ඔබේ සැමියාත් පැණි උගුලකට හසුවෙන්න පුළුවන්
පිරිමින්ගේ බල බිඳින ලිංගික උප්පරවැට්ටි හෙවත් පැණි උගුල් ගැන දැන ගනිමු. ඔහු එක්තරා සුප්‍රකට පාසලක විදුහල්පතිවරයෙකි. ඇතැම් පාසල්වල විදුහල්පතිවරුන් යම් යම් නොමනා ක්‍රියාවන් නිසා ප්‍රකට වන අතරේ මේ විදුහල්පතිවරයා ප්‍රකට වූයේ ඔහුගේ සෘජු හා නිර්භය ප්‍රතිපත්ති නිසාය. ඔහුගේ පාසලට කිසි දිනෙක නියමිත පටිපාටියෙන් බැහැරව පළමු වසරට සිසුන් ඇතුළත් කරගැනීමක් සිදුවූයේ නැත. සිය සමීපතම ඥාතීන්ට හෝ හිතවතුන්ට පවා ඔහු සලකන ලද්දේ කාටත් පොදු ආකාරයටමය. ප්‍රදේශයේ දේශපාලන බලවතුන්ට හිස නැමුවේද කොන්ද පහත් කළේද නැත. ඔහු සිසුන් ඇතුළත් කරගැනීම සඳහා කිසි විටෙක අල්ලස් ගත්තේද නැත. පාස‍ලේ ඉතා දැඩි විනයක් පවත්වාගෙන ගියේය. මුදලට හෝ හිතවත්කමට විවිධ උදව් ලබාගැනීමට නොහැකි වූ බොහෝ දෙනා මෙම විදුහල්පතිවරයාගේ ක්‍රියා කලාපයට දෝෂාරෝපණය කළහ. එහෙත්, මැදිහත් සියලු දෙනා ඔහු පිළිබඳව පළ කළේ සතුටුදායක ප්‍රතිචාරයන්ය. කාලය මෙසේ ගෙවී යද්දී විදුහල්පතිවරයාගේ මෙම ක්‍රියාකලාපයන් හා ප්‍රතිපත්ති හිටිහැටියේ වෙනස් වනු දක්නට හැකි විය. ඔහුගේ සෘජු ප්‍රතිපත්ති දියවී යනු දක්නට ලැබිණි. එක් අවස්ථාවකදී ඔහු නියමිත පටිපාටියෙන් බැහැරව අත්තනෝමතික අයුරින් සිසුන් ඇතුළත් කරගත් අවස්ථාවක් ද විය. විදුහල්පතිවරයාගේ මෙම හදිසි වෙනසට හේතුව එක්වර සොයාගැනීමට නොහැකි වුවද තරමක් කල් ගත වූ පසු ඒ පිළිබඳ සියුම් ලෙස විමසුම් කළ මාපියන්ට හෙළිවූයේ ඔහු මෙවැනි වෙනසකට ලක් වූයේ ‘පැණි උගුලකට’ හසුවීම නිසා බවය.
