🛍️   Business Directory
📣   Classifields
🛍️   Business Directory
📣   Classifields

කල් පැනපු ආහාරවලින් විෂ රසායන ද්‍රව්‍ය නිකුත් වෙනවා

කල් පැනපු ආහාරවලින් විෂ රසායන ද්‍රව්‍ය නිකුත් වෙනවා


මිනිස් පරිභෝජනයට සුදුසු ආහාර කුමක්ද? යන්න තෝරා බේරා ගෙන වෙළඳපොළෙන් මිලදී ගැනීමට පාරිභෝගිකයා විමසිලිමත් වීම මේ උත්සව සමයේදී වඩාත් වැදගත් කාරණයකි. ඉදිරි කාලය තුළදී උත්සව එළැඹීමත් සමඟ වෙළඳපොළට එන මිනිස් පරිභෝජනයට නුසුදුසු ආහාර වර්ග බහුල වීමේ අවදානමක් පවතියි. මේ කාරණාව සම්බන්ධයෙන් මතක තබාගෙන වෙළඳපොලෙන් ආහාර මිලදී ගැනීමට සැලකිලිමත් වීම වඩාත් වැදගත් වන්නේ රෝග වලට ගොදුරු නොවී සිටීමටය.  කොළඹ අතිරේක අනුමත රස පරීක්ෂක සහ නාගරික රස පරීක්ෂක ගාමිණී රාජනායක මහතා පවසන ආකාරයට වෙළඳපොළෙන් ආහාරපාන මිලදී ගැනීමේදී වඩාත් සැලකිලිමත් වීමෙන් පුද්ගලයාගේ සෞඛ්‍ය ආරක්ෂාව නිරන්තරයෙන්ම පවත්වාගත හැකි බව අවධාරණය කරයි. උත්සව සමය එළැඹීමත් සමඟ පාරිභෝගිකයා ලහි ලහියේ ආහාරපාන මිලදී ගැනීම සිදු කරයි. හදිසියට මිලදී ගැනීමත් සමඟ එම ආහාරපාන පරිභෝජනයට සුදුසුද නැද්ද යන්න සොයා බැලීමට ඔවුන්ට අමතක වේ. ඒ අනුව මිනිස් පරිභෝජනයට නුසුදුසු ආහාර පරිභෝජනය කිරීමෙන් විවිධ රෝගාබාධවලට ගොදුරු වීමට ඔවුන්ට සිදු වේ. උත්සව සමය එළැඹීමත් සමඟ වෙළඳපොළට නිකුත් කිරීමට තිබූ නරක් වූ කූනිස්සන් සහ පොන්නි සම්බා සහල් තොගයක් පසුගියදා අත්අඩංගුවට ගැනීම මීට කදිම උදාහරණයකි. නරක් වූ කූනිස්සන් චිලිපේස්ට් සෑදීමටත්, පොන්නි සම්බා සහල් ෆ්‍රයිඩ් රයිස් සෑදීමටත් භාවිතා කිරීමට තිබූ අවකාශය එමඟින් වැළකී තිබීම මහජන සෞඛ්‍ය ආරක්ෂාවට හේතු වී ඇත. නොඑසේ නම් මිනිස් පරිභෝජනයට නුසුදුසු මෙවැනි ආහාර පරිභෝජනයට ගැනීමෙන් පුද්ගලයන් කී දෙනෙකු ලෙඩ රෝගවලට ගොදුරු වීමට ඉඩ තිබුණ ද යන්න අපට සිතාගත නොහැක. 

කූනිස්සන් පරණ වී දිරායාමත් සමඟ ඒවායේ ක්ෂුද්‍ර ජීවින් වර්ධනය වීම සිදු වේ. ඒ අනුව එහි දිලීර, බැක්ටීරියා, සහ මිනිස් සිරුරට අහිතකර වෙනත් විස සහිත රසායනික වර්ග වර්ධනය වීමේ අවදානම් පවතියි. කූනිස්සන් තොගය තුළම ක්ෂුද්‍ර ජීවින් වර්ධනය වීම සිදුවන අතර ඔවුන්ගෙන් නිකුත් කරන බහිස්‍රාවීය අපද්‍රව්‍ය එම ආහාරවලට එක් වේ. ඒවායේ පවතින අහිතකර බැක්ටීරියා, දිලීර වර්ග ශරීරගතව වීමෙන් පුද්ගලයා රෝගී භාවයට පත් වේ. සහල්වල ගුල්ලන් සිටීම ද මිනිස් පරිභෝජනයට නුසුදුසු තත්ත්වයකි. සහල්වල තිබෙන පෝෂණීය කොටස් ගුල්ලා ආහාරයට ගෙන බහිස්‍රාවීය කිරීම සිදු කරයි. සහල් සෝදා පරිභෝජනය ගැනීමට කටයුතු කළ ද ගුල්ලාගේ බහිස්‍රාවීය අපද්‍රව්‍ය ශරීරගත වීමේ අවදානමක් පවතියි. කිසියම් ආහාරයක ගුල්ලන්, දිලීර, බැක්ටීරියා, පුස් වර්ග වර්ධනය වී තිබීමෙන් එම ආහාරයෙන් අප බලාපොරොත්තු වන පෝෂණ ගුණය නොලැබේ. ආහාරවල අඩංගු ප්‍රෝටීන්, ඇමයිනෝ අම්ල වැනි පෝෂණ කොටස් එමඟින් අපට ලබාගත නොහැක. එම නිසා මෙවැනි ආහාර වෙළඳපොළේ පවතින්නේ නම් ඒවා ප්‍රතික්ෂේප කිරීම ඔබගේ කාර්යයකි. එය ඔබගේ ශරීර සෞඛ්‍ය යහපත්ව පවත්වා ගැනීමට හේතු වේ. මිනිස් පරිභෝජනයට නුසුදුසු කිසියම් ආහාරයක් වෙළඳපොළේ පවතින්නේ නම් ඒ පිළිබඳ ප්‍රදේශයේ සිටින බලයලත් සෞඛ්‍ය වෛද්‍ය නිලධාරිවරයකුට, මහජන සෞඛ්‍ය පරීක්ෂකවරයකුට පැමිණිලි කිරීම ඔබගේ යුතුකමකි. එය මුළු මහත් මනුෂ්‍ය පරපුරටම කරන විශාල සේවාවක් ද වේ. 

සන්ධ්‍යා කරුණාරත්න 

උපුටා ගැනීම - දිනමිණ