This site has features that require javascript. Follow these simple instructions to enable JavaScript in your web browser.
විස්තර ලුහුඩු දැන්වීම්
පවුල තුළ අවුල් ඇති වීමට බලපාන හේතු
null

අද සමාජයේ බොහෝ පවුල් දෙකඩ වන්නටත් නොයෙක් අඬදබර ඇතිවන්නටත් බලපාන ප්‍රධානම හේතුව ලිංගික ජීවිතය තුළ පවතින අනවබෝධය බව මින් පෙර විස්තර කළෙමු. ඊටඅමතරව පවුල් සංස්ථාව තුළ නොයෙක් අර්බුදකාරී තත්ත්වයන් ඇතිවීමට බලපාන බවට හඳුනාගෙන ඇති තවත් හේතු සාධක කිහිපයකි.

1. භාර්යාව විදේශගත වීම.

පවුලට ඇති ආදරය නිසාම කාන්තාව විදේශගත වීම තුළ බිරිඳකගේ මවකගේ ආදරය රැකවරණය අහිමි වීම පවුල් ජීවිත තුළ තවත් බොහෝ ප්‍රශ්න ඇතිකර වීමට හේතුවක් වේ. ස්වාමිපුරුෂයින් මත්පැනට ඇබ්බැහි වන්නටත් අනියම් සබඳතාවල පැටලෙන්නටත් බලපාන ප්‍රධාන හේතුවක් ලෙස භාර්යාව විදේශගත වීම හඳුනාගෙන තිබේ.

2. එකිනෙකාට දැනෙන ලෙස ආදරය නොදැක්වීම.

පවුලක සැමියා බිරිඳ හා දරුවන් ලෙස එක සෙවණක එකට ජීවත් වුවද එකිනෙකාට දැනෙනවිදියේ ආදරයක් නොලැබෙන අන්දම බොහෝ පවුල් ජීවිත තුළින් හඳුනාගෙන තිබේ. ආදරයරැකවරණය යන්න අඹුසැමියන් වශයෙන් එකිනෙකාටත් මව්පියන් වශයෙන් තම දූදරුවන්ටත් නියම ආකාරයෙන් සන්නිවේදනය නොවීමද බොහෝ පවුල් ජීවිත අසාර්ථක වීමට බලපාන තවත් හේතුවක් බව සොයාගෙන ඇත.

3. සන්නිවේදනය අඩාලවීම.

පවුලක් වශයෙන් එකට ජීවත් වුවද නොයෙක් මත ගැටුම් හේතුවෙන් අඹුසැමි දෙදෙනා එකිනෙකා සමග සුහදව කතාබස් නොකරමින් ආගන්තුකයින් සේ ජීවත්වන පවුල් කොතෙකුත් වේ. මේ ආකාරයට පවුලක ප්‍රධාන භූමිකාව ගෙනයන අඹුසැමි දෙදෙනා නන්නාඳුනන්නන් සේ ජීවත්වීම තුළ පවුල් ජීවිතයක් කිසිසේත් සාර්ථක නොවන බව අමුතුවෙන් පැවැසිය යුතු දෙයක් වන්නේ නැත.

4. අනෙක් පාර්ශ්වයේ මතයට සවන් නොදීම.

සමහර ස්වාමි පුරුෂයින් මෙන්ම බිරින්දෑවරුන්ද තම මතයේම හිඳිමින් අනෙක් පාර්ශ්වයට ඇහුම්කන් නොදීමටත් සැමවිටම තම අභිමතයටම සියල්ල සිදුවිය යුතුය යන මතයේ හිඳීමක් බොහෝ පවුල් ජීවිත තුළ අඬදබර මත ගැටුම් ඇතිවන්නට බලපාන තවත් හේතුවකි.

5. කාර්යබහුල බව නිසා එකිනෙකා නොසලකා හැරීම.

