හදිසියේ ඇතිවන ක්ලාන්තයට කළ යුතු පිළියම්
අපගේ ශරීරයේ අපේ පාලනයකින් තොරව ක‍්‍රියාත්මක වන ස්වයං සාධක ස්නායු පද්ධතියට අයත් ප‍්‍රත්‍යානුවේගී ස්නායුවක ක‍්‍රියාකාරීත්වය නිසා, ක්ලාන්තය සිදු වේ. නමුත් මේ ආකාරයට ඇතිවන ක්ලාන්තයට අමතරව තවත් විවිධ වූ වෛද්‍යමය හේතු කාරණා නිසාද සිහි නැතිව ඇද වැටෙන්න පුළුවන් මේ නිසාම සාමාන්‍ය ක්ලාන්තයක්, වෙනත් හේතුවකට ඇතිවිය හැකි ක්ලානත්යකින් වෙන් කරවා ගැනීම වෛද්‍යවරයකු සතු කාර්යයක් වනවා. රෝගියා විසින් දෙනු ලබන රෝග විස්තරය අනුව වලිප්පුව, කරකැවිල්ල, රුධිර සීනි අඩුවීම, හිස බර ගතිය ආදී ලෙස වූ වෙනත් කාරණා ද සැලකිය යුතු වෙනවා. විශේෂයෙන් නිතර නිතර ක්ලාන්තයට ලක්වන පුද්ගලයන් වෛද්‍ය උපදෙස් හා අවවාද ලබා ගත යුතු වෙනවා. මෙලෙස ඇතිවන ක්ලාන්ත තත්ත්වයට ඇති ප‍්‍රතිකාර ක‍්‍රම ගැන කතා කරන කොට පළමුවෙන්ම සිතිය යුතු කාරණය වන්නේ "වැළැක්වීමයි".
(Avoidance of triggers) මේවා ගැන නැවත මතක් කරනවා නම් රුධිරය දැකීම, රුධිරය සිරින්ජයකට ලබා ගැනීම බලා සිටීම, වැඩි වේලාවක් සිටගෙන සිටීම, එකවරම සිට ගැනීම, දැඩි ඔසප් වේදනා, නින්ද නොමැති වීම, බඩගින්නේ සිටීම, විජලනය, තද උෂ්ණාධික පරිසරයක සිටීම, ආදී කාරණා ඒ අතර වනවා. නමුත් දැඩි ආවේග හා ශෝක ජනක අවස්ථාවන් (Extreme emotion) හදිසි අනතුරුවලින් ලේ ගැලීම ආදිය ප‍්‍රයෝගිකව වැළැක්වීම හෝ පාලනයක් කළ නොහැකි දෙයක් වන බව මතක් කළ යුතුව තිබෙනවා. ඒ වගේම එන්නතක් ලබාදීමේදී සිහි නැතිවන අය කකුලක් මත අනිත් කකුල දමා තද කරගෙන සිටීමෙන් (Crossing legs and tightening them) රුධිර ගමන අඩු වී ක්ලාන්තය ඇතිවීම අවම කළ හැකි වනවා. ඒ වගේම ක්ලාන්තය ඇතිවිය හැකි අවස්ථාවලට මුහුණ දීමට පෙර හොඳින් දියර පානයක් කිරීම මගින් (විශේෂයෙන් ලූණු හා ලවන අඩංගු දියර) රුධිර පරිමාව තරමක් වැඩිකර අඩු රුධිර පීඩනයට මුහුණ දිය හැකි වෙනවා. මීට අමතරව අධික රුධිර පීඩන ඖෂධ ප‍්‍රතිකාර මගින්, සිට ගන්නා විට ක්ලාන්තය ඇති කරනා අවස්ථාවල ඒ පිළිබඳව වෛද්‍ය උපදෙස් ගැනීම වැදගත් වෙනවා. වඩාත් වැදගත් ක‍්‍රියාමාර්ගය වන්නේ ක්ලාන්තය සෑදීම පිළිබඳ පෙර ලකුණු දැනෙන පුද්ගලයෙකු නම් වහාම හිස පොළවට සමාන්තර වන සේ බිම දිගාවීමක් පාදයන් පොළවෙන් ඉහළට ඔසවා ගෙන තැබීමට කටයුතු කිරිමත් හෝ එවැනි දෙයක් කිරීම අපහසු අවස්ථාවක අවම වශයෙන් ඉඳගෙන සිටියදී තම හිස බිමට දමාගෙන සිටිමත් යන කාරණායි. සම්පූර්ණ සිහි නැතිවීමකදී, උගුරේදී දිව පහළට වැටී සිදුවන හුස්ම ගැනීම අවහිර වීම වැළැක්වීමට (හිස පසෙකට හරවන සේ) බිම දිගාකර තබා නිකට ප‍්‍රදේශයෙන් හිස මඳක් ඉහළට එසවීමත් ජීවිතය බේරා ගන්නා ප‍්‍රථමාධාර ක‍්‍රියාවක් වනවා. නිතර නිතර සෑදෙන ක්ලාන්තවීම සඳහා ඖෂධ ප‍්‍රතිකාර නියම කෙරෙන බවද මතක තබා ගත යුතු වෙනවා. කෙසේ වෙතත් මේ සඳහා අදාල හේතුවත්, විශේෂඥ වෛද්‍ය උපදෙසුත් අවශ්‍ය වෙනවා. අවසාන වශයෙන් සටහන් කළ යුතු වන්නේ, කෙටි කාලකයට සීමාවන ක්ලාන්තයන් ශරීරයට එතරම් බලපෑමක් හෝ විශේෂ රෝගයක රෝග ලක්ෂණ වීමට ඉඩකඩ අඩු අතර ඇදගෙන වැටීමේදී සිදුවිය හැකි බාහිර අනතුර හා තුවාල විම් නම් සමහර අවස්ථාවල බරපතල තත්ත්වයන් ඇති කරන බැව් මතක් කළ යුතු වෙනවා.
උපුටා ගැනීම දිනමිණ පුවත් පත
