දරුවන්ගේ ජීවිත විනාශ වීමේ ප්‍රධාන වගකීම මවුපියන්ගේ

පසුගිය දිනෙක කුඩා දැරියක අතවරයට ලක්කර ඝාතනය කළ පුවත කාගෙත් සිත්වලට මහත් කම්පනයක් දනවන සිදුවීමක් වුණා. මවුපියන් තම දරුවන්ගේ ආරක්‍ෂාව පිළිබඳ දෙවරක් සිතිය යුතු බව මේ පුවතින් වටහා ගත යුතු දෙයයි. ඝාතනයට සැක කර අත්අඩංගුවට ගෙන සිටින පුද්ගලයන්ට මරණීය දණ්ඩනය නියම කළ යුතු බවට මතවාද පැතිර ගියද මෙහිදී සමාජයේ වැඩි අවධානයක් ලැබිය යුතු වන්නේ දරුවන් පිළිබඳ මවුපියන් තුළ ඇති සැලකිලිමත් බවයි.

මවුපියන්ට සමීප බව : දරුවන්ගේ පූර්ණ වගකීම සතු වන්නේ මවුපියන් වෙතය. දරුවන්ට ආදරයෙන් ළෙන්ගතුව කතා බහ කරන්නේ නම් ඔවුන්ගේ සියලු දේ මවුපියන් හා බෙදා හදා ගැනීමටද ඔවුන් හැම විටම සූදානම්ය. එදිනෙදා පාසලේ සිදුවීම්, මිතුරු මිතුරියන් හා තමාට මුණගැසෙන පුද්ගලයන්ගේ තොරතුරු සියල්ල මවුපියන්ට දැනගත හැකිවන්නේ ඔවුන් හා සමීපව කතා බහ කරන්නේ නම් පමණි. දරුවන් හා මව අතර පවතින සම්බන්ධතා පිළිබඳ කරන ලද පරීක්‍ෂණවලට අනුව දකුණු ආසියාවේ මවුපියන් දරුවන් සමඟ දිනකට සුහදව කතා කිරීමට වෙන් කරන කාලය පිළිබඳව සොයා ගෙන ඇත. දරුවන් සිය පියා සමඟ දිනකට විනාඩි 5ක් පමණ කාලයක්ද මව සමඟ විනාඩි 45ත්, 60ත් අතර කාලයක්ද කතා බහ කිරීමට වෙන් කරන බව එමඟින් සොයාගෙන තිබේ. නමුත් මවුපියන් මීට වඩා දරුවන් හා සමීපව සිටීම වැදගත්ය. ලොව සන්නිවේදනය කිරීමට වඩාත් සුදුසු වන්නේ ශරීර භාෂාවයි. මව හා දරුවා අතර සංවාදයේදී මව දරුවාට සමීප බව පෙන්වීමට ආදරය දැක්වීමට වඩාත් සුදුසු වන්නේ කතාව සමඟ ඔබේ මුහුණින් හා අංග චලනයෙන් ප්‍රකාශ වන හැඟීමයි. එලෙස ඔබට දරුවා හා කතාබහ කිරීමට හැකි නම් විශ්වසනීයත්වයෙන් ඔබ හා සියලු දේ කීමට දෙවරක් නොසිතයි. දරුවාගේ වැඩි ආරක්‍ෂාවට ඔබ ඔවුන්ට වඩාත් සමීප වීම වැදගත්ම කාරණාවයි.

