ගබ්සාවීමේ අවදානම ඇතිකරවන වැරැදි ආහාර පුරුදු
ගබ්සාවක් කියන්නේ කුස පිළිසිඳගත් දරුවා ඉපදීමට ප්‍රථම කුසෙහිදීම විනාශයට පත්වීම. ඉන්පසු එය රුධිරය ලෙස පිටවීම සිදුවෙනවා. මෙය ශාරීරිකව මෙන්ම මානසිකවද දරා ගැනීමට අමාරු තත්ත්වයක්. මේ ගබ්සා වීමට විවිධ හේතු තියෙනවා. මාස එකහමාරක, දෙකක කාලය තුළ කුමන මොහොතක හෝ ගබ්සාවක් වෙන්න පුළුවන් වගේම පසු කාලෙත් ඒ කියන්නේ මුලින් කියුවා වගේ මාස තුනෙන් පසු ගබ්සා වෙන්නත් විවිධ හේතු තියෙනවා. මූලික හේතු ලෙස පාර්ශ්වික හේතු, මානසික හේතු, ආරය, හෝමෝන විකෘතිතා, ආයුර්වේදයට අනුව නම් වා, පිත්, සෙම් යන තුන් කරුණුවල දෝෂ, ලේ දෝෂ, රක්ත දෝෂ, ගර්භාෂය උසවීම, උෂ්ණත්වය වැඩවීම යන හේතු ගන්න පුළුවන්.
මානසික හේතු :
මාසයකට වරක් ආර්තවය සිදුවීම ගැබ් ගැනීමත් එක්ක නතර වෙනවා. නමුත් බොහෝ තරුණ මවුවරු ගැබ් ගත්තට පසුවත් මේ ගැන හිතනවා. ආර්තවයට සූදානම් වෙනවා. මේ නිසා මානසික බලපෑම හේතු කරගෙන ආර්තවය සිදුවීම නිසා ගර්භය විනාශ වෙනවා. එසේම මානසික ආතතිය කියන කරුණත් ගන්න පුළුවන්. මානසික ආතතිය ගොඩක් ගර්භණී අම්මලා තුළ දක්නට පුළුවන්. දරුවා ඉපදෙන විට දැඩි වේදනාවක් විඳින්න වෙයිද, ජීවිතය අවදානමට ලක්වෙයිද වගේ කරුණු ගැන ආතතියක්, බියක් ඇති කරගන්නවා. මෙයත් ගබ්සා වීමට හේතුවක්. එසේම පවුල් පරිසරය තුළ නැන්දම්මා - ලේලි ආරවුල්, බීමත් සැමියා නිසා ඇතිවන සිත් වේදනා සහ ආර්ථික ප්‍රශ්නත් මානසිකව බලපෑම නිසා ගබ්සාව සිදුවීමට ඉඩ තිබෙනවා.
ආරය :
සමහර මවුවරුන්ට ගබ්සාවත් සිදුවීම හා හෝමෝන ගැටලු, ගර්භයේ ගැටලු ආදිය ආරය අනුව පැමිණෙන්න ඉඩ තියෙනවා. මේ හේතුව මත ගැබිනි මවක් ගබ්සා වීමට ඉඩ තිබෙනවා.
