"සසර සර" ජාතික රූපවාහිනියෙන්....
"සසර සර" ජනප්‍රිය රංගන ශිල්පිනී දමිතා අබේරත්න ගේ රංගන ජීවිතයට වසර 31 ක්‌ උදාවූ 2013 වසරේ ඇගේ කුළුඳුල් අධ්යක්ෂණය වන "සසර සර" ටෙලි නාට්‍යය ජාතික රූපවාහිනී නාලිකාවේ 2013 දෙසැම්බර් 17 වැනිදා සිට රාත්‍රී 8. 30 ට සෑම සතියේ දිනකම විකාශනය වෙයි. "සසර සර" නිර්මාණය, තිර රචනය දොස්‌තර දයානාත් රණතුංග වන අතර මෙය සත්‍ය කතාවක්‌ ඇසුරින් රචිත නිර්මාණයකි. මෙහි කැමරා අධ්යක්ෂණය ප්‍රභාත් රෝෂන්, සහාය අධ්යක්ෂණය රංජන් ප්‍රසන්න, කලා අධ්යක්ෂණය පියතිස්‌ස අකුරංබොඩ, අංග රචනය නලින් ප්‍රේමතිලක, නිෂ්පාදන කළමනාකරණය ෂම්මි ද සිල්වා, නිශ්චල ඡායාරූප ජනක මායාදුන්න, කොණ්‌ඩා සැකසුම සෑම් පෙරේරා, මෙහි ගීත රචනය ලූෂන් බුලත්සිංහල වන අතර තේමා ගීතයෙහි සංගීත අධ්යක්ෂණය නැසීගිය ප්‍රේමසිරි කේමදාස ශූරීන් විසිනි. මෙය කේමදාස ශූරීන් විසින් සංගීත අධ්යක්ෂණය කළ අවසන් තේමා ගීතය වේ. මෙම ගීතය ගායනය කළේ විශාරද ඉන්දිකා උපමාලි විසිනි. මෙම නිර්මාණය වෙනුවෙන් ඇප කැපවූ මගේ ආදරණීය රංගන ශිල්පීන් හා ශිල්පිනීන්හට ගෞරවය හා ස්‌තුතිය ප්‍රණාමය හදපිරි සතුටින් පුදකරමි.
නිල්මිණි තෙන්නකොන්, දර්ශන ධර්මරාජ, රොෂාන් පිලපිටිය, සුරංගි රුවන්මලී, ලියෝනි කොතලාවල, ග්‍රේස්‌ ආරියවිමල්, දයා තෙන්නකෝන්, ඉෂාන් ගම්මුදලි, අංජුලා රාජපක්‍ෂ, සුසිලා කෝට්‌ටගේ, අනුරුද්ධිකා පාදුක්‌කගේ, බුද්ධි වික්‍රම, ඉන්ද්‍රජිත් නාවින්න,සුනිල් වල්පිට, ලූෂන් බුලත්සිංහල, ඥණාංග ගුණවර්ධන, මානෙල් වානගුරු, සීතා කුමාරි, ළමා නළු කෝකිල පවන් ඇතුළු සෙසු චරිත රඟපෑ සියලුම ශිල්පීන්ටද මාගේ ගෞරවය පුදකරමින් දමිතා අප වෙත එවා තිබූ ලිපියක සැඳහන්ව තිබේ. නිෂ්පාදිකාවක්‌ ලෙස දමිතාගේ පළමු නිර්මාණය වන ලදේදුන්නෙන් පාට අරංල නිර්මාණයද විකාශනය වූයේ ජාතික රූපවාහිනියෙනි. තම කුළුඳුල් අධ්යක්ෂණය ප්‍රේක්‌ෂකයන් අතරට ගෙන යැමට අතහිත දුන් සියලු දෙනාටත්, ජාතික රූපවාහිනී නාලිකාවේ සභාපතිතුමන් ඇතුළු වැඩසටහන් අංශයේ සියලු කාර්ය මණ්‌ඩලයටත්, රූපවාහිනී අනිකුත් කාර්ය මණ්‌ඩලයේ සියලු දෙනාටත් හදවතින්ම ගෞරවය පුද කරන බවද දමිතා පවසන්නීය.
උපුටා ගැනීම දිවයින පුවත් පත
