🛍️   Business Directory
📣   Classifields
🛍️   Business Directory
📣   Classifields

දීර්ඝායුෂ ඕන නම් හොඳට නිදියගන්න

දීර්ඝායුෂ  ඕන නම් හොඳට නිදියගන්න

නින්ද ආයුර්වේද ඇසින්

නින්ද මිනිස් වර්ගයාට අවශ්‍ය මූලික කරුණුවලින් එකක් ලෙස ආයුර්වේදය හඳුන්වනවා. මේ මූලික අවශ්‍යතාවලටිත‍්‍රිවිධ උපස්ථම්භ’ කියනව. සැපවත් නින්දකින් නිරෝගී බව, ශරීර පෝෂණය, ශරීර බලය, බුද්ධිය හා ආයුෂ වර්ධනය වන බව සඳහන් වෙනවා. එමෙන්ම සුවදායක නින්දක් අඛණ්ඩව නොලැබෙන විට ඉහත කරුණු ඉටු නොවන බවත් රෝගී වීමටත්, ආයුෂ අඩුවීමටත් හේතු වෙනවා.

ප‍්‍රමාණවත් නින්දක් නොලබන විට

සාමාන්‍යයෙන් කෙනකුට අවශ්‍ය නින්දේ ප‍්‍රමාණය වයස සමග වෙනස් වෙනවා. කුඩා දරුවන්ට වැඩි පැය ගණනක් නින්ද අවශ්‍ය අතර වැඩිහිටියන්ට දිනකට පැය 6 * 9ත් දක්වා කාලයක් නින්ද අවශ්‍ය වෙනවා. තවත් වයස් ගත වනවිට පැය 5 - 7ක පමණ නින්ද හොඳටම ප‍්‍රමාණවත් වෙනව.

කාන්තාවන් වැඩිපුර නිදාගන්නව

සාමාන්‍යයෙන් කාන්තාවන් පිරිමින්ට වඩා වැඩිපුර විනාඩි 45ක් හෝ පැයක් පමණ නිදා ගන්නව.

නිශ්ශබ්දව සිදුවන ජීව විද්‍යාත්මක වෙනස්කම්

සාමාන්‍යයෙන් කාර්යබහුල දිවා කාලයේදී අපේ ශරීරයේ ජෛව රසායනික ක‍්‍රියාවලින් මෙන්ම ක‍්‍රියාකාරීත්වයද වැඩි වේගයකින් සිදුවෙනවා. රාත‍්‍රි කාලයේ ලබන සුවදායක නින්දකදී මෙම ක‍්‍රියාවලින් අවම වේගයකින් සිදුවෙමින් ශරීරයට යම් විවේකයක්, සැහැල්ලූවක් ලබා දෙනවා. ශරීරයේ තාපය නිෂ්පාදනය (උණුසුම) සාමාන්‍ය ප‍්‍රමාණයට වඩා සියයට 10 - 15 කින් (10 - 15%) පමණ අඩු වෙනවා. රාත‍්‍රියට ශක්ති අවශ්‍යතාවන් අඩුයි. හදවතේ ස්පන්දනයද රාත‍්‍රි කාලයට අඩුවෙනවා. රුධිර පීඩනයත් නින්දේදී අඩුයි. ඒ වගේම පිට කරන අනු ප‍්‍රමාණයත් රාත‍්‍රියට අඩු වෙනවා. මාංස පේශිවල තද බවද අඩු වී සැහැල්ලූ වෙනවා. මේ අනුව පෙනී යන්නේ නින්දේදී අප ඉතාම සැහැල්ලූවෙන් සිටින බවයි. ශරීරය ඉතාම පහසුවෙන් සිටින බවයි. නමුත් අපගේ සිහිය හොඳින් ක‍්‍රියාත්මක වෙනව.

ප‍්‍රමාණවත් නින්දක් දිගුකාලීනව නොලැබීමෙන් ඔබ රෝගී වෙනව.

සාමාන්‍යයෙන් රාත‍්‍රියට නිදිවර්ජිතව සිටීමෙන් ඔබගේ ශරීරයේ ජීව විද්‍යාත්මක රටාව බිඳවැටෙනව. ශරීරයට අවශ්‍ය ස්වාභාවික සැහැල්ලූ බව නොලැබී යනවා. අවසානයේ දිගුකාලීන රෝගවලට ගොදුරු වෙනවා. විශේෂයෙන්ම නින්දේ අඩුකම ස්නායු පද්ධතියටත් බලපානවා. කලක් අධිකව නිදි මැරීමෙන් ඔබගේ මතක ශක්තිය අඩුවෙනවා. ඔබට නිතර නොරුස්සනසුලූ බවක් ඇති වෙනව. එමෙන්ම අධික විඩාබර බවක් දැනෙනවා. වෙනත් දෛනික කටයුතුවල පලදායික ලෙස යෙදීමට නොහැකි වෙනවා. ඒ වගේම "සාංකාව" වැනි රෝග ලක්ෂණ ඇතිවෙන්නත් පුළුවන්. 

නින්ද නොයෑම

සමහර අයට නින්ද නොයෑම රෝග තත්ත්වයක් දක්වාම වැඩි දියුණු වූ අය සිටිනවා. නින්ද නොයෑමි අනිද‍්‍රා’ ලෙස හැඳින්වෙනවා. වර්තමාන ඉතා කාර්යබහුල ජීවන රටාව තුළ නින්ද නොයෑම බොහොමයක් දෙනාට කරදරයක් වෙනවා. රාත‍්‍රි කාලයේ සුවබර නින්දක් නොලැබුණු විටෙක පසුදින කළයුතු කාර්යයන්ටද එය අනිසි ලෙස බලපානවා.

නින්ද නොයෑමට හේතු

විශේෂයෙන්ම මෙයට බලපාන්නේ මානසික ආතතියයි. වයස් ගතවීමත් තවත් හේතුවක්. එසේම වැඩ අධික බව කායික මානසික විවේකයෙන් තොර වීම, තේ, කෝපි වැනි දේ රාත‍්‍රියට වැඩිපුර පානය කිරීම, ආදිය නින්ද නොලැබීමට හේතු වෙනව. ඒ වගේම රාත‍්‍රියට නිරාහාරව නින්දට ගියොත් නින්ද අඩු වෙන්න පුළුවන්. මෙවැනි කරුණු සාමාන්‍ය දේවල් වුවද සමහර සැලකිය යුතු කායික රෝග නිසාද නින්ද නොලැබී යන්නට ඉඩ තිබෙනවා.

සුවබර නින්දකට උපදෙස්

ඔබට සුවබර නින්දක් ලැබීමට අවශ්‍ය නම් නින්දට යන අවස්ථාවේදී ඔබ කායිකව මෙන්ම මානසිකවද පිරිසුදු විය යුතුය. හොඳින් ඇග සෝදා පිරිසුදු වී ආගම සිහිකර නින්දට යන්න. එවිට ඔබට සුවබර නින්දක් ලැබේ. නින්ද අඩුවෙන් ලබන අය දිවා කාලයේදී කිසියම් ව්‍යායාමයක නියැළෙන්න. රාත‍්‍රි කාලයේදී සැහැල්ලූ එහෙත් ප‍්‍රමාණවත් ආහාර වේලක් ගැනීමට උත්සුක වන්න. ඔබ නිදාගන්නා ස්ථානයේ හොඳ වාතාශ‍්‍රයක් තිබිය යුතුයි. අනවශ්‍ය ශබ්ද ආදියෙන් තොර විය යුතුය. එසේම තද ආලෝකයෙන් තොර විය යුතුය. විදුලි බුබුළු නිවා දමා අඳුරේම නිදා ගැනීම සුව නින්දට හේතු වෙනවා. ඇඳ, මෙට්ටය මෙන්ම කොට්ටයද තද බවෙන් තොර විය යුතුය. ඇඳ ඇතිරිලි ලා පැහැයෙන් තිබෙන්නේ නම් වඩා සුදුසුය. නින්දට යෑමට පෙර වාද විවාදවලට යොමුවීම රණ්ඩු සරුවල්වලට යොමු වීම මෙන්ම බියකරු දර්ශන ඇතුළත් චිත‍්‍රපට, ටෙලි නාට්‍ය වැනි දේ නැරැුඹීම් නිසාද නින්ද අඩුවන බැවින් ඒවායින්ද වැළැකීම සුදුසුය.


නිදන ඉරියව්වත් වැදගත්

ඔබ ඔබට පහසු ඇලයකට හැරී නිදා ගැනීමයි වඩා සුදුසු. උඩුබැලි අතට නිදා ගැනීම සුදුසු නොවේ. අප කුමන ඉරියව්වෙන් නිදා ගත්තද, රාත‍්‍රියේදී වරින් වර ඉරියව්ව වෙනස් වීම සාමාන්‍ය දෙයක්.