වැරැදි ආහාර පුරුදු :
බොහොමයක් අම්මලා දරුවකු පිළිසිඳ ගත්තවිට ආහාරය සඳහා ගන්නේ අධික ආම්ලික හා මිරිස් සැර සහිත ආහාර, අන්නාසි ගැට, අඹ ගැට, වෙරළු වගේ ආම්ලික පලතුරු ආහාරයට ගැනීම හොඳ නැහැ. ඒ වගේම තමයි, මේ ආම්ලික ආහාරවලට ලුණු මිරිස් අධිකව යොදලා ආහාරයට ගන්නත් ගැබිනි මවුවරු කැමැතියි. මේකත් ඒ තරම් හොඳ තත්ත්වයක් නෙවෙයි. ඒ වගේම කෘත්‍රිම රසකාරක මිශ්‍ර කළ අජිනමොටෝ, කෘත්‍රිම වර්ණක යෙදූ දිව පිනවන ආහාර භාවිතයත් ගබ්සා වීමට හේතුවක්. එසේම හරක් මස් අධිකව ආහාරයට ගැනීමත් හොඳ නැහැ. ෆෝමලින් වගේ කල්තබා ගන්නා ද්‍රව්‍ය යෙදූ ආහාර වර්ගත් ගර්භණී සමයේ අහිතකර වෙනවා. සොසේජස්, මීට් බෝල්ස් වගේ සකස් කළ හෝ කලින් පිසූ ආහාරත් භාවිතය ගබ්සාවට අත වැනීමක්. ඒ වගේම පලතුරක් ලෙස ප්‍රසිද්ධ ගස්ලබුත් ගැබ්ගෙන මුල් මාස කිහිපය තුළ ගැනීම හොඳ නැහැ. එයට හේතුව ගස්ලබු කිරි ඍජුවම ගර්භාෂයට බලපෑම් කිරීමයි. ගස්ලබු කිරි නිසා ගර්භාෂයට හානි සිදුවෙනවා.
කෘත්‍රිම ඖෂධ :
බටහිර වෛද්‍ය විද්‍යාව තුළින් උපත ලබන කෘත්‍රිම හා ආදේශක ඖෂධ නිසා ගබ්සා වීම සිදු වෙනවා. කෙස් වැවීමට, සම පැහැපත් කිරීමට, රුව රැකීමට ආදී ලෙස ලේබල් කර වෙළෙඳපොළට නිකුත්වන ඖෂධ වර්ග මින් ප්‍රධානයි. මීට අමතරව කෘත්‍රිම වේදනා නාශකත් ගබ්සාවට හේතුවක්. ගර්භණී සමය තුළ ඔබ යම්කිසි හේතුවක් මත කුමන හෝ කෘත්‍රිම ඖෂධයක් භාවිත කළහොත් ගබ්සාවක් සිදු නොවුණත් කලලයේ විකෘති වීමක් හෝ වෙන්න පුළුවන් නිසා මෙවැනි ඖෂධ භාවිතයට පෙර වෛද්‍ය උපදෙස් පැතීම යෝග්‍යයි. ඊස්ට්‍රජන්, ප්‍රොජෙස්ට්‍රන් හෝමෝන සමතුලිත බව නැතිවීමත් ගබ්සා වීමට මෙන්ම වඳභාවයට හේතුවක්. එසේම කුඩා කාලයේ ලිංගික අතවර හා අඩන්තේට්ටම්වලට ලක්වූ දරුවන් වැඩිහිටි වියේ ගැබ්ගත් පසු බොහෝ විට ගබ්සාවලට ලක්වීමට ඉඩ තිබෙනවා. ඔවුන් තුළ ලිංගිකත්වයට පවතින බිය, ඒ සිදුවීම තුළ විකෘති වූ මනස මේ සඳහා හේතු වෙනවා වගේම සදාකාලික වඳ භාවයටත් එය හේතුවක් වෙන්න පුළුවන්. එසේම යම් යම් විවිධ හේතු මත කලින් ගබ්සාවක් කළ හෝ ගබ්සාවට ලක්වූ මවුවරුන් නැවැත ගබ්සා වීමටත් වැඩි ඉඩක් තිබෙනවා. බොහෝවිට 100%ක්ම නොවුවත් වැඩි ප්‍රතිශතයක් ඒ සඳහා ඉඩ තිබෙනවා.
වැළැක්වීම
- විශේෂයෙන් නිපුණ වෛද්‍යවරයකුගේ උපදෙස් රහිතව විවිධ ඖෂධ වර්ග ලබා ගැනීමෙන් වැළැකීම සිදු කළ යුතුයි.
