මනාලිය විලාසිතා කුඩුවක් නොවේ

මංගල දිනයකදී අප ඇස් පුරා දකින්නට බලාපොරොත්තු වෙන්නේ මනාලියගේ සැබෑ සුන්දරත්වයයි. චාම්බව මනාලිය වන යුවතියට කෙතරම් ආඩම්බරයක්ද? එහෙත් දැන් බොහෝ විට අප දකින්නේ පමණට වඩා මේක්අප්වලින් වර්ණවත් වූ අනවශ්‍ය ලෙස විලාසිතාවන් පුරවාගත් මනාලියන්. මංගල ඇඳුමින් සැරසුණු ඇතැම් මනාලියන් දිස්වන්නේ නළඟනන් ආකාරයටයි. Modern bride කියූ සැනින් අප මනසෙහි මැවෙන්නේ ඉතා තද ෆවුන්ඩේෂන් එකක් දැමූ විවිධ වර්ණයන්ගෙන් වර්ණ ගැන්වූ ඇස් ඇති දිගු අයිලයිනර් සහිත ඇස් පිහාටු දිගට දැමූ ජපන් බෝනික්කකු මෙන් රෝස පැහැති කම්මුල් ඇති විවිධ විලාසිතාවලින් සැරසුණු මනාලියකි. සැබැවින්ම අද බොහෝ මනාලියන් මෙබඳුය. මනාලියකට ගැළපෙන නොගැළපෙන සෑම දෙයක්ම අද ඇයට පැළඳවීම විලාසිතාවක් බවට පත්ව ඇත. මනාලියගේ මංගල ඇඳුම බොහෝ වැඩ දැමූ විට ඇයගේ ස්වාභාවික සුන්දරත්වය වැසී යන ආකාරයේ ඇඳුමක් බවට වේ. විලාසිතා යනු දවසින් දවස අලුත් වියයුතු බව සැබෑය. නමුත් මනාලිය යනු විලාසිතා කූඩුවක් නොවන බව සිතා කටයුතු කිරීම වැදගත්. වර්තමානයට සරිලන පරිදි විලාසිතාවන් අලුත් විය යුතු වුව ද මනාලියක් හැඩ ගැන්විය යුත්තේ එම අවස්ථාවට ගැළපෙන විලාසිතාවන්ගෙන් බව අවබෝධකර ගත යුතුයි. විශේෂයෙන්ම මෙහිදී මනාලියන්ගේ මේක්අප් පිළිබඳ කතා කළ යුතුමයි. ඒ පමණට වඩා මේක්අප් යෙදීමේ හේතුවෙන් බොහෝ අවස්ථාවල මනාලියන්ගේ මුහුණු වෙස් මුහුණක ස්වරූපයක් දිස්වෙන නිසයි මෙසේ සිදුවීමට හේතුව මනාලියකට යොදන මේක්අප් එක පිළිබඳ නිවැරැදි අවබෝධයක් නොමැතිකමයි.

මනාලියකගේ මේක්අප් එකක් නිවැරැදි විය යුත්තේ මොන ආකාරයෙන් ද ඇයව මේක්අප් කිරීමේදී සැලැකිලිමත් වියයුතු කරුණු කාරණා මොනවාද?

