සුන්දරත්වය නැති කරන පෞරුෂ දුර්වලතා
ඇතැම් කාන්තාවන් සමාජයේ බොහෝ දෙනාගේ ප‍්‍රසාදයට හා ආකර්ෂණයට ලක් වෙනවා. ඒ සඳහා ඇගේ සුන්දර රූ සපුව පමණක්ම නොව ඇගේ චරිත ස්වභාවය සමග මුසු වූ පෞරුෂයත් බෙහෙවින්ම බලපානවා. මෙවන් කරුණු ඔබේ යහපත් ප‍්‍රතිරූපය හා මනා පෞරුෂය කෙරෙහිත් බලපාන බව ඔබ දන්නවාද?
ගැළපෙන විලාසිතා : ප‍්‍රසන්න පෙනුමැති කාන්තාවක් වෙත අපේ නෙත් ඇදී යන්නේ නිතැතින්මය. ඒ අතරින් ඇයටම සුවිශේෂී වූ විලාසිතාවටත් වැඩි අවධානයක් යොමු කළ යුතුමයි. එහෙත් නවීන පන්නයේ විලාසිතාවන්ට යොමු වූ පමණින්ම ඇගේ සුන්දරත්වය පෙනෙන්නේ නැත. ඒ සඳහා එම විලාසිතා ඇගේ සිරුරේ හැඩයට සමේ පැහැයට හොඳින් ගළපා ගැනීමට සැලකිලිමත් විය යුතුය. එනම් සිරුරේ හැඩය මනාව ඉස්මතු කර පෙන්වන වයසට ගැළපෙන විලාසිතාවක් වීමත් වැදගත්ය. මීට අමතරව එම විලාසිතාව ඔබ සහභාගි වන උත්සව අවස්ථාව සමගද තෝරා ගන්න. එහෙත් ඇතැම් කාන්තාවන් අන් අයගේ අවධානය දිනා ගැනීමට අවස්ථානුකූල නොවන විලාසිතා යොදා ගැනීම මත සමාජයේ සිනහවට ලක්වන අවස්ථාද ඇත. එහෙයින් ඔබේ සුන්දරත්වය වටහා ගනිමින් ඒ අනුව විලාසිතා කිරීමට අවධානය යොමු කරන්න.
ආභරණ : තම විලාසිතාවට ගැළපෙන ආකාරයට ආයිත්තම් තේරීමේදීද ඔබ සැලකිලිමත් විය යුතු කාරණා බොහෝය. විලාසිතාවට වැඩි ඔපයක් ලබා දෙන අවස්ථාවට උචිත, තමාටම අනන්‍ය වූ ආභරණ තෝරා ගැනීමෙන් ඔබේ සුන්දරත්වය වැඩි කර පෙන්වන්න සමත් වන්නකි.
මේකප් : සුන්දර යුවතියක් වුවත් තවත් ආකර්ෂණීයව දිස්වන්නට නම් මේකප් භාවිත කරන බව අප දන්නා කරුණක්. ඇයගේ සමේ පැහැයට ගැළපෙන ආකාරයට වර්ණ සංකලන භාවිත කර මෙම ආලේපන ගැල්වීම කළ යුතුය. ඒ සමගම මෙම ආලේපන නිෂ්පාදනයන්ගේ ප‍්‍රමිතිය පිළිබඳ ඔබේ අවධානය යොමු කිරීමත් වැදගත් වේ. මුහුණේ හැඩය ඔබට ගැළපෙන ආකාරයට හැඩගන්වා වැඩි සුන්දරත්වයක් එක්කිරීම මේකප් මගින් සිදුවේ. අවස්ථාව අනුව ඔබ යොදා ගන්නා කොණ්ඩා විලාසිතාවත් වැඩි අවධානයක් ලබා දිය යුතු අංගයකි.
අත් බෑගය : නිතර අත්බෑගයක් අතැතිව ගමන් කිරීමට කාන්තාවන් පුරුදුව සිටිති. එය ඔබට අත්‍යවශ්‍යම බඩු භාණ්ඩ කිහිපයක් බහා තැබීමට හැකි පරිදි තෝරා ගැනේ. එය ඇය යන ගමන බිමන අනුව සරල සැහැල්ලූ ආකාරයට හෝ මෝස්තර ගළපා ගනිමින් විසිතුරු ආකාරයකට හෝ ගළපා ගනියි.
