This site has features that require javascript. Follow these simple instructions to enable JavaScript in your web browser.
Sithmal Yaya
ළිඳේ වැටුණ දෛවඥයා

එක්තරා ගමක ප්‍රසිද්ධ දෛවඥයෙක් වාසය කළා. එයා අහසේ තරු දිහා බලලා ගණන් හදා එක එක අයට අනාගතේ වෙන්න තියෙන ග්‍රහ බලපෑම් ගැන කියනවා.

"මේ තරුවෙ ගමන නිසා ඔහේට ඉදිරි කාලය අසුබයි"
"මේ තරුවෙ ගමන නිසා ඔහේට ඉදිරි කාලය සුබයි"
"මේ තරුව රාහු ඇල්ලීම නිසා ඔහේට මාරකයක් තියෙනවා" ඒ ඔන්න ඔය ආදී වශයෙනුයි.

ඒ කාලයේ දුර බලන කණ්ණාඩි තිබුණේ නෑ. ඒ නිසා මේ පුද්ගලයා තරු බැලූවෙ තමන්ගෙ ඇස් දෙකින්. දවසක් එයා හඳ නැති තරුවලින් පිරුණ අහසක් ඇති රැයක අහස දිහා බලාගෙන තරු බල බලා ඇවිද්දා. එහෙම යනකොට පාර අයිනෙ තිබුණ එතරම් ගැඹුර නැති පාළු ළිඳකට වැටුණා. ළිඳේ ගැඹුර එයාගේ උරහිස් දක්වා වුණත් එයාට ගොඩ එන්න හැකි වුණේ නෑ.

"කවුරුහරි මාව ගොඩට ගන්නකෝ" කියලා එයා කෑගහන්න වුණා.

මේක ඇහුණ මිනිහෙක් ඇවිත් මෙහෙම ඇහුවා. "කවුද මේ මහ රෑ කෑගහන්නෙ? මොකද මේ ළිඳ ඇතුළෙ කරන්නේ?"

"ආ මේ මම දෛවඥ මහත්තයා. අනේ! මාව ගොඩට ගන්න"

දෛවඥයා ගොඩට ගත් මිනිහා මෙහෙම ඇහුවා. "හැබෑටම ඔහේ කොහොමද මේ ළිඳට වැටුණෙ?"

"මං අහසෙ තරු ගැන ගැන යද්දී නෙව මේක වුණේ"

"හරු හරි මුන්නැහේ පොළොවෙ තියෙන දේ ගැන නොසොයා නොබලා අහසේ තියෙන දේ ගැන බල බලා ගොහිනුයි මේක කරගත්තෙ. මිට පස්සෙවත් උඩ සෝදිසි කරන්න ඉස්සර බිම සෝදිසි කරල ඉන්න. මේ ළිඳ වතුර තියෙන ගැඹුරු එකක් වුණා නම් තරු බලලත් ඉවරයි පලාපල කියලත් ඉවරයි" මිනිහා කීවා.

ඊසොප්