දෙගොල්ලොම එක වගෙ

‘බලාගෙන ගියාම අපෙ තරුණ නිළියොයි. විපක්සෙ අයයි අතර පුදුම සමානකමක්නෙ තියෙන්නෙ.’ පීරිස්, තම මිතුරු කපිල සමඟ කීවේ නව ග්‍රන්ථයක් දොරට වැඩීම වෙනුවෙන් පැවති උත්සවයක විරාමයකදීය.

‘ඒ දෙගොල්ලො හරියට බටර් බනිසුයි, බ්ලොක් ගලුයි වගේනෙ. ඒ වගෙ දෙකොට්ඨාසයක් අතර කොහෙන්ද සමාන කමක්?’ කපිල කීවේ සෝපහාසයෙනි.

‘ආණ්ඩුව මොන ජිල්මාල් දැම්මත් මෙදා සැරේ අපි ස්ථිරේටම දිනනවා, කියලනෙ ඡන්දෙට කලින් විපක්ෂය කියන්නෙ. ඒත් ඡන්දෙන් පැරදුණාම හොට බිම ඇනිලා කෙළවරක් නැතුව කියන්ඩ ගන්නවනෙ, අරව කළා, මේවා කළා කියලා පීරිස් කීවේය.

‘ඉතින් තරුණ නිළියො කොහොම ද විපක්ෂයට සමාන වෙන්නෙ?’ කපිල පුදුම වෙමින් ඇසීය.

“ඇයි කපිල ඔය තරුණ නිළියොත් එහෙමනෙ. බඳින්ඩ කිට්ටුව කියනවා ‘එයා මට පණ වගෙ ආදරෙයි. මගෙ වෘත්තියට මටත් වඩා උනන්දු එයා’ කියලා. බැඳලා අවුරුද්දක් යන්ඩ කලින් කියනවා, ‘ඒ මිනිහා මට පොඩ්ඩක්වත් ආදරේ කරලා නැහැ. බොරු අවංකකමක් පෙන්නලා මාව රැවැට්ටුවා’ කියලා. විපක්ෂය කියන්නෙත් ඕකම නේද?” පීරිස් තම තීරණය සනාථ කරමින් කීවේය.