හරියට තොල් කළුවෙලා මොන දේ කළත් වැඩක් වුණේ නෑ
එයාගේ මූණ නම් ලස්සනයි. ඒත් බලන්නකෝ තොල් කළු වෙලා තියෙන හැටි. කවුරුන් හරි ඔබේ දෙතොල ගැන මෙහෙම කියනවට ඔබ නම් කැමැති වෙන එකක් නෑ.
දෙතොලේ පැහැපත් බව තිබෙනවා නම් ඔබේ තොල් පෙතිවල පිපෙන සිනහව මොනතරම් ලස්සනද?
ඒත් බලන්න, ඔබේ දෙතොල වියැළිලා, කළුවෙලා, දුර්වර්ණ පැල්ලම් මතුවෙලා තිබුණොත් එය ඔබේ මුහුණට අවලස්සන බවක් ගෙන දෙන හැටි. මේ නිසාම අප වෙත ප්‍රතිකාර ගන්න එන අය සිටිනවා. අද අපේ කාන්තාවන් වැඩිදෙනකුට තියෙන ප්‍රශ්නයක් තමයි තොල් කළුවෙන එක. මේ අය කියන්නේ තොල් කළු වෙනවාට ලිප් බාම් ගෑවත් ප්‍රතිකාර කළත් වැඩක් වුණේ නැති බවයි.
ඇයි මේ තොල් කළු වෙන්නේ?
මේ ගැන විමසා බැලීමේදී එයට හේතූන් කීපයක්ම දක්වන්න පුළුවන්. මවුපියන්ගේ ජානවලින් තොල් කළුවීම සිදුවෙනවා. සමහරුන්ගේ උපතින්ම තොල්වල කළු පැහැයක් දක්නට ලැබෙනවා. ඒ අයගේ මෙලනින් වර්ණ දේහය තොල්වල වැඩියෙන් නිෂ්පාදනය වෙනවා. එහිදී 100% ක් තොල්වල වර්ණය වෙනස් කිරීම අපහසුයි.
පරිසරයේ වෙනස් කම් :
තමන් ජීවත්වන පරිසරයේ වෙනස්කම් නිසාත් තොල්වල කළු පැහැයක් ඇතිවිය හැකියි. ඔබ නිතර උණුවෙන් තේ කෝපි හෝ වෙනත් බීම වර්ග පානය කරන අයෙක් නම් ඔබේ තොල්වල වර්ණය වෙනස් වෙන්න පුළුවන්.
බාල වර්ගයේ ලිප්ස්ටික් භාවිතය :
මෙය අද බහුලව දක්නට ලැබෙනවා. බොහෝ කාන්තාවන් දිනපතා හෝ ගමන් බිමන්වලදී හෝ තොල් හැඩකර ගන්නට ලිප්ස්ටික් වර්ග භාවිත කරනවා. මෙම ලිප්ස්ටික් වර්ග මිලෙන් අඩු බාල වර්ගයේ ඒවා නම් එහි අඩංගු සමට අහිතකර ද්‍රව්‍ය නිසා පහසුවෙන්ම තොල් කළු වීම සිදුවිය හැකියි. මේ නිසා ඔබ නිතර නිතර තොල් ආලේපන පාවිච්චි කරන අයකු නම් මිලෙන් වැඩි වුවත් හොඳ තත්ත්වයේ සහ ප්‍රමිතියක් ඇති ලිප්ස්ටික් තෝරා ගන්නට සැලකිලිමත්වන්න.
විවිධ ලෙඩ රෝග නිසා :
ඇතැම් විට ශරීරයේ පවතින යම් යම් ලෙඩ රෝග නිසාත් තොල් කළුවීමට හැකියාවක් තිබෙනවා. තොල් කළුවීම කෙරෙහි බලපාන අනෙක් කරුණ නම් දුම් පානයයි.
අප ඉහතින් දැක් වූ හේතූන් එක් එක් අයට වෙනස් වන්නට පුළුවන්. එම නිසා මෙයට පිළියම් යෙදීමේදී එම හේතූන් පිළිබඳ සොයා බැලිය යුතුයි. තොල් කළු වීමේ තත්ත්වයට කෙතරම් ප්‍රතිකාර කළත් එහි වෙනසක් සිදු නොවන බවයි බොහෝ දෙනෙක් පවසන්නේ.
ඊස්තටික් මෙඩිසින් ක්‍රමයේ දී මේ සඳහා සිදු කෙරෙන විශේෂ ප්‍රතිකාර තිබෙනවාද?
ඔව්, තොල් කළුවීම මඟ හැරවිය හැකි ප්‍රතිකර්ම තිබෙනවා. ඊස්තටික් මෙඩිසින්වලදී අප කරන්නේ මුලින්ම තොල් කළුවීම කෙරෙහි බලපා ඇති හේතුව සොයා ගැන්මයි. ඉන්පසුව ශරීරය තුළට ප්‍රතිඔක්සිකාරක ලබාදෙනවා. ඒ වගේම මෙයට හේතුව යම් යම් ලෙඩ රෝගවල බලපෑමක් නම් මෙහිදී ඒ සඳහා ද ප්‍රතිකාර සිදු කරන අතරම සැමවිටම රෝග සඳහා අදාළ විශේෂඥ වෛද්‍යවරුන් වෙත යොමු කරනවා. තොල්වල සම ඉතාමත්ම සංවේදියි. තොල්වල මෙලනින් වර්ණක අඩු කළ හැකි සහ දුර්වර්ණ බව අඩුකළ හැකි ඖෂධීය සංයෝග මෙහිදී ආලේප කරන්නට ලබාදෙනවා. ඊට අමතරව ඊස්තටික් මෙඩිසින් සම්බන්ධ වෛද්‍යවරුන් දෙතොල්වල අවපැහැය අඩු කරන ප්‍රතිකර්ම මෙහිදී සිදු කරනවා.
මීට අමතරව සැලකිලිමත් විය යුතු වැදගත් කරුණු පිළිබඳ විමසා බැලුවොත්?
වැදගත්ම දේ වඩාත් හොඳ ඖෂධීය ලිප් බාම් එකක් පාවිච්චි කිරීමයි. එමෙන්ම තොල්වල වියළි බව වළක්වා තොල් ආරක්ෂාකර ගැනීමට නිතරම මොයිස්චර්රයිසර් ලිප් බාම් වර්ගයක් තොල් මත ගැල්වීම ද වඩාත් සුදුසුයි. ලිප් බාම් එකක් භාවිත කරනවා නම් PH අගය පහළොවට වැඩි ලිප් බාම් එකක් භාවිත කරන්න. ඉර අව්වටත් අපේ මුහුණ වගේම තොල් කළු වීමත් සිදුවනවා. නමුත් වැඩි දෙනෙක් මේ ගැන හිතන්නේ නෑ. ඔවුන් ඉර අව්වෙන් සම ආරක්ෂාකර ගන්න උනන්දු වුණත් තමන්ගේ දෙතොලට ඉර අව්වෙන් වන හානිය වළක්වා ගැනීම කෙරෙහි සැලකිලිමත් වන්නේ නෑ. එය වැරැදියි. ඔබ සම ආරක්ෂාකර ගැනීමට හිරු ආවරණ ආලේපන භාවිත කරනවා නම් අනිවාර්යයෙන්ම තොල්වලටත් PH අගය 15 ට වැඩි ලිප්ස්ටික් එකක් භාවිත කිරීම ඉතා වැදගත්. ඉතින් මේ කරුණු ගැන ඔබ සැලකිලිමත්ව කටයුතු කරනවා නම් තොල් කළුවීම වළක්වා ගනිමින් එහි පැහැපත් බව රැකගන්නට ඔබටත් හැකිවේවි.
උපුටා ගැනීම තරුණි