අපචාර හා අපයෝජකයන් : කුඩා කාලයේදී මවගෙන් ආදරය නොලැබීම හමුවේ පීඩාවට පත්වන තරුණයන් ආදර සබඳතාවලදී තම පෙම්වතියට සලකන්නේ ඇතැම් විට දරුණු ලෙසය. මේ හේතුවෙන් ඔවුන්ගේ ජීවිතයට ආදරය නොලැබෙයි. එම නිසා මොවුන් ග්‍රහණයට ගනු ලබන්නේ තමාට අවනත වන කීකරු වන කුඩා දැරියන්ය. තම අවශ්‍යතාවන් ඉටුකර ගැනීමට ගනිමින් කුඩා දරුවන් අපයෝජනය කරන්නේද මොවුන්ය. මවුපිය සෙනෙහස නොලැබූ මොවුන් සමාජය දෙස බලන්නේද කේ‍රා්ධයෙනි. කුඩා දරුවන් සතුටින් සිටිනු දැකීමද වෛරය උත්සන්න වීමට හේතුවිය හැකිය. එවිට දරුවන් ඝාතනය කරන අවස්ථාද අප කොතෙකුත් අසා ඇත. පසුගිය මාස 7 තුළ කුඩා දරුවන් 13ක් පමණ ඝාතනය වූයේ මේ හේතුවෙනි. ලංකාවේ මෙවැනි පුද්ගලයන් එක් ලක්‍ෂ පනස් දහසක් පමණ සිටින බව සොයාගෙන ඇත. මෙවැනි සාහසිකයන්ගෙන් ඔබේ දරුවා බේරා ගැනීමට නම් මේ ගැන සැලකිලිමත් විය යුතුමයි.

දරුවන්ගේ ආරක්‍ෂාවට : කුඩා දැරියන් අන් අයගේ වැඩි ආකර්ෂණයට ලක්වන ආකාරයට විලාසිතා කිරීමද සුදුසු නොවේ. මවුවරුනි දියණිය වඩාත් සුන්දර කිරීමට විවිධ විලාසිතාවෙන් ඇඳුම්, පැලැඳුම් ඇන්දවීමෙන් පිරිමි පාර්ශ්වයේ අවධානය යොමුවෙයි. පෙර සඳහන් කළ පිරිස් මේ අතර සිටින බැවින් මවක් වශයෙන් ඔබ මේ ගැන සිතිය යුතුමයි. මේ නිසා දරුවාට ඇඳුම් පැලඳුම් තෝරා ගන්නා විටත් සැලකිලිමත් වන්න.

ගැවසෙන ස්ථාන : පෙර සඳහන් කළ ආකාරයට සමාජයේ පීඩනයට ලක්වූ මෙම පිරිස් නිතර ගැවසෙන්නේද වෘත්තීන්වල නියැළෙන්නේද දරුවන් වැඩි වශයෙන් ගැවසෙන ස්ථානවලය. පාසල, ක්‍රීඩාපිටිය, පිහිනුම් ස්ථාන, දිවා සුරැකුම් මධ්‍යස්ථාන, දරුවන් ප්‍රවාහනය, අමතර පන්ති පැවැත්වෙන ස්ථාන ඔවුන්ගේ වැඩි අවධානය දිනා ගනියි. මෙවැනි ස්ථානවල දැනුම අඩු හා ආර්ථිකය අතින් පහළ පුද්ගලයන් ගැවසුණද ගුරුවරුන්, වෛද්‍යවරුන් ලෙසද මොවුන් පෙනී සිටින අවස්ථා ඇත.

පාසල් ආශි්‍රතව කුලී වැඩවල නිරත වන්නන්.
දිවා සුරැකුම් මධ්‍යස්ථාන ආශි්‍රත කණ්ඩායම්.
නිවෙසට සමීප අලුතින් කුලියට ආ පුද්ගලයන්.
සවස විශේෂ උපකාර පන්ති පවත්වන ගුරුවරුන්.
ක්‍රීඩා ගුරුවරුන්.
දරුවන් මූලික කරගෙන වැඩසටහන් පවත්වන්නන්.
පිළිබඳ මවුපියන් වඩාත් සැලකිලිමත් වන්න.

මෙවැනි පුද්ගලයන් දරුවන්ට ඉක්මනින් ළඟා වීමට හැකි ස්ථාන සොයමින් දරුවන් ග්‍රහණයට ගැනීමට සැලැසුම් කරමින් සිටින පිරිසකි. කුලියට නිවෙස්වලට එන ආගන්තුක පිරිස් එක් තැනක නොසිටින නිසා තම කාර්යය අවසන් වූ පසු ඉවත්ව යන නිසාත් අපරාධකරුවන් ලෙස ග්‍රහණය කර ගැනීමද අපහසුය. නමුත් මවුපියන් වශයෙන් තම දරුවන්ගේ ආරක්‍ෂාව පිළිබඳ සැලකිලිමත් වන ඔබ මෙවැනි පුද්ගලයන් ගැන අවධියෙන් සිටින්න.