ආදරය කරන කාලයේ එකිනෙකා සමග කතා කරන්නට හමුවන්නට ඕනෑ තරම් වෙලාව තිබුණද විවාහ වූ පසුව තම බිරිඳට ඇහුම්කන් දෙන්නට බොහෝ ස්වාමිපුරුෂයින්ට කාලයක් නැත. තමන්ට කතා කරන්නට බොහෝ දේ සිතේ තබාගෙන භාර්යාවන් තම සැමියා පැමිණෙන තුරු බලා සිටියද සැමියා ඇය පවසන දේ සාවධානව අසා නොසිටීම ඇය තුළ කලකිරීමක් ඇති වීමට බොහෝ විට හේතු වන්නකි. සමහර ස්වාමිපුරුෂයින් මෙන්ම භාර්යාවන්ද ඒ ආකාරයට අනෙක් පාර්ශ්වයට ඇහුම්කන්දෙන බව පෙන්වන්නට උත්සාහ ගත්තද ක්‍රියාකාරීව සවන් නොදෙනවා නම් එය අනෙක් පාර්ශ්වයට හඳුනා ගැනීම අපහසු වන්නේ නැත. සැමියා හෝ බිරිඳ ඒ ආකාරයට ක්‍රියාකාරීව අනෙකාට සවන් නොදීම තුළ තමන්වගණන් ගන්නේ නැත යන හැඟීම අනෙක් පුද්ගලයා තුළ ඇති කරවයි.

6. කරන කැපකිරීම් සඳහා අගය කිරීමක් නොතිබිම.

“කොච්චර කළත් අන්තිමට වෙච්ච පුංචි වැරැද්දක් අල්ලගෙන කියවනවා” යන්න උපදේශනයන් කරා පැමිණෙන දෙපාර්ශ්වයෙන්ම නැගෙන ‍පොදු චෝදනාවකි. ස්වාමිපුරුෂයින් මෙන්ම භාර්යාවන්ද පවුල වෙනුවෙන් කරන කැපවීම් කිසිවිටෙකත් ඇගයීමට ලක් නොවුවද සිදුවන සුළු හෝ අත්වැරැද්දක් හෝ අතපසුවීමක් විශාල වරදක් ලෙස දකිමින් චෝදනා කිරීම බොහෝ පවුල් ජීවිත අතර හිත් රිදවීම් මත ගැටුම් ඇති වෙමින් පවුල් ජීවිත අසාර්ථක වන්නටද බලපාන හේතුවක් වී තිබේ.

7. එකිනෙකාට ගෞරව නොකිරීම.

අනෙක් පාර්ශ්වයේ ගෞරවය ලබන්නට ඕනෑම භාර්යාවක් මෙන්ම ස්වාමිපුරුෂයෙක්ද කැමතිය. එහෙත් බොහෝ පවුල් ජීවිත තුළ නැත්තේද එයයි. ආදරය කරන කාලයේ දැක්වූ ගෞරවය සැලකිල්ල විවාහ වූ පසුව නැත්තටම නැති වී යාම බොහෝ අඹුසැමියන් තුළින් දැක ගත හැකි දෙයකි. පවුල් ජීවිත තුළ එකිනෙකාට ගෞරව නොකරමින් නොතකා හැරීමද නොයෙක් ගැටලු ඇති කරවීමට හේතුවන්නකි.

8. වගකීම් පැහැර හැරීම.

පවුලක් තුළ නොයෙක් ප්‍රශ්න ගැටලු පැන නගිද්දි විශේෂයෙන් ස්වාමිපුරුෂයින් ඒවා මගහැර පලා යෑමටත් මත්පැනට ඇබ්බැහි වෙමින් ප්‍රශ්න ගැටලු අමතක කර දමන්නටත් උත්සාහ දැරීම තුළ භාර්යාවන් දරුවන් අසරණ භාවයට පත්වීම සිදුවේ. පියා ස්වාමිපුරුෂයා වශයෙන් පවු‍ලේ ප්‍රශ්නවලට උරදිය යුතුව තිබියදී ඒවා මගහැර ජීවත්වීම තුළ භාර්යාවන්ට තම සැමියා එපාවන තත්ත්වයකට පත්විය හැකිය. උසස් රැකියාවන්හි නියුතු ආර්ථික අතින් ශක්තිමත් කාන්තාවන්ද සමහරවිට තම දරුවන්ගේ වගකීම් සේවකයින්ට පවරා මව යන භූමිකාවෙන් ඉවත්ව ජීවත්වන අවස්ථා තිබේ. සමාජ තත්ත්වයට අනුව ඒ ආකාරයට ස්වාමිපුරුෂයින් මෙන්ම භාර්යාවන්ද තම වගකීම් පැහැර හැරීම තුළ පවුල් ජීවිත කොතෙකුත් අසාර්ථක වන අවස්ථා තිබේ.

උපුටා ගැනීම ලක්බිම