This site has features that require javascript. Follow these simple instructions to enable JavaScript in your web browser.
Sithmal Yaya
HIV නොවේ මේවත් ලෙඩ දුවේ


ඕනම දෙයක් ගැන කිව්වාම හොයලා බලන්නේ නැතිව බයවෙන එක අපේ අයගේ සාමාන්‍ය පුරුද්දක්. බයවෙලා විතරක් නවතින්නේ නැහැ. ඒ ගැන හිතලා මානසිකව වැටිලා සියලු කටයුතු අඩාල කරගන්නවා. මේ දවස්වල HIV ගැන ලියැවෙන ලිපියට ලැබෙන සමහර ප්‍රතිචාරවලිනුත් ඔය කිව් කාරණය මනාව ඔප්පු වෙනවා. අන්න ඒ නිසාම ලිංගිකව බෝ නොවන රෝග පිළිබඳවත් යමක් කතා කරන්න හිතුවා. මොකද සමහර ලිංගිකව බෝ නොවන රෝගවල රෝග ලක්‍ෂණ ලිංගිකව බෝවන රෝගවල රෝග ලක්‍ෂණවලට බෙහෙවින්ම සමානයි. ඒ නිසා ලිංගිකව බෝ නොවන රෝග වැලඳිලා ඉන්න අයත් මේ ලිපි මාලාව කියවලා හෝ වෙනත් දැනුවත් කිරීම් නිසා ටිකක් හරි බයවෙලා ඇති.

සාමාන්‍යයෙන් ලිංගික ප්‍රදේශවල හටගන්නා ආසාදන ප්‍රධාන වශයෙන් කොටස් දෙකකට බෙදන්න පුළුවන්. ඉන් පළමුවැන්න දෙදෙනකු ලිංගිකව එක්වීම නිසා ඇතිවන බෝ නොවන ආසාදනයි. දෙවැන්න නම් ලිංගික එක්වීමක් නිසා බෝවන සමාජ රෝග යටතට ගැනෙන ආසාදනයි. ආසාදනයක් ඇතිවීමට හේතුවන්නේ ක්‍ෂුද්‍ර ජීවීන් හෙවත් විසබීජයන්ය. ඒවා වයිරස්, බැක්ටීරියා හෝ දිලීර කාණ්ඩයට අයත් වෙනවා. මෙහිදී ලිංගිකව බෝ නොවන ආසාදන ගැන ගත් විට අපේ ශරීරයේ විවිධ ස්ථානවල ක්‍ෂුද්‍ර ජීවීන් දකින්න පුළුවන්. සමෙහි, මුඛයෙහි, යෝනි මාර්ගය තුළ සහ ගුදය තුළ විවිධ වර්ගයේ බැක්ටීරියා, වයිරස් සහ දිලීර සමතුලිතව ජීවත් වෙනවා. එය හරියට වන ළැහැබක් තුළ හෝ මල් වත්තක විවිධ වර්ගයේ ශාක සමතුලිත අයුරින් ජීවත් වනවා වගෙයි.

සමහර අවස්ථාවන්හිදී සමතුලිතව පැතිරිලා තිබෙන ක්‍ෂුද්‍ර ජීවීන්, සමහර විට ක්‍ෂුද්‍ර ජීවීන්ගෙන් එක් කාණ්ඩයක්, ඒ සමතුලිතතාව බිඳිමින් ශීඝ්‍රයෙන් වර්ධනය වෙන්න ඉඩ තියෙනවා. ඒ වගේ අවස්ථාවලදී අවට තිබෙන පටක පවා විනාශ කරගෙන වණ, තුවාල පවා ඇතිකරන අවස්ථා දකින්න පුළුවන්. එවිට එය ආසාදනයක් ලෙස හඳුන්වනවා. ගුද මාර්ගය තුළ හෝ මලපහ සමඟ පිටවන සමහර විසබීජ යෝනි මාර්ගයට ඇතුළු වීමෙන් යෝනි ආසාදන ඇතිවෙන්න පුළුවන්. ඒ වගේම ඒ විසබීජ මුත්‍රා මාර්ගයට ගිය විට මුත්‍රා ආසාදන ඇතිවනවා.

මුත්‍රා ආසාදන

මේක කාන්තාවන් අතර බහුලව තිබෙන රෝගී තත්ත්වයක්. මුත්‍රා දැවිල්ල, නිතර මුත්‍රා කිරීමේ අවශ්‍යතාව, යටිබඩේ අපහසුතාව හෝ වේදනාව, යෝනි ප්‍රදේශයේ වේදනාව බහුලව දක්නට ලැබෙන රෝග ලක්‍ෂණ ලෙස හඳුන්වන්න පුළුවන්. මීට අමතරව ඇඟ සීතල කර උණ ගැනීම, කොන්දේ කැක්කුම, ආහාර අරුචිය සහ මුත්‍රා අවපැහැ වීම ආසාදනය වූ විට ඇතිවිය හැකි රෝග ලක්‍ෂණ වනවා.

