කොල්ලො සෙල්ලමට බරයි කෙල්ලො සෙල්ලමට බයයි

පූරුවේ පවක් වගේද පාරුවේ පුවක් කිව්වලු. පැඟිරි විසේ මෝදු වෙන දෝදු තරුණ කාලෙදි තෝරු වගේ වැඩ කරන්න ගිහිල්ලා දෝදු මෝදු කරගෙන ජීවිතේම සෙත්තපෝච්චි කරගත්ත කොල්ලෝ කෙල්ලෝ ඕනතරම් ඉන්නවා. ඒ අය හිතන්නෙ ඒක පූරුවේ පවක් කියලා. පැඟිරි විසේ ඇවිස්සුණහම ගොඩක් කොල්ලොන්ට ඕනෙ ගොඩක් කෙල්ලොත් එක්ක සෙල්ලම් කරන්න. පැඟිරි දඟර කෙල්ලෝ - මදුරු දඟර කොල්ලෝ කිව්වලු!! ගොඩක් කොල්ලො හිතාගෙන ඉන්නේ කෙල්ලො කියන්නේ තමන්ට ඕන වෙලාවට ළඟට අරගෙන සෙල්ලම් කරන්න පුළුවන් සෙල්ලම් ‘බඩු’ කියලා. මොනා වුණත් ආදරණීය දුවේ පුතේ, කොල්ලෙක් කෙල්ලෙක්ට ආදරේ කරනකොට ඒ කොල්ලගේ මුළු ජීවිතෙන් භාගයක්ම ඒ ආදරේ වෙනුවෙන් කැපකරනවා. ඔව්... භාගයක්ම!! ඒත් කෙල්ලෙක් කොල්ලෙක්ට ආදරේ කරනකොට ඒ කෙල්ලගේ මුළු ජීවිතේම ඒ ආදරේ වෙනුවෙන් කැපකරනවා. ඔව්... මුළු ජීවිතේම. තමන්ගේ මුළු ජීවිතේම ආදරේ වෙනුවෙන් කැපකරන කෙල්ලන්ගේ අහිංසක ආදරේ එක්ක සෙල්ලං කරන කොල්ලෝ නිසා ඒ අහිංසක කෙල්ලන්ගේ හිතට ලොකු දුකක් එකතුවෙනවා. තමන්ගේ පෙම්වතා තමන් එක්ක කළේ සෙල්ලමක් කියලා දැනගත්ත දාට කෙල්ලොන්ට ගොඩාාාාාාාාාක් දුක හිතෙනවා. ජාතික උපවාස මාසය ප්‍රකාශයට පත් කරලා වගේ කන්නේ බොන්නේ නැතිව ඉන්නවා, හොටු පෙරාගෙන හෙණ හයියෙන් අඬනවා... පන්සල් යනවා, පල්ලි යනවා, කෝවිල් යනවා... ආයිත් අඬනවා. කොල්ලන් කොටු පනී - දිමියන් ගොටු බඳී - නහයෙන් හොටු පනී - කපුවන් කපු කටී කිව්වලු!! ඒ විතරක් නෙවෙයි... ඇඳට වෙලා කොට්ටෙ බදාගෙන කල්පනා කරනවා... පුළුං කනවා... පුළුං කටේ - හුළං ගියේ කිව්වලු!! ලව් එකට කෙළ වුණහම කෙල්ලො කරන චාටර්ම වැඩේ තමයි මූණ හෝදන්නෙ නැතිව ඉන්න එකයි දත් මදින්නේ නැතිව ඉන්න එකයි. තමන් ආදරේ කරපු කොල්ලො වෙන කෙල්ලෙක් එක්ක සම්බන්ධයක් තියෙනවා කියලා දැනගත්ත පළියට මූණ හෝදන්නෙ නැතුව දත් මදින්නෙ නැතුව ඉන්න ඕනෙ නෑනේ. මැදියම් රැයේ - මැළියම් බැඳේ කිව්වලු. කොල්ලා හොඳට කාලා බීලා ආතල් එකේ යාළුවොත් එක්ක සෙට් වෙලා රණවරා එකක්, බෙලිමල් එකක් එහෙම බීලා ෆුල් සොමියේ ඉන්නවා. කෙල්ල ගෙදරට වෙලා නාන්නේ නැතිව, දත් මදින්නේ නැතුව හොටු පෙරාගෙන ලල් ඇද කරගෙන අඬ අඬ ඉන්නවා. ඒ වගේ ලල් ඇදකරගෙන ඉන්න කොල්ලොත් ඉන්නවා ඉතිං. කිණ්ඩිය වැටේ - කෙණ්ඩිය බිඳේ - බණ්ඩිය පිරේ - නෝණ්ඩියි පුතේ කිව්වලු!! විදුලි බලය ඇනහිටීම නිසා සිදුවන ප්‍රමාද දෝෂ හේතුවෙන් ප්‍රේම සම්බන්ධය ඇනහිටීමෙන් ගොඩක්ම අඬන්නේ කෙල්ලෝ. දකුණු ආසියානු සමාජයේ තියන සංස්කෘතික රාමුව ඇතුළේ ඉන්න කෙල්ලෝ ඇත්තටම පව්. කන්‍යාභාවය, පිරිසුදු චරිතය, සදාචාරය, විනය, හික්මුණු චරිතය වගේ එකී මෙකී නොකී දේවල් ගොඩක දකුණු ආසියාවේ සාම්ප්‍රදායික සංස්කෘතියේ ඉන්න කෙල්ලො පැටලිලා ඉන්නවා. මේ සංස්කෘතික රාමුව ඇතුළේ කොල්ලන්ට තියන නිදහස කෙල්ලොන්ට නෑ. කෙල්ලොත් හදවතින් සමහර දේවල්වලට කැමැතියි. ඒත් සංස්කෘතික රාමුව නිසා ඒ දේවල් කරන්න බෑ. හක්කෙ පොල් රා බොක්කෙ තල් රා කිව්වලු!! කොල්ලො කැමැතිම දේ තමයි කෙල්ලොත් එක්ක පෙරළී පෙරළී පෙරළ පෙරළා සෙල්ලම් කරන එක. ඒත් කෙල්ලොන්ට කොල්ලොත් එක්ක පෙරළී පෙරළී පෙරළ පෙරළා සෙල්ලම් කරන්න අවස්ථාවක් නෑ. ඒත් එහෙම සෙල්ලම් කරලා ඉවර වෙලා කොල්ලා කෙල්ලව දාලා ගියහම ඒ කෙල්ලට ඇතිවෙන මානසික වේදනාව ගැන අපේ කොල්ලෝ හිතන්නේ නැති එක ලොකු අවුලක්. මේ අවුලට අපේ සංස්කෘතියත් බලපානවා. සමහරු හිතනවා ආදරේ කරනකොට කෙල්ලෝ හරි බොළඳයි කියලා. ඒත් ඒක තමයි කෙල්ලොන්ගේ හැටි. මුළු ජීවිතේම ආදරෙත් එක්ක බෙදාගත්තහම කෙල්ලොන්ගේ හිත් බොළඳ වෙනවා තමයි. ඇත්තටම බැලුවොත් ඒක බොළඳ කමක් නෙවෙයි. අවංකවම ආදරේ කරලා... ඒ ආදරේ අහිතකර විදියට පලදෙනකොට තමයි ඉවසන්න අමාරු. බොක්කෙ ගුළිය ලෙළදේ ශක්‍රභවන ඇලලේ - පීසා කුලුන ඇලවේ - ලව් සිතිවිලි පලදේ කිව්වලු! කෙල්ලොත් එක්ක සෙල්ලම් කරන හැම කොල්ලෙක්ම අහගනිල්ලා කෙල්ලොන්ගේ ආදරේ හරිම සංවේදී. විරහවට ඊටත් වඩා සංවේදී! මචං... කවදා හරි දවසක උඹලගේ දුවත් එක්ක උඹලගේ අක්කත් එක්ක නංගිත් එක්ක තවත් කවුරුහරි කොල්ලෙක් සෙල්ලම් කරනවට උඹලා කැමැතිද? කිරි අප්පොට කිරි වවුලො පැනපි කිව්වලු!! ඒ නිසා අහිංසක කෙල්ලන්ගේ අහිංසක හිත් එක්ක සෙල්ලම් කරන්න එපා. ඒ අහිංසක හිත්වලට හොර කරන්න එපා. පට්ට සිරා සිප්පි හොරා කිව්වලු!! කෙල්ලොත් ඉඳලා හිටලා කොල්ලන්ගේ ආදරෙත් එක්ක සෙල්ලම් කරනවා තමයි. ඒ වෙලාවට ඉතිං