This site has features that require javascript. Follow these simple instructions to enable JavaScript in your web browser.
විස්තර ලුහුඩු දැන්වීම්
වැරැදි පුරුදු නිසා සමට සිදුවන හානි

වැරැදි පුරුදු නිසා හිස්හොරි ඇතිවන විදිය ගැනත් පිම්පල්ස් හොඳ වෙන්නේ නැත්තෙ ඇයි කියන එක ගැනත් පසුගිය සතියක අපි කතා කළා. අද කතා කරන්න යන්නෙ වැරැදි පුරුදු නිසා සමට සිද්ධ වෙන හානි ගැනයි. සාමාන්‍යයෙන් තරුණියක් විදියට කොණ්ඩයට වගේම සමටත් ඉතාම හොඳ අවධානයක් ලබාදීම ඉතාම වැදගත් වෙනවා. ඒ කියන්නෙ සම කියලා කියන්නෙ තව කෙනකුගේ හිත ඇදගන්න පුළුවන් දෙයක්. සම පැහැපත්ව තියන්න පුළුවන් හොඳම ක්‍රමය තමයි වැඩි වැඩියෙන් වතුර බොන එක. වතුර කොච්චර බිබ්වත් ඒකෙන් අපිට හානියක් නැහැ. ඊට අමතරව පෝෂ්‍යදායී ආහාර ලබා ගැනීම, හොඳ නින්දක් ලැබීම, විවේකය, මානසික ඒකාග්‍රතාව වගේ දේවල් නිසා සමේ පැහැපත් බව, නිරෝගී බව ස්වාභාවිකව රැකගන්න පුළුවන්. මේ කියපු කරුණු හරි විදියට සිද්ධ වුණේ නැති වුණොත් සමට හානි ඇති වෙන්න පටන් ගන්නවා. ඒ නිසා ඉස්සෙල්ලාම ස්වාභාවික විදියට සමේ ආරක්‍ෂාව ඇති කර ගන්න පුරුදු වෙන්න ඕනෙ. 

කුරුලෑ කඩන්න එපා : ඊළඟ කාරණය තමයි ගොඩක් තරුණියන් මුහුණේ පිම්පල්ස් ආවම නියපොතුවලින් ඒවා කඩලා දානවා. මේ විදියට නියපොතුවලින් පිම්පල්ස් කැඩුවාම ඇතිවන කැළල ස්වාභාවිකව මැකෙන්න අවම වශයෙන් මාස හතක්වත් ගතවෙනවා. හැබැයි ඒ වුණත් ඒ කැළල් සියයට සියයක්ම මැකෙන්නෙත් නැහැ. පිම්පල් එක ආපු තැන පුංචි හෝ ඩැමේජ් එකක් ඇති වෙනවා. මේ ඩැමේජ් එක කවදාවත් සම්පූර්ණයෙන්ම නැති වෙන්නෙ නැහැ. ඒ නිසා පිම්පල්ස් ආවම නියපොතුවලින් කඩලා දාන්න එපා. නියපොතු ගොඩක් වෙලාවට සමට විස සහිත වෙන්න පුළුවන්. ඊට අමතරව මදුරුවො හෝ කූඹි කෑවාම අත්වල ඇඟිලි දහයෙම නියපොතුවලින් කසන්න ගියොත් සම මතුපිට ඉරිතළා ගොස් ඩැමේජ් වෙන්න පුළුවන්. ඒ ඩැමේජ් එකත් මාස ගණනාවක් යනකල් යථා තත්ත්වයට පත්කරගන්න බැහැ. 