- එසේම බස්වල, යතුරුපැදිවල ගමන් කිරීමෙන් ගර්භාෂය ගැස්සීමට ලක්වීම වළක්වා ගැනීම කළ යුතුයි.
- උෂ්ණාධික ආහාර භාවිතය (ඉස්සෝ, දැල්ලෝ, විනාකිරි අඩංගු ආහාර) නිසා ඇතිවන ගර්භාෂයේ උෂ්ණත්වය වැඩිවීම ගබ්සාවට හේතුවන නිසා එවැනි ආහාර භාවිතයෙන් වැළකීමත් සිදු කළ යුතුයි.
- සංකීර්ණ ජීවන රටාවක් තුළ ගැබිනි මවක් ඉතා නිදහස්ව කාලය ගත කළ යුතුයි.
- අධික වෙහෙස ගෙන දෙන කටයුතුවලින් මිදී කාලය ගත කළ යුතුය.
- ගැබිනි මවකට කායික හා මානසික නිදහස අතිශයින්ම අත්‍යවශ්‍ය වේ. ඇඟලුම් කම්හල් වැනි ස්ථානවල සේවය කරන හා නිතර ඇවිදීම් කරන ගර්භණී මවුවරුන් ගබ්සා වීමේ වැඩි අවදානමක සිටින නිසා ඔවුන් ඒ පිළිබඳ අවධානය යොමු කිරීම වැදගත් වේ.
ගබ්සාවට ආයුර්වේද ප්‍රතිකාර
- මූලිකව වෛද්‍ය ප්‍රතිකාර ලබා ගැනීම වැදගත්ය.
- මනස නිරෝගීව තබා ගැනීම සහ විවේකය වඩාත් වැදගත් වේ.
- නිතර යකඩ හා ලේ වඩවන ආහාර ලබා ගත යුතුය. මන්ද ගබ්සාවකදී ශරීරයෙන් වැඩි වශයෙන් රුධිරය පිටවන නිසා නැවැත ගැබ්ගැනීමට හෝ සාමාන්‍ය තත්ත්වයෙන් සිටීමටවත් නොහැකි ලෙස ශරීරය දුර්වල වීමට පුළුවන. මේ නිසා "මෝර මාළු, මුහුදු මාළු හා යකඩ අඩංගු ආහාර වැඩිපුර ගත යුතුය." සුදුලූනු, උළුහාල්, ගම්මිරිස්, සූදුරු වැනි දේ ආහාරයට වැඩියෙන් එක් කර ගැනීම ගබ්සාවකින් පසු ගර්භාෂය පිරිසුදු වීමට හේතුවක් වේ.
ගබ්සාව පිළිබඳ පවතින දුර්මත
- ගැහැනු දරුවකු වැඩිවියට පත්වීමේදී ඇය තනිවීම.
- ග්‍රහ අපල සහ ග්‍රහ දෝෂ.
- කළුකුමාර දිෂ්ටිය ආරූඪ වීම.
- ප්‍රේත දෝෂ.
ඉහත කරුණු මත ගබ්සාවක් සිදුවනවා යැයි කීම මිථ්‍යාවකි. මේ අනුව නිරෝගී ඩිම්බාණු හා ශුක්‍ර ධාතු හරහා නිරෝගී දරුවකු බිහිවන අතර යම් හෙයකින් ගබ්සාවක් සිදුවුවහොත් ඉහත දැක්වූ කායික, මානසික, පාරිසරික හේතු නිසා හෝ වෙනත් ජීව විද්‍යාත්මක හේතු නිසා මිස කිසිම නොපෙනෙන බලයකට මිනිසාට හානිකළ නොහැකි බව කිව යුතුය.
හංසි ආටිගල
උපුටා ගැනීම මව්බිම පුවත්පත