මේ ‘පැණි උගුල’ යනුවෙන් හැඳින්වෙන්නේ කුමක්ද? මෙය ඇතැම්විට ඔබගේ වාග් කෝෂයට අලුත් වදනක් වන්නට පුළුවන. පැණි උගුලක් යනු යම් යම් පුද්ගලයන්ගේ දුර්වලතාවයන් හඳුනාගෙන එම දුර්වලතාවයන් ඔස්සේ ඔහුව පාලනයකට නතුකරගැනීම සඳහා යම්කිසි පුද්ගලයකු යෙදවීමේ ක්‍රියාවලියය. ලොව සියලු දෙනා සර්ව සම්පූර්ණ නැත. විවිධ පුද්ගලයන්ගේ විවිධ දුර්වලතාවයන් තිබේ. ඇතැම් ඒවා ප්‍රකට දුර්වලතාවයන් වන අතර ඇතැම් ඒවා එසේ නොවේ. විශේෂයෙන් පෞරුෂමය වශයෙන් ශක්තිමත් පුද්ගලයන් සමාජය ඉදිරියේද ශක්තිමත් පුද්ගලයන්ය. නමුත් ඔවුන්ගේ ද කුමක් හෝ දුර්වලතාවයක් තිබේ. දුෂ්කර කාර්යක් වන්නේ එය හඳුනාගැනීමය. යම් විදියකින් එය හඳුනාගතහොත් ඔහුව පවා ‘අල්‍ලේ නටවන්නට’ පුළුවන. ඉහත සඳහන් විදුහල්පතිවරයාට සිදුවූයේද එවැන්නකි. ලෝකයේ බොහෝ සුප්‍රකට පුද්ගලයන්ගේ දුර්වලතාවය වන්නේ ස්ත්‍රී ලෝලීත්වයයි. ඇතැම් පුද්ගලයන් පෞරුෂමය වශයෙන් කෙතරම් ශක්තිමත් වුවද කාන්තාවන් ඉදිරියේ එම පෞරුෂයන් ඇදවැටෙන බැව් දකින්නට පුළුවන. සුප්‍රකට සිනමා චරිතයක් වූ ‘ජේම්ස් බොන්ඩ්’ ද එවැන්නෙකි. ජේම්ස් බොන්ඩ් යනු ලෝකයේ සිටින සුප්‍රකටම රහස් පරීක්ෂක චරිත අතුරින් එකකි. නමුත් ඔහු කාන්තා ලෝලියෙකි ඒ නිසාම ඔහු කරා පැමිණෙන කාන්තාවන් නිසා ඔහුගේ යම් යම් උපායයන් වැරදී ගිය අවස්ථාවන් දක්නට ලැබි තිබේ. මෙය සැබෑ ලෝකයේ චරිතයක් නොවුව ද එය එසේ ගොඩනංවා ඇත්තේ සැබෑ ලෝකයේ ඇතැම් රහස් පරීක්ෂකයන්ට ද එවැනි දේ සිදුවන බැව් පෙන්වීමටය. පැණි උගුල් ඇටවීම ලෝකය පුරාම පැතිර ඇති දෙයකි. බොහෝ විට මෙම පැණි උගුල ලෙස ක්‍රියාත්මක වන්නේ කාන්තාවන් වුව ද පිරිමින් ද පැණි උගුල් ලෙස ක්‍රියාත්මක වූ අවස්ථා ඉඳහිට දක්නට ලැබේ. ඔවුන්ගේ අරමුණ වන්නේ යම්කිසි පුද්ගලයකු කරා එළැඹී ඔහුව හෝ ඇයව තමා වෙතට කෙසේ හෝ නැඹුරු කරවා ගැනීමය. පැණි උගුල්වලට හසුවන සියලු පිරිමින් කාන්තාලෝලීහු නොවෙති. ඇතැම්හු යහපත් පවුල් ජීවිත ගතකරමින් හිඳින්නෝය. ඇතැමුන් කාන්තාවන් කෙරෙහි උනන්දුවක් නැත. එවැනි සම්බන්ධතාවලට කාලයක් ද නැත. නමුත් තමා ගැහැනු උගුලකට, නැතහොත් පැණි උගුලකට හසු වී ඇති බව දැන ගන්නා විට සියල්ල සිදුවී හමාරය. මෙම පැණි උගුල් සිය ගොදුර වෙත ළඟා වන්නේ සාමාන්‍ය ආකාරයෙනි. ගොදුර පිරිමියෙකු නම් ඔහුට සම්බන්ධ කුමක් හෝ කාරණයක් අදාළ කරගනිමිනි. මතුපිටින් බලන විට මෙය සාධාරණ හේතුවකි. අප පෙර සඳහන් කළ විදුහල්පතිවරයා උදාහරණයකට ගතහොත්, ඇතැම් විට මේ කාන්තාව පාසලට පැමිණෙන්නට ඇත්තේ යම්කිසි පර්යේෂණයක් සඳහා තොරතුරු එක් රැස්කරන්නියක් ලෙස විය හැකිය. මේ සඳහා ඇයට නිතරම විදුහල්පතිවරයා