This site has features that require javascript. Follow these simple instructions to enable JavaScript in your web browser.
Sithmal Yaya
මාසික වැටුපෙන් උපරිම ප්‍රයෝජන ගැනීමට ක්‍රම 5ක්

 

සාමාන්‍ය වැටුප පරිභෝජනය : ශ්‍රී ලංකාවේ සමාජයේ පවුලක සැමියා මෙන්ම බිරියද බොහෝවිට රැකියාවල නිරත වෙයි. නමුත් නිවෙසේ මුදල් පරිහරණය සිදුවන්නේ බොහෝ විට කාන්තාව අතිනි. වැටුප අතට ගත් විගසම අප සිදු කරන්නේ පළමුව පෙර මාසයේ විදුලි හා ජල බිල් ගෙවීමට, දරුවන්ගේ පන්ති ගාස්තු හා ණය ගෙවීමට වෙන්කිරීමයි. මෙයට වැඩි මුදලක් වෙන් කිරීමටද සිදුවෙයි. දෙවනුව තම ආහාර පාන ගැන වැඩි අවධානයක් යොමු කරයි. කාන්තාවන් තෙවනුව වැඩි පිරිවැයක් වෙන් කරනුයේ විලාසිතාවලට හා තම තත්ත්වය වඩා වැඩි කිරීමට කරන උත්සාහයටයි. නවීන වාහනයක් මිලදී ගැනීම, වැනි වැඩි පීඩනයක් ඇතිවන පිරිවැයක් දැරීමට සිදු වන කටයුතුවලට මොවුන් නැඹුරුවක් දක්වයි. 

බටහිර සමාජයේ පරිභෝජනය : අප රටේ මෙන් නොව යුරෝපා රටවල කාන්තාවන් නම් ඔවුන්ගේ මුදල් පරිහරණය පිළිබඳ දෙවරක් සිතා බලා එය යොදා ගන්නේද වඩා ඵලදායී කාර්යකටයි. ඔවුන් සිතන ආකාරය අනුවත් මෙය වෙනස් වෙයි. මොවුන් තම වැටුප පරිභෝජනය කරන්නේ පිරමිඩයක ආකෘතියක ආකාරයටය. එහි පහළම තලයේදී පවුලේ නිරෝගිකම, සුවතාව පිළිබඳ වැඩි අවධානයක් යොමු කරයි. මොවුන් තම වැටුපෙන් පළමුව වෙන් කරන්නේ සුවතාව වෙනුවෙනි. පෝෂණීය පලතුරු වර්ග මිලට ගැනීම හා පිහිනුම් වැනි ක්‍රීඩාවලට යොමු වීමට වැඩි ඉඩකඩක් ලබා දෙයි. දෙවනුව ඔවුන් කොටසක් ආයෝජනය කරන්නේ අධ්‍යාපන කටයුතු වෙනුවෙනි. දරුවන්ගේ මූලික විෂයන්ට අමතරව වෙනත් භාෂාවන් අධ්‍යයනයටද ආරම්භයක් ලබා ගන්න ක්‍රීඩා පුහුණුවකට හෝ ගෘහණියගේ අමතර දැනුමකට අත්කම් වැනි පාඨමාලාවකට යොමු වන්නට අවශ්‍ය මුදලද වෙන්කර තබන්න. සති අන්තයේ පුවත්පත්වල මෙවැනි දේ පිළිබඳ ඇති දැන්වීම් කියවා මෙවැනි පාඨමාලාවකට යොමුවී ඔබේ දැනුම දියුණු කර ගන්න. ගෘහණියකට නම් එමඟින් අමතර ආදායම් මාර්ගවලට අවස්ථා සාදා ගැනීමටත් හැකියාව ඇති කරයි. තෙවැනි කාරණය නම් ණය නොවී සිටින ලෙස ස්ථිර ආයෝජන ක්‍රමයකට යම් මුදලක් වෙන් කිරීමයි. වෙනත් සුළු හෝ ව්‍යාපාරයකට මුදලක් වෙන් කිරීමට මොවුන් හුරුව ඇත. 

සරල ක්‍රමවේද පහක් : තමාට හිමිවන මාසික වැටුප විවිධ වෘත්තීන් අනුව වෙනස් වුවත් එය නිසි ලෙස කළමනාකරණය කර ගැනීමට ඔබ දැන ගත යුතුයි. මේ නිසා මුදල් පරිභෝජනය කිරීමේදී මේ කාරණා ගැන සැලකිලිමත් වන්න. 

