොහැකි බව කියන ෆේෂල් පැරලයිස් රෝගයට ආයුර්වේදයෙන් නිට්ටාවටම සුවය
අපිට උපතේදි ලැබුණු රූපය අපිට රටක් වටිනවා. එහෙත් අර්දිතය හෙවත් මෞචික පක්ෂාඝාත රෝගය හැදුණොත් අපේ උපන් රූපය නැතිවී යනවා. මුහුණේ පැත්තක් අක්‍රිය වෙනවා. රජෙක් වුණත්, රැජනක් වුණත් එදාට හිතින් හඬා වැටෙනවා. ෆේෂල් පැරලයිස් රෝගයේ මූලික ලක්ෂණය වන්නේ මුහුණේ අඩක් පමණ කොටසකට පමණක් රෝග ලක්ෂණ ඇතිවීමයි. රෝගියාගේ ඇස්, කම්මුල්, නාසය, දෙතොල්, නිකට, කන ආදී ස්ථානවල ක්‍රියාකාරිත්වය අඩකින් පමණ අඩුවී යනවා. මේ හේතුව නිසාම මුහුණේ හැඩය විකෘති ස්වභාවයට පත්වෙනවා. මෙසේ සිදුවීම රෝගියා බලවත් මානසික, චිත්ත පීඩාවකට ලක් කරනවා. ෆේෂල් පැරලයිස් රෝගය ක්‍රමයෙන් උත්සන්න වන විට සම හිරිවැටීම, හකු තදවීම, ඇසෙහි කැලඹිලි ස්වභාවයක් හටගැනීම, කම්මුලේ පේශි දඟලන ස්වභාවයක් දැනීම, හිස නිතර සෙලවීමක් සිදුවීම, මුඛයේ කෙළවරකින් ඛේටය වැගිරීම ආදී ලක්ෂණ ඇතිවෙනවා. මුහුණේ අඩක ක්‍රියාකාරිත්වය අඩපණ වී තිබීමේ අවස්ථාවේ සිට එම අඩෙහි ක්‍රියාකාරිත්වය මුළුමනින්ම නතර වී යෑමටද හැකියි. රෝගියා නිදන අවස්ථාවේ ඇස් ඇරී පැවැතීම, ආහාර ගන්නා අවස්ථාවේදී මුඛයෙහි කොටසක ආහාර එක්රැස්වී පැවැතීම ආදී ස්වභාවයක්ද ඇතිවෙනවා. මීට අමතරව මුහුණේ පිළිබිඹු වන සතුට, සිනාව, දුක, කඳුළ, කේ‍රා්ධය, වෛරය, අනුකම්පාව වැනි හැඟීම් ප්‍රකාශ නොවීම මත යහපත් ආකාරයට මානුෂික සබඳතා පවත්වාගෙන යෑමටද බාධා ඇති වෙනවා. ෆේෂල් පැරලයිස් රෝගය සඳහා මූලික හේතුව වන්නේ නම් 7 වැනි ශීර්ෂණ්‍ය නාඩිය ආඝාත වීමයි. දරාගත නොහැකි අධික ශීතලට හෝ අධික උෂ්ණත්වයට හිස ප්‍රදේශය නිරන්තරයෙන් ලක්වීම මත හෝ කුමන හෝ කාලයකදී හිස තදබල කම්පනයකට පත්වීම හෝ හිසෙන් අධික ලෙස බර එසවීම නිසා හෝ දත් ගැලවීම නිසා හෝ මෙම ශීර්ෂණ්‍ය නාඩිය ආඝාත වීම සිදුවිය හැකියි. මීට අමතරව හිස, මුහුණ, බෙල්ල ප්‍රදේශයේ යම් සැත්කම් කිරීම හේතුවෙන් ඇතිවන පසු විපාක තත්ත්වයක් ලෙස මුහුණේ සමහර ප්‍රදේශවල ක්‍රියාකාරිත්වය අඩපණ විය හැකියි.
මුහුණේ පැත්තක හිරිවැටීමක් ඇතිවීම, පේශී ක්‍රියාකාරිත්වය යම් වෙනසක් දැකීම, හදිසියේ ඇතිවන තද හිසරදය, කරකැවිල්ල, ඇස් නළියන ස්වභාවය ආදී ලක්ෂණ කාලයක් තිස්සේ පවතීනම් වෛද්‍යවරයකු හමුවිය යුතුයි. කඩිනම් වෛද්‍ය ප්‍රතිකාර ලබා ගැනීම තුළින් ෆේෂල් පැරලයිස් රෝගයට සුවය ලබා ගත හැකියි. මේ සඳහා බටහිර හෝ ආයුර්වේද වෛද්‍ය ක්‍රම ඔස්සේ ප්‍රතිකාර ලබා ගත හැකියි. ඕනෑම රෝගී තත්ත්වයක් නිසා මිනිසුන් අසරණ වෙනවා. ඉහතින් සඳහන් කළ පරිදි ෆේෂල් පැරලයිස් රෝගය නිසා මිනිසුන් වැඩියෙන් අසරණ වෙනවා. මේ සඳහා ප්‍රතිකාර ලබා ගෙන රෝගය සුව නොවුණු සහ දීර්ඝ කාලයක් තිස්සේ නොකඩවා ප්‍රතිකාර ලබා ගන්නා රෝගීන් එය තමන්ගේ ජීවන උරුමය යැයි සිතා සිටිනවා. මුහුණේ ස්නායු අප්‍රාණිකව ඇති බැවින් නැවැත ඒවා ප්‍රාණවත් කළ නොහැකි නිසා රෝගය සුව නොකළ හැකි බවට නිර්දේශ ලැබූ රෝගීන් අප හමුවට එනවා. ආයුර්වේද ප්‍රතිකාර මඟින් එවැනි රෝගීන් සුව කළ හැකියි. ස්නායු පෝෂණය කර මුහුණේ ක්‍රියාකාරිත්වය සාමාන්‍ය තත්ත්වයට පත් කිරීමට සමත් බලගතු ඖෂධ ආයුර්වේද වෛද්‍ය විද්‍යාව සතුව තිබෙනවා. අතුරු ආබාධ ගෙන දෙන එන්නත් ලබා දීම ෆේෂල් පැරලයිස් රෝගය සඳහා යොදා ගැනීම හේතුවෙන් බරපතළ පසු විපාක ඇති විය හැකියි.
උපුටා ගැනීම මව්බිම