හමුවන්නට සිදු වේ. සූක්ෂ්ම අයුරින් ඔහු සමග යම්කිසි සබඳතාවයක් ගොඩනගාගන්නේ මේ අතරතුරය. මෙයට ගොදුරුවන පුද්ගලයා කාන්තාලෝලියකු නම් මේ කාර්ය වඩාත් පහසුය. එසේ නොවුණ ද මෙම ‘පැණි උගුල්’ පසුබසින්නේ නැත. ඔවුහු කෙසේ හෝ අදාළ පුද්ගලයා තමාගේ ග්‍රහණයට සිරකරගැනීමට දක්ෂ වෙති. එසේ ග්‍රහණයට හසුකර ගැනීමෙන් පමණක් ඔවුනගේ කාර්යය සම්පූර්ණ වන්නේ නැත. ඒ පුද්ගලයා ‘පැණි උගුල’ට හසු වූ බවට පෙන්වන සාක්ෂි රැස් කරගැනීම ඔවුනගේ ඊළඟ අදියරයි. මේ සඳහා ගොදුරු වන පුද්ගලයාට නොදැනෙන සේ තෙවැනි පාර්ශ්වයක් ද මෙයට සම්බන්ධ කරගනී. මතෛක් කල් අදාළ පුද්ගලයාට අයත් පරිශ්‍රයක් තුළ ඔවුන්ගේ හමුවීම සිදුවුව ද නොබෝ දිනකින් එය වෙනත් තැනක් බවට පත්කරගැනීමට ‘පැණි උගුල’ උපක්‍රමශීලී වේ. තෙවැනි පාර්ශ්වය සිය වැඩකටයුතු ආරම්භ කරන්නේ මෙහිදීය. ඔවුන්ගේ මෙම හමුවීම් ඡායාරූප ගතකිරීම, වීඩියෝ ගතකිරීම ආදිය සිදුකරනු ලබන්නේ මෙම තෙවැනි පාර්ශ්වයයි. සිය අරමුණ ඉටුකරගැනීම සඳහා ගොදුර සමග යහන්ගතවීමට වුවද මෙම පැණි උගුල් නිරතුරුවම සූදානම්ය. ගොදුර මෙතරම් දුරකට රැගෙන ආ පසු ඔහුගේ සියලු දුර්වලකම් හඳුනාගන්නට පැණි උගුල සමත් වන අතර, ඉන්පසුව මෙහි ඊළඟ අදියර ක්‍රියාත්මක වේ. මෙහිදී ඇතැම්විට සිදුවන්නේ මෙම සම්බන්ධතාවය ප්‍රසිද්ධ කරන බවට තර්ජනය කොට ඔහු ලවා යම් යම් දේ ඉටුකරවා ගැනීමය. මෙය උගුලක් හබකයක් බව ඔහුට වැටහෙන්නේ එතැන් සිටය. සමාජය ඉදිරිපිට දැඩි පෞරුෂයක් ගොඩනගාගෙන සිටින බොහෝ පුද්ගලයන් බිඳවැටෙන්නේ මෙවැනි අවස්ථාවලදීය. සිදුවූයේ කුමක්ද යන්න පවා ඔවුන්ට සිතාගත නොහැකි වේ. මතෛක් කල් සිංහයන් සේ හැසිරුණු පුද්ගලයෝ මෙවැනි පැණි උගුලකට හසුවූ පසු නිතැතින්ම නිවට සිඟාලයන් බටව පත්වෙති. ලෝකයේ සිටි මෙවැනි සුප්‍රකට පැණි උගුලක් ලෙස ඉතිහාසගත වන්නේ යුද ඔත්තුකාරියකව සිට අවසානයේ වෙඩි කා මරුමුවට පත් වූ ‘මාතාහාරි’ය. ඇය පළමු ලෝක යුද සමයේද යුද රහස් හෙළිකරගැනීම පිණිස හමුදාවන්හි ඉහළ නිලවල පුද්ගලයන් රැසක් සිය පැණි උගුලට හසුකර ගත්තාය. අප රටේ දක්නට නැතත් විදෙස් රටවල පැණි උගුල් ඇටවීම සඳහා නියෝජිතායතන පවා දක්නට ලැබේ. ඒවා Honey trap Agency යනුවෙන් හඳුන්වනු ලබයි. යම්කිසි කාන්තාවකට සිය සැමියාගේ විශ්වසනීය බව පිළිබඳ ගැටලු ඇත්නම් ඔවුන් පිහිට පතන්නේ මෙම ආයතනයන්ගෙනි. එක් අවස්ථාවක එක් කාන්තාවක් සඳහන් කොට තිබුණේ පැණි උගුල් ඇටවීම පිණිස යොදාගත් කාන්තාව විසින් සිය සැමියා උදුරාගත් බවය. එනම් මෙම පැණි උගුල සිය රාජකාරි බැහැර දමා අදාළ පිරිමියාට සැබෑ ලෙස ද ආදරය කොට ඔහු සිය ස්වාමි පුරුෂයා බවට පත්කරගත් බවකි.
