This site has features that require javascript. Follow these simple instructions to enable JavaScript in your web browser.
Sithmal Yaya
යාළුවො මාළුවො වගේ ඕන තරම් හිටියත් අවංක සැබෑ යාළුවො ඉන්නෙ කීයෙන් කී දෙනා ද?

ඔබට යාළුවො ඉන්නවද? සාමාන්‍යයෙන් අපි හැමෝටම වගේ යාළුවො ඉන්නව. හොඳ යාළුවෙක් කියන්නෙ විශාල ශක්තියක්. සහනයක් වගේම සැනසීමක්. හැබැයි ඉතිං යාළුවො කිව්වට සේරම එක වගේ නෙමේ. එක පතේ කන තරමට ගජ මිතුරෝ ඉන්නව. අඹ යාළුවො ඉන්නව. සහෝදර සහෝදරියො වගේ හරිම ආදරෙන් හැමදේම බෙදාහදා ගන්න යහළු යෙහෙළියො ඉන්නව. අතේ දුරින් ඇසුරු කරන යාළුවො ඉන්නව. නිකං මගදි දැක්කම ඇයි - හොඳයි කියන යාළුවො ඉන්නව. හැබැයි ඒ එක්කම දිය යටින් ගින්දර ගෙනියන යාළුවොත් ඉන්නව. උඩින් එකක් කියල යටින් එකක් කරන යාළුවො ඉන්නව. හොඳ මූණ පෙන්නුවට, හොඳින් කතාබහ කළාට, එකට වැඩ කළාට, හිත යටින් සූක්ෂම ලෙස අපිට ඊර්ෂ්‍යා කරන යාළුවොත් ඉන්නව. අපිටම නොදැනී අඟේ ඉදං කන කන යාළුවො ඉන්නව. ඒ වගේම අපිට නොදැනි අපිව නරක දේට යොමු කරවන විනාශ මුඛයට ඇද දාන යාළුවොත් ඉන්න බැරිකමක් නෑ. අව්ව - වැස්ස දෙකටම ඉන්න යාළුවො වගේම වැහි කාලෙට පේන්නත් නැති හොඳ කාලෙට විතරක් ළඟින් ඇසුරු කරන යාළුවොත් ඉන්නව. වාසි වෙලාවට විතරක් ළංවෙලා ප්‍රයෝජන ගන්න බලාගන ඉන්න කොටසකුත් ඉන්නව. ‍පොදු වශයෙන් යාළුවො ගැන කියපු ඒ හැමදේම ඔබත් දන්නව ඇති. අත්දැකල ඇති. ඒ ‍පොදු අත්දැකීම් ඇසුරෙන් අපිට කාරණා තුනක් ගැන අවධානය යොමුකරන්න පුළුවන් නම් ඒක අපේ ජීවිතය සැනසීමෙන් තියාගන්න උදව් වේවි. ඒ කරුණු තුන තමයි,

1. හොඳ යාළුවො ඇසුරු කරන්න.
2. නරක යාළුවන්ගෙන් ප්‍රවේසම්වෙන්න.
3. ඔබ හොඳ මිතුරෙක් වන්න.

ඇත්තටම ඔය කරුණු තුනම එකට එකක් සම්බන්ධයි. හොඳ යාළුවෙක් කියන්නෙ කවුද නරක යාළුවෙක් කියන්නෙ කවුද කියා පැහැදිලි අදහසක් ගත්තොත් ඔබට පුළුවන් කාට හරි හොඳ මිතුරෙක් වෙන්න. හොඳ යාළුවො ඇතිකරගන්න. හොඳ මිතුරෙක් තුළ දකින්න තියන ගුණාංග වගේම නරක මිතුරෙක් තුළ දකින්න තියෙන ගුණාංග ගැනත් කතාකරන්න අනන්ත අප්‍රමාණ දේවල් තියෙන්න පුළුවන්. යාළුකම මිතුදම කියන එකත් සාගරයක් වගේ සංකල්පයක්. ඉවරයක් නැතුව කතා කරන්න පුළුවන් දෙයක්. ඒ සයුරෙන් දිය දෝතක් වගේ සැබෑ මිතුදමක ගුණාංග ගැන ටිකක් කතා කරමු.

