🛍️   Business Directory
📣   Classifields
🛍️   Business Directory
📣   Classifields

ලේසර් ප්‍රතිකාරය පිළිකා කාරකයක්ද?

ලේසර් ප්‍රතිකාරය පිළිකා කාරකයක්ද?

ලේසර් යනු 

ලේසර් කිරණ විශේෂිත ශක්තිජනක කිරණ වර්ගයකි. එහි අධික ශක්තියක් ගැබ්ව ඇත. එම කිරණ සමේ හෝ අනෙකුත් ඉන්ද්‍රියක ගමන් කිරීමට හැකි දුර ප්‍රමාණ අනුව වෙනස් වෙයි. විවිධ වර්ගයේ ලේසර් නිපදවා ඇත. මෙලෙස අදාළ රෝගය සඳහා සුදුසු කිරණ විවිධ පරාසයෙන් භාවිත කරන අතර එය නිසි ලෙස භාවිත නොකරන්නේ නම් අතුරු ආබාධ ඇතිවන බව සැබෑවකි. ලේසර් මඟින් රෝග ගණනාවකට ප්‍රතිකාර කළ හැකිය.

ලේසර් මඟින් කළ හැකි ප්‍රතිකාර

නවීන වෛද්‍ය විද්‍යාවේ ලේසර් ප්‍රතිකාරය විවිධ රෝගවලට ප්‍රතිකාර කිරීමට යොදා ගනු ලබයි. නමුත් අප අද මෙහිදී සාකච්ඡා කිරීමට බලාපොරොත්තු වන්නේ චර්ම රෝගවලට ලේසර් ප්‍රතිකාරය යොදාගන්නා ආකාරයයි. මෙම ප්‍රතිකාරය ඉතා බහුලව යොදාගන්නේ රූපලාවණ්‍ය චර්ම ප්‍රතිකාරයන් සඳහාය.

අනවශ්‍ය රෝම ඉවත් කිරීම

කාන්තාවන්ට ඉතා කරදරයක් වන සහ ප්‍රතිකාර කිරීමට අවශ්‍ය වන මුහුණ සහ කම්මුල වැනි තැන්වල වැවෙන රෝම මෙම ප්‍රතිකාරය මඟින් ස්ථිරව සුව කළ හැකිය.

රුධිර නාළවල අක්‍රමිකතා නිසා ඇතිවන රෝග

උත්පත්තියෙන් ඇතිවන රුධිර වාහිනී අක්‍රමිකතා වැනි රුධිර වාහිනීවල ඇතිවන ආබාධ සඳහා ලේසර් කිරණ භාවිත කරනු ලැබේ. බොහෝ විට මේවා සමේ ලේ පැල්ලම් ලෙස දිස්වන අතර සමට අවලස්සනක් එක් කරයි.

සමේ පැහැයේ ඇතිවන අක්‍රමිකතා

මුහුණේ හෝ අනෙක් තැන්වල ඇතිවන උපන් ලප හෝ මෙලස්මා වැනි මුහුණේ ඇතිවන දුඹුරු පැහැති වර්ණය ඉවත් කිරීම සඳහා මෙම ප්‍රතිකාරය භාවිත කරයි. එයින් සම පැහැපත් මෙන්ම දුර්වර්ණ වීම පාලනය කළ හැකිය.

සමේ ඇතිවන කැළැල්

සමේ ඇතිවන උඩට මතුවූ තුවාල කැළැල් වැනි තත්ත්වයන් සඳහා සමහර විට මෙම ලේසර් ප්‍රතිකාරය භාවිත කළ හැකිය. මෙමඟින් අවම කැළැලක් ඇති වන සේ සමේ ඉලිප්පීම් හා අනවශ්‍ය වර්ධනයන් ඉවත් කළ හැකිය.

අනෙකුත් භාවිතයන් කරන අවස්ථා
  • ඉන්නන් - සාමාන්‍ය ප්‍රතිකාරවලින් සුව නොවන විට
  • සමේ පිළිකා
  • කුරුලෑ සහ කැළැල්
  • වයස්ගත වීමත් සමඟ මුහුණේ ඇතිවන රැලිවැටීම්

මෙම ප්‍රතිකාරයෙන් නියම ප්‍රතිඵල ලබාගැනීමට නම් හොඳින් එම තාක්‍ෂණය ප්‍රගුණ කළ වෛද්‍යවරයකුගෙන් එම ප්‍රතිකාරය ලබාගත යුතුය. එසේම ප්‍රතිකාරය අතරතුර ඇස් ආරක්‍ෂා කිරීමට විශේෂිත වූ කණ්ණාඩි පාවිච්චි කළ යුතු අතර සමහර අවස්ථාවලදී අනවශ්‍ය ලෙස සමට හානි වීමද සිදුවිය හැකියි.

අතුරු ආබාධ

ලේසර් ප්‍රතිකාරය නිවැරැදිව සිදුකරන්නේ නම් ඉන් මහඟු ප්‍රතිඵල ලබාගත හැකියි. නමුත් වෙනත් ප්‍රතිකාර ක්‍රමවල මෙන්ම එහි හොඳ නරක දෙපැත්තක් තිබීමටද පුළුවන. මෙය නිසියාකාරව නොකිරීම නිසා විවිධ අතුරු ආබාධ ඇතිවිය හැකිය.

  • තාවකාලිකව ඇතිවන වේදනාව, රතුපැහැ වීම, පිළිස්සී ඇතිවන දියබුබුළු
  • සමේ කැළැල්
  • සමේ තද හෝ ළා පැහැ තත්ත්ව ඇතිවීම.

එවැනි අතුරු ආබාධ ඇති වුවද පිළිකා ඇතිවේ යැයි අනිසි බියක් ඇතිකර නොගත යුතුයි.

සැලකිලිමත් වන්න

ඇතැම් ස්ථානවල ලේසර් ලෙස සඳහන් කර විවිධ ප්‍රතිකාර සිදුකරයි. නමුත් එය නිසි ලේසර් ප්‍රතිකාරය නොවිය හැකිය. ආලෝක ප්‍රතිකාරවලින් විවිධ රෝගවලට ප්‍රතිකාර කරන අතර එම ප්‍රතිකාර රෝගවලට සාර්ථක වෙයි. නමුත් සෑම එළියක් විහිදුවන උපකරණයක්ම ලේසර් යැයි වරදවා වටහාගත යුතු නොවේ. රෝග සඳහා කරනු ලබන ඇතැම් ලේසර් ප්‍රතිකාර රජයේ රෝහල්වල සිදුකරන අතරම රූපලාවණ්‍ය කටයුතු සඳහා ලේසර් ප්‍රතිකාර කිරීමට සුදුසු පිළිගත් වෛද්‍යවරයකු වෙත යෑම වඩා වැදගත්ය.

ශාලිකා රංගනී සමරදිවාකර
මව්බිම