🛍️   Business Directory
📣   Classifields
🛍️   Business Directory
📣   Classifields

ආපසු හැරිලා ගිහින් දොර වහලා ආවා දැයි බලන ලෙඩේ ඔබටත් තිඛෙනවාද?

ආපසු හැරිලා ගිහින් දොර වහලා ආවා දැයි බලන ලෙඩේ ඔබටත් තිඛෙනවාද?

එක් සන්ධ්‍යාවක අප කාර්යාලයට ඇතුළු වූයේ ඉතා පිරිසිදුවට හොඳින් හැඳ පැලඳගත් කාර්යාලීය බෑගයක් ද අතින් ගත් කඩවසම් තරුණයෙකි. ඔහුට අසුන් ගන්නා ලෙස ආරාධනා කළ විගස ඔහු මා ඉදිරියේ සෙමින් ආසනයේ හරි බරි ගැසෙමින් වාඩි වී ඔහුගේ කතාව ඉක්මනින් ම පවසන්නට විය.

මම බැඳලා වැඩි කාලයක් නෑ. අපි දෙන්නා වසරක පමණ කාලයක් ආශ්‍රය කරලා දෙපැත්තෙම ආශිර්වාදය මැද්දෙ තමයි විවාහ වුණේ. එයා හරිම හොඳ ක්‍රියාශීලී දක්ෂ කෙනෙක්. අවංකවම මට ආදරය කළා. කියන්න තරම් වරදක් නෑ. ඇයත් මම වැඩ කරන කාර්යාලයේමයි වැඩ කරන්නෙ. බැඳලා මාස 3 යන කොට මට තේරුණා මෙයාව මට ගැළපෙන්නෙ නෑ කියලා. මොකද හරි කලබලයි. වැඩ වල කිසිම පිරිසුදු කමක් පිළිවෙළක් නෑ. එයා හරිම කඩිසරයි. කාර්ය ශූරයි. නමුත් ගෙදරදි එහෙම නෑ.‍ මේවාට කතා බහ වෙලා අපි අතර හිත් නොහොඳකම් ඇති වුණා. මම ඒත් එයාට ගොඩක් ආදරෙයි. එයා එහෙම වෙන කිසිම කෙනෙක් එක්ක වෙන සම්බන්ධයකුත් නෑ‍. මටත් එහෙම නෑ‍. නමුත් දැන් එයා කියනව එයාට මගෙන් වෙන් වෙන්න අවශ්‍යයිලු. මේ ප්‍රශ්නය නිසා දැන් අපි දෙන්නාට කාර්යාලයේ වැඩ කරගෙන යන්න අමාරුයි. මට දික්කසාද වෙන්න නෙමෙයි අපේ පවුල රැකගන්න උදව් කරන්න. ඔහු දිගටම කතා කරගෙන ගියේ ය. මම කිසිදු කතාවක් නොකර අසා සිටියෙමි. ඉන් පසු ඔහු සමඟ කතා බහ කළ සාකච්ඡාවේදී දැන ගත් කරුණ නම් සඳුන් නම් වූ මෙම තරුණයා පෞද්ගලික ආයතනයක විධායක ශ්‍රේණියේ රැකියාවක් කරන අතර වැදගත් පවුලක ඉපිද හොඳින් ඉගෙන ගත් තරුණයෙකි. චමරි නම් වූ ඔහුගේ බිරිය පවුලට ගැළපෙන ඉතා උගත් වැදගත් කාන්තාවක් වූවා ය. සඳුන් පිළිවෙළට සියලු දේ කරන පිරිසුදුකම ගැන වැඩි උනන්දුවක් දක්වන ජීවිතය පිළිබඳව සැලසුම් කළ අයෙකු මුත් ඔහුගේ සිතුම් පැතුම් හා ක්‍රියාශීලීත්වයේ යම් වෙනසක් ද මා හට පැහැදිලි විය. ඒ කෙසේ වුව ද මෙය පවුලේ ප්‍රශ්නයක් වූ බැවින් මේ සඳහා සාර්ථක මඟ පෙන්වීමකට යෑමට අවශ්‍ය නම් බිරිය ද කැටුව පැමිණෙන ලෙස මා ඔහුට පැවසුවෙමි. පසු දිනෙක අපගේ ආරාධනයෙන් චමරි නම් වූ සඳුන්ගේ බිරිය සඳුන් සමඟ අප කාර්යාලයට පැමිණියා ය. මා පළමු දිනයේ සඳුන්ගේ සිතුම් පැතුම් හා ක්‍රියාවන් පිළිබඳව කළ නිරීක්ෂණයෙන් චමරි කළ හෙළිදරව්ව සමඟ සසඳන්නට විය. චමරි පැවසුවේ සඳුන් ඉතා ප්‍රියමනාප පිළිවෙළකට වැඩ කරන පුද්ගලයෙකු වූ බැවින් ඔහු සමඟ විවාහ වීමට තීරණය කළ බවයි. නමුත් විවාහ වී ඉතා ටික දිනකින් සඳුන්ගේ අසාමාන්‍ය සිතුම් පැතුම් හා හැසිරීම හා ක්‍රියාවන් ඇයට දක්නට ලැබුණු බව ඇය කීවා ය. ටික කාලයක් යෑමේදී ඒ පිළිබඳව කතා බහ දෙදෙනා අතර දික් ගැස්සී ඇත. සඳුන් පිළිබඳව චමරි දකින දුර්වලතාවය නම් පිරිසුදු කිරීම ඕනෑවට වඩා වැඩි වීමයි. සෑම බඩුවක් ම ඇඳුමක් ම ඔහු යම් කිසි පිළිවෙළකට තබයි. එහි යම් කිසි වෙනසක් සිදු වුවහොත් සඳුන්ට අසීමිත ලෙස තරහ යයි. මල් පෝච්චියක් එහා මෙහා කිරීම වැනි දේ ඊට උදාහරණයන් ය. කොතරම් පිරිසුදුව ඇඳුම් පැලඳුම් තැබුවත් සඳුන්ට එහි අඩු පාඩු පෙනෙයි. ඇඳුම අඳින්නට පෙර බොහෝ වාරයක් ගසමින් සිටී. විවාහයෙන් පසු කිසි දිනෙක වේලාවට පෙර කාර්යාලයට යෑමට චමරි හට නොහැකි වී තිබේ. ඇය උදේ සඳුන් නිවසින් පිටවී යෑමට පෙර වැඩ කටයුතු බොහෝ වේලාවක් ගත වන බැවිනි. නිවසේ යතුර දමා යතුරු පැදියෙන් ටික දුරක් ගොස් නැවත හැරී එන්නේ යතුර නිසි අයුරින් වැසුණා දැයි බැලීම සඳහා ය. මෙම ප්‍රමාදය උදෑසන සිට දිනය අවසන් වන තෙක් ම පවතින බව චමරි අප හා පැවසුවා ය. චමරිගේ කතාව ඉතා සාවධානව අසා සිටි සඳුන් පැවසුවේ ඇයගේ කතාව සත්‍ය බවට අනුමත කළේ ය.

