40න් පසු ගැබ් ගැනීම් අවදානමට හේතු 10ක්
වයසට යෑමත් සමඟ සිරුර අකර්මණ්‍ය වීම, නිදන්ගත රෝග ඇති වීම සිදු වෙනවා. එම වයසේදී දරු ප්‍රසූතියට සූදානම් වීමත් අවදානම් ප්‍රතිඵල ඇති කිරීමට ඉඩ තිබෙන්නේ ඒ නිසයි. විශේෂ අවශ්‍යතා සහිත දරුවන් බිහිවීම වයස අවුරුදු 40න් පසුව වර්ණ දේහ නිවැරැදිව බෙදීම අක්‍රමවත් වෙනවා. ඒ හේතුව නිසා වර්ණදේහ සම්බන්ධව, දරුවන්ට ඇතිවන සියලුම ගැටලු මේ වයසේදී ඇතිවෙන්න පුළුවන්. වයසට යෑමත් සමඟ සිරුර අකර්මණ්‍ය වීම, නිදන්ගත රෝග ඇති වීම සිදු වෙනවා. එම වයසේදී දරු ප්‍රසූතියට සූදානම් වීමත් අවදානම් ප්‍රතිඵල ඇති කිරීමට ඉඩ තිබෙන්නේ ඒ නිසයි.
විශේෂ අවශ්‍යතා සහිත දරුවන් බිහිවීම : වයස අවුරුදු 40න් පසුව වර්ණ දේහ නිවැරැදිව බෙදීම අක්‍රමවත් වෙනවා. ඒ හේතුව නිසා වර්ණදේහ සම්බන්ධව, දරුවන්ට ඇතිවන සියලුම ගැටලු මේ වයසේදී ඇතිවෙන්න පුළුවන්. අවුරුදු 20දී 1,500කට එකක්ද, අවුරුදු 30දී 900කට එකක්ද සහ අවුරුදු 40දී 100කට එකක් වශයෙන් මෙම අවදානම වැඩි වෙනවා. නමුත් වයස අවුරුදු 40ට වැඩි මවුවරුන්ට සිදු වන දරු උපත් සීයෙන් එකකට මෙම අවදානම තිබෙන අතර දරුවන් 99 ක්ම නිරෝගී දරුවන් බව පැවසිය හැකියි.
මළ දරු උපත් : වයස අවුරුදු 40ට වැඩිවෙද්දී විවිධ රෝගවලට ගොදුරු වනවා. විශේෂයෙන් දියවැඩියාව සහ ප්‍රෙෂර් ඉන් ප්‍රධානයි. ඒ වගේම වැදෑමහ ක්‍රියාකාරී වීමත් මේ වයසේදී ඉතාම අඩු මට්ටමකයි පවතින්නේ. ඒ නිසා මළ දරු උපත් ඇති වීමේ අවදානම මේ වයසේදී ඉහළ මට්ටමක පවතිනවා.
නිවුන් දරුවන් බිහිවීම : වෛද්‍ය විද්‍යාත්මකව විශේෂ හේතුවක් නැහැ. නමුත් සංඛ්‍යාලේඛන සලකා බැලූ විට අවුරුදු 40න් පසු මවුවරුන්ට නිවුන් දරුවන් බිහිවීමේ අනුපාතය වැඩි මට්ටමක පවතිනවා.
දියවැඩියාව : වයස අවුරුදු 40 පසුවූ ගර්භණී මවුවරුන්ට දියවැඩියා අවදානමක් තිබෙනවා. මෙය කරුණු තුනක් මත පදනම් විය හැකියි. එනම්,
- ගර්භණී වීමට පෙර නොදැනුවත්ම දියවැඩියාව වැලඳී සිටි කාන්තාවක්, ගර්භණී සමයේ කෙරෙන වෛද්‍ය පරීක්ෂණ හරහා එය හඳුනාගැනීම.
- ගර්භණී සමයේ සමහර මවුවරුන්ට ඇති වන පරිදි දරුවාගේ ක්‍රියාකාරීත්වය නිසා ඉන්සියුලින් නිපදවීමෙන් ඇතිවන දියවැඩියාව.
- දියවැඩියා මවක් තමන්ට දියවැඩියාව ඇති බව දැනගෙනම ගර්භණී වීම.
නොමේරූ දරු උපත් : වයස වැඩිවීමත් සමඟ නිදන්ගත රෝග, වැදෑමහ ගැටලු, වකුගඩු ආබාධ ඇති වනවා. එවිට මවගේ ජීවිතය ආරක්ෂා කර ගැනීමට අඩු මාසයෙන් දරුවා බිහිකළ යුතු වනවා. ඒ හැරුණු විට වයස වැඩිවීම නිසා දරුවා හොඳින් නොවැඩීමද විය හැකියි.
දරුවා බිහි වීමේ ගැටලුව : අවුරුදු 40ට වැඩි මවුවරුන්ගේ වැදෑමහ ක්‍රියාකාරී වීමේ ගැටලු පවතින බැවින් දරුවා බිහිවීමේ දී දරුවාට ඔක්සිජන් ලැබීම අඩු විය හැකියි.
අධික රුධිර පීඩනය : වයසට යන විට අධිරුධිර පීඩනය ඇති වීම සාමාන්‍යයි. ඒ හැරුණු විට වයසත් සමඟ මවට දරුවාගේ වෙනස්කම්, ගර්භණී සමයේ වෙනස්කම්, දරාගත නොහැකි නිසාත් අධිරුධිර පීඩනය ඇති වෙනවා.
ගබ්සා වීම : වර්ණදේහ හුවමාරුවේදී එය හරියාකාරව සිදු නොවන නිසා නියමිත වර්ණ දේහ සංකලනයක් නොමැති, ජීවයක් ලෙස සැලකිය නොහැකි කලල සොබාදහම විසින් ගබ්සාවක් ලෙස ඉවත් කරයි.
දරුවා බිහිවීමට වැඩි වේලා ගත වීම : දරුවා බිහිවීමට කල්ගත වීම 40න් පසු මවුවරුන් තුළ දැකිය හැකි ලක්ෂණයකි. ඒ සඳහා නිශ්චිත හේතුවක් කිව නොහැකි වුවත් වයසත් සමඟ මාංසපේශිවල ඇතිවන ගැටලුවක් නිසා මෙසේ වේ යැයි සැලකිය හැකිය.
රුධිරය පිටවීම : වයසත් සමඟ වැදෑමහ පහත් වීම, ගැබ්ගෙල වසා පිහිටීම හෝ හදිසියේම වැදෑමහ ගර්භාෂයෙන් වෙන්වීම නිසා මෙසේ රුධිරය පිටවීම සිදුවෙනවා. විශේෂයෙන් කිව යුත්තේ ඉහත ලක්ෂණ අනෙක් වයස්වල අයටත් තිබිය හැකි බවයි. නමුත් 40ත් පසු වයස් කාණ්ඩයට මෙය වැඩිවශයෙන් දක්නට ලැබෙනවා. එසේම මෙම හේතු දහය 40න් පසු මවුවරුන්ට ඇති වන ගැටලු බෝහෝමයකින් සුළු කරුණු කීපයක් පමණි. එම හේතුද කාන්තාවගෙන් කාන්තාවට වෙනස් විය හැකියි. එබැවින් වයස 40න් පසු කාන්තාවක් ගැබ් ගත්තේ නම් වෛද්‍ය උපදෙස් ගෙන ගර්භණී සමය සැලසුම් කිරීම වඩාත් සුදුසු වෙනවා.
උපුටා ගැනීම මව්බිම
