🛍️   Business Directory
📣   Classifields
🛍️   Business Directory
📣   Classifields

කාන්තාවන් අනිවාර්යයෙන්ම කරගත යුතු වෛද්‍ය පරීක්ෂණ

කාන්තාවන් අනිවාර්යයෙන්ම කරගත යුතු වෛද්‍ය පරීක්ෂණ


අධික රුධිර පීඩනය :


අධික රුධිර පීඩනය අද බොහෝ දෙනා අතර පැතිර පවතින රෝගයක් බවට පත්ව ඇත. සෞඛ්‍යවත් ජීවන රටාවෙන් බැහැරව සිටීමත් මෙයට මූලික හේතුවක්. එම නිසා අද තරුණ පරපුරත් මෙයට බිලිව සිටී. තරුණ වියේ පටන්ම පුරුද්දක් වශයෙන් වසර 2කට වරක්වත් මෙලෙස පරික්ෂාකරගැනීම වැදගත්ය. විශේෂයෙන්ම ඔබේ ලේ ඥාතියෙකු හදිසි හෘදයාබාධයක් නිසා මරණයට පත්වූයේ නම් (අඩු වයසින් එනම් අවුරුදු 45ක්) ඔබද කල්තියාම මෙවැනි පරීක්ෂණවලට යොමුවීම වැදගත්ය. එවිට ඔබට එම දුර්වලතා හඳුනාගනිමින් නිසි ප්‍රතිකාරවලටද යොමුවිය හැකිය. එම පරීක්ෂණයේදී නිරෝගී පුද්ගලයකුට නම් රසදිය 140/80ථථ වඩා අඩුවෙන් සටහන්ව තිබියු යුතුය. එයට වඩා වැඩිවේ නම් ඒ සඳහා නිසි ප්‍රතිකාර වෛද්‍යවරු විසින් නිර්දේශ කරයි. දිනපතා ව්‍යායාමවල නිරත වීමත් ලුණු භාවිතය හැකි තරම් අඩු කිරීමත් රුධිර පීඩනය පාලනයට උපකාරී වන මූලික සාධකයන්ය.


දියවැඩියාව :


මෙයද අද සුලබව දැකිය හැකි රෝගී තත්ත්වයකි. අධිකව පැණි රස හා ක්ෂණික ආහාර ගැනීමත් මෙයට හේතු වී ඇත. පරම්පරාගතව පවතින රෝගයක් නිසා අද කුඩා ළමයින් පවා මෙම තත්ත්වයට මුහුණ පා තිබීම දැක ගත හැකිය. මේ නිසා අවුරුදු 25 සිටම රුධිර පරීක්ෂාවකට යොමුව එහි සීනි මට්ටම මැන බැලීම වැදගත්ය. වසර 3කට වරක්වත් මෙවැනි පරීක්ෂණවලට යොමුව රුධිරයේ සීනි මට්ටම මැනගත හැකි නම් එයද ඔබේ සෞඛ්‍යමත් ජීවන රටාවට ඉවහල් වන්නකි. ආහාර ගෙන පැය 10ක් සිට ඕතධධඤ ඉභඨචප පරීක්ෂණයකට භාජන වීමෙන් ඔබට රුධිරයේ ඇති සීනි තත්ත්වය මැන බැලීමට පුළුවන. එහි අගය 100ට අඩුව තිබිය යුතුය. විශේෂයෙන් මෙම පරීක්ෂණ සඳහා යොමු විය යුත්තේ අවුරුදු 45 ඉක්ම වූවන් හා ගර්භණි අවධියේ පසුවන කාන්තාවන්ය. මන්ද මෙම අවධියේ පසුවන තැනැත්තන්ට දියවැඩියාව වැලඳීමේ වැඩි ප්‍රවණතාවක් පවතින බැවිනි.


කොලෙස්ටරෝල් :


මේදය අධික ආහාර නිතර භාවිතය නිසා මෙම රෝගය හට ගැනීමට පුළුවන. වත්මන් තරුණ පරපුරත් මෙයට හසුව ඇති බැවින් අවුරුදු 20 සිට වුවද ඔබ වෛද්‍ය පරීක්ෂණයකට යොමු වූවාට වරදක් නැත. වයස අවුරුදු 35 - 40 අතර කාලයේදී නම් ඔබ අනිවාර්යයෙන් මෙම පරීක්ෂණයට යොමුවිය යුතු වන්නේ ඔබට එම අවදානම වැඩිවන බැවිනි. වසර 2කට වරක් මෙවැනි පරීක්ෂණයකට යොමු වෙමින් ඔබේ සෞඛ්‍ය පිළිබඳ මැන බැලීමට හැකිය. කාන්තාවන් මෙම රෝගයට වැඩි වශයෙන් ගොදුරු වන්නේ ආර්තවහරණයෙන් පසුවය. හෝමෝන ක්‍රියාවලියත් සමඟම මෙහි අවදානම තවදුරටත් වැඩිවීමට පුළුවන. එම නිසා හැකි නම් වසරකට වරක්වත් මෙවැනි පරීක්ෂණයකට යොමු වන්න. ඔබ මෙම පරීක්ෂණයට යොමු විය යුත්තේ පැය 14 පමණ නිරාහාරව සිටිමිනි.