නින්ද අඩු අයට ප‍්‍රතිකාර

සාමාන්‍යයෙන් නින්ද අඩු අය නිතර ඖෂධවලට යොමු වීම දක්නට ලැබෙන දෙයක්. නමුත් නින්ද ගෙන දෙන ඖෂධවලින් කාලීන වශයෙන් අහිතකර ප‍්‍රතිඵල ඇති වෙනව. ඒවාට ඇබ්බැහි වෙන්න පුළුවන්. ඒ වගේම විවිධ අතුරු ආබාධ ඇතිවෙන්නත් පුළුවන්. එම නිසා එවැනි ඖෂධවලින් වළකින්න. නියමිත වෙලාවට නින්දට යෑම වැදගත් වෙනව. ඒ සඳහා පුරුද්දක් ඇතිකරගන්න. විටමින් බී, සී, ඞී, වගේම කැල්සියම්, මැන්ගනීස්, පොටෑසියම් වැනි පෝෂණ සංඝටක ආහාරයෙන් නොලැබී යන විටත් නින්ද අඩු වීමට ඉඩ තිබෙන නිසා මේවා අඩංගු අංග සම්පූර්ණ ආහාර වේලක් ගැනීමත් අවශ්‍යයි. රාත‍්‍රියට තේ, කෝපි, මද්‍යසාර, චොක්ලට් වැනි දේවලින් වළකින්න.

ආයුර්වේද උපදෙස්

නින්ද අඩු අයට හිසට තෙල් වර්ගයක් (ඖෂධීය) දමා හොඳින් සම්බාහනය කිරීම සුව නින්දකට හේතු වෙයි. එසේම කිරි, ගිතෙල් යනාදිය ඖෂධ සමග හා ආහාර වශයෙන් ගැනීමෙන් නින්ද හොඳින් ලැබීමට හේතු වෙනවා. එසේම නිදන කාමරය සුවඳවත් කිරීම, මිහිරි සියුම් සංගීත රාවයකට කන්දීම හා ප‍්‍රියමනාප සිතුවම් නිදන කාමරයේ තැබීමද සුබදායක නින්දකට හේතුවන බව ආයුර්වේදයේ දැක්වෙනවා.

සුව නින්දක් නොලැබෙන අයට නිවෙසේදී අත්හදා බැලිය හැකි ප‍්‍රතිකාර

  • රාත‍්‍රි නින්දට යෑමට මොහොතකට පෙර මඳ උණුසුම් කිරි වීදුරුවක් මීපැණි තේ හැඳි 1ක් (හෝ සීනි ස්වල්පයක්) දමා පානය කරන්න. කිරිවල ඇති ඇමිනො අම්ලය නින්ද ඇති කිරීමට උදවු වෙනවා. 
  • නින්දට යෑමට පෙර සුළු වේලාවක් සරල ව්‍යායාමයක යෙදෙන්න. අවශ්‍ය නම් ශීර්ශාසන සර්වාංගාසන හෝ පශ්චිමෝත්තානාසන වැනි යෝග ආසනයක යෙදෙන්න. එවිට මාංස පේෂී අතර Lactic acid එකතුවීම වළකී. මොළයට හොඳ රුධිර සැපයුමක් ලැබේ. ශරීරය හා මනස සැහැල්ලූ වේ. ඔබට සුව නින්දක් ලැබේ.
  • මඳ උණුසුම් වතුර බේසමකට පාද දෙක දමා විනාඩි 15ක් පමණ තබාගෙන පසුව ඉවතට ගෙන වතුර පිසදමා ඖෂධීය තෙල් ස්වල්පයක් පාදවල ආලේපකර පිරිමදින්න. මෙය හොඳ නින්දක් ලැබීමට හේතු වෙනව.

මේ ආකාරයට සුවබර නින්දක් ලැබීම නිරෝගී වීමටත් දීර්ඝායුෂ ලැබීමටත් හේතු වෙනව. ඒ වගේම සුව නින්දක් ලැබීමටත් තරුණ බව රැුක ගැනීමටත් ලස්සන වෙන්නටත් හේතු වෙනව.

උපුටා ගැනීම මව්බිම පුවත් පත