(1) කවුද හොඳ මිතුරෙක් කියන්නෙ? 
හොඳ මිතුරෙක් කියන්නෙ අවංකවම අපිට ආදරේ කරන කෙනෙක්. වාසි බලාගන නෙමේ. සල්ලි පනං උදව් පදව් තියන වෙලාවට විතරක් නෙමේ, අතේ සතේ නැති වෙලාවට, බලා‍පොරොත්තු බිඳුණු වෙලාවට, කොටින්ම ‘පාං’ කියන්න බැරි තත්ත්වෙක ඉන්දැද්දීත් අපි ළඟින්ම හෙල්ලෙන් නැතුව ඉන්න කෙනෙක්. කෙනෙකුගෙ අවවාද, ගුරුහරුකම්, මග පෙන්වීම අපිට ප්‍රයෝජනවත් විය හැකි බව ඇත්ත. ඒත් ඊට වඩා අපිට වටින්නෙ අපේ වේදනාව බෙදාගන්න අය. අපේ තුවාල සුවකරල හදවතට උණුසුම දෙන අය. අපේ ආදරණීය කෙනෙක් මිය ගිය වෙලාවක, කරන්නෙ කියන්නෙ මොනවද කියල නොතේරෙන වියවුල් මොහොතක අපිත් එක්ක හිතින් ළංවෙලා අපේ අසරණකම, දුක්බර බව, බල බිඳුණු මොහොතක බෙදාගන්නව නම් ඒ අය තමයි ඇත්තම යාළුවො කියන්නෙ. අපේ දියුණුවට අව කපන, ඊර්ෂ්‍යා කරන, උඩින් හොඳ මූණ පෙන්නල යටින් අපේ විනාශයට වැටීම ප්‍රාර්ථනා කරන අය නෙමේ හොඳ මිත්‍රයො කියන්නෙ. ප්‍රශ්නයක් ආවම හිමීට ලිස්සල යන අය නෙමේ හොඳ යාළුවො කියන්නෙ. සමහර වෙලාවට සත්තු හොඳයි මිනිසුන්ට වැඩිය. සත්තු අපිව විවේචනය කරන්නෙ නෑ. අපෙන් හරස් ප්‍රශ්න අහල රිදවල මානසිකව වට්ටන්න හදන්නෙ නෑ. ඒත් අපිට සෙනෙහස පෙන්වමින් ළඟට වෙලා ඉන්නව. එහෙම අපිව විවේචනාත්මකව නොබලා මොන වැරැද්ද තිබුණත් අපිව ආදරෙන් පිළිඅරගන කඳුළු පිසදමන කෙනා නෙමේද සැබෑ මිතුරෙක් වෙන්නෙ? “අවුල් සහගත, පිළිවෙළක් නැති ගෙයක් කියන්නෙ සැබෑ මිතුරන්ගෙන් බොරු මිතුරන් වෙන්කර ගත හැකි කදිම ස්ථානයක්” කියල එක සුප්‍රසිද්ධ ‍ලේඛකයෙක් කියල තිබුණ. ඒකෙත් ‍පොඩි ඇත්තක් තියනව නේද? සමහරු මිනිසුන්ව ඇසුරු කරන්නෙ යාළුකම් පවත්වන්නෙ ගේ දොර බලල. ඒත් ඇත්ත මිතුරෙක් තමන්ගෙ මිතුරාව බලන්න එන්නෙ ගෙදර හැඩිවෙලාද නැද්ද කියල බලන්න නෙමේ. ගහක් යට හිටියත් සැබෑ මිතුරෙක් එන්නෙ තමන්ගෙ මිත්‍රයාට ආදරෙන් මිසක් ඔහුගේ ගේ දොර තක්සේරුකරල නෙමේ. හොඳ මිතුරෙක් කවදාවත් ඔබට බොරුවක් කරන්නෙ නෑ. කවදාවත් වංචාවක් කරන්නෙ නෑ. ඔබව රවටල ප්‍රයෝජන ගන්නෙ නෑ. පෞද්ගලික ප්‍රයෝජන සඳහා ඔබව ඇසුරු කරන්නෙ නෑ. ඔබට දුකක් සිදුවුණු වෙලාවක හොඳ මිතුරෙක් නම් ඔබෙන් ආරාධනාවක් ලැබෙන තුරු ඉන්නෙ නෑ. දැනුණු ගමන් දැනගත්ත ගමන් ඔබ ළඟට එනවා. හොඳ මිතුරෙක්ගෙ දහසකුත් එකක් හොඳ ගතිවලින් සාරාංශයක් ලෙස කැටි කළ ගුණාංග කීපයක් තමයි ඉහතින් කැටි කරල තියෙන්නෙ. 