තවත් අවස්ථාවක එක් කාන්තාවක් පිරිමියෙකු විසින් අටවන ලද පැණි උගුලකට හසු විය. එනම් මෙහිදී උගුල ලෙස ක්‍රියාත්මක වූයේ පිරිමියෙකි. මතෛක් කලක් සිදුවූයේ ඔත්තු බැලීමක් විනා සැබෑ ආදරයක් නොවන බව හෙළිවුව ද අදාළ උගුලට හසු වූ කාන්තාව එය පිළිගැනීමට මැළි වූවාය. “මේක කොහොමටවත් වෙන්න බැරි දෙයක්. එයා මට පණටත් වඩා ආදරේ කළා” යනුවෙන් ඇය කීවාය. නමුත් ඇය හසුවී තිබුණේ පැණි උගුලකටය. දැනට වසර දෙකක පමණ පෙර එක් සිංහල පුවත් වබේ අඩවියක මෙවැනි පුවත් ශීර්ෂයක් සටහන් වී තිබිණි. ‘ශ්‍රී ලංකාවේ විස්සයි විස්සට ලිංගික දැලක් එළලා’ මෙහිදී සිදුව තිබුණේද ක්‍රිකට් ක්‍රීඩකයන්ට ලිංගික අල්ලස් දී සිදුකිරීමට සැලසුම්කොට තිබූ ක්‍රීඩා පාවාදීමේ සිදුවීමකි. මෙය විමල් මර්වාහ් නම් ඉන්දීය කාන්තාවක් විසින් සැලසුම් කරන ලද්දක් බැව් හෙළි විය. එම ප්‍රවෘත්තියේ ද මෙම ක්‍රියාව හඳුන්වාදී තිබුණේ ‘පැණි උගුලක්’ ලෙසිනි. කෙසේ වුවද පැණි උගුල්වල නිරන්තර ඉලක්කය වන්නේ පිරිමින්ය. බොහෝ විට සමාජයේ කුමක් හෝ අංශයකින් ප්‍රගතියක් ලබා ඇති පිරිමි මෙවැනි උගුල්වලට හසුකරගැනීමේ උපක්‍රම ක්‍රියාත්මක වේ. මෙවැනි උගුල්වල අවසාන අරමුණ වන්නේ තර්ජනය කොට මුදල් ලබාගැනීමය. නැතහොත් යම්කිසි පුද්ගලයකුගේ වැඩපිළිවෙළක් නවතා දැමීමය. සමාජයේ යම් යම් අසාධාරණකම්වලට එරෙහිව සටන් වදින පුද්ගලයන් ද පැණි උගුල්වලට හසුකරගන්නට ඉඩකඩ ඕනෑ තරම්ය. එබැවින් එවැනි උගුල්වලට හසුවිය හැකි යැයි හැඟෙන්නන් තමන් වෙත ප්‍රවේශ වන්නන්ගෙන් ප්‍රවේශම් විය යුතුය. විශේෂයෙන් කාන්තාවක වශයෙන් ඔබගේ සැමියා මෙවැනි උගුලකට හසුවීමේ ඉඩකඩක් ඇතැයි ඔබට හැඟේ නම් ඔබ ද මේ පිළිබඳ අවධානයෙන් යුක්තව සිටිය යුතුය. ඒ අනුව මේ පැණි උගුල් සම්බන්ධයෙන් ඔබේ සැමියා ද කල් තියා දැනුවත්කොට සිටීමෙන් යහපතක් මිස අයහපතක් සිදුවන්නේ නැත.
උපුටා ගැනීම ලක්බිම