මෙහිදී අප පළමුවෙන්ම මනාලියට දමන ෆවුන්ඩේෂන් පිළිබඳ කතා කරමු. ඔබ රූපලාවණ්‍ය ශිල්පියකු හෝ ශිල්පිනියක නම් ඔබට විවිධ ආකාරයේ සමක් ඇති මනාලියන් මුණගැසී තිබෙනු විය හැකියි. එනම් සාමාන්‍ය සමක්, වඩාත් තෙල් සහිත සමක්, වියළි තද පැල්ලම් සහිත කුරුලෑ කැළැල් සහිත සමක්, සුදු තලඑළලු, කළු පැහැති සමක් ආදී වශයෙනි. මෙහිදී අප මෙම සමෙහි ස්වභාවය නිවැරැදිව හඳුනාගෙන ෆවුන්ඩේෂන් තෝරාගත යුතුයි. පළමුව කළ යුත්තේ කන්සීලර් එකක් තෝරා ගෙන සමේ ඇති අඩුපාඩු තැන් වසා ගැනීමයි. ඉන්පසු සමේ වර්ණයට ගැළපෙන ෆවුන්ඩේෂන් ආලේප කළයුතු අතර මනාලියකට ෆවුන්ඩේෂන් තට්ටු ගණනාවක් දැමීම සුදුසු නොවේ. ඇතැම් අවස්ථාවල ටීවී මේක්අප්, වීඩියෝ මේක්අප්වල දී ෆවුන්ඩේෂන් දැමීම නිසා මෙය සිදුවේ. ටීවී වීඩියෝ දර්ශන සඳහා ෆවුන්ඩේෂන් යොදනු ලබන්නේ එම විදුලි ආලෝකයට සහ කැමරා කාචයන්ට හසුවන පරිදියි. එනමුත් එය මනාලියකට දැමීම ඉතාම බරපතළ වරදකි. මනාලිය දවසේ පැය ගණනාවක් ෆවුන්ඩේෂන් දමා එම අවස්ථාවට මුහුණ දිය යුතුය. ඇතැම් අවස්ථාවල තද පැහැති වර්ණයක් සහිත සමක් ඇති අය ෆවුන්ඩේෂන් මඟින් ඉතාමත් සුදු අයෙක් බවට පත්වන තරමේ වෙනස්වීමක් කර ඇති බව ඔබ දැක ඇති. මංගල දිනයේදී මනාලිය ඇයම ද යන්න හඳුනා ගැන්මට අපහසු අවස්ථාවන් ද බොහෝයි. මනාලියගේ නියම සුන්දරත්වය වන්නේ ඇයගේ චාම් බවයි. ඇයට ෆවුන්ඩේෂන් දමා ඇත්ද නැත්ද යන්න සොයා ගැනීමට අපහසුවන අන්දමට සරල ලෙස ෆවුන්ඩේෂන් භාවිත කළ යුතුයි. මෙය අපි නැචුරල් ෆවුන්ඩේෂන් දැමීම ලෙස හඳුන්වමු. එනම් ෆවුන්ඩේෂන් දැමූවත් ඇයගේ ස්වාභාවික පෙනුම ඉස්මතු විය යුතුයි. එය ස්වාභාවික ලෙස දිස්විය යුතු අතර කෘත්‍රිම නොවිය යුතුයි. මෙය රූපලාවණ්‍ය ශිල්පියකු සතු විශාල වගකීමකි. එමෙන්ම මනාලිය හැඩගැන්වීමේදී ඇයට සාධාරණය ඉටුවීමයි.

මෙලෙස ෆවුන්ඩේෂන් දැමූ පසු ඇයට ෆිනිෂිං පවුඩර් දැමීම කළයුතු අතර එය ඇය මුලින් දමන ලද ෆවුන්ඩේෂන් එකටම ගැළපෙන වර්ණයක් විය යුතුයි. එය ද දැමිය යුත්තේ මනාලියකට මේක්අප් කරන බව වටහාගෙනයි. ඉන්පසු මනාලියගේ මේක්අප් එකෙහි වැදගත්ම කොටස වනුයේ අයි මේක්අප් එකයි. මෙහිදී ෆැන්ටසි මේක්අප්වල දී මෙන් විවිධ වර්ණයන්ගෙන් මනාලියගේ ඇස් වර්ණ ගැන්වීම නොකළ යුතුයි. වෙස් නැටුමකට මෙන් දිගු අයිලයිනර් දමා දිගු ඇස් පිහාටු දැමීම ඇයට සුදුසු නොවේ. ඇතැම් අවස්ථාවල ඕනෑවටත් වඩා ඇස් කළුකර වෙස් මුහුණක් දැමූ ආකාරයට ඇස් හැඩගන්වා ඇති අයුරු දක්නට ලැබෙන අවස්ථා තිබෙයි. සිල්වර් ග්ලිටර් වැනි දෑ උපයෝගී කරගෙන ඇස් හයිලයිට් කිරීම ඇයට සුදුසු නොවේ. ඇස් සඳහා වර්ණ තෝරා ගැන්මේදී ළා පැහැති වර්ණ තෝරා ගැනීමට වගබලා ගත යුතුයි. එනම් පීච්, බ්‍රොන්ස්, ලයිට් පින්ක්, ඩල් ගෝල්ඩ් වැනි වර්ණ සුදුසුවන අතර උවමනාවට වඩා ඇස් කෙළවර තද වර්ණ දැමීම මඟින් මනාලියගේ සුන්දරත්වය ගිලිහී යනු ඇත. ඇස් වර්ණ ගැන්විය යුත්තේ ඇස්වල තිබෙන මලානික බව ඉවත් කිරීමට සහ ගිලී ඇති ඇස් ඔප් නංවා ඇස්වලට කාන්තිමත් බවක් ප්‍රබෝධවත් බවක් ලබාදීමට පමණි. එහි මොනර නැටුමකට මෙන් විවිධ වර්ණ දමා දිගුකිරීම මනාලියකට සුදුසු නොවේ. අයිලයිනර් දැමීම ද තද කළු පැහැති වර්ණයන් නොවිය යුතුයි. සමේ වර්ණයට ගැළපෙන දුඹුරු පැහැති අයිලයිනර් සහ කාජල් ශ්‍රී ලාංකික මනාලියකට සුදුසුය. අයිලයිනර් දමන්නේ ඇස් දෙක මඳක් හයිලයිට් වීමටත් ඇස්වල ඇති අඩුපාඩු වසා ගැනීමටත් බව වටහාගත යුතුයි. මෙමඟින් කුඩා ඇස් මඳක් විශාල කර ගැනීමටත් විශාල ඇස් කුඩාකර ගැනීමටත් වැනි අඩුපාඩු මඟහරවා ගතහැකිය. ඉන්පසු ඇස් පිහාටු මත තැවරී ඇති පවුඩර් ඉවත් කිරීමට මඳක් මස්කාරා දැමීම සුදුසු වේ.

