This site has features that require javascript. Follow these simple instructions to enable JavaScript in your web browser.
විස්තර ලුහුඩු දැන්වීම්
රැකියා කරන කාන්තාවන්ට තිඛෙන ලොකුම ප්‍රශ්නය

අද අපේ රටේ තියෙන්නේ ඉතාම තරගකාරී ආර්ථිකයක්. මේ තරගකාරී ලෝකයේ කාන්තාව වන ඔබටත් ලොකු වගකීමක් හිමිවෙලා කියලා ඔබ දැනටමත් දන්නවා ඇති. සරලවම කිව්වොත් කාන්තාවක් වන ඔබටත් අද රැකියාවකට නොයා ඉන්න අමාරු තත්ත්වයක් තමයි ඇති වෙලා තියෙන්නේ. ඒ නිසාම කාන්තාවට ගෙදරදී පැවැරුණු වැඩ, ඒ කියන්නේ ළමයි බලාගන්න, ගෙදර පිරිසුදු කිරීමේ වැඩ, ආහාර පිසිනවා වගේ වැඩවලට අමතරව තවත් කාර්යභාරයක් හිස මත පැටවෙලා. ඒ ගෙදරට අවශ්‍ය මුදල් නැතිනම් ආදායමක් ලබා ගන්න එක. අද ආර්ථිකය ගැන ටිකක් අපි කතා කළොත් දළ වශයෙන් පවුලකට ජීවත් වෙන්න රුපියල් 50,000ක්වත් ඕනේ. ඒත් ඒ තරම් ආදායමක් ගන්න පවුල් කීයද අද ලංකාවේ ඉන්නේ? මේ නිසා ඔබත් රැකියාවක් කළ යුතු කාලය දැන් එළැඹිලා. එහෙම වුණත් ඔබට තවත් ගැටලුවක් මතුවෙනවා. ඒ තමයි ඔබ කැමැති වුණත් අකැමැති වුණත් ඔබට රැකියා ලබාගන්න වෙන්නේ වැඩිපුරම පෞද්ගලික අංශයේ වීම. ඊට පසු අපි බලන්න ඕනේ කාන්තාවක් විදියට ගෙදර වැඩ ටික ඔබේ හිස මත පැවැරෙන ගමන් ඔබ කොහොමද රැකියාවේ තිඛෙන වගකීමත් ඔළුවට ගන්නේ කියලා. එහෙම ඒ වගකීම ඔළුවට ගන්නනම් ඔබ ගොඩනඟා ගතයුතු ශක්තීන් 03ක් අපිට හඳුන්වලා දෙන්න පුළුවන්.

  1. ඔබ කරන රැකියාව ගැන ඔබ තෘප්තිමත් වෙන්න ඕනේ.
  2. ආයතනය තුළ ඔබට පැවැරෙන කාර්යභාරයට ඔබ අදාළවෙන්න ඕනේ.
  3. ගෙදරට විතරක් වගකියූ ඔබ රැකියාවේ වගකීමටත් බැඬෙන්න ඕනේ.

මේ කරුණු 03දීම ඔබේ පෞරුෂය බලපානවා. එතකොට මේ කරුණු 03 සඳහා ඔබ ධනාත්මකව මුහුණ දෙන්නනම් සුවිශේෂී පෞරුෂයක් ඔබ හදා ගන්න ඕනේ. ඒක සාමාන්‍ය කාන්තාවක් ඉක්මවා ගිය එකක් වෙන්නත් ඕනේ. මොකද රැකියාව කරන ආයතන කියන්නේ වෙනස්ම සමාජයක්. ඒ නිසා ඒකට මුහුණ දෙන්නනම් ඒ වෙනස් සමාජය තුළ ඔබට කටයුතු කරන්නනම් ඔබට විධිමත් කුසලතා හා හැකියාවන් ගණනක් තිබිය යුතුයි.

මනෝභාවයන් තුනක්

අපි ඊළඟට තව කාරණයක් ගැන බලමු. සාමාන්‍යයෙන් රැකියාවලට යන කාන්තාවන්ට මනෝභාවයන් 03ක් තියෙනවා. ඒ කියන්නේ මනස වැඩ කරන ආකාර 03ක් තියෙනවා.

