🛍️   Business Directory
📣   Classifields
🛍️   Business Directory
📣   Classifields

අකලට හිසකෙස් ගැලවීයෑම වළක්වන අලුත්ම ප්‍රතිකාරය

අකලට හිසකෙස් ගැලවීයෑම වළක්වන අලුත්ම ප්‍රතිකාරයහිසකෙස් ගසක් වර්ධනය වන අවස්ථාව (catagen phase) , වර්ධනය නැවැතී සිටින අවස්ථාව (catagen phase)  සහ ගැලවී යන අවස්ථාව(telogen phase) යන ආකාර තුනෙන් පැවැතිය හැකියි. සාමාන්‍ය පුද්ගලයකුගේ කෙස්වලින් 90%ක ප්‍රමාණයක් වර්ධනය වන අවස්ථාවේ පවතින අතර 10%ක් ගැලවී යන අවස්ථාවේ පවතී. මේ නිසා සාමාන්‍ය කාන්තාවකගේ කෙස් ගසක ආයු ප්‍රමාණය අවු. 4 - 7 වන අතර පුරුෂයකුගේ මෙම කාලය අවුරුදු 3ක් පමණ වෙයි. සාමාන්‍ය මිනිසකුගේ කෙස් අවුරුද්දකට අඟල් 6ක් පමණ වැඩේ. දිනකට කෙස් ගස් 50 - 100ක් අතර ප්‍රමාණයක් ගැලවී යෑම සාමාන්‍ය තත්ත්වයකි. 

කෙස් ගැලවී යන ක්‍රම : 

කාන්තාවන්ගේ හිසකෙස් ගැලවී යෑම ආකාර කිහිපයකට සිදුවෙයි. හිසකෙස් පීරන විට, නිදා සිටින විට කොට්ටය මත රැඳීම හා ස්නානය කරන විටද කෙස් ගැලවී යෑම නිතරම සිදුවන්නක්. මෙලෙස කෙස් අධිකව ගැලවී ගොස් තට්ටය පෙනෙන තත්ත්වයට පත්වීම බොහෝ අය මුහුණදෙන ගැටලුවකි. කාන්තාවන්ගේ හිසකෙස් අඩු වීමට බලපාන හේතු රාශියකි.

දරු ප්‍රසූතියෙන් පසුව : දරුවකු ප්‍රසූත කළ පසුව මාස 3ක් ඉක්ම ගිය විට කාන්තාවන්ගේ හිසකෙස් අධිකව හැලීම සාමාන්‍ය තත්ත්වයකි. එය කාලයත් සමඟ නැවැත යථා තත්ත්වයට පත් වෙයි.

නීරක්තිය : රුධිරයේ අඩංගු යකඩ උෟනතාවද හිසකෙස් තුනී වීමට හා කොණ්ඩය අඩු වීමට බලපෑ හැකි තවත් හේතුවකි. රුධිර පරීක්ෂාවක් සිදු කර ගැනීමෙන් ඔබට මේ බව තහවුරු කර ගැනීමේ හැකියාව ඇත.

හෝමෝන වෙනස්කම් : Polycystic syndrome  රෝගයෙන් හිසකෙස් හැලීම, ශරීරයේ අධික රෝම වර්ධනය, කුරුලෑ ඇති වීම, තරබාරුකම, අක්‍රමවත් මාසික ආර්තවය වැනි ලක්ෂණ මතු විය හැකියි. තරුණ ගැහැනු ළමයින් හා මැදිවියේ කාන්තාවන්ද මෙම තත්ත්වයට ගොදුරු වීමට පුළුවන. හිස් මුදුනේ කෙස් අඩු වීම, වැඩි වශයෙන්ම දැකිය හැකි ලක්ෂණයයි. තයිරොයිඩ් ග්‍රන්ථියේ අධික හෝ මඳ ක්‍රියාකාරිත්ව නිසා කෙස් ගැලවී යා හැකිය.

හිසකෙස් විලාසිතා : ඇතැම් කොණ්ඩා මෝස්තර නිසා හිසකෙස් තදින් ගෙතීමෙන්ද, හිසකෙස්වලට රසායන ද්‍රව්‍ය යෙදීමෙන්ද කොණ්ඩය අයන් කිරීමෙන්ද, උණුසුම සහිත හිසකෙස් වියළන උපකරණ මඟින්ද කෙස් ගස් කැඩීමට ලක්විය හැකියි.

වෙනත් රෝගී තත්ත්ව : ඇතැම් රෝගී තත්ත්ව හා ඖෂධ මඟින්ද හිසකෙස් හැලීම සිදුවෙයි. ශල්‍යකර්මයකින් මාස තුනක් ගිය පසු අධිකව හිසකෙස් අඩු වීම හෝ තදබල අසනීප තත්ත්ව හේතුවෙන්ද කෙස් ගස් ගැලවී යයි.