ක්‍ෂණික ප්‍රතිකාර නැහැ : ඒ වගේම සමහර වෙලාවට නොසිතන අවස්ථාවල කෑම නිසා සම මතුපිට ඇතිවන ඇලර්ජි තත්ත්වයන් සියයට සියයක්ම දැනගෙන මිසක් හරියට නොදැන අත්බෙහෙත් පාවිච්චි කරන්න යන්න එපා. ඇලර්ජි නිසා සම මතුපිට ඇතිවන දද හෝ කුෂ්ඨවලට ක්‍ෂණික ප්‍රතිකාර නැහැ. වෛද්‍යවරයකුට ඒ වගේ දේවල්වලට ප්‍රතිකාර කරන්න දින කීපයක් ගත වෙනවා. ඉතින් ක්‍ෂණිකව හොඳ වෙන්න කියලා හිතාගෙන හරියට නොදන්නා අත්බෙහෙත් කරන්න ගියොත් සිද්ධ වෙන්නෙ සම තව තවත් ඩැමේජ් කරගන්න එකයි. 

තුවාය භාවිතයේ වැරැදි : ගොඩක් අය නාලා ඇඟ පිස දමනකොට රළු විදියට සම ඇදෙන්න පිසදමන්න පුරුදු වෙලා ඉන්නවා. සමහරු තුවාය පිට ප්‍රදේශයෙන් දාලා පිට පිසදැමෙන විදියට තුවාය ඒ අතට මේ අතට දෙපැත්තට අදිනවා. මේ විදියට පිස දානකොට බොහොම හොඳින් ඇඟ පිස දැමෙනවා වගේම බොහොම ඉක්මනට සම රැලි වැටෙන්න පටන්ගන්නවා. ඒ නිසා මුහුණ හෝ ඇඟ පිස දමනකොට තෙත මාත්තු වන ආකාරයට මෘදුව පිසිනවා හැරෙන්න රළු විදියට පිස දැමීම සුදුසු වන්නේ නැහැ. විශේෂයෙන්ම මුහුණ පිස දමන්න ඕනෙ බොහොම මෘදු විදියටයි. ඒ වගේම මුහුණ පිස දමන තුවාය ඇඟ පිස්නය පාවිච්චි කරන්න එපා. මුහුණ පිසදමන්න පිරිසුදු පුංචි තුවායක්, එහෙමත් නැතිනම් පිරිසුදු ඇඳුමක් තබා ගන්න. 

උණු වතුරත් එපා : අනිත් එක තමයි අව්වට සම පිච්චෙන එක. අපි හිතාගෙන ඉන්නෙ සම පිච්චෙන්නෙ අව්වට විතරයි කියලයි. ඒත් ඒක වැරැදියි. අව්වට සම පිච්චෙනවා හා සමානවම උණු වතුරෙන් ඇඟ සෝදන විටත් සම පිච්චෙනවා. දවසම ඒ.සී. එකේ ඉඳලා ගෙදර ඇවිත් මහන්සියටත් එක්ක උණු වතුරින් නාන්න ඇඟ සෝදන්න ගොඩක් අය පුරුදු වෙලා ඉන්නවා. ඒක හොඳ දෙයක් නෙවෙයි. අව්වට සම පිච්චෙන එකෙන් වෙන්නෙ සමේ පැහැපත් බව නැතිවෙලා අඳුරු පැහැයක් ගන්න එක. උණු වතුරට සම පිච්චෙන එකෙන් වෙන්නෙ පැහැපත් බව අඩු වෙන අතරම සමේ වියළි බව වැඩි වෙන එක. ඒ නිසා මේ දෙකම එක හා සමාන ප්‍රතිඵල ඇති කරනවා. ඉතින් උණු වතුරින් ඇඟ සෝදන එක අඩු කරලා පුළුවන් තරම් සිසිල් වතුරින් ඇඟ සෝදන එක තමයි සුදුසු වන්නේ. ඔබේ සමේ ස්වභාවය අනුව එය හඳුනාගන්නා විදිය ගැනත් සමට ගැළපෙන විදියට නිවැරැදි පුරුදු ඇතිකර ගන්නා ආකාරය ගැනත් අපි ලබන සතියේ කතා කරමු. 

දුලාංජලී මුතුවාඩිගේ 

මව්බිම