  1. ළමා මනෝභාව
  2. මවුපිය මනෝභාව
  3. වැඩිහිටි මනෝභාව

ළමා මනෝභාවය

අපි මුලින්ම ළමා මනස ගැන බැලුවොත් ළමයා තීන්දු ගන්නේ තමන්ගේ හැඟීම් අනුව. තමන්ට හිතෙන දේ හිතට එන දේ කරනවා. එතකොට රැකියාවකට යන සමහර කාන්තාවන්ටත් ළමා මනෝභාවය තියෙනවා. එහෙම අය තමයි තමන්ගේ හැඟීම් අනුව තීන්දු තීරණ ගන්නේ. කාර්යාලයක පිටස්තර අය හුඟක් ඉන්නවා. සමහර විට හැඟීම්බර විය යුතු අවස්ථා හුඟක් එන්න පුළුවන්. ඒත් නිවෙසේ ලොකු වගකීමක් තිඛෙන ඔබ කාන්තාවක් හැටියට ඒ හැඟීම්වලට අවනත නොවී බුද්ධිමත්ව වැඩ කරන්න ඕනේ. නැතිව හැඟීම්වලට අනුව වැඩ කළොත් ඔබේ රැකියාවත්, පෞද්ගලික ජීවිතයත් දෙකම අඩපණ වේවි. අද රූපවාහිනි නාට්‍යවලත් හුඟක් වෙලාවට තියෙන චරිත හුඟක්ම බොළඳ කාන්තා චරිත. කාන්තාවන්ට හැඟීම් දැනෙන එක ස්වාභාවිකයි තමයි. ඒත් ඒ චරිත ඔබේ චරිත කර නොගෙන වගකීමෙන් වැඩ කිරීම ඔබ සතු දෙයක්. ඒ නිසා හදවතින් හිතලා රැකියාවේදී ක්‍ෂණික තීරණ ගන්න එපා. ක්ෂණික පුද්ගල සබඳතාවලට යන්න එපා. ඔබ රැකියා ස්ථානයේ අනෙක් අය එක්ක ගැටෙන අවස්ථාවලදී ඔබට පැවැරෙන කාර්යයන්වලදී බුද්ධිමත්ව හිතන්න පළපුරුද්දක් ඇති කරගන්න. දරුවෝ ඉන්න විවාහක මවුවරුන්ට මේක ඉතාම වැදගත්.

මවුපිය මනෝභාවය

ඊළඟට අපි මවුපිය මනෝභාවය ගැන කතා කරමු. මේකෙන් කිය වෙන්නේ දැඩි විනිශ්චයශීලී, නීතිරීති මඟින් අනුන් දැඩිව පාලනය කරන කාන්තාවක් ගැන. ඒ කියන්නේ ගෙදර ළමයින්ව පාලනය කරනවා වගේ රැකියා ස්ථානවල තමන් යටතේ ඉන්න අයව පාලනය කරන්න උත්සාහ කරනවා. රැකියා කරද්දී නීති රීති අවශ්‍යයි වගේම ස්ථානෝචිත ප්‍රඥාවත් අවශ්‍යයි. ඒ නිසා මවුපිය මනෝභාවය ඔබට රැකියා ස්ථානයේදී හානියක්.

වැඩිහිටි මනෝභාවය

ඊළඟට අපි බලමු වැඩිහිටි මනෝභාවය ගැන. මේක තමයි රැකියා කරන කාන්තාවක් වශයෙන් ඔබට තිබිය යුතුම මනස. ඒක සංකේතවත් වෙන්න ප්‍රධාන කරුණු 4ක් තියෙනවා.

  1. දත්ත, කරුණු, පුවත් ආදිය මත තීරණ ගැනීම.
  2. හැඟීම්වලට වඩා බුද්ධියට අනුව තීරණ ගැනීම.
  3. අභියෝගවලට මුහුණ දීම.
  4. සිතිවිලි, අදහස් හා ආකල්ප මත තම ජීවිත තත්ත්වය ගොඩනඟා ගැනීම.
අද රැකියාවක් කරන ඔබට බසයක, දුම්රියක ගමන් යෑමත් අභියෝගයක්. වාචික ලිංගික හිංසනය ඕන තරම් මේ ආයතනවල තියෙන්න පුළුවන්. ඒනිසා ඊට මුහුණ දෙන්නනම් ඔබ බුද්ධිමත්, සමාජශීලී හා පෞරුෂයක් සහිත අයකු විය යුතුයි. එහෙම වුණොත් ඔබට රැකියාවෙන් වගේම පවුල් සබඳතා තුළිනුත් ඉදිරියට යෑමට හැකි වේවි.

උපුටා ගැනීම මව්බිම පුවත්පත