පිරිමින්ගේ කොණ්ඩය යෑම.
කාන්තාවන්ගේ මෙන්ම පිරිමින්ගේද හිසකෙස් ගැලවී යෑම සුලබව දක්නට ලැබෙන්නකි. ප්‍රධාන වශයෙන්ම නළල දෙපැත්තේ සහ හිසේ මැද්දෙන් කොණ්ඩය අඩු වීම දැකිය හැකිය. මෙම තත්ත්වය මැදිවියේ සහ අවුරුදු 20 - 30 ත් අතර පසුවන පිරිමින් අතර දැකීමට පුළුවන. මෙලෙස කොණ්ඩය අඩු වී තට්ටය පෑදීමට අවුරුදු 15ක් - 20ක් පමණ ගත වුවත් ඇතැමුන්ට මෙම තත්ත්වය ඉක්මනින් ඇති වෙයි. බොහෝ විට මෙම තත්ත්වය ඇතිවන්නේ හෝමෝන හේතුවෙනි. හිසකෙස් හෝමෝනවලට අධි සංවේදිතාව දැක්වීම මීට හේතුවයි. අවුරුදු 20ක් පමණ වන විට මෙය මානසිකවද පීඩාකාරී තත්ත්වයක් විය හැකියි.

ප්‍රතිකාර : මේ සඳහා ප්‍රතිකාර ක්‍රම කිහිපයක්ම ඇත. ආලේප කරන දියර හා මුඛය මඟින් ගන්නා ඖෂධ මින් ප්‍රධාන වෙයි. මාස 3 - 4 පමණ මෙම ප්‍රතිකාර කිරීමෙන් ප්‍රතිඵල ලබා ගත හැකිය. 

නවතම ප්‍රතිකාරය : රුධිර පට්ටිකා සරු ප්ලාස්මා ප්‍රතිකාරය යනු නවතම ප්‍රතිකාර ක්‍රමයකි. හිසකෙස් වර්ධනයට පමණක් නොව විවිධ රෝග ගණනාවකටම මෙම ප්‍රතිකාරය කරන අවස්ථා ඇත. මෙහිදී රෝගියාගේ රුධිර සාන්ද්‍රණ කර එහි වර්ධක සාධක සහිත රුධිර ප්ලාස්ම භාවිත කර,

  • හිසකෙස් වැටීම වැළැක්වීම
  • සමට තරුණ පෙනුම ලබා දීම
  • කල්ගත වූ තුවාල සුව කිරීම
  • සමේ දුඹුරු පැල්ලම් ඉවත් කිරීම

වැනි ප්‍රතිකාර කළ හැකි අතරම සන්ධි රෝග සඳහාද ශල්‍ය වෛද්‍යවරුන් මෙම ප්‍රතිකාර යොදා ගනියි.

සිදු කරන ක්‍රමය : මෙය සිදු කරන්නේ රෝගියාගේ රුධිරයෙන් වර්ධක වෙන් කර නැවැත එම රෝගියාටම එන්නත් කිරීමයි. අධිකව හිසකෙස් ගැලවී යන රෝගීන්ට මෙය සිදු කිරීමේදී පළමුවෙන්ම රෝගියාගේ රුධිරය ඉවත් කර ගනු ලැබේ. පසුව කේන්ද්‍ර අපසාරි යන්ත්‍ර ආධාරයෙන් රුධිරය කොටස්වලට වෙන් කර රුධිරයේ කෙස් වර්ධනයට අවශ්‍ය පෝෂ්‍ය පදාර්ථ සහිත කොටස් හිසකෙස් අඩු ප්‍රදේශයට එන්නත් කරයි. එන්නත් කිරීමට පෙර එම ස්ථානය පමණක් නිර්වින්දන කරයි. එමඟින් සමට පමණක් එම පෝෂ්‍ය පදාර්ථ ඇතුළු කරයි. මේ ගැන අනිසි බියක් ඇති කර නොගත යුතු වන්නේ එහි අතුරු ආබාධ අවම වීම නිසයි.

අතුරු ආබාධ : මෙම ප්‍රතිකාර ක්‍රමයේ අතුරු ආබාධ නොමැති වුවත් සම රතු පැහැ ගැන්වීම, ඉදිමීම, සිදු වුවත් පැය කිහිපයකින් යථා තත්ත්වයට පත් වෙයි. අදාළ ස්ථානයේ ආසාදන ඇති වන්නේ කලාතුරකිනි. 

සැලකිලිමත් වන්න : නිසි ලෙස මෙම ප්‍රතිකාරය සිදු නොකළහොත් බැක්ටීරියා ආසාදන ඇති විය හැකිය. මේ නිසා ඔබ සැලකිලිමත් විය යුතු කාරණය නම් මෙම ප්‍රතිකාරය සුදුසුකම් ඇති ස්ථානයකින් සිදු කර ගැනීමයි. හිසකෙස් ගැලවී යෑම සඳහා ප්‍රතිකාරයක් ලෙස මෙය සිදු කරන්නේ නම් මසකට වරක් නැවැත සිදු කිරීම සුදුසුයි. සමට තරුණ පෙනුමක් ලබා දීමට නම් මාස දෙකකට වරක් නැවැත කිරීමද සුදුසුය. හිසකෙස් වැවීමට සිදු කරන මෙම ප්‍රතිකාරයෙන් මාස 2 - 4 ඇතුළත ප්‍රතිඵල ලබා ගත හැකිය.

ශාලිකා රංගනී සමරදිවාකර
මව්බිම