වෛද්‍යවරයකු හමුවූ විට මුත්‍රා පරීක්‍ෂා කොට ආසාදිත තත්ත්වය නිවැරැදිව හඳුනාගෙන ප්‍රතිජීවක මඟින් ප්‍රතිකාර කරනු ඇත. වතුර වැඩිපුර පානය කිරීම මේ සඳහා වන කදිම විසඳුමක්. ආර්තවහරණයට ලක්වූ වැඩිහිටි කාන්තාවන්ගේ යෝනි මාර්ගය වියළී යෑම නිසා හටගන්නා ආසාදනත් මුත්‍රා මාර්ගයට පැතිරී යන්නට ඉඩ තිබෙනවා. එවැනි අවස්ථාවකදී ඊස්ට්‍රජන් හෝමෝනය අඩංගු ක්‍රීම් වර්ග ආලේප කිරීම මඟින් ප්‍රතිකාර කළ හැකියි.

යෝනි මාර්ගයේ හටගන්නා බැක්ටීරියා ආසාදන

මෙම තත්ත්වය ලිංගිකව ක්‍රියාකාරී කාන්තාවන් අතර විශේෂයි. යෝනි මාර්ගයේ සමතුලිතව තිබෙන ක්‍ෂුද්‍ර ජීවී පරිසරය අසමතුලිත වීම නිසා බැක්ටීරියා ආසාදන හටගැනීම සිදුවෙනවා. මෙහිදී අළු වර්ණයට හුරු සුදු පාට පිළීගඳින් යුත් පෙණ සහිත දියරයක් යෝනි මාර්ගයෙන් ශ්‍රාවය වීම දකින්න පුළුවන්. යෝනි මාර්ගය තුළ සහ පිටත දැවිල්ලක් හටගැනීමද හැකියි. මෙය ප්‍රතිජීවක ඔෟෂධ පානයෙන් පෙති පානයෙන් හෝ යෝනි මාර්ගයේ තැම්පත් කරනු ලබන පෙති හෝ ක්‍රීම් මඟින් සුවපත් කිරීමේ හැකියාව පවතිනවා.

මුත්‍රාශයේ ආසාදන

සාමාන්‍ය අවස්ථාවලදී මුත්‍රාශයේ හෝ මුත්‍රා මාර්ගයේ කිසිදු විසබීජයක් දකින්න නැහැ. ඒ කියන්නේ සාමාන්‍ය තත්ත්වයන් යටතේ මුත්‍රාශය ජීවානුහරණ තත්ත්වයේ පවතිනවා. එහෙත් සමහර විට යෝනි මාර්ගයේ හෝ ගුද මාර්ගයේ ජීවත් වන ක්‍ෂුද්‍ර ජීවීන්, පෞද්ගලික ස්වස්ථතාව පවත්වාගෙන නොයෑම නිසා හෝ අපිරිසුදු තත්ත්වයන් යටතේ ලිංගික සංසර්ගයේ යෙදීම නිසා මුත්‍රා මාර්ගය තුළටත්, මුත්‍රාශය තුළටත් ඇතුළු වී ආසාදන ඇතිකරන්න පුළුවන්.