මෙම බෑගය අතේ රඳවන ආකාරය අනුවත් විලාසිතා මැවේ : අත් බාහුවේ රඳවන බෑග අත් බෑගය ලෙසත්, උරහිසේ රඳවන බෑගය ලෙසත් අප හඳුනා ගනියි. නමුත් බොහෝ කාන්තාවන්ට මේ පිළිබඳ නිසි දැනුම්වත් වීමක් නොමැති නිසා එම විලාසිතා උචිත ආකාරයට භාවිත නොකරයි. එය ඇගේ මනා පෞරුෂයටත් අහිතකර ලෙස බලපාන බව ඔබ දන්නවාද? එහි තිබිය යුතු වන්නේ ඇයට අත්‍යවශ්‍යම භාණ්ඩ කිහිපයක් පමණකි. බැංකුවට හෝ කාර්යාලයීය කටයුත්තකට නිවෙසින් පිටව යන ඔබ සතුව පෑනක් තිබිය යුතුමය. නැත්නම් වෙනත් අයගෙන් ඔබ පෑනක් ඉල්ලා සිටීමද ඔබේ නොසැලකිලිමත් භාවය පිළිබඳ අන් අයට තහවුරු වන අවස්ථාවක් වනු ඇත. ඒ සමගම යමක් හදිස්සියේ සටහන් කරගැනීමට අවශ්‍ය කුඩා සටහන් පොතක්, මුදල් ඇසිරීමේ පහසුව සඳහා කුඩා පසුම්බියක් බෑගය තුළ වීමත් ඔබට පහසුවක් වනු ඇත. එමෙන්ම බෑගය තුළ නිතරම ටිෂූ පැකට්ටුවක් ළග තබා ගැනීමත් කාන්තාවකට වැදගත්ය.
නිවැරැදි ඉරියව් : කාන්තාවකගේ ලාලිත්‍ය මෙන්ම නිවැරදි ඉරියවුද ඇගේ පෞරුෂය මනාව පෙන්වන අංගයකි. ඇගේ ගමන් විලාසය, භාෂා ශෛලිය, ප‍්‍රසන්න සිනහව හා අන්‍යයන්ට ගරු කිරීම වැනි ගුණාංගද ඇගේ වටිනාකම තව තවත් ඉස්මතු කරවයි. ඇගේ ක‍්‍රියාකාරකම්වලදී නිසි ඉරියව් අනුගමනය කිරීම ඇගේ දැකුම්කලූ ස්වභාවයට පමණක් නොව සෞඛ්‍යවත් දිවි පෙවෙතකටත් බෙහෙවින් ඉවහල් වන්නකි.
ආහාර ගැනීම : ආහාර ප‍්‍රධාන වශයෙන්ම මිනිස් දිවියේ පැවැත්මට ඉවහල් වන සාධකයකි. නමුත් කාන්තාවක් වශයෙන් නිවැරැුදි ආහාර රටාවලට අනුගත විය යුතුමය. අප නිවෙසේදී පමණක් නොව උත්සව අවස්ථාවලදීද මේ ආහාර රටා ඉරියවු බොහෝ දෙනාගේ අවධානයට ලක් වෙයි. එම නිසා ඉතා ප‍්‍රසන්න අයුරින් ආචාරශීලීව නිවැරැුදි ආහාර රටා අනුගමනය කිරීම වැදගත්.
නිවැරැදි අංග චලන : ඔබ අන් අය හා කතාබහ කිරීම මෙන්ම එහිදී සිදුවන අංග චලන බොහෝ දෙනාගේ අවධානයට ලක්වන බව ඔබ නොදන්නවා විය හැකියි. නමුත් එම අංග චලන ඔබේ චර්යාවන් හා ආකල්පද සමාජයට නිරූපණය කරන තවත් එක් ආකාරයක් බව ඔබ දන්නවාද එනිසා ඔබ යම් පුද්ගලයෙක් සමඟ කතා කිරීමේදී නිවැරදි අංග චලන භාවිතයත් එම පුද්ගලයාගේ දෑස දෙස බලා නිසි අංගචලන භාවිත කර කතාබහ කිරීමෙන් පෞරුෂත්වය වඩා හොඳින් පෙන්නුම් කළ හැකි වේ.
මේ ආකාරයට කාන්තාවක් ලෙස ඔබට සමාජය හා ගනුදෙනු කිරීමේදී ආචාරශීලී චර්යා රටාවකට යොමු වීමෙන් අන් අයගේ ආකර්ෂණය දිනා ගන්නා සුන්දර යුවතියක් වීමට හැකි වේවි.
ශාලිකා රංගනී සමරදිවාකර
උපුටා ගැනීම මව්බිම