(2) ඊළඟට නරක යාළුවන්ගෙන් ප්‍රවේශම් වෙන්න කිව්වනෙ. කවුද නරක යාළුවො? 
ඉහත අපි කතා වූ ගුණාංග නැති, ඊට පටහැනි ගති පැවතුම් කාටහරි තියනව නම් ඔහු හෝ ඇය කිසිසේත් හොඳ මිතුරෙක්/ මිතුරියක් නෙමේ කියල අවබෝධකරගන්න. කෙටියෙන්ම තමන්ගෙ වාසියට අපිව ඇසුරු කරන, අපිට රහසිගතව ඊර්ෂ්‍යා කරන උඩින් හොඳ මූණ පෙන්නල යටින් කටු ගහන, අපේ දුකේදී මූණිච්චාවට ‘ආනේ පව්’ කියල, හිමින්ම මග ඇරල යන කවුරුත් හොඳ මිතුරො නෙමේ. ඒක හොඳට තේරුම් ගන්න. 

(3) අනිත් ලොකුම දේ තමා අපි තවත් කෙනෙකුට හොඳ යාළුවෙක්ද කියන ප්‍රශ්නය? 
අපේ හිත් අවංක වෙන්න පුළුවන්. සංවේදීවෙන්න පුළුවන්. ඒත් බොහෝ අවස්ථාවල අපි හොඳ මිතුරන් විදිහට පෙනී සිටියත් අවංක, පරිත්‍යාගශීලී සැබෑ මිතුරෙක් අප තුළ නෑ වෙන්න පුළුවන්. කන්නාඩියක් ළඟ හිටගන්න. අපි ඉහත කතා කළ හොඳ මිතුරෙකුගෙ ගති ලක්ෂණ ඔබ තුළ තියනවද කියල අවංකව ඔබේම හිතෙන් අහන්න. ඔබ මොන වගේ මිතුරෙක්ද කියල ඔබටම පහසුවෙන් තේරේවි. ඉතින්, ඔබේ සැබෑ මිතුරන් කවුද කියල හොඳින් අඳුනාගන්න. වැරදි පුද්ගලයින්ව මිතුරන් ලෙස ඇසුරු කිරීම නවත්තන්න. ඔබේ කාලය කා දමන, තේරුමක් නැති දේට ඔබව ඇද දමන මෝඩ දේවල් කතා කරන අය ඔබේ යාළුවන් විය යුතු නෑ. ඥානවන්ත දේ කතා කරන ප්‍රඥාවට ආදරය කරන අය ඔබේ මිතුරන් කරගන්න. ඔබ හොඳ මිතුරෙක් වෙන්න. මිතු දම හිඟමනේ යන්නත් එපා. කෙනෙක්ට ඔබව අවශ්‍ය නම් ඔබට ඇගේ/ ඔහුගේ ජීවිතයේ ඉඩක් සලසාවි. ඔබව අඩුතක්සේරුවකින් සලකන කිසිවෙක් ඔබේ හොඳම මිතුරෙක්/ මිතුරියක්වීමට සුදුසු නැති බවත් අවබෝධ කරගන්න. වාසනාවන්ත කලට වඩා අවාසනාවන්ත කලට ඔබ ළඟ ඉන්න, ඔබට ගරු කරන, ඔබ වටිනා පුද්ගලයෙක් ලෙස හදවතින්ම අගයන කෙනෙක් පමණයි ඔබේ හොඳම මිතුරෙක්/ මිතුරියක් විය යුත්තෙ. මිනිස්සු අපේ ජීවිතයට පියමං කරනව. පිටව යනව. සමහරු යන්නෙ වේදනාවේ පියසටහන් ඉතුරු කරල. තවත් සමහරු සදාකාලික ආදරණීය මතක පියසටහන් තියල යනව. ඔබව හැඬවූ, ඔබව මානසිකව වට්ටන්නට හැදූ හැමෝගෙම පියසටහන් වැල්ලෙ තැබූ පිය සටහන් ලෙස සෝදා හරින්න. ඔවුන් හොඳ මිතුරන් නොවෙයි. ආදරණීය මතක සටහන් තැබූ අවංක මිතුරන්ගේ අඩි සලකුණු සදාකාලිකව හදතුළ සුරකින්න. හොඳ මිතුරන් තෝරාගන්න. හොඳ මිතුරෙක් වෙන්න. ජීවිතයේ සැනසීමට අපිට හොඳ මිතුරන් අවශ්‍යයි. 

මයිකල් ආන්ජලෝ 
උපුටා ගැනීම ලක්බිම