පියයුරු පරීක්ෂාව :


කාන්තාවන්ට පියයුරු වල පිළිකා ඇතිවීමේ අවදානමක් පවතී. පියයුරු හා කිහිල්ල මෙහිදී පරීක්ෂාවට ලක් කෙරේ. පියයුරු වල ඇතිවන අසමානතා කල් තියා හඳුනා ගැනීමට කාන්තාවන් අවුරුදු 20 පමණ සිට මසකට වරක් ස්වයං පියයුරු පරීක්ෂාවේ යෙදිය යුතුය. එම ප්‍රදේශවල ඉදිමීමක් තුවාලවීමක් සිදුව ඇත්නම් වහාම වෛද්‍යවරයකු වෙත යොමු විය යුතුයි.


මැමෝග්‍රැෆි පරීක්ෂාව :


මෙම පරීක්ෂණයද කාන්තාවන්ගේ පියයුරු පිළිකා සම්බන්ධව කෙරෙන පරීක්ෂාවකි. එහිදී ස්කෑන් හෝ එක්ස්රේ මඟින් මේ බැව් තහවුරු කරගත හැකිය. වයස අවුරුදු 40 ඉක්මවූ අයකු නම් වසරකට වරක් වුවද මෙම පරීක්ෂණයට යොමුවීම සුදුසුය. ඔබේ මව හෝ නැඟණිය බඩවැලේ පිළිකා, ඩිම්බකෝෂ පිළිකා හෝ පියයුරු පිළිකාවකට ගොදුරු වී ඇත්නම් ඔබට ද එය ඇතිවීමේ අවදානමක් පවතින බැවින් අවුරුදු 40ට පෙර සිටම මෙම පරීක්ෂාවට යොමුවීම වඩාත් සුදුසු වන්නකි.


යටිබඩ පරීක්ෂාව හා පැප් පරීක්ෂාව :


කාන්තාවන්ගේ යටිබඩේ ඇතිවන රෝගී තත්ත්ව මෙමඟින් පරීක්ෂාවට ලක් කෙරෙයි. අවුරුදු 21න් පසු වසරකට වරක්වත් ඔබ මෙවැනි පරීක්ෂාවට ලක්වීම වඩා වැදගත්ය. යටිබඩ ප්‍රදේශයේ ලේ ගැලීම හෝ ගෙඩි හටගෙන ඇත්නම් ඒ බැව් මෙමඟින් තහවුරු කර ගැනීමටද හැකියාව ඇත. ගැබ්ගෙල ප්‍රදේශයෙන් ශ්ලේෂ්ම කොටසක් ගෙන මෙම පරීක්ෂාව සිදුකෙරේ. දැන් රජයේ රෝහල්වල පිහිටුවා ඇති සුවනාරි සායන හරහා ඔබට මේ පරික්ෂණ නොමිලේම සිදුකර ගත හැකිය.


අස්ථිවල දුර්වලතා පරීක්ෂාව :


මෙමඟින් ඔබේ සිරුරේ අස්ථිවල පවතින දුර්වලතා හෙවත් ඝනත්වය අඩුවීම පරීක්ෂා කෙරෙයි. මෙය කාන්තාවන්ට සුවිශේෂී වන්නේ ඔස්ටියෝපොරෝසිස් නම් අස්ථි රෝගය ඔවුන්ට වැලඳීමේ වැඩි ප්‍රවණතාවක් ඇති බැවිනි. මෙය 80%ක් ඇති වන්නේ කාන්තාවන්ටය. අවුරුදු 65 ඉක්ම වූ පසු වසර 5කට වරක්වත් මෙම පරීක්ෂාවට යොමුවීමෙන් අස්ථිවල දුර්වලතා හඳුනාගත හැකිය. වයස අවුරුදු 65 ඉක්ම වූ විට ඊස්ට්‍රජන් හෝමෝනය නිපදවීම අඩුවීම මෙයට මූලිකම හේතුව වී ඇත. පිටකොන්ද, කලවා, හන්දි සහ මැණික්කටුව ප්‍රදේශයේ අස්ථිවල ඝනත්වය මැන බලයි.

මේ ආකාරයට නිසි වයස්වලදී වෛද්‍ය පරීක්ෂණවලට යොමු වීමෙන් ඔබේ සෞඛ්‍ය සම්පන්න බව තහවුරු කර ගැනීමටද පහසු වන අතර ඒ සඳහා නිසි ප්‍රතිකාරවලට යොමුවීමද ඔබට පහසු වනු ඇත. කාන්තාවක් වශයෙන් ඔබ මේ පිළිබඳව සිතිය යුතු වන්නේ පවුල් සංස්ථාවේ නිරෝගී බවත් ඔබ සතු වන බැවිනි.

වෛද්‍ය තුසිත කහදූව කොළඹ ජාතික රෝහල

ශාලිකා රංගනී සමරදිවාකර

උපුටා ගැනීම මව්බිම පුවත් පත