මවුපියන්ගේ අඩුපාඩු :

කාර්යබහුලත්වය නිසාම මවුපියන්ට දරුවන් සමඟ ගත කරන්න වන්නේ අඩු කාලයකි. මේ හේතුවෙන් දරුවන් ආදරය හා අවධානය ලබා ගන්න බාහිර පුද්ගලයන්ට සමීප වෙයි.
මවුවරු රූපවාහිනි ටෙලි නාට්‍යවලට ඇබ්බැහි වීම.
මවුවරු රූපලාවණ්‍ය කටයුතු හෝ රෝග පිළිබඳව පමණක් වඩා උනන්දු වීම.
මවුපියන් කාර්යබහුල වීම.
දරුවන්ගේ අදහස් හා හැඟීම් සීමා කිරීම.
රූපවාහිනියේ කතා මාලාවලට බොහොමයක් කාන්තාවන් ඇබ්බැහි වී සිටින නිසා දරුවන් කෙරෙහි අති අවධානයද පහව යන්නේ ක්‍රමයෙනි. මීට අමතරව රූපලාවණ්‍ය ගැන වැඩිපුර සිතන කාන්තාවන් තම රූපය සුන්දර කර ගැනීමට දවසින් වැඩි වේලාවක් ගත කරන විට දරුවන්ගේ අවශ්‍යතා පිළිබඳ සොයන්න වෙන් වන්නේ අඩු කාලයකි. නිතර කතා කරන දඟකාර දරුවන් මවුපියන්ගේ නිදහසට බාධාවක් වන විට ඔවුන්ගේ කතා බහ සීමා කිරීමට තරවටු කරන අවස්ථාද ඇත. දරුවන් තමාට වන හිරහැර හා අපහසුතාද මවුපියන්ට සඟවන්නේ මේ හේතුවෙනි.

අපචාර සිදුවීමේ බලපෑම : කුඩා දරුවන් විවිධ අපචාර හා අපයෝජනයට ලක්වීම නිසා මානසික පීඩාකාරී තත්ත්වවලට ලක්වෙයි. එය ඔවුන්ගේ ජීවිත කාලයේම හීන පෞරුෂයට බලපානු ලබන කාරණයකි. එලෙස අපචාරවලට ලක්වූ දරුවන් එම බලපෑමෙන් ඇතැම් විට ඉදිරි සමාජයේ අපයෝජකයකු වීමටද ඉඩ කඩ වැඩිය. අවුරුදු 6 - 8ත් අතර වියේ පසුවන දරුවන් වඩා හොඳින් අධ්‍යාපනය හදාරන්නේ එම අවධියේදී බොහෝ දේ හොඳින් මතකයේ රඳවා ගත හැකි නිසයි. දරුවන් මෙම අවධියේ අපයෝජනයට ලක්වීම නිසා විශාල මානසික කම්පනයකට පත්වෙයි. මෙය මුළු ජීවිත කාලයටම බලපාන අහිතකර මානසික තත්ත්වයකි. අවුරුදු 12 - 14ත් අතර පසුවන දරුවන් අපයෝජනයට ලක් වන්නේ යම් කෙනෙක්ගේ බලහත්කාරයෙන් නොව ස්ව කැමැත්තෙන් විය හැකියි. මේ බලපෑමෙන් එම දරුවන් සමලිංගිකයන් බවට පත්වීමේ වැඩි අවධානමක්ද පවතියි. මෙවැනි සමාජ ගැටලු බොහොමයකට හේතු වෙමින් කුඩා දරුවන් ඛේදවාචකයන්ට ගොදුරු වන්නේ මවුපියන්ගේ නොසැලකිලිමත් බව නිසයි. සමාජයට දොස් පැවරීමෙන් නොව පවුලේ දරුවන්ගේ ආරක්‍ෂාව ගැන ඔබ සැලකිලිමත් වන්නේ නම් මෙවැනි සමාජ ගැටලු සිදුවීමට ඇති ඉඩකඩ අල්පය.

මව්බිම