🛍️   Business Directory
📣   Classifields
🛍️   Business Directory
📣   Classifields

ඇස් යට ආලේපන පරෙස්සමෙන්

ඇස් යට ආලේපන පරෙස්සමෙන්

මුහුණේ පිහිටි අනෙකුත් සියලූ අවයවයන්ට වඩා අපගේ වැඩි අවධානයට හා ආරක්ෂාවට යොමු විය යුතු අවයවය වන්නේ ඇසයි. වර්තමානයේ බොහෝ දෙනෙකුට දක්නට ලැබෙන ඇස් යට කළු වීමේ තත්ත්වය ඇති වීමට ප‍්‍රධාන හේතුවක් වූ පාරම්පරික තත්ත්වයක්. ඒ සමගම දැඩි මානසික පීඩනය, පවුලේ ප‍්‍රශ්න, අධික ලෙස පාඩම් කිරීමෙන් ඇස් වෙහෙස කිරීම, නිදි වැරීම නිසා ඇස් වෙහෙසවීම, දවසේ වැඩි කාලයක් පරිගණක අසල ගැවසීමෙන් සහ ඒ දිහා බලා සිටීමෙන් ඇසට වන වෙහෙස ආදි තවත් විවිධ හේතු ඇස් යට කළු වීම සඳහා බලපානවා. සමහර අයට නිතර කඳුළු පිටවීම නිසාත් මේ තත්ත්වය ඇතිවෙන්න පුළුවන්. මේ නිසා පිග්මන්ටේෂන් තත්ත්වයක් මතුවෙන්නත් පුළුවන්. අනෙක් සුවිශේෂී කාරණය වෙන්නේ මෙවැනි අයි ක‍්‍රීම් (eye cream) ආලේප කර ඇස වටේ හිතුමතේ මසාජ් කිරීමයි. මසාජ් කිරීමේ දී ඒ සඳහා නියමිත ක‍්‍රමවේදයක් තිබෙනවා. ඇස වටේ මසාජ් කරන්න අපි සුදුසු පරිදි පාවිච්චි කළ යුත්තේ අපේ අතේ මුද්ද දාන ඇගිල්ල හෙවත් වෙදැගිල්ලයි. මේ ඇගිල්ලෙන් රවුමට රවුමට සියුම්ව පීඩනයක් ලබා දෙමින් තමයි ඇස වටා මසාජ් කළ යුත්තේ. ඒ තෙරපුම සිදුකරන පැත්තකුත් තිබෙනවා. ඒ මසාජ් කිරීම වැරදි ආකාරයට සිද්ධ වුණොත් ඇසේ පිහිටා තිබෙන මාංශ පේශීන් අනිත් පැත්තට තෙරපීමක් වෙනවා. අනිත් පැත්තෙන් මේ මසාජ් එක කළ යුත්තේ උපරිම විනාඩි 15 ක් හෝ ඊට වඩා අඩු කාලයකුයි. ඊට වඩා කාලයක් මසාජ් කිරීමත්, වෙනත් ඇගිලි ඒ සඳහා ‍භාවිත කිරීමත් කිසි විටෙකත් සුදුසු නොවේ. සමහරු ඇස වටේ ප‍්‍රදේශයත් ස්ක‍්‍රබ් (Scrub) කරන අවස්ථා තිබෙනවා. ඒක සම්පූර්ණයෙන්ම වැරදි ක‍්‍රමයක්. ඇස් වටේ Scrub කිරීම නිසා ඇස වටේ පිහිටා තිබෙන සියුම් සෛල විනාශ වෙනවා.

ඇස යට කළු වීමේ ප‍්‍රශ්නය නිසා කෙනෙකුගේ මුහුණ දිහා බැලූ විට ඇස් වටේට කළු වීම නිසා එය කැපී පෙනෙන තත්ත්වයක් මතු වී මුහුණට අවලස්සනක් එකතු කරනවා තමයි. නමුත් මේ තත්ත්වයෙන් මිදෙන්න අපි ඉතාම කල්පනාකාරීව, සෞඛ්‍ය සම්පන්න, ආරක්ෂාකාරී ක‍්‍රමවේදයක් අනුගමනය කළ යුතුයි. ඇස් වටේ කළුයි කියා බොහෝ දෙනෙක් කරනුයේ වෙළෙඳපොළේ ඇති අයි ක‍්‍රීම් වර්ගයක් මිලදී ගෙන ආලේප කරන්නට පෙලඹීමයි. එහෙත් ඔබ මෙසේ මිලදී ගන්නා ආලේපය ඔබේ ඇස ආරක්ෂා කරයි ද? ඇසේ පෙනුමට තර්ජනයක් එල්ල කරයි ද? එම ආලේපන වර්ගවල රසායනික ද‍්‍රව්‍ය අඩංගු ද ආදිය පිළිබඳ ඔබ සැලකිලිමත් වූයේ නෑ නේද? ඇස වටේ ප‍්‍රදේශය ඉතාම සියුම් අතිශය සංවේදී පෙදෙසක්. මේ සංවේදී තැන්වලට වෙනත් බාහිර ආලේපන ගැල්වීමේ දී එම නිෂ්පාදනයේ ප‍්‍රමිතිය පිළිබඳ අපි දැඩි ලෙසම සිතිය යුතුය. සමහර ආලේපන ඔබේ සියුම් සමට විෂ සහිත විය හැකිය. ඒ නිසා සුදුසුකම් ලත් රූපලාවණ්‍ය විශේෂඥවරයකුගෙන් හෝ වෛද්‍යවරයකුගේ උපදෙස් නොමැතිව කිසි විටෙකත් තමන්ගේ ඇස යටට හිතුමතේ වෙළෙඳපොළෙන් මිලදී ගන්නා ආලේපන වර්ග පාවිච්චි කරන්නට එපා.

උපුටා ගැනීම සිළුමිණ