This site has features that require javascript. Follow these simple instructions to enable JavaScript in your web browser.
Sithmal Yaya
සෞභාග්‍යයේ මැණික

 

"මැණික්" කියූ පමණින් බොහෝ දෙනකුගේ සිතට නැඟෙන්නේ නිල් වර්ණයෙන් දිලිසෙන මැණිකක්. ඒ තරමට මේ නිල් වර්ණය සහිත මැණික් අපට සමීපයි. "ශ්‍රී ලංකාවේ සාඩම්බරය", "ජාතික මානික්‍යය" ආදී වශයෙන් හැඳින්වෙන නිල් මැණික අප රටේ පමණක් නොව මුළුමහත් ලෝකයේම ප්‍රසිද්ධම මාණික්‍යය ලෙස කිරුළු දරා හමාරයි. ඒ තරමටම නිල් මැණිකේ බලයට, ශක්තියට සමකළ හැකි තවත් මැණික් වර්ගයක් නොමැති තරමටම එය ජනාදරයට, විශ්වාසයට පාත්‍රවී තිබෙනවා. එංගලන්තයේ එළිසබෙත් රැජන, ඩයනා කුමරිය මෙන්ම වර්තමානයේ කේට් කුමරියද සාඩම්බරයෙන් පැලැඳ සිටින්නේ ශ්‍රී ලංකාවේ නිල් මැණික් බව අමුතුවෙන් කිවයුතු දෙයක් නෙවෙයි. අමිතාබ් බච්චන්, ඓශ්වර්යා රායි, ලක්‍ෂ්මි මිතෙල්, මුකේෂ් අම්බානි වැනි සිනමා තරු ධන කුවේරයන් සහ ප්‍රසිද්ධ ව්‍යාපාරිකයන්ගේ අත් සරන මේ නිල් මැණිකේ බලය ගැන ඔවුන් කතා කරන්නෙ හරිම ආදරයෙන් බව අපි ඔබට මීට ඉහත ලිපියකිනුත් කියා දුන්නා මතක ඇති. මේ කරුණු මා ඔබට ඉදිරිපත් කිරීමේදී මඳක් ප්‍රවේසම් විය යුතුයි කියලත් හිතෙන කරුණක් තිබෙනවා. මොකද අපගේ ලිපිවලින් අහුලා ගන්නා යම් යම් දත්ත භාවිත කරමින් එක්තරා වංචනිකයකු රූපවාහිනි වැඩසටහන්වල ජනතාව මුළා කරමින් සිටින බව බොහෝ දෙනකුගෙන් මට අසන්නට ලැබීම නිසා. ඒ නිසයි මා නිතර අවධාරණය කරන්නෙ මෙවැනි අයගෙන් ප්‍රවේසම් වීමට තරුපති පාඨක ඔබ බුද්ධිමත් විය යුතුයි කියන දේ.

සමාජයේ ජන්ම පත්‍රවලින් සමස්තයක් ලෙස ගත් කල හැම කෙනකුම නිල් මැණික් පැලඳීමට වාසනාවන්ත නූතන් සියයට හැත්තෑ පහක් පමණම දෙනාට නිල් මැණික් පලඳින්න පුළුවන් කියන එක මාගේ අත්දැකීම් අනුව පැහැදිලි වෙනවා. කෙසේ වෙතත් පැලඳීමට නිල් මැණික් තෝරා ගැනීමේදී ඔබ සැලකිලිමත් වියයුතු කරුණු රාශියක් තිබෙනවා. ශ්‍රී ලංකාව, ඉන්දියාව, කාශ්්මීරය, ටැන්සානියාව, මැඩගස්කරය, නයිජීරියාව, කෙන්යාව, තායිලන්තය ආදී වශයෙන් රටවල මෙම නිල් මැණික් නිධි දක්නට ලැබුණත් හොඳම තත්ත්වයේ නිල් මැණික් ලෙස අපට දැක්විය හැක්කේ ශ්‍රී ලංකාව සහ කාශ්මීරයේද සමහරක් මැඩගස්කර් සහ ටැන්සානියා ගල්ද වීම විශේෂයක්. මේ අතරින් නයිජීරියානු නිල් මැණික්වල බොහෝ විට කහ වර්ණය මිශ්‍ර වී ඇති නිසාත් කොළ වර්ණයට වඩා නැඹුරුවක් පෙන්වන නිසාත් ඔබ නිල් මැණික් තෝරාගන්නා විට නයිජීරියානු නිල් මැණික් තෝරා ගැනීමෙන් හැකි තාක් වැළකී සිටීම මැණික් පිළිබඳ පරිණත දැනුමක් නැතිනම් නුවණට හුරුයි. මැණික් ලෝකයේ රතු මැණික්, පුෂ්පරාග, පද්මරාග, සුදු නිල්, රෝස සැනයර්, මඟුල් ගල, කොල සැෆයර්, ඉන්ද්‍ර නීල ආදී මැණික් වර්ගද අයත් වන "කොරැන්ඩම්" කුලයට අයත් මේ අභිමානවත් නිල් මැණික්, මැණික් ලේකයේ වැඩිම ඉල්ලුමක් ඇති මැණික් වර්ගයක්ද වෙනවා. දෘඪතාව නවයක් ලෙස මෝසස්ගේ මාපකයේ පෙන්නුම් කරන නිල් මැණික විශිෂ්ට ගුරුත්වය හතරක්ද පරාවර්තන අගය 1.76 - 1.77ක්ද ලෙස දැක්වෙනවා. බොහෝ විට දකුණු අතේ මැදඟිිල්ලේ පැලඳීමට නිර්දේශ කරන මෙම සෞභාග්‍යයේ මාණික්‍යය ව්‍යාපාරිකයන්ගේ ඉලක්ක, අරමුණු බොහෝ මල්පල ගැන්වීමේ විශ්වීය හැකියාවන්ගෙන් යුක්ත බව වසර දස දහස් ගණනක සිට සමාජයේ මුල් බැස ඇති දැඩි විශ්වාසයක්. මේ නිසා සමාජ ආදරයක්, විශ්වාසයක් දිනා සිටින හොඳ තත්ත්වයේ නිල් මැණික් එන්න එන්නම දුබල වීම නිසා අද ආර්ථිකමය වටිනාකම අතින්ද නොසිතූ විරූ ලෙස ඉහළ ගිහින්. මීට වසරකට එකහමාරකට කලින් රුපියල් දස දහසක පහළොස් දහසක මිලකට ලබාගත හැකිව තිබූ හොඳ තත්ත්වයේ නිල් මැණික් කැරට් එකක ප්‍රමාණයක් අද වන විට වෙළෙඳපොළේ රුපියල් තිස් දහසේ සිට ලක්‍ෂය පමණ දක්වා අලෙවි වෙනවා. මා මෙසේ සඳහන් කළ පලියටම මෙවැනි මිල ගණන් යටතේ මැණික් එකවර මිලට නොගෙන ඒ පිළිබඳව සවිස්තරාත්මකව සොයා බැලීමක් කිරීමකින් අනතුරුව මැණික් මිලට ගැනීම සිදුවිය යුතුයි. මොකද මා මෙසේ සඳහන් කළේ අද වන විට නිල් මැණික්වල දුර්ලභකම නිසාම නොයෙකුත් විද්‍යාත්මක ක්‍රම මඟින් විද්‍යාගාර තුළ නිපදවන කෘත්‍රිම නිල් මැණික් බහුලව ඇති නිසයි. මෙහිදී ඔබ සැලකිලිමත් වියයුතු අනෙක් කාරණාව තමයි බොහෝ කූට වෙළෙඳුන් වර්ණ විසරණය මඟින් වර්ණ ගන්වා නිල් මැණික් බවට පත්කර මෙම මැණික් වෙළෙඳපොළට ඉදිරිපත් කිරීම. සෙල්සියස් අංශක 1,200 - 1,400 වැනි උෂ්ණත්වයේ කොරැන්ඩම් ගල් ටයිටේනියම් ඔක්සයිඩ් සමඟ රත් කළ විට ටයිටේනියම් ශුද්‍ර කොටස් කොරැන්ඩම් ගල තුළට විසරණය වී ලස්සන නිල් වර්ණයක් පෙන්වනවා. 

ඉතින් මෙවැනි තත්ත්වයන් යටතේ ඔබ පමණක් නොව ඔබට මැණික් අලෙවි කරන බොහෝ වෙළෙඳුන්ටද මෙවැනි කාරණා පරීක්‍ෂා කිරීමට හැකි දැනුම අල්ප බැවින් හොඳම ක්‍රමය නිවැරැදි සහතිකයක් ලබා ගැනීම හෝ හරි මැණික් උපදේශනයක සේවාව ලබා ගැනීමයි. කෙසේ වෙතත් සෙනසුරු ග්‍රහයා සමඟ ඍජුවම සම්බන්ධ වන මෙම නිල් මැණික් පැලඳීමට ප්‍රථම කේන්දර පරීක්‍ෂාවකින් එය පැලඳීමට සුදුසුද නුසුදුසුද යන්න සොයා බැලීමත් අනිවාර්ය කරුණක්. ධනය, ආකර්ෂණය සහ සෞභාග්‍ය ජීවිතයට කැන්දන මෙම නිල් මැණික් අතර එහි තවත් ප්‍රභේදයන් වන නිල් ආරු නූල්ද විශේෂ තැනක් ගන්නවා. මොකද පංච කාම සම්පත් ලැබීමේ අග්‍රගණ්‍යම මාණික්‍ය ලෙස සලකන්නේ නිල් ආර්නූල. ඒ කෙසේ වෙතත් ඔබ ව්‍යාපාරිකයකු නම්, ධනය රැස් කිරීමේ මහත් බලාපොරොත්තුවක එල්බ සිටින්නකු නම් සෞභාග්‍යයේ මංපෙත් විවර කිරීමට නිල් මැණික තරම් ප්‍රබල සහ ශක්තිවන්ත තවත් මාණික්‍යයක් නැති බවත් එය පැලඳීමෙන් විශ්මිත අරමුණු කරා ගිය ජීවිතයේ සාර්ථකත්වය අත් කරගත්තවුන් අන්තර්ජාලයට එක්කර ඇති අදහස් පරීක්‍ෂා කර බැලුවොත් ඔබටම තේරුම් යාවි.  

මැණික් උපදේශක  මිලින්ද එදිරිසිංහ (0766488248) 

මව්බිම