This site has features that require javascript. Follow these simple instructions to enable JavaScript in your web browser.
Sithmal Yaya
ජංගම දුරකතනය නිසා පෞරුෂයට හානි කරගන්න එපා

දුරකතනයේ නාදය : ජංගම දුරකතනයක නාද රටාව මෙතැනදී ඉතාම වැදගත්. හුඟක් දෙනෙක්ගේ ජංගම දුරකතන නාදය අනෙක් අයට බාධාවක් වන බව ඔවුන් දන්නේ නැහැ. කොයි වෙලාවේ දුරකතන ඇමැතුමක් ඒවිද කියලා අපිට කියන්න බැහැ. තමන්ට අවශ්‍ය දුරකතන නාදය තෝරාගත්තට පස්සේ එහි ශබ්දය අඩුවෙන් තියෙනවා නම් එය වඩාත් සුදුසුයි. අනෙක් කරුණ විදියට අප දුරකතන භාවිත කරන අවස්ථා පෙන්වා දෙන්න පුළුවන්. හදිසි සාකච්ඡාවකදී, වෛද්‍යවරයකු හමුවීමට ගිය විටදී, දුරකතනයේ නාදය අවම කිරීමට, හෝ දුරකතනය නිශ්ශබ්ද කිරීමට පුරුදු විය යුතුයි. 

කතා කිරීමේදී : ඒ වගේම ජංගම දුරකතනයට පිළිතුරු දෙන විට තමන් ඉන්නේ කොහෙද කතා කළ යුත්තේ මොන විදියටද කියන කරුණු ගැන සැලකිලිමත් වීමත් වැදගත් වනවා. තමන් කතා කරන්නේ මොනවද කොතැනද කාත් එක්කද කියලා හුඟක් අයට මතක නැහැ. ඒ වගේම පවුල් ප්‍රශ්න, ගෙදර ප්‍රශ්න සේරම ජංගම දුරකතනයෙන් විසඳන්න සමහර අය උත්සාහ කරනවා. එය එතරම් සුදුසු තත්ත්වයක් නෙවෙයි. 

ආචාරශීලී වෙන්න : පිරිසක් අතර ඉද්දී දුරකතන ඇමතුමක් ආවොත්, මට කරුණාකර සමාවෙන්න, පොඩි වේලාවක් දෙන්න' වගේ ආචාරශීලී වචනයක් කියලා පැත්තකට ගිහින් කතා කරන්න. එයින් අනෙක් අයට බාධාවක් වන්නේ නැහැ.

තමන් හඳුන්වාදීම : ඇමතුම ආවාම ආචාරශීලී විදියට කතා කරන්න. 'හෙලෝ, කාටද කතා කරන්න ඕන' වගේ දෙයක් අපිට භාවිත කරන්න පුළුවන්. ඒ වගේම අපි ළඟම යාළුවකුට ඇරෙන්න වෙනත් ඕනම කෙනකුට කතා කරන විට හෙලෝ මම හසිනි' වගේ අපිව හඳුන්වා දෙන්න පුළුවන්. නැත්නම් 'හෙලෝ මේ කාංචනා නේද, කාංචනා මම හසිනි' වගේ වාක්‍ය කීපයකින් අපිට ආමන්ත්‍රණය කරන්න හැකියාව තියෙනවා. 'මට පොඩි වේලාවක් දෙනවද, මට විනාඩියක් කතා කරන්න පුළුවන්ද' වගේ දෙයකින් අපිට තවත් ආචාරශීලී විය හැකියි.

රාත්‍රි ඇමැතුම් : අපේ ළඟම හදිසි යහළුවකුට ඇරෙන්න, කිසිම විටෙක රාත්‍රි 7.00න් පසු කතා කරන්න පුරුදු වෙන්න එපා. ඒ අයට වගකීම් තිබෙනවා. අපි ඔවුන්ට බාධාවක් වීම සුදුසු නැහැ. විශේෂයෙන් ඔබ කාන්තාවක් නම් යහළුකමට වුණත් පිරිමි කෙනෙක් සමඟ රාත්‍රියේ කතා කරන්න එපා. මොනතරම් සමීප සබඳතා තිබෙන කෙනෙක් සමඟ වුණත් ඒ පුද්ගලයාට ගෞරව කරලා කතා කරන්න පුරුදු වෙන්න. 

මඟහැරෙන ඇමතුම් : සාමාන්‍යයෙන් දුරකතන භාවිත කරන හැම කෙනෙක්ටම මඟ හැරුණු ඇමැතුම්  (Missedcall) ප්‍රශ්නය එනවා. ඔබට වැරැදි අංකයකින් ඇමතුමක් ආවොත් ඒ පුද්ගලයා කතා කරන තුරු ඉන්න. ඔබ අමතන්න එපා. ඔබ වැරැදීමකින් අංකයකට ඇමතුමක් ගත්විට, අංකය වැරදී බව දැනගතහොත් සමාව (Sorry)  ඉල්ලන්න. ඒ වගේම වැරදිලා ඔබේ දුරකතනයට එන ඇමතුමකට ප්‍රතිචාර දක්වද්දී 'ඔයා කතා කළේ වැරදි අංකයකට' එහෙමත් නැත්නම් Sorry Wrong Number  කියලා කියන්න. ඔබේ විස්තර ඉන්නේ කොහෙද ආදිය කියන්න යන්න එපා. ඒ පුද්ගලයාට අහන්න අයිතියකුත් නැහැ. 

අංකය වෙනස් කිරීමේදී : ඒ වගේම දුරකතන අංකය වෙනස් කරනවා නම් කෙටි පණිවුඩයකින් ඒ බව යහළුවන්ට දැනුම් දෙන්න. සමහර පුද්ගලයන් නොදන්නා අංක  (Unknown Number)  වලට අමතන්නේ නැහැ. ඔබේ යාළුවන් අතර එවැනි අය ඉන්නවා නම් ඔබේ කෙටි පණිවුඩය ඔවුන්ට පහසුවක් වනවා. යහළුවකුට ඇමතුමක් ගන්නා විට, යාළුවා ඇමතුමට ආවේ නැත්නම්, කෙටි පණිවුඩයක් තියන්න පුරුදු වෙන්න. එවිට යාළුවා ඔබට ප්‍රතිචාර දක්වනවා. 

කාර්යබහුල වෙලාවට : ඒ වගේම දුරකතනයෙන් කතා කරන්න බැරි තැනක, බැරි අවස්ථාවක ඉන්නවා නම් ඔබ ඒ බව අමතන පුද්ගලයාට පවසන්න. 'දැන් කතා කරන්න අපහසුයි. මට පොඩි වේලාවක් දෙන්න. මම ගන්නම්' හෝ 'ටිකක් බිසී, ඔයා විස්තරය මැසේජ් කරන්න' වගේ දෙයක් කියන්න පුළුවන්. 

පෞරුෂයට හානියක් : ජංගම දුරකතනය, එය භාවිත කරන ආකාරය මත ඔබේ පෞරුෂය තීරණය වනවා. එබැවින් ජංගම දුරකතනය භාවිතයේදී විශේෂයෙන් සැලකිලිමත් වන්න. ඔබ සමඟ යමෙක් කතා බහ කරන විට ඔබ දුරකතනය ගැන අවධානයෙන් සිටියහොත් අනෙක් පුද්ගලයා අපහසුතාවට පත් වෙනවා. ඔබට අපහසුවක් නැත්නම් අවහිර නොවන විදියට දුරකතනය අතේ තියාගෙන යන්න පුළුවන්. විලාසිතාවට ගැළපීම, අධික මිල ගණන්වල දුරකතන භාවිතය ඔබේ අයිතියක්. නමුත් තම පෞරුෂයට හානි නොවන ලෙස ජංගම දුරකතනය භාවිත කිරීම ඉතාම වැදගත්. 

මව්බිම