සුනඛයන්ට පණු ආසාදනය ඇති වෙන්නේ කෙසේද?
ඔබ ආදරය කරන පුංචි සුරතල් බලු පැටියා ගැන සැලකිලිමත් විය යුතු විශේෂ කාරණයක් ගැනයි අද අපි ඔබව දැනුවත් කරන්නේ. ඒ තමයි කොහොමද බලු පැටියෙකුගේ පණු හරණය කරන්නේ කියන එක. බලු පැටියෙකු හදා ගන්නා විට සති දෙකක් තුනක් යනවිට එයා කිරි බොන ඒක ප්‍රතික්ෂේප කරනවා. නැතිනම් එයාගේ බර අඩු වෙනවා වගේ ප්‍රශ්න ඔබටත් ඇති වෙලා ඇති. මේ ලක්ෂණ ඇති වන්නට ප්‍රධානම ලෙස බලපාන්නේ පණු ආසාදනය වීම විය හැකිය. ඇතැම් අවස්ථාවල මේ පරපෝෂී පණුවන් ආසාදනය වීම නිසා සුනඛ පැටවුන් මරණයට පත් වීම පවා සිදුවිය හැකිය. ඕනෑම වයසක පසුවෙන සුනඛයන්ට පණුවන් ආසාදනය වීම ඇති විය හැකි නමුත් වැඩි අවධානමක් පවතින්නේ අඩු වයස් වල සිටින පැටවුන්ටයි.
සුනඛයන්ට පණු ආසාදනය ඇති වෙන්නේ කෙසේද?
- කිරි බොන අවධියේ පසු වෙන සුනඛ පැටවුන්ට මවගේ කිරි මගින් පණුවන් ආසාදනය වේ.
- එමෙන්ම කුස තුල හ්‍රෑණ අවධියෙහි කළල බන්ධය හරහා පණු ආසාදනය ඇති වේ.
- ගර්භනී සාමය අවසාන කාලයේදී ගැහැණු සුනඛයාගේ අක්‍රිය අවස්ථාවෙහි පසුවෙන පණුවන්ගේ ජිවන චක්‍ර යලි සක්‍රිය තත්වයට පත් වෙයි. සක්‍රිය වන ජිවන චක්‍ර අවස්ථාවේදී පැටවුන්ට මෙලෙස පණුවන් ආසාදනය වේ.
- එසේම පණුවන් ආසාධිත සුනඛයන්ගේ මලපහ සමග පණුවන්ගේ ජිවන චක්‍රයෙහි බිත්තර අවස්ථා පරිසරයට යොමු වෙන අතර ඒවා සමග සෘජුවම ශරීර ගත වීම මගින් පණු ආසාදන ඇති වේ.
- මලපහ ජලයට, පසට හා තෘණ සමඟ එකවිද ශරීර ගත විය හැකිය. සමහර පරපෝෂී පණුවන්ගේ මෙම ආසාධිත අවස්ථා පරිසරයෙහි මාස හෝ අවුරුදු ගණන් පවතී.
- තවත් සමහර පරපෝෂී පණුවන්, මියන් වැනි කුඩා සතුන්ට ආසාධනය වී පවතින අතර මෙවැනි සතුන් සුනඛයන් විසින් ගොදුරු කර ගැනීමේදී පරපෝෂිතයන් ශරීර ගත විය හැකිය.
- පටි පණුවන් සුනඛයන්ට ආසාදනය වෙන්නේ මැක්කන් මගිනි. මැක්කන් සිරුරෙන් ඉවත් කිරීමට සුනඛයන් උත්සාහ කිරීමේදී මැක්කන් ගිලීම සිදුවීම නිසා මැක්කන්ට ආසාදනය වී පවතින පණුවන් මේ සමග ගිලෙයි. එමගින්ද පණුවන් ආසාදනය වීමට පුළුවන.
ආහාර ජීරණ පද්ධතිය ආශ්‍රිත පරපෝෂී පණුවන්.
වට පණුවන් (Round Worms) : පියවි ඇසට පෙනෙන දිගැති සිහින් සිලින්ඩරාකාර හැඩයක් ගන්නා පණුවන් වර්ගයකි. මොවුන්ගේ කිට අවස්තාව අක්මාව, පෙනහැල්ල වැනි ව්‍යුහයන් වෙත ගමන් කිරීම මගින් රෝග තත්වයන් ඇති වේ.
කොකු පණුවන් (Hook Worms) : මොවුන් අන්ත්‍රයට සම්බන්ධ වී රුධිරය උරා බොන නිසා සුනඛයාට අධික ලෙස පෝෂණ කොටස් අහිමි විය හැකිය.
පටි පණුවන් (Tape Worms) : පටි පණු ආසාදනය නිසා වමනය, පාචනය, ආහාර අරුචිය, දේහ බර අඩුවීම, උදරය විශාල වීම වැනි රෝග ලක්ෂණ දැකිය හැකිය. මෙම ලක්ෂණ බොහෝ විට සුනඛ පැටවුන් තුල දක්නට ලැබේ.
පණුහරණ ඖෂධ ලබා දීම සහ පණු ආසාදන අවම කිරීම.
සති දෙකේදී පුංචි බලු පැටවුන්ට පණුහරණ ඖෂධ ලබා දීම ආරම්භ කිරීම සුදුසුය. එහිදී පයිරැන්ටින් (Pyrantin) ඖෂධය ලබා දිය හැකි අතර වයස සති 4, 6, 8 සහ 10 දී පයිරැන්ටින් (Pyrantin) ඖෂධයම ලබා දිය යුතුය. ඉන්පසු වයස මාස 3 සිට 6 දක්වා මසකට වරක් බැගින් පණුහරණ ඖෂධ ලබා දිය යුතුය. මේ සඳහා වැඩි ප්‍රබලතාවයකින් යුත් (Drontal Plus, Prazivet Plus) ඖෂධ ලබා දිය හැකිය. බලු පැටියා මාස හයෙන් පසුව මාස තුනකට වරක් බැගින් ඉහත ඖෂධ කල යුතු වේ. එසේම මැක්කන් මර්ධනය මගින්ද සුනඛ මලපහ ඉතා ඉක්මනින් ක්‍රමානුකුලව ඉවත් කිරීමෙන්ද ආසාදනය අවම කල හැකිය. පණුහරණය හා සම්බන්ධ විශේෂම කාරණය වන්නේ නිසි මාත්‍රාවෙන් සුනඛයාගේ වයස් සීමාවට ගැලපෙන ඖෂධයක් ලබා දීමත් නිසි කලට ඖෂධ ලබා දීමත්ය. පණුහරණ ඖෂධ ලබා දීම මගින් නැවත ආසාදනය වීම වැළක්වීමබලු පැටවුන්ගේ සෞඛ්‍ය වෙනුවෙන් ගත හැකි වටිනාම පියවරකි.
උපදේශනය පශු වෛද්‍ය අනුර දිසානායක
උපුටා ගැනීම රිවිර