වෛද්‍ය පර්යේෂණයත් : පවුලේ සියලු දෙනාටම ඇඟ සම්පූර්ණ වෛද්‍ය පරීක්‍ෂාවක් සිදු කිරීමට අවස්ථාවක් උදා කරගන්න. ඇඟ සම්පූර්ණ වෛද්‍ය පරීක්‍ෂාවකට වැඩි මුදලක් වැය වන නිසා ඔබ මෙවැනි දේ කල් දමනවා විය හැකියි. නමුත් ඔබේ නිරෝගිකම හොඳින්ම මැන බැලිය හැකි වන්නේ මෙවැනි වෛද්‍ය පරීක්‍ෂණයකිනි. මේ නිසා මුදල් අතට ලැබුණු විටෙක ඔබේ සෞඛ්‍යසම්පන්න බව පරීක්‍ෂා කර ඉදිරියේදී ඇති විය හැකි රෝග අවදානමින් මිදෙන්න. නමුත් අවුරුදු හා නත්තල් සමයේදී ඔබේ ආහාර රටාවේ තෙල්, සීනි වැඩි වන නිසා මේ කාලයේදී වෛද්‍ය පරීක්‍ෂණ සිදුකර නොගන්න. 

රක්‍ෂණාවරණයක් : මේ සමඟම පිළිගත් ආයතනයකින් වෛද්‍ය රක්‍ෂණාවරණයක් ලබා ගන්න. මේ සඳහා මාසික වැටුපෙන් රු. 2000ක් පමණ වෙන් වුවත් මෙය හදිසි අනතුරක් හෝ ශල්‍යකර්ම සිදු කිරීමට අවශ්‍ය වූවිට එය ආර්ථිකමය වශයෙන් විශාල වාසියකි. 

දරුවන්ටත් ගිණුමක් : දරුවකු උපත ලැබූ පසු එම දරුවා වෙනුවෙන් ගිණුමක් ආරම්භ කරන්න. මවුපියන් මාසිකව ලබන වැටුපෙන් 2%ක් වත් ඔවුන් වෙනුවෙන් ඉතිරි කරන්න. මුදල් තැන්පතු ගිණුමක් මෙන්ම රක්‍ෂණ ගිණුමක් ආරම්භ කරන්න. දරුවාගේ හදිසි රෝගී තත්ත්වයකදී ඔබ අත මුදල් නැති වුවත් මෙවැනි රක්‍ෂණාවරණයක් ඇත්නම් බිය විය යුතු නැත. 

පෝෂණීය මිල අධික ආහාරවලට වැඩි ඉඩක් : මුදල් ලැබුණු විට විනෝදයට ර්ථීඪලලච වැනි රසකාරක යෙදූ කෙටි කෑමවලට නොව තරමක් මිල අධික පෝෂණීය එළවළු පලතුරු මිලදී ගන්න. පෝෂණවේදියකුගෙන් නිසි උපදෙස් ලබාගෙන පෝෂණීය ආහාර පිළිබඳ දැනුවත් වෙන්න. දෙළුම්, ඩ්‍රැගන්ෆෘට් වැනි මිල අධික පෝෂණීය පලතුරු වර්ග ඔබේ ආහාරයට එක් කරගන්න. රසවත් නිර්මාංස ආහාර වේලක රස විඳින්නටත් ඔබට පුළුවන්. මීට අමතරව නිතර ආහාර වේලට එක්කර නොගන්නා නැවුම් කිරි, මැංගුස්, ලාවුලු වැනි පළතුරු වර්ග, ග්‍රීන් ටී පාන හා බෙලි මල් පානවලට වැඩි ඉඩක් ලබා දෙන්න. 

අමතර දැනුමක් එකතු කර ගන්න : මාසිකව ලබන වැටුපෙන් සුළු මුදලක් හෝ සෑම මසකම වෙන්කර තබන්න. ඔබ කැමැති මල් වගාව, කේක් නිර්මාණ හෝ අත්කම් වැනි පාඨමාලාවකට සති අන්තයේ සහභාගි වන්න. එවැනි පාඨමාලාවකට සහභාගි වී එය ඔබේ අමතර ආදායම් මාර්ගයක් කර ගැනීමට ස්වයං රැකියාවකට එළැඹීමටද හැකියි.

සමාජ සේවයට වෙන් කරන්න : අප අතට ලැබෙන මුදලින් යම් ප්‍රමාණයක් දානමය හෝ ආගමික දෙයකට සමාජ සේවා අරමුදලට වෙන් කිරීමටද අමතක නොකරන්න. තමාගේ පරිභෝජනයට පමණක් මුදල් වැය නොකර ආධ්‍යාත්මික කටයුතුවල යෙදීමටද යම් මුදලක් වෙන් කරන්න. මාසිකව යෙදෙන දානමය කටයුත්තකට, දුගී දරුවන්ට වැනි සත්කාරවලටද පවුලම එක් අරමුදලක් සාදා එයට එක් කිරීමට හුරුවන්න. දරුවන් තුළ යහපත් ආකල්ප වර්ධනය කිරීමටද මෙවැනි කාර්යයන්වල යෙදීම පහසුවකි. 

ශාලිකා රංගනී සමරදිවාකර 

මව්බිම