අවුල් වියවුල් උල් වෙනවා. සෙල්ලං ලෙල්ලං කරගන්නා කෙල්ලං ගැන අහලා තියෙන නිසා සහ ඒ සෙල්ලමට සංස්කෘතික බාධා තියෙන නිසා ගොඩක් කෙල්ලෝ සෙල්ලමට බයයි. ඒත් කොල්ලෝ සෙල්ලමට බරයි. එහෙම වුණහම ඉතිං සුළු වරදකින් දරුවෙක් සිටී කියන වාක්‍යත් එක්ක තමයි මංගල දැන්වීම දාන්න වෙන්නෙ. නිදි පැදුරයි අඬ අඳුරයි - සඳ කොඳුරයි - උණ පඳුරයි කිව්වලු! අපේ සංස්කෘතිය ඇතුළේ ලිංගිකත්වය හංගලා තියන නිසා දරුවන් හැදෙන්නෙ නැති විදියට දෙල් ‍ෙදා‍ෙදාල් වෙන තොල් තො‍ෙදාල් වෙන වැරැදි කරන හැටි දන්නෙ නෑ. එතකොට ඉතිං පැඟිරි විසේ ඇවිස්සෙන විසේකාර පිස්සු වැඩකරන්න බැරි වෙනවා. විශේෂයෙන්ම කෙල්ලොන්ට ලිංගිකත්වය ගැන තියන දැනුම අන්තිමයි!! මේක සංස්කෘතික අවුලක්. දකුණු ආසියාවේ තියෙන මේ සංස්කෘතික අවුල නිසා තමයි Google එකෙත් Sex කියන වචනේ ඇතුළත් කරලා තියෙන රටවල උඩින්ම දකුණු ආසියානු කලාපයේ රටවල් තියෙන්නෙ. දකුණු ආසියාවේ ලිංගිකත්වය කියන විෂය හංගල තියන නිසා තමයි මේ විදියට වෙන්න. මේවා ඇහැවුවහම ආතල් සිප්පු පාගල් මැක්සා වෙලා යනවා. මේ සංස්කෘතියේ තත්ත්වය නිසා වැඩියෙන්ම අවුල් වෙන්නෙ කෙල්ලන්ගේ. දකුණු ආසියානු සංස්කෘතියේ ඉන්න ගොඩක් කෙල්ලොන්ට Love Sick හැදුණහම ගොඩක් වෙලාවට ඒ කෙල්ලො Love කරන්නේ බොක්කෙන්. ඒත් කොල්ලන්ට තියෙන සංස්කෘතික නිදහස නිසා ඒ කොල්ලො Love කරන්නේ හක්කෙන්. හක්කයි බොක්කයි හැප්පුණහම හක්ක කඩලා යන වෙලාවලුත් තියෙනවා. ඒත් ලව් එක කැඩුණහම බොක්කෙන් ලව් කරපු කෙල්ලගේ හක්ක ඇතුළු හැම මුල්ලකටම ඒ වේදනවා දැනෙනවා. ඒ වේදනාව අමතක කරන්න කෙල්ලොන්ට අමාරුයි. සමහර වෙලාවට බොක්කයි හක්කයි දෙකම එකට පසුතැවෙන වෙලාවලුත් තියෙනවා. කෙල්ලට බඩ එයි - කොල්ලට බඩ යයි කිව්වලු!! Love එකට කෙළ වුණාට පස්සේ සමහර කෙල්ලෝ තමන්ව රවට්ටපු කොල්ලට පාඩමක් උගන්නන්න කියලා හිතාගෙන ෆුල් ලල් එකේ ඉන්න ෆොටෝස් Fb එකේ දානවා. දාලා ගිය එකාට රිදෙන්නත් එක්ක වෙන කොල්ලොත් එක්ක ඉන්න ෆොටෝස් පවා Fb එකේ දානවා. ඒත් ඒ කෙල්ලගේ හදවත කඳුළුවලින් පිරිලා තියෙනවා කියලා දන්නේ ඒ කෙල්ලයි මමයි විතරයි!! ලබන සතියේ අදිමු බර භාගේ - හැදෙයි එතකොට අංශ භාගේ ලක්මිණ රණසිංහ උපුටා ගැනිම මව්බිම පුවත්පත