හෙළ ඔසුවෙන් සුවය ලබමු
අපේ රටේ පැරැුන්නන් අතීතයේ දී නොයෙක් ආකාරයෙන් ජීවිතය ජය ගන්නට උත්සාහ දරා තිබෙනවා. නූතනය තරම් නොදියුණු සමාජයක සිටි ඔවුන් අභියෝගාත්මක අරමුණ කරා හොඳීන් ළගා වී ඇත්තේ ද ස්වෝත්සහයෙන් ය. එහෙත් වර්තමානය, සියලූ ඉල්ලූම් - සැපයුම් න්‍යායන් මුදල මත තීරණය වී ඒ මත පමණක් පාලනය වීමකට ලක්ව ඇත. නමුත්, ඒ තුළින් අපට වටිනා යමක් මගහැරී යන්නේ නොදැනුවත්වම ය. එදා අත් බෙහෙත් භාවිතාකර යමෙක් අනතුරකින් ගලවා ගැනීමේ හැකියාව බොහෝ දෙනකුට තිබුණි. එය රෝග ලක්ෂණයකට කරන්නා වූ ප‍්‍රතිකර්මයකි. එහෙත් අද, කාර්යබහුලත්වය සමග මිනිසාට එවැනි දෑ මතකයෙන් ගිලිහී ගොස් ය.
තැල්මකට
අපගේ දෛනික කටයුතු අතරතුර යම් තැළුමක් ඇතිවුවොත් එය වේදනාකාරී ය. ඒ සඳහා අත්කහ ලූණු වතුරෙන් දියකර පොල් තෙලෙන් කකාරා ගාන්න පුළුවන්. එසේම රත්හඳුන්, කපුරු, තිත්තඅදිං අරක්කුවලින් අඹරා ගාන්න පුළුවන්. තව ද අඹ පොතු, කැන්ද පොතු, අහු පොතු කොටා එහි යුෂ ගෙන කකාරා ගෑ හැකියි.
කිහිල්ලේ ගෙඩියකට
යම් අවස්ථාවක කිහිල්ලේ ගෙඩියක් ඇති වුවොත් හොර ඉටි, කැකුණ ඉටි, මී ඉටි, කපුරු, සිවන්ගුරු, තිත්අදින් සමානව ගෙන එඩරු තෙලෙන් අඹරා ගාන්න පුළුවන්. එසේම ඒ සඳහා තල, එඩරු ඇට, නෙල්ලි සමානව ගෙන කබලෙන් බැද එළගි තෙලෙන් අඹරා ගාන්න පුළුවන්. තව ද පුහුල් කොළ ඇල්වතුරෙන් අඹරා ගාන්න පුළුවන්.
ගල්තැලූමක්
ගල් තැලූමක් නම් එරඹඳු කොළ, අමුකහ, ලූණු එකට කොටා මලවා බදින්න පුළුවන්. එම තැලූමටම කළුවෙල්ලන්ගිරිය කොළ, කහ, පොල්, ලූණු දමා කොටා මීතෙලෙන් මලවාගෙන බදින්න පුළුවන්.
විසප්පුවක්
විසප්පුවක්. එසේත් නැති නම් විසර ගෙඩියක් ඇති වුවොත්, නික මුල් පොතු, රුක්අත්තන පොතු, අරළු, වියලි ඉගුරු සමව ගෙන සියඹලා යුෂෙන් අඹරා කිහිප වතාවක් ගෑ හැකියි. එවිට එය පුපුරා යනවා. ඒ සඳහාම දෙහි ගැට, අමුකහ, රතු ළූණු, වැල් පෙනෙල, දිය හඹරල එක සමානව ගෙන පොල් කිරෙන් තම්බා අඹරා ගාන්න පුළුවන්.
සෙම්ගෙඩි
සෙම්ගෙඩි තිබෙන විටකදී ඉගුරු, ගම්මිරිස්, තිප්පිලි, සහිඳ ලූණු, කරඳමුංගු, සංසද මුල් ඇඹුල් දොඩම් ඉස්මෙන් අඹරා රෙදි කෑල්ලක පොට්ටනියක් බැඳ හක්කේ තබාගන්න. එවිට සියලූ සෙම පිටව යනවා.
මුත‍්‍ර දැවිල්ලට
මුත‍්‍රා දැවිල්ල ඇති අයකුට ගොටු කොළ, රතුළූණු, කිතුල් හකුරු ගෙන කොටා වතුර ටිකක් දමා ඉස්ම ගෙන බීමට දීම සුදුසුයි. හීන්දැරිච්චි, පොල්පලා තම්බලා බොන්න දෙන්න. සුදු හඳුන් කුඩු තැඹිලි වතුරට දමා බීම සුදුසුයි. කුඩා දරුවකු නම් සුදු හඳුන් කුඩු ගෙන යටි බඬේ ගෑම ද සුදුසුයි.
උපුටා ගැනීම දිනමිණ පුවත් පත