හුඟක් වේලාවට මුත්‍රාශයේ ආසාදන බැක්ටීරියා නිසා ඇතිවෙනවා. මුත්‍රා දැවිල්ල, ඉක්මනින් මුත්‍රා කිරීමට අවශ්‍ය වීම, එහෙත් මුත්‍රා හොඳින් පිට නොවීම, යටිබඩේ වේදනාව, ඇඟ සීතල කර උණ ගැනීම සහ කොන්දේ කැක්කුම මෙහිදී ඇතිවන ලක්‍ෂණ ලෙස පෙන්වා දෙන්න පුළුවන්. මුත්‍රා රතු පැහැයෙන් හෝ අව පැහැයෙන් යුක්ත වියහැකියි. මුත්‍රා පරීක්‍ෂා කළ විට එහි රතු රුධිරාණු, සුදු රුධිරුණු සහ විසබීජ විශාල වශයෙන් දක්නට ලැබෙනවා. මුත්‍රා තුළින් දුගඳක්ද හමනවා.
බොහෝ විට මුත්‍රාශයේ ආසාදන දිනක් දෙකක් ඇතුළත ඉබේම හොඳ වෙන්නත් පුළුවන්. ජලය සහ දියර වර්ග වැඩිපුර පානය කිරීම, ලිංගික ප්‍රදේශය සබන් යොදා පිරිසුදු කර තබාගන්න. එහෙත් රෝග ලක්‍ෂණ පැය 4කට වඩා තිබෙනවා නම් වෛද්‍යවරයකු හමුවෙලා ප්‍රතිකාර ලබාගැනීම නුවණට හුරුයි. එසේ නොකළහොත් ආසාදනය මුත්‍රා නාළිකා තුළටත්, එමඟින් වකුගඩු තුළටත් පැතිර යෑමට ඉඩ තිබෙනවා. එමඟින් පයෙලොනෙෆ්රයිටිස් කියන රෝගී තත්ත්වය ඇතිවන අතරම එය ඉතාම භයානක රෝගයක් ලෙස හඳුන්වන්න පුළුවන්.

මධුසමයේදී හටගන්නා මුත්‍රා ආසාදන

අලුත විවාහ වූ කාන්තාවන්ට ප්‍රථමවරට ලිංගික ක්‍රියාවලියකට නිරාවරණය වීමේ හේතුවෙන් මෙම තත්ත්වය ඇතිවෙනවා. මෙහිදී සිදුවන්නේත් මුත්‍රාශයේ ආසාදන ඇතිවීමයි. නමුත් ගර්භණී වීමට පෙර ඇතිවන මුත්‍රා ආසාදන නිසා ගබ්සා ඇතිවිය හැකියි. දරුවාගේ වර්ධනය බාල වීමද එහිදී ඇතිවන තවත් අතුරු ප්‍රතිඵලයක්. ඒ නිසා කල් නොයවා ප්‍රතිකාර ගැනීම යෝග්‍ය වෙනවා.

යෝනි මාර්ගයේ උල්ලෝගම් හෙවත් කිරිමැලියම්

මෙම ආසාදනය ඇති කරනු ලබන්නේ කැන්ඩිඩා ඇල්බිකන්ස් නම් වූ දිලීරයක් මඟින්. මෙම දිලීරය සම, මුඛය, යෝනි ප්‍රදේශය සහ ගුද මාර්ගයේ ඉන්නවා. එය අනෙකුත් ක්‍ෂුද්‍ර ජීවීන් සමඟ සමතුලිත තත්ත්වයක පවතින විට ගැටලුවක් නැහැ. ඒත් යම් විදියකින් අනිත් ක්‍ෂුද්‍ර ජීවීන් අබිබවා ශීඝ්‍රයෙන් වැඩෙන්න ගත්තොත් ඉන් රෝග ඇති වෙනවා. මෙය කුඩා දරුවන්ගේ මුඛයේ වර්ධනය වූ විට එය උල්ලෝගම් හෙවත් කිරිමැලියම් ලෙස හඳුන්වනවා. කැන්ඩිඩා ආසාදනය යෝනි මාර්ගයේ හටගත් විට එය ටින්කිරි වන් සුදු පැහැ උකු දියරයක් ලෙස යෝනි මාර්ගයෙන් පිටවෙනවා. මෙය සිංහල වෛද්‍ය ක්‍රමයේදී හඳුන්වන්නේ සුද යෑම නමින්. සමහර විට දිලීරය යෝනි ප්‍රදේශයේ කිරි කැබලි මෙන් ඇලවී තිබෙනවා දකින්න පුළුවන්. මෙහි ගන්ධයක් නිකුත් වන අතරම දැවිල්ල සහ කැසීම ඇතිවෙනවා. ලිංගික සංසර්ගයේදී යෝනි මාර්ගය තුළ වේදනාවක්ද ඇතිවෙනවා.

ස්වාභාවික ප්‍රතිකාර ක්‍රමයක් ලෙස යෝගට් හෝ මුදවපු කිරි ඇතුළු කිරීම මඟින් රෝගය සුවකර ගන්න පුළුවන්. යෝගට්වල තිබෙන ලැක්ටොබැසිලස් ඇසිඩොපිලස් බැක්ටීරියාව කැන්ඩිඩා රෝගය ඇතිකරන දිලීරය වර්ධනය වීම යටපත් කරනවා. නමුත් යෝනි මාර්ගයට යෝගට් ඇතුළු කිරීම එතරම් පහසු නැහැ. මෙම රෝගය සඳහා දැනට ප්‍රත්‍යක්‍ෂ ඔෟෂධ තිබෙනවා. ඒවා පෙති ලෙස මුඛයෙන් ගත හැක. ඒ වගේම මුඛයේ තිබෙන උල්ලෝගම් රෝගය මුඛ සංසර්ගයෙන් බෝවීමද සිදුවෙනවා. එසේම ලිංගික අවයව මුඛයෙන් ස්පර්ශ කරන විට මුඛයට හෝ ලිංගික අවයවවලට බෝ වෙනවා.

වෙනත් යෝනි ආසාදන

යෝනි මාර්ගයේ ආසාදනවලට වැඩිපුරම හේතුවන්නේ කිරිමැලියම් හෙවත් මොනීලියා ආසාදනයයි. ඒක සෛලික ජීවියකු වන ට්‍රයිකොමොනාස් වැජිනේලිස් විසින් ඇතිකරන ආසාදනය ද බහුලව දක්නට ලැබෙනවා. ට්‍රයිකොමොනියසිස් නමින් හඳුන්වන මෙම රෝගී තත්ත්වය ලිංගික වශයෙන්ද සම්ප්‍රේෂණය විය හැකියි. යෝනි ප්‍රදාහය ඇතිකළ හැකි අනෙකුත් තත්ත්වයන් නම් පවුල් සංවිධානය සඳහා භාවිත කරන ශුක්‍රාණු නාශක ජෙලි වර්ග නිසාද, කෘත්‍රිම රෙදිවලින් මසන ලද යට ඇඳුම් නිසාද, ලිංගික ප්‍රදේශයට ඉසින සුවඳ විලවුන් වර්ග නිසාද සමහර විට යෝනි ආසාදන ඇතිවිය හැකිය. එම ද්‍රව්‍ය සහ ඇඳුම් භාවිත නොකිරීම මඟින් රෝගය සුවපත් කරගත හැකිය.

ලිංගික ප්‍රදේශයේ ආසාදන වළක්වා ගැනීම සඳහා උපදෙස් මාලාවක්

  • වැසිකිළියට ගොස් සෝදන විට ජලය පිටුපසින් නොව ඉදිරිපසින් වත්කරන්න. පිටුපසින් ජලය වත්කළහොත් ගුද මාර්ගය ප්‍රදේශයේ ඇති මලපහ සේදී විසබීජ යෝනි මාර්ගය සහ මුත්‍රා මාර්ගය දෙසට ගමන් කරනු ඇත.
  • වැසිකිළියේදී මලපහ කිරීමෙන් පසු ටිෂූ කොළ භාවිත කරන්නේ නම් එමඟින් ඉදිරියේදී සිට පසුපස දෙසට පිස දමන්න. එවිට මුත්‍රා මාර්ගය සහ යෝනි මාර්ගය මලපහ ගෑවී අපිරිසුදු වන්නේ නැත.
  • මුත්‍රා නොකර තද කරගෙන ඉන්න එපා. මුත්‍රා අවශ්‍යතා ඇතිවූ වහාම මුත්‍රා කරන්න.
  • ලිංගික ප්‍රදේශයේ භාවිත කරන සුවඳවිලවුන්, ෂැම්පු සහ සබන් වර්ග ආසාත්මික නම් ඒවා භාවිතයෙන් වළකින්න.
  • කෘත්‍රිම යට ඇඳුම් නිසා ලිංගික ප්‍රදේශයේ දහදිය එකතු වී විසබීජ වර්ධනය සඳහා සුදුසු පරිසරයක් නිර්මාණය වේ. එබැවින් දහදිය ලේසියෙන් උරාගන්නා කපු රෙද්දෙන් නිමවූ යට ඇඳුම් අඳින්න.
  • අනාරක්‍ෂිත ලිංගික හැසිරීම්වලින් වළකින්න.


මේ කතාව ඔයාට කියන්න හිතුවේ බොරුවට බයවෙලා මානසිකව වැටෙන එක නතරකරන්න. ඒ නිසා මේ කිසිම ලෙඩක් සුළුවෙන් හිතන්න එපා. නියපොත්තෙන් කඩන්න තියෙන දේ පොරවෙන් කපන්න තියාගන්න එපා. ආණ්ඩුවේ ඉස්පිරිතාලේ සල්ලි ගන්නේ නෑනේ. රහස්‍යභාවය ආරක්‍ෂා කරගෙන ඕන කෙනකුට බෙහෙත් ගන්න පුළුවන්.

කතාව - හංසි ආටිගල
විශේෂ ස්තූතිය - විශේෂඥ වෛද්‍ය
ආරියසේන යූ. ගමගේ මහතාට
මව්බිම