පණ වගේ ඇස් දෙක රැකගන්න
ඇස් පරීක්ෂා කරගන්න 40 පනිනකම් ඉන්න එපා.
ඔබ වඩාත්ම ආදරය කරන වස්තුව ඇස් දෙක වගේ රැකබලා ගන්න කියලානේ හැම විටම කියන්නේ.
ඒත් ඒ තරමටම සැලකිල්ලෙන් ඔබ ඔබේ ඇස් දෙක රැක බලා ගන්නවා ද?
ඒ පැනය තමාගෙන්ම අහන වැඩි දෙනෙකු ‘ඇත්තමයි අපි අපේ ඇස් දෙක ගැන ඒ තරම් හොයා බලන්නෙ නෑ’ නේදැයි සිතේවි. ඇස්වල ආබාධයක් ඇති වුණොත් ඇහැට අනතුරක් සිදු වුණොත් නැතිනම් ඉබේම පෙනීම අඩු වුණොත් නම් අපි ඉක්මනට ඇස් දොස්තර මහත්තයා ළඟට දුවනවා. ඒත් ශරීරයේ වටිනාම ඉන්ද්‍රියක් වන ඇස් දෙක ඇස් දෙක වගේ රැක ගන්නට නම් ඔබ අඩුම තරමින් අවුරුද්දකට වරක් වත් ඇස් පරීක්ෂා කර ගන්නට ඕනෑ. ඇස් රැක ගැනීම ගැන කතා කරන්නට හේතු වුණේ පසු ගිය දහ වැනිදාට ලෝක දෘෂ්ටි දිනය යෙදී තිබූ හේතුවෙන්. සෑම වර්ෂයකම ඔක්තෝබර් මාසෙ දෙවැනි බ්‍රහස්පතින්දාට ලෝක දෘෂ්ටි දිනය සමරනවා. මේ අවුරුද්දේ එහි තේමාව වුණේ “ඔබේ ඇස් පරීක්ෂා කරගන්න” යන්නයි. ඇස් පරීක්ෂා කරගන්නට විශේෂ හේතුවක් අවශ්‍ය නෑ. වයස අවුරුදු හතළිහ පැන්නාම පෙනීමේ ඇතිවන වෙනස්කම් නිසා බොහෝ දෙනෙක් “හතළිස් ඇඳිරිය” ඇවිත් කියලා ඇස් පරීක්ෂා කරවා ගන්නවා. ඒත් වයස අවුරුදු හතළිහට කලින් වුණත් ඇස්වල නිරෝගී බව ගැන ඔබ උනන්දු වෙන්නට ඕනෑ.
ලෝක ජනගහනයෙන් මිලියන තිස් නවයක්ම අන්ධ භාවයට පත්ව ඇති බව ඔබ දන්නවා ද? මොවුන් අතරින් වැඩි දෙනෙක් ලංකාව වැනි දියුණු වෙමින් පවතින රටවල ජනතාව එලෙස අන්ධ භාවයට පත්වන්නට හේතු වී ඇත්තේ ඇසේ සුද, දියවැඩියාව හේතුවෙන් ඇතිවන අක්ෂි ආබාධ, ග්ලූකෝමාව, දෘෂ්ටි ආබාධ සහ ළමා වියේ අන්ධ භාවයයි. එසේ අන්ධ භාවයට පත් වූවන් ගෙන් සියයට 80 ක්ම කල් තියා ඇස් පරීක්ෂා කර ගත්තා නම් වළක්වා ගත හැකි අන්ධ භාවය වීමයි එහි ඇති ඛේදජනක තත්ත්වය. නිසි කලට ඇස් පරීක්ෂා කරනවා නම් සෑම පුද්ගලයන් පස් දෙනකුගෙන් හතර දෙනකුගේම අන්ධ භාවය වළක්වා ගන්නට පුළුවන්. අන්ධ භාවයට බලපාන ප්‍රධාන හේතු කිහිපයක්ම තිබෙනවා. ඇසේ සුද, හතළිස් ඇඳිරිය, ග්ලූකෝමාව, දියවැඩියාව ප්‍රධාන වන අතර මවුපියන් ඇස් රෝගවලින් පෙළෙන විට ඇතිවිය හැකි ජානමය බලපෑම ඇසට අනතුරු සිදුවීම හා වෙනස් ඇස් රෝග, ඇසට රසායනික ද්‍රව්‍යයක් ඇතුළුවීම, වපරය, ලේ නෑයින් අතර විවාහය සහ මන්ද දෘෂ්ටිකතාව හෙවත් අර්ධ අන්ධ භාවයත් සදාකාලික අන්ධ භාවයට හේතු වෙනවා. මේ සියලු රෝග කල් තියා හඳුනා ගතහොත් අන්ධ භාවයෙන් වැළකෙන්නට හැකි වීම එහි ඇති සුබවාදී ලක්ෂණයයි.
ඇසේ සුද ඇතිවෙන්නේ සාමාන්‍යයෙන් වයස අවුරුදු හැට පමණ වූ විට. හැට ඇඳිරිය කියලත් ඇතැමුන් එය හඳුන්වනවා. ඇසේ සුද මේරීමෙන් ඇසේ පෙනීම ක්‍රමයෙන් අඩු වෙමින් සදාකාලිකව අන්ධ භාවයට පත් වීම මෙම රෝගයේ ස්වභාවයයි. සරල සැත්කමක් මඟින් ඇසේ සුද ඉවත් කොට කාචයක් ඇසට බද්ධ කිරීමෙන් සාමාන්‍ය පෙනීම ලබා ගන්නට පුළුවන්. අවුරුදු හතළිහ පැන්නාම හැදෙන්නේ හතළිස් ඇඳිරිය. පොත් පත් කියවීමේ අපහසුතාව, ඉඳිකටුවට නූල දැමීමේ අපහසුතාව ඇති වෙන විට ඇස් පරීක්ෂා කරගන්න. හතළිස් ඇඳිරියට ඇස් පරීක්ෂා කරන විට ඔබේ දෑසේ සුද මතුවී ඇත්නම් එයට ද කල් වේලා ඇතිව පිළියම් කරගන්නට ඔබට හැකි වේවි. හතළිස් ඇඳිරියට කන්නාඩි ගන්නට වෛද්‍යවරයා ඔබට උපදෙස් දුන් විට ඉක්මනින්ම අදාළ නිර්දේශ මත කන්නාඩි ලබා ගැනීම වැදගත්. ඒ වගේම මේ කන්නාඩිය ඔබ ලියන කියවන වේලාවට වෛද්‍ය උපදෙස් අනුව පැලඳීමත් වැදගත්.
අවුරුද්දකට වරක් නැත්නම් අවුරුදු දෙකකට වරක්වත් ඇස් පරීක්ෂා කරවා ගෙන කන්නාඩිය වෙනස් කිරීමට අවශ්‍ය නම් එසේ කිරීමත් වැදගත්.
ග්ලූකෝමාව ඇස් අන්ධ වීමට බලපාන ප්‍රබල හේතුවක්. ඇසේ පීඩනය වැඩි වී අක්ෂි ස්නායුවේ ඇති ස්නායු තන්තු විනාශයට පත් වීමෙන් ග්ලුකෝමාව ඇති වෙනවා. ක්‍රමයෙන් ඇසේ දෘෂ්ටි පරාසය අඩු වී යමින් ඔබ නොදැනුවත්වම දෑස් නොපෙනී යාම මෙහි ඇති භයානක තත්ත්වයයි. කිසියම් වස්තුවක් දෙස ඔබ නෙත් යොමු කරන විට ඇසේ දෙපස පෙනීම අඩු වී යාම මෙහි රෝග ලක්ෂණයයි. ඇසේ දෙපස පෙනීම අඩු වීම එකවර ඔබට නොදැනීම මෙහි ඇති බරපතළ තත්ත්වයයි.
දියවැඩියාව ඔබේ සිරුරේ සෑම ඉන්ද්‍රියකම ක්‍රියාකාරිත්වයට අහිතකර ලෙස බලපාන බව ඔබ දන්නවා. දියවැඩියාව පාලනය නොකළහොත් ඉබේම ඇස් අන්ධ භාවයට පත් වෙන්නට පුළුවන්. ඩයබිටික් රෙටොනොපති යනුවෙන් හඳුන්වන්නේ මෙම රෝග තත්ත්වයයි. දියවැඩියාව ග්ලූකෝමාව සමඟත් සෘජු සම්බන්ධයක් තිබෙනවා. ලෝකයේ වැඩිහිටි ජනතාවගේ අන්ධ භාවයට හේතු වන ප්‍රධාන හේතුව ග්ලෝකෝමාව. ඩයබිටික් රෙමොනපති රෝගය පාලනය නොකිරීම නිසා ඇසේ දෘෂ්ටි විතානයේ සියුම් නහර පිපිරීමෙන් ඇස තුළ රුධිර පැල්ලම් ඇතිවීමෙන් හා ඇස ඉදිමීමෙන් ඇස් අන්ධ භාවයට පත් වීමයි. එ‍යින් වැළකීමට ඇති හොඳම ක්‍රමය දියවැඩියා රෝගීන් අනිවාර්යයෙන්ම වසරකට වරක් ඇස් පරීක්ෂා කරගැනීමයි.