ඉන්පසුව තොල් ආලේප නිවැරැදිව පාවිච්චි කළ යුතුය. මෙහිදී ලිප් ලයිනර් එකක් අඳිනු ලබන්නේ තොල්වල ඇති අඩුපාඩු ඉවත්කර හැඩය ඉස්මතුකර ගැනීමටයි. මෙහිදී අප පාවිච්චි කිරීමට බලාපොරොත්තු වන ලිප්ස්ටික් වර්ණයට ගැළපෙන ඒ හා සමාන වර්ණයක් ඇති ලිප් ලයිනර් එකකින් ලිප්ස්වල හැඩය ලබාගත යුතුයි. නමුත් ලිප්ස්ටික් ආලේප කිරීමෙන් පසු ලිප් ලයිනර් එක වඩාත් තද පැහැයට ඉස්මතු වී පෙනීම මනාලියකට සුදුසු නොවේ. එය ඇන්දා නොඇන්දා හා සමානව විය යුතුයි. ඉන්පසු ලිප්ස්ටික් වර්ණයන් තෝරා ගැනීමේදී ද ඉතාමත් කල්පනාකාරී වීම වැදගත්. එනම් වඩාත් තද වර්ණ සුදුසු නොවන අතර සමේ පැහැයට ගැළපෙන ශ්‍රී ලාංකික කාන්තාවන්ට සුදුසු . පින්ක්, ඔරේන්ජ් වැනි වර්ණ තෝරා ගැනීම සුදුසු වන අතර මේවා Gloss නොව Mat Finish ඒවා විය යුතුයි. ලිප්ස්ටික් දිගු වේලාවක් රඳවා ගැනීම සඳහා නව තාක්ෂණික ක්‍රම උපයෝගී කරගැනීම සුදුසු වේ.

අවසානයේදී බ්ලෂර් කිරීම නිවැරැදිව කළ යුතුයි. එනම් මුලින්ම Blushon වර්ණ ද බ්‍රොන්ස්, ගෝල්ඩ් පීච් වැනි ඒවා විය යුතු අතර බ්ලෂොන් තැවරීමේදී ඒවා තවරා ඇති බව වෙන වෙනම නොපෙනෙන සේ එය ස්වාභාවිකව දිස්විය යුතුයි. අප Blushon තවරන්නේ මුහුණේ ඉරියව් මනාව පෙන්වීමට මිස තද රෝස කම්මුල් ඇති බෝනින්කකු මෙන් දිස්වීමට නොවේ. මුහුණේ කම්මුල් ඇටයට පහළින් බ්ලෂෝන් තැවරීමෙන් කම්මුල්වල හැඩය ස්වභාවිකව ලැබෙන අතර හකු ඇටය මත බ්ලෂර් තැවරීමෙන් බෙල්ලත් මුහුණත් හොඳින් වෙන් වී පෙනේ. තව ද නළල වටා මඳක් තැවරීමෙන් හිසත් නළලත් අතර හැඩය ඉස්මතුවන අතර නාසය දෙපස නෝස් කට් (Nose cut) දැමීම මඟින් නාසයේ දිගු බව ස්වාභාවිකව පෙනේ. මෙසේ නිවැරැදිව බ්ලෂෝන් තැවරීමෙන් මුහුණේ ඉරියව් හොඳින් ඉස්මතු වී පෙනිය යුතුයි.

හැඩ ගැන්වීම්වලදී ද මනාලියගේ නියම සුන්දරත්වය දැකීමට නම් භාවිත කරන මේක්අප් තෝරා ගන්නා විට හොඳ වෙළෙඳ නාමයක් ඇති උසස් තත්ත්වයේ නිෂ්පාදන ගත යුතු බව කිව යුතුමයි. එවිට කිසිදු ගැටලුවකින් අඩුපාඩුවකින් තොරව මේක් අප් එකක සැබෑම සුන්දරත්වය ඉස්මතුකර ගැන්මට හැකිවනු ඇත. මේක්අප් යනු කෙනකුගේ සුන්දරත්වය ඉස්මතු කරලන දෙයක් මිස මුහුණකට කෘත්‍රිම පෙනුමක් ගෙන දෙන දