🛍️   Business Directory
📣   Classifields
🛍️   Business Directory
📣   Classifields

කමක්‌ නෑ අම්මට ඇසිඩ් ගහපන් - අසම්මත ප්‍රේමයෙන් අන්ධ වූ තරුණියන් දෙදෙනකුගේ කතාව

කමක්‌ නෑ අම්මට ඇසිඩ් ගහපන් - අසම්මත ප්‍රේමයෙන් අන්ධ වූ තරුණියන් දෙදෙනකුගේ කතාව

අපි ප්ලෑන් කළේ අම්මගෙ ඇස්‌පෙනීම නැති උනාම අපට හැමදාම විනෝද වෙන්න පුළුවන් ක්‍රමයක්...

මේ කෑම්ප් එකේ උඹලට හොඳින් ඉන්න ඕනෙ නම් මම කියන විදිහට වැඩ කරන්න ඕනෙ. එහෙම බැරි එකෙක්‌ ඉන්නව නම් මගෙන් සල්ලං නොවී වෙන කෑම්ප් එකකට යන එක හොඳයි. කෝපයෙන් කෑගසන ඩිලානිගේ හඩ කන්වලට යවුල් වලින් අනින්නාක්‌ බඳුය. ඇගේ හඩ පිරිමියකුගේ කට හඩට සමානය. ඇගේ හැසිරීම මෙන්ම ශරීර ලක්‍ෂණ පවා තරුණයකු මෙන් විය. සුන්දර යුවතියක භාවිත කරන සුකුමල වචන වෙනුවට ඇගේ මුවග රැඳී තිබුණේ අමු තිත්ත කුණුහරුපය. උතුරුකරයේ එක්‌තරා හමුදා කඳවුරක රාජකාරි කරමින් සිටි ඩිලානි තිස්‌ විය නොඉක්‌මවූ තරුණියක වූවාය. ඩිලානිගේ හැසිරීම මෙන්ම ගති ලක්‍ෂණ නිසාම ඇයට හමුදා කඳවුරේ සෙබළියන් අතර මුල් තැන හිමිව තිබුණේ නිතැතින්ය. කඳවුරේ කාන්තා සෙබළියන්ගේ භට නිවාසය භාරව සිටියේ ද ඩිලානිය. හැමවිටම ඇය දරදඩු පාලනයක්‌ ගෙන ගියාය. කඳවුරේ කිසිම සෙබළියක්‌ ඇගේ වචනයට ඇගේ නියෝගයන්ට පිටින් ගියේ නැත. සුන්දර තරුණියක වූ චතුරිකා රාජකාරි කළේ ද මේ කඳවුරේය. ඩිලානිගේ තර්ජන ගර්ජන රැවුම් ගෙරවුම් හමුවේ චතුරිකා සිටියේ බියට පත්වූ මුවැත්තියක ලෙසය. ඉමදූව කනංකේ ග්‍රාමයේ ඉපිද හැදී වැඩුණු චතුරිකා සොහොයුරන් පස්‌ දෙනකුගේ පවුලේ එකම ගැහැනු දරුවා වූවාය. දහසකුත් එකක්‌ ආර්ථීක ප්‍රශ්නවලින් හෙම්බත් වී සිටි චතුරිකා ඒ ප්‍රශ්න වලින් ගැලවීමට රැකියාවක්‌ සොයන්නට වූවාය. යුද හමුදා සේවයට එක්‌ වීමට ඇයට අවස්‌ථාව ලැබුණේ ඒ අතරතුරදීය. කඳවුරේ රාජකාරි සඳහා පැමිණි මුල් දිනවලදී චතුරිකාට ඩිලානිගෙන් කිසිම බුරුලක්‌ ලැබුණේ නැත. පුංචි අත්වැරදීම් වලට පවා ඇය ඩිලානිගේ දැඩි වාග් ප්‍රහාර වලට ලක්‌ වූවාය. මේ වෙනස්‌කම් නිසා ඇයට හමුදා සේවය දැඩි නීරස රැකියාවක්‌ බවට පත්වෙමින් තිබිණි. කාලය කෙමින් ගෙවී යද්දී ඩිලානිගේ හැසිරීම ටිකෙන් ටික වෙනස්‌ වන බව චතුරිකාට තේරුම් යන්නට විය. උඹ හොඳ කෙල්ලෙක්‌ බං. මං උඹට කැමතියි. ඕනෙම උදව්වක්‌ උඹ මගෙන් ඉල්ලපන්. ඩිලානි චතුරිකාට කීවාය. දිනෙන් දින නීරස වෙමින් තිබූ චතුරිකාගේ හමුදා සේවයට ජීවයක්‌ එක්‌ වන්නට පටන් ගත්තේ එතැන් සිටය. හැම විටම ඩිලානි තමන් සමග සිටීමට උත්සාහ කරන බවක්‌ චතුරිකාට වැටහිණි. රාජකාරි කරන වේලාවල්වලදී පවා ඇය හොරැහින් තමන් දෙස බලා සිටිනු චතුරිකා දුටුවාය. මේ වගේ කෙනෙක්‌ මට හිතවත් වෙලා ඉන්න එක ලොකු දෙයක්‌. මගේ කියලා කිසි කෙනෙක්‌ මෙතැන නැහැ. ඩිලානි අක්‌කා ඉන්න එක මට හයියක්‌. ඩිලානිගේ රැකවරණය ගැන සිතමින් චතුරිකා සිය දහස්‌ වාරයක්‌ සතුටු වූවාය. කඳවුරේ නාන කාමරවල ස්‌නානය කරද්දී පවා ඩිලානි චතුරිකාගේ පිරිපුන් අඟපසඟ දෙස හොරැහින් බලා සිටියාය. ඒ බව දුටුවද චතුරිකා එය ගණනකට ගත්තේ නැත. මේ ගෑනු ගොඩේ ඔයාට නිදාගන්න අමාරුයි. මම ඔයාට නිදාගන්න වෙනම තැනක්‌ ලෑස්‌ති කරලා දෙන්නම්. දිනක්‌ ඩිලානි චතුරිකාට කීවාය. සෙබළියන්ගේ භට නිවාස ගොඩනැඟිල්ලේ වෙනම කාමරයක නිදා ගැනීමට චතුරිකාට අවස්‌ථාව ලැබිණි. එය තමන් ලැබූ විශේෂ වරප්‍රසාදයක්‌ ලෙස ඇය සිතුවාය. වෙනම කාමරයක නිදා ගැනීමට ලැබුණු දින රාත්‍රිය චතුරිකාට ඉතාම දීර්ඝ එකක්‌ විය. මධ්‍යම රාත්‍රිය ගෙවී යද්දී කාමරයේ දොර විවෘත වන හඬින් චතුරිකා අවදි වූවාය. එහෙත් අවදි වූ බව නොපෙන්වා ඇය නිසොල්මනේ සිටියාය. අඳුරේම කාමරයට ඇතුළු වූ රුව හෙමිහිට චතුරිකාගේ ඇඳට බර වුණේය. ඇගේ මුළු සරුවාංගයම ගැහෙන්නට විය. ඇය නිහඩවම සිදු වන්නේ කුමක්‌දැයි පිරික්‌සන්නට වූවාය. අඳුරු රුව චතුරිකාගේ සිරුර ස්‌පර්ශ කරන්නට වුණේය. කවුද උඹ? මොනවද කරන්න හදන්නෙ. තව දුරටත් ඉවසාගෙන සිටිය නොහැකි වූ තැන චතුරිකා කෑගැසුවාය. අඳුරු රුව එකවරම චතුරිකාගේ මුව අතින් තද කළාය.කෑගහන්න එපා බං මේ මම... ඩිලානි අක්‌කා. මට මහ පාළුවක්‌ දැනුණා. ඒකයි උඹව හොයාගෙන ආවෙ. ටිකක්‌ කතා කර කර ඉන්න. අඳුරේම මතු වූ රුව ඩිලානිගේ බව දැනගත් පසු චතුරිකාගේ බිය පහව යන්නට විය. ඩිලානි මොනවාදො කොඳුරන්නට වූවාය. ඇගේ ගොරහැඬි අතැඟිලි චතුරිකාගේ සිරුර පුරා දිව යන්නට වුණේය. "අනේ ඩිලානි අක්‌කේ... මේ මොකද කරන්නෙ" චතුරිකා වික්‌ෂිප්ත වූවාය. එදින රාත්‍රිය මහා කාලකණ්‌ණි රාත්‍රියක්‌ ලෙස ගෙවී ගියේය. ඩිලානිගේ අසම්මත ක්‍රියාවන් හමුවේ චතුරිකා දැඩි ලෙස අසරණ වූවාය. එහෙත් ඒ ක්‍රියාවන්වලට විරුද්ධවීමට තරම් ශක්‌තියක්‌ ඇයට තිබුණේ නැත. චතුරිකා නමැති සුන්දර තරුණිය තම අසම්මත ක්‍රියාවන් සඳහා ඩිලානි යොදවා ගත්තේ ඒ ආකාරයටය. පසුදා පහන් විය. චතුරිකාට ඩිලානිගේ මුහුණ බැලීමට බැරි තරමට ලැඡ්ජාවක්‌ සිතිණි. එහෙත් ඩිලානිට එය සාමාන්‍ය දෙයක්‌ මෙන් පෙනෙන්නට තිබිණි. එදින රාත්‍රියේ ආරම්භ වූ මේ අසම්මත සම්බන්ධය දිනෙන් දින ඉතාම බරපතළ ලෙස වැඩි වන්නට පටන් ගත්තේය. ටික දිනක්‌ ගෙවී යද්දී චතුරිකා ද ඩිලානිගේ පහස සොයන්නට වූවාය. ඒ අසම්මත ක්‍රියාවන්ට චතුරිකාගේ සිත ඇදී ගොස්‌ තිබුණේ ඇයටත් නොදැනුවත්වය. ඔය ගෑනි මේ කෑම්ප් එකේ කෙල්ලො කීප දෙනෙක්‌ම තියාගෙන ඉන්නවා. කෙල්ලන්ව බය කරගෙන ඉන්නෙ ඒකයි. උඹ පරිස්‌සමෙන්. කඳවුරේ සෙබළියන් කීප දෙනකුම චතුරිකාට ඩිලානිගේ කෙරුවාවන් ගැන කීවෝය. එහෙත් ඒ වන විට චතුරිකා ද ඒ පහත් ඇසුරට වැටී සිටියාය. කාලයක්‌ ගතවෙද්දී චතුරිකාගේත් ඩිලානිගේත් අසම්මත ඇසුර හමුදා කඳවුරේ ප්‍රසිද්ධ රහසක්‌ බවට පත්ව තිබුණේය. මට මේ කෑම්ප් එකේ ඉඳලා ඇති වෙලා. මුන් හැම එකාම අපි දෙන්න දිහා බලන්නෙ අමුතු විදිහකට. ඩිලානි තමාගේ සමීපතම මිතුරිය වූ චතුරිකාට කීවාය. හමුදා සේවයෙන් ඉවත් වී වෙනත් රැකියාවක්‌ කිරීමට ඔවුන් සැලසුම් කරන්නේ මේ ප්‍රශ්න නිසාය. ඒ අතරතුර චතුරිකා හදිසියේම විවාහ වූවාය. මවගේ දැඩි බලපෑම නිසාම විවාහ වූ ඇය සිය සැමියා සමග කනංකේ ප්‍රදේශයේ නිවසක පදිංචි වූවාය. හමුදා සේවයේ යෙදී සිට ඇය නිවසට එන්නේ මාසයකට වරකි. විවාහයෙන් පසු චතුරිකා දියණියක ලැබුවාය. දරුවා වැදුව ද ඇය හදා වඩා ගැනීමේ කාර්ය භාර කෙරුණේ චතුරිකාගේ මව වෙතය. කාලයක්‌ ගත වෙද්දී චතුරිකාගේ සැමියාට ඇය එතරම් රිස්‌සුවේ නැත. ඇගේ හැසිරීම ගති පැවතුම් කෙරෙහි දැඩි අකමැත්තකින් සිටි සැමියා කාටත් හොරා නිවසින් පිටව ගියේය. අවසානයේ ඔහු වෙනත් විවාහයක්‌ කරගෙන වෙනම පදිංචියට ගියේ ගැහැනියකගෙන් ලැඛෙන සතුට චතුරිකාගෙන් නොලැඛෙන්නට වූ නිසාය. දැන් උඹට තේරෙනව නේද? ඔය කසාද කෙරුවාවල් අපිට හරියන්නෙ නැහැ. අපි දෙන්න මොනව හරි හොඳ දෙයක්‌ කරලා සල්ලි ටිකක්‌ හොයා ගමු. ඩිලානි සිය කල්‍යාණ මිතුරිය බවට පත්ව සිටි චතුරිකාට කීවාය. හමුදා සේවයෙන් නීත්‍යනුකූලව ඉවත්වූ චතුරිකා ලෙබනනයේ රැකියාවකට ගියේ අනාගතය සුන්දර කරගැනීමේ සිහින මවාගෙනය. හමුදා සේවයෙන් ඉවත් වූ ඩිලානි ද අරාබිකරයේ රැකියාවකට ගියාය. රටවල් දෙකක සිටිය ද ඔවුහු දිනපතාම දුරකථනයෙන් කතා කළෝය. එකිනෙකාගේ සුවදුක්‌ සොයා බැලූ‍වෝය. මට උඹව නොදැක ඉන්න බැහැ බං. අපි දෙන්නම ලංකාවට ගිහිල්ලා මොනව හරි කරලා ජීවත් වෙමු. ඩිලානි යෝජනා කළාය. අන්තිමේදී ඩිලානිත් චතුරිකාත් රට රැකියාවන්ට සමුදී ශ්‍රී ලංකාවට එන්නේ කුමක්‌ හෝ රැකියාවක්‌ කර ජීවිතය ජය ගැනීම සඳහාය. ඩිලානිගේ උපන්ගම මතුගමය. එහෙත් ඇය වැඩි කාලයක්‌ උපන් ගමේ ගත කළේ නැත. ඩිලානි තම අසම්මත සහකාරියගේ නිවසට නිතර යන්නට පුරුදුව සිටියාය. ඩිලානි තම දිය‚ය සමග මෙවැනි ඇසුරක්‌ පවත්වාගෙන යන බව චතුරිකාගේ මව දැන සිටියේ නැත. ඔවුහු ඩිලානිට තම පවුලේ කෙනකුට මෙන් සලකන්නට පුරුදුව සිටියහ. රට රැකියාවන්ට ආයුබෝවන් කියූ ඩිලානිත් චතුරිකාත් කනංකේ ප්‍රදේශයේ පුංචි ව්‍යාපාරයක්‌ පටන් ගත්හ. සිල්ලර බඩු කඩයක්‌ විවෘත කළ මේ අසම්මත යුවළ කාලයක්‌ තිස්‌සේ එය සාර්ථකව කරගෙන ගියෝය. එහෙත් වැඩි කාලයක්‌ ඒ වෙළෙඳාම කරන්නට ඔවුන්ට ඉඩ ලැබුණේ නැත. ඩිලානිත් චතුරිකාත් අතර ඇතිවී තිබූ අසම්මත ඇසුර දිනෙන් දින ලියලා වැඩෙමින් තිබිණි. ඉඩ ලැඛෙන හැම විටකම ඔවුහු ඒ අසම්මත ක්‍රියාවන්වල යෙදෙමින් පහත් පෙළේ වින්දනයක්‌ ලැබීමට පුරුදුව සිටියහ. මම යනවා ගාමන්ට්‌ එකක රස්‌සාවක්‌ කරන්න. මෙහෙම ගියොත් මට මගෙ කෙල්ලට කන්න අඳින්න දෙන්නවත් සල්ලි නැති වෙනවා. ගෙදර ඉන්න මල්ලිලා දෙන්න ගැන බලන්න වෙලා තියෙන්නෙත් මට.

චතුරිකා තමන් පත්ව සිටින අසරණකම පිළිබඳව ඩිලානිට කීවාය. කොග්ගල ප්‍රදේශයේ ඇඟලූ‍ම් කම්හලක රැකියාවට චතුරිකා පිටත්ව යන්නේ ඉන් පසුවය. මේ අතර ඩිලානි ද කටුනායක ප්‍රදේශයේ මහා පරිමාණ ආපන ශාලාවක සේවයට ගියාය. කොග්ගල ඇඟලූ‍ම් කම්හලේ රැකියාවට ගිය පසු චතුරිකා තම අනාගතය ගැන අලූ‍ත් සිහිනයක්‌ මවන්නට වූවාය. ඩිලානි සමග ගෙවන ජීවිතය මහා කාලකණ්‌ණි එකක්‌ බව ඇයට වැටහී තිබිණි. එහෙත් ඒ ඇසුරෙන් ඈත් වීමට තවමත් ඇයට හිත හදා ගැනීමට බැරිය. චතුරිකාට මධුසංඛ මුණගැසෙන්නේ ඔය අතරතුරදීය. මධුසංඛ යුද හමුදාවේ සේවය කරන තරුණයෙකි. කෙටි කාලයක ඇසුරෙන් පසු ඔහු චතුරිකා විවාහ කර ගන්නට තීරණය කළේය. ඔහු චතුරිකාගේ පවුලේ වැඩිහිටියන් මුණගැසී මේ ගැන කතා බහ කිරීමට එකඟව සිටියේය. චතුරිකා තම ආදර සම්බන්ධය ගැන ඩිලානිට කීවාය. එය ඇසීමෙන් ඩිලානි යක්‍ෂණියක මෙන් කෝපාවිෂ්ට වූවාය. උඹට පිස්‌සුද යකෝ ආයෙත් කසාද බඳින්නෙ. එකෙක්‌ බැඳලා මට්‌ටු වුණා. මදිද? අනික උඹ කොහොමද මාව දාලා යන්නෙ. උඹට පුළුවන්ද මං නැතිව ඉන්න. ඩිලානි සිය කල්‍යාණ මිතුරිය වූ චතුරිකාට අමුතිත්ත කුණුහරපයෙන් බැණ වදින්නට වූවාය. තර්ජනය කරන්නට වූවාය. මම උඹට ආයෙ කසාද බඳින්න ඉඩ තියන්නේ නෑනේ. උඹගෙ ගෙදර මහ උන්ට මම මේ ගැන කතා කරනවා. දිනක්‌ ඩිලානි චතුරිකාගේ කනංකේ නිවසට පැමිණියාය. එදින චතුරිකාගේ මව මෙන්ම වැඩිමහල් සොහොයුරෝද නිවසේ සිටියහ. උඹලට පිස්‌සුද මේ කෙල්ලව කසාද බන්දල දෙන්න යන්නෙ. එක පාරක්‌ අමාරුවේ වැටුණු කෙල්ල ආයෙ අමාරුවෙ දාන්න ද හදන්නෙ. ඩිලානි චතුරිකාගේ මවට බැණ වදින්නට වූවාය. මේ කෙල්ලව බඳින්න කෙනෙක්‌ ඉදිරිපත් වෙච්ච එක හොඳයිනෙ. අනික කෙල්ලට තව වයස තියෙනවා. ඒකිටත් අනාගතයක්‌ තියෙන්න ඕනේ. චතුරිකාගේ මව ඩිලානිගේ අදහසට එකඟ වුණේ නැත. තම දියණිය නැවත විවාහයක්‌ කරගත යුතුය යන මතයේ ඇය සිටියාය. මේ බහින් බස්‌ වීම්වලින් පසු සියල්ලෝම නින්දට ගියහ. චතුරිකා නිදාගන්නේ නිවසේ ඉදිරිපස කාමරයේය. ඒ කාමරයේ දොරවල් කිසිවක්‌ තිබුණේ නැත. ඩිලානි නින්දට ගියේද චතුරිකා සමගය. එදින රාත්‍රියේ චතුරිකාත් ඩිලානිත් සුපුරුදු අසම්මත ඇසුරට එක්‌ වුණේය. චතුරිකාගේ වැඩිමහල් සොහොයුරාගේ බිරිඳ ඩිලානිගේ හැසිරීම පිළිබඳව සිටියේ තරමක සැකයෙන්ය. ඇය එදින රාත්‍රියේ චතුරිකාගේ කාමරයට හොරෙන් එබී බැලූ‍වේ ඇගේ සිතේ දලූ‍ලා වැඩෙමින් තිබූ සැකය නිසාමය. ඇගේ සැකය තහවුරු විය. චතුරිකාගේ කාමරයේ සිදු වූ අසම්මත ක්‍රියාවන් සියල්ල ඇගේ නෑනණ්‌ඩිය නිරීක්‍ෂණය කළාය. මේ වගේ ගෑනු ගෙවල්වලට වද්ද ගන්න ලැඡ්ජ නැද්ද. පවුල් ජීවිත විනාශ කරනවා. චතුරිකාගේ වැඩිමහල් සොහොයුරා සිය මවට බැණ වදින්න වූවේය. එදින උදයේම ඩිලානිට චතුරිකාගේ නිවසින් පිට වී යැමට සිදුවිය. උඹ ආයේ හතරමායිමේ පස්‌ පාගන්නෙ නැහැ. බලාගනින් අපේ කෙල්ලව එහෙම ආශ්‍රය කළොත් උඹට කරන දේ. චතුරිකාගේ මව ඩිලානිට හොඳටම බැණ වැදුණාය. එදින ඩිලානි චතුරිකාගේ නිවසින් පිටව ගියේ දැඩි වෛරයක්‌ සිතේ සිර කරගෙනය. එදින වෙන් වූවද නිතර නිතර ඔවුන් ගාල්ල ප්‍රදේශයේදී මුණ ගැසුණෝය. ඒ සෑම අවස්‌ථාවකදීම ඔවුහු රිසිසේ සතුටු වූහ. පෙම්වතුන් මෙන් විනෝද වූහ. පසුගිය 17 වැනිදා රාත්‍රිය මහා මූසල රාත්‍රියක්‌ වී තිබුණේය. කොග්ගල ඇඟලූ‍ම් කම්හලේ රාජකාරි නිම කර චතුරිකා නිවසට එන්නේ රාත්‍රි 7.00 ට පමණය. බස්‌ රථයෙන් එන චතුරිකා කනංකේ පුහුලහේන හන්දියෙන් ඉන් බැසගන්නා අතර ඇය නිවසට කැඳවාගෙන එන්නේ මව විසින්ය. එදිනද සුපුරුදු ලෙස මව සිය ආදරනීය දියණිය කැඳවාගෙන එන්නට කනංකේ පුහුලහේන හන්දියට ගියාය. දියණිය කැටිව නිවස බලා අඳුරේම යද්දී සිදු වූයේ කිසිවකුත් නොසිතූ දෙයකි. යතුරු පැදියක පැමිණි පුද්ගලයන් දෙදෙනෙක්‌ එකවරම චතුරිකාගේ මවගේ මුහුණට ඇසිඩ් ප්‍රහාරයක්‌ එල්ල කළේය. ඇසිඩ්වලින් නැහැවී දැඩි ලෙස පිළිස්‌සුණ චතුරිකාගේ මව විලාප තබන්නට වූවාය. ඇගේ සිරුරට එල්ල වූ ඇසිඩ්වලින් සුළු ප්‍රමාණයක්‌ චතුරිකා වෙතද වැඳී තිබිණි. ඇයද ඉන් තුවාල ලබා සිටියාය. දැඩි ලෙස පිළිස්‌සුණු චතුරිකාගේ මව කනංකේ රෝහලටත් එතැනින් ගාල්ල කරාපිටිය රෝහලටත් මාරු කර යවනු ලැබීය. අසාධ්‍ය තත්ත්වයෙන් සිටි ඇය කොළඹ ජාතික රෝහලේ දී මෙලොව හැර ගියාය. සුළු තුවාල ලබා සිටි චතුරිකා ගාල්ල රෝහලෙන් ප්‍රතිකාර ලබන්නට වූවාය. චතුරිකාටත් ඇගේ මවටත් ඇසිඩ් ප්‍රහාර එල්ල කිරීමේ සිද්ධිය සම්බන්ධයෙන් පොලිස්‌ පරීක්‍ෂණ ආරම්භ වන්නේ ඉන් අනතුරුවය. මාතර ජ්‍යෙෂ්ඨ පොලිස්‌ අධිකාරී දේශබන්ධු තෙන්නකෝන් මහතාගේ අධීක්‍ෂණය යටතේ කනංකේ පොලිස්‌ ස්‌ථානාධිපති රොෂාන් හෙට්‌ටිආරච්චි ඇතුළු නිලධාරීහු මාතර ප්‍රදේශය පීරමින් සැකකරුවන් සොයන්නට වූහ. අපිට තරහකාරයො හිටියෙ නැහැ. මේ වැඩේ කළේ කව්ද කියලා අපට හිතාගන්නවත් බැහැ. චතුරිකාගේ පවුලේ ඥාතීන්ගෙන් ප්‍රශ්න කළද වැදගත් තොරතුරක්‌ සොයා ගැනීමට පොලිසියට ඉඩ ලැබුණේ නැත. දින දෙකක්‌ තිස්‌සේ රෝහලේ ප්‍රතිකාර ලබමින් සිටි චතුරිකාගෙන් ප්‍රශ්න කිරීමට පොලිසිය තීරණය කළේ කිසියම් හෝඩුවාවක්‌ ලබා ගැනීමේ අරමුණෙන්ය. අපේ නංගි කෙනෙක්‌ බඳින්න ආවා අකුරැස්‌ස පැත්තෙ කොල්ලෙක්‌. ඒ කසාදෙ අන්තිමේදී කෙරුණේ නැහැ. ඒ කොල්ලා අපේ අම්මත් එක්‌ක තරහෙන් හිටියෙ. මේ වැඩේ එයා කරන්න ඇති.චතුරිකාගෙන් ලැබුණු තොරතුරු ඉතාම වැදගත් එකක්‌ විය. පොලිස්‌ නිලධාරීහු අකුරැස්‌ස ප්‍රදේශය පීරමින් චතුරිකාගේ ඥාති නැගනිය විවාහ කර ගැනීමට පැමිණි තරුණයා සොයන්නට වූහ.

අවසානයේදී මේ තරුණයා අත්අඩංගුවට ගැනීමට පොලිසිය සමත් විය. මෙම තරුණයා පිළිබඳව දීර්ඝ ලෙස විමර්ශනය කළ පොලිසිය මෙම සිද්ධියට ඔහුගේ කිසිම සම්බන්ධයක්‌ නොමැති බව හෙළි කර ගත්තේය. ඇසිඩ් ගැසීමේ සිද්ධියට අදාළව කිසිදු හෝඩුවාවක්‌ ඉදිරිපත් නොවීම නිසා පොලිසිය දැඩි අසීරුතාවට පත්ව සිටියේය. පරීක්‍ෂණ කණ්‌ඩායම නැවත කැඳවූ ජ්‍යෙෂ්ඨ පොලිස්‌ අධිකාරී දේශබන්ධු තෙන්නකෝන් මහතා පරීක්‍ෂණය ඉදිරියට කරගෙන යන ආකාරය පිළිබඳව උපදෙස්‌ දුන්නේය. තුවාල වෙලා ඉන්න චතුරිකාගෙ හැසිරීම ගැන හොඳට හොයලා බලන්න.. සමහර විට අපට හෝඩුවාවක්‌ ගන්න පුළුවන් වෙයි. තෙන්නකොන් මහතාගේ උපදෙස්‌ මත කනංකේ පොලිස්‌ ස්‌ථානාධිපති ඇතුළු නිලධාරීහු චතුරිකාගේ පෙර හැසිරීම පිළිබඳව සොයන්නට වූහ. ඔය ගෑනි අසම්මත ඇසුරක්‌ පවත්වාගෙන යනවා. ආමි එකෙන් පැනලා ආව කෙල්ලෙක්‌ නිතරම ඔය ගෙදරට රිංගනවා. චතුරිකා සමලිංගික ඇසුරකට ඇබ්බැහි වී ඇති බව හෙළි කර ගැනීමට පොලිසිය සමත් වුණේය. ඒ අනුව ඇය සමග සම්බන්ධතාව පැවැත් වූ ඩිලානි පිළිබඳව පොලිසිය සොයන්නට වූහ. චතුරිකා සහ ඇගේ මව බරපතළ තුවාල සිදු වී රෝහල් ගත කර සිටියද කිසිම අවස්‌ථාවක ඩිලානි ඔවුන් බැලීමට රෝහලට ගොස්‌ සිටියේ නැත. එය පොලිස්‌ නිලධාරීන්ගේ සැකයට හේතු වී තිබුණේය. චතුරිකාගේ නිවසේ සුළු ප්‍රශ්නයක්‌ ඇති වුවද මුලින්ම එන්නේ ඩිලානිය. එහෙත් මේ තරම් ඛේවාචකයක්‌ ඇති වී තිබුණද ඇය නොපැමිණිම පිළිබඳව විශාල ගැටලූ‍වක්‌ පොලිස්‌ නිලධාරීන් තුළ ඇති විය. උපාය දූතයකු යොදවා ඩිලානිට දුරකථන ඇමතුමක්‌ ලබා දුන් පොලිස්‌ නිලධාරීන් චතුරිකා සහ ඇගේ මව බැලීමට එන්නැයි දැනුම් දුන්නේය. මට හරියට වැඩ. නිවාඩුවක්‌ ලැබුණාම යනවා එයාලව බලන්න. ඩිලානිගෙන් ලැබුණේ එවැනි පිළිතුරකි. මේ අතර චතුරිකා සහ ඇගේ මවට ඇසිඩ් ප්‍රහාරය එල්ල වන අවස්‌ථාවේ ඒ ආසන්නයේ සිටි කාන්තාවකගෙන්ද ඉතාම වැදගත් සාක්‍ෂියක්‌ ලබා ගැනීමට පොලිසියට හැකි විය. ඔය දෙන්නට ඇසිඩ් ගහපු කෙනා ඒ වෙලාවේ කෑගැහුවා එයාගෙ කටහඩ ගැහැනු කෙනෙකුගෙ කටහඩක්‌. ඩිලානි පිළිබඳව මතු වී තිබූ සැකය තවත් තීව්‍ර කිරීමට මේ සාක්‍ෂිය ප්‍රමාණවත් වුණේය. පොලිස්‌ නිලධාරීන් ඩිලානි පසුපස පන්නන්නට පටන් ගත්තේය. චතුරිකාගේ ජංගම දුරකථන බිල්පත් පරීක්‍ෂා කළ පොලිස්‌ නිලධාරීන් මෙම සිද්ධිය වූ දින ඩිලානි සමග පැය ගණනක්‌ කථා කර ඇති බවද සොයා ගත්තේය. ඇසිඩ් ප්‍රහාරය එල්ල කිරීමට සුළු මොහොතකට පෙරද ඩිලානි චතුරිකා සමග දුරකථනයෙන් කතා කර ඇති බව හෙළිවිය. මේ පිළිබඳව චතුරිකාගෙන් පොලිසිය ප්‍රශ්න කළද ඇය එය තරයේම ප්‍රතික්‍ෂේප කළාය. අනේ ඩිලානි මේ කිසිදේකට සම්බන්ධ නැහැ. එයාට කරදර කරන්න එපා. චතුරිකා හඩා වැලපෙමින් කියන්නට වූවාය. අවසානයේ ඩිලානි නීතිඥවරයකු මාර්ගයෙන් කනංකේ පොලිසිය වෙත භාර වූවාය. මාතර ජ්‍යෙෂ්ඨ පොලිස්‌ අධිකාරී දේශබන්දු තෙන්නකෝන් මහතා වෙත රැගෙන ගිය ඩිලානි ප්‍රශ්න කිරීම්වලට භාජනය කළේය. මුලින් කිසිවක්‌ හෙළි කිරීමට අකමැති වුවද අවසානයේ සියලූ‍ තොරතුරු පොලිස්‌ නිලධාරීන් වෙත ලබා දෙන්නට ඇයට සිදුවිය. අපි දෙන්නගෙ සම්බන්ධයට අම්මා විරුද්ධ වුණා. චතුරිකාගෙ කැමැත්ත මතයි මම මේ වැඩේ කළේ. අපි ප්ලෑන් කළේ අම්මගෙ ඇස්‌ දෙකට ඇසිඩ් ගහලා. එයාව අන්ධ කරන්න. එයාගෙ ඇස්‌පෙනීම නැති උනාම අපට හැමදාම විනෝද වෙන්න පුළුවන් නෙ මගේ ඥාති මල්ලි කෙනෙක්‌ එක්‌ක ඇවිත් මම මේ වැඩේ කළේ. ඩිලානිගේ මුවින් පිට වූ ඒ පාපතර වචන පොලිස්‌ නිලධාරීහු පවා අන්දමන්ද කළහ. තම පහත් ආශාවන් සන්තර්පනය කිරීම සඳහා මවගේ ඇස්‌ අන්ධ කිරීමට තරම් මොවුහු සාහසික වී සිටියහ. අසම්මත සම්බන්ධතාවයෙන් අන්ධ වී සිටි මේ පාපතර කාන්තාවන් තම අවශ්‍යතා වෙනුවෙන් සිය මවගේ දෑස්‌ අන්ධ කොට මරා දැමීම මහ පොළොව නුහුලන අපරාධයක්‌ නොවන්නේද?

-දිවයින-