මවුපියන් ඇස් රෝගවලින් පෙළෙනවා නම්, ග්ලුකෝමා, ඩයබිටික් රෙමිනොපති වැනි රෝගවලින් පෙළෙනවා නම් මවුපියන් ලේ ඥාතීන් නම් ජානමය බලපෑමෙන් දරුවන්ටත් අක්ෂි ආබාධ ඇති වෙන්නට පුළුවන්. එවැනි අවදානමක් ඇති මවුපියන් කුඩා කාලයේ පටන්ම දරුවන් ගේ ඇස් පිළිබඳ විමසිලිමත් වෙන්නට ඕනෑ. ඇස් ආබාධයක් ඇත්දැයි නිතර පරීක්ෂා කර බැලීම වැදගත්. ආබාධ ඇති දරුවන් උපැස් පලඳිනවා නම් ඒවා නිසි කලට නැවත පරීක්ෂා කර කන්නාඩි මාරු කළ යුතුයි. නැවත වසර ගණනාවක්ම එකම කන්නාඩිය භාවිත කරන්න එපා.
ඇහේ වපරයට ‘පිං වපරය’ කිව්වේ ඒ කාලේ. දැන් කාලෙ ජනතාව ‘වපරය’ අන්ධ භාවයට හෝ දෘෂ්‍යාබාධවලට හේතු වන බව දන්නවා. උපන් අලුතම බිලිදාගේ දෑසේ වපරයක් හෝ වෙනසක් දුටුවොත් වහාම අක්ෂි වෛද්‍යවරයකු හමු වන්න.
හතළිස් ඇඳිරියත් නොසලකා හැරිය යුතු නෑ. එමඟින් ඔබ අන්ධ භාවයට පත් වෙන්නට පුළුවන්. හතළිස් ඇඳිරිය තිබුණත් නැතත් වයස අවුරුදු හතළිහෙන් පසුව නම් ඔබ වසරකට වරක් ඇස් පරීක්ෂා කරවා ගන්නට ඕනෑ.
අල්ප දෘෂ්ටිකතාව හෙවත් පෙනීම අඩු බව තවත් ආබාධයක්. ඇහේ සුද හෝ හතළිස් ඇඳිරිය නැතත් ඇස්වල පෙනීමේ පහත දැක්වෙන වෙනස්කම් වේ නම් ඒවා අර්ධ අන්ධ භාවයේ ලකුණු වෙන්නට පුළුවන්. සුව කළ නොහැකි අක්ෂි රෝගයක් නිසා ඔබ ඉතාම අඩු ඇස් පෙනීමකින් යුක්ත නම් විශේෂ උපකරණ මඟින් ඔබගේ ඇස් පෙනීම වැඩි දියුණු කරගන්නට පුළුවන්. ඔබගේ ඇස් පෙනීම ගැන සරල පරීක්ෂණයක් ඔබටම කරගන්නට පුළුවන්. ඒ අනුව ඔබ උපැස් පැලඳ සිටියත්, යහළුවන් හා හිතවතුන්ගේ මුහුණු හඳුනා ගැනීමට නොහැකි නම්, කියවීම, ආහාර පිසීම, මැසීම වැනි ළඟ පෙනුම අවශ්‍ය වෙන ක්‍රියාකාරකම් කළ නොහැකිනම්, ඔබගේ ඇඳුම්වල වර්ණ ගැළපීම හා වර්ණ තෝරා ගැනීම කළ නොහැකි නම්, ආලෝකය මදක් අඩු අවස්ථාවලදී සාමාන්‍ය ක්‍රියාකාරකම් කළ නොහැකි නම්, මාර්ග සංඥා, බස් පුවරු හෝ ව්‍යාපාරික ආයතනවල නම් සඳහන් පුවරු කියවීමට නොහැකිනම් ඔබ අර්ධ අන්ධ භාවයෙන් පෙළෙනවා වෙන්නට පුළුවන්. කල් ඇරියොත් රෝගය වැඩි වෙන්නට ඉඩ තිබෙනවා. එහෙයින් කල්තියා රෝග හඳුනාගෙන ඒවා වළක්වා ගන්නට කටයුතු කිරීමෙන් අන්ධ භාවයෙන් ඔබේ ලෝකය අඳුරු වීම වළක්වා ගන්නට පිළිවන්. ලංකාවේ ඕනෑම ගමක ග්‍රාමීය රෝහලක් හෝ තිබෙනවා. බොහෝ රෝහල්වල අක්ෂි සායන තිබෙනවා. ඒවායින් ඔබේ ඇස් නොමිලේ පරීක්ෂා කරගන්නට පුළුවන්. විෂන් 2020 ලේකම් කාර්යාලයෙන් ඔබේ ඇසට අවශ්‍ය ප්‍රතිකාර මෙන්ම සුද මතුවී ඇත්නම් ඒ සඳහා අවශ්‍ය කාචය නොමිලේම ලබාගන්නට පුළුවන්. වැඩි විස්තර විෂන් 2020 ලේකම් කාර්යාලයේ දුරකථන අංක 0112693744 ඇමැතීමෙන් ලබා ගන්නට පුළුවන්.
සාගරිකා දිසානායක ජයසිංහ
උපුටා ගැනීම සිළුමිණ පුවත්පත