මේ වනවිට වරද කාගේදැයි පැහැදිලි විය. ඇත්ත වශයෙන් ම හෙළිදරව් වූ කරුණු අනුව කතා නායකයා වන සඳුන් බොහෝ කලක සිට නිව්රෝශීය තත්වයේ මානසික රෝගයක් වන ග්‍රස්තීය අනිවාර්ය අක්‍රමතා වෙන් පෙළෙමින් සිටී. මෙම රෝගී තත්ත්වයේදී මූලිකවම සිදුවන්නේ යම් කිසි පාලනය කරගත නොහැකි සිතුවිල්ලක් හෝ ක්‍රියාවක් කිරීමයි. මෙම රෝගී තත්ත්වය ජානමය තත්ත්වයක් යටතේ ද සමාජීය පරිසරයක තත්ත්වයක් යටතේ ද ඇති විය හැකි ය.

ඉදිරි මොළයේ ඇතිවන රසායනික විපර්යාස මොළය තුළ සිදුවන අතර ඕනෑවට වඩා පිරිසුදු බාවය, පිළිවෙළ සොයා බැලීම, බඩු බාහිරාදිය සෑම විටම පිළිවෙළට තැබීම, දොර අගුල් දැමීම, විදුලි ලාම්පු නිවීම, යමක් නැවත නැවත කිරීම මෙම රෝගයේ ලක්ෂණ කිහිපයකි. කරදරයක් වනුයේ මේ ආකාරයට ඕනෑවට වඩා සැලකිලිමත් වීම නිසා ඔවුන් බොහෝ විට ‍එදිනෙදා කටයුතු වලදී පමා වීමට ලක්වීමයි. එසේ ම තමාට අවශ්‍ය පරිදි කළහොත් තවත් අයෙකු විසින් එය වෙනස් කළහොත් කෝපයට පත්ව සමාජයේ අනිකුත් අය සමඟ ප්‍රශ්නවලට පැටලේ. උත්සව වැඩ වැනි පොදු අවශ්‍යතාවලදී බොහෝ ප්‍රශ්න ඇති වේ. සහකාරිය හෝ සහකාරයා මෙම තත්ත්වය හොඳින් හඳුනාගෙන ඉන් මිදීමට උදව් නොකළහොත් පවුල් ජීවිතයේ ප්‍රශ්න ඇතිවීම අනිවාර්ය වේ. ගුණ යහපත් කාන්තාවක වන චමරි සඳුන්ගේ මෙම තත්ත්වය ඉතා ඉක්මනින් හඳුනා ගත්තා ය. ඇය සඳුන්ගෙන් වෙන් නොවී සඳුන් සමඟ එකට ජීවත් වෙමින් ඔහුගේ මෙම රෝගී තත්ත්වය සුව කර ගැනීමට උදව් වීමට කැමැති වූවා ය. එය මේ යුවළට මෙන් ම අපට ද මහත් සැනසිල්ලක් විය. මෙවැනි රෝගීන් සඳහා‍ ඖෂධ ප්‍රතිකාර මෙන් ම මනෝ ප්‍රතිකාර ද බොහෝ ඇත. සංජානීය චර්යා ප්‍රතිකාර මේ රෝගය සඳහා අප යොදා ගත් අතර අනවබෝධයෙන් දික්කසාදය කරා යෑමට සිටි යුවලක් මේ වනවිට රෝගී තත්ත්වයන් ද මග හරවාගෙන බොහෝ සතුටින් කල් ගෙවයි.

මනෝ විද්‍යා උපදේශක මේජර් සුසන්ත ද සිල්වා (විශ්‍රාමික)

උපුටා ගැනීම සිළුමිණ පුවත් පත