ලස්‌සන ඈත් කරන ඔබ නොදැන කරන වැරදි ක‍්‍රියා
ලස්‌සන ගැන කතා කිරීමේදී නිරෝගී, පිරිපුන් සම ප‍්‍රධාන තැනක්‌ ගන්නවා. සම නිරෝගීව තබා ගැනීමට උත්සාහ කරන බොහෝ යුවතියන්, කාන්තාවන් නොදැන කරන වැරදි නිසාවෙන් සමට අවලස්‌සනක්‌ එකතු කර ගන්නා බව ඔබ මෙතෙක්‌ නොදැන සිටියා විය හැකියි.
ඔබ මුහුණ ක්‌ලෙන්ස්‌ කරනවා. ඒ කියන්නේ සමට ගැළපෙන ක්‌ලෙන්සින් එකක් තෝරාගෙන සමේ කුණු ඉවත්කර ගන්නවා. මුහුණ පිරිසිදු කර ගන්නට ක්‌ලෙන්සින් එක භාවිත කලාට ඔබ මුහුණ පිසදමන තුවාය කෙතරම් පවිත‍්‍රද කියා බලනවාද? සතියකට සැරයක්‌වත් එය සෝදනවාද? කුණු දුහුවිලි සහිත තුවායෙන් මුහුණ පිසදැමීමේදී ඒවා මුහුණට එකතු වෙනවා. ඉතිං ඔබ, මුදලක්‌ වියදම් කර තෝරාගත් ක්‌ලෙන්සර් එකෙන් නියම ප‍්‍රතිඵල ලැබෙන්නේ නැහැ නේද? ඒ නිසා මේ කරුණ හොඳින් මතක තියා ගන්න. මුහුණ පිරිසිදු කර ගැනීමට, මුහුණේ කුණු දුහුවිලි ඉවත්කර ගැනීමට ඔබ තෝරාගත් ක්‌ලෙන්සර් එක මුහුණට භාවිතා කර මුහුණ සේදීමෙන් පසු පිරිසිදු කපු රෙදි කෑල්ලකින් මුහුණ පිසදමන්න. මුහුණ පිසදැමීමෙන් පසු එම රෙදි කෑල්ල සෝදන්නත් අමතක කරන්න එපා. එවිට, නැවත ඊළග දිනට ඔබ භාවිතා කරන්නේ සෝදා තැබූ පිරිසිදු රෙදි කඩක්‌.
ක්‌ලෙන්සර් එක භාවිතා කිරීමේදී මුහුණට වගේම බෙල්ලටත් ක්‌ලෙන්සර් එක ආලේප කිරීමට මතක තබා ගැනීමත් වැදගත් කරුණක්‌. මුහුණේ ලස්‌සන ගැන කතා කිරීමේදී මුහුණට බලපෑමක්‌ වන ලෙසට බොහෝ කාන්තාවන් යුවතියන් කරන තවත් වරදක්‌ තිබෙනවා. ඔබට ගැළපෙන ෂැම්පෝ වර්ගය තෝරාගත් ඔබ එය හිස ගල්වා හිස මදක්‌ සම්භාහනය කර හිස සෝදනවා. ඔබ හිස සෝදන්නේ කොහොමද? හිසේ තිබෙන ෂැම්පෝ ටික ඔක්‌කෝම ඔබේ මුහුණට වැටෙන ලෙස නේද? ඒක හරිම වැරදි ක‍්‍රියාවක්‌. හිස ෂැම්පෝ කර හිසේ ඇති ෂැම්පෝ සෝදා ඉවත්කළ යුත්තේ මුහුණට සහ ඇගට නොවැටෙන ලෙසටයි. ෂැම්පෝ තිබෙන්නේ මුහුණට වත්, සිරුරට වත් නොවෙයි. ෂැම්පෝ මුහුණට වැටීමෙන් මුහුණට හිසේ ඇති කුණු දුහුවිලි සියල්ලම එකතු වෙනවා. මෙන්න මෙවැනි දේ ඔබ එතරම් අවධානයක්‌ නොකරන කරුණු වුවත් ඔබේ ලස්‌සන ඔබෙන් ඈත්වීමට මෙවැනි කරුණු තදින්ම බලපාන්නට පුළුවන් බව අමතක කරන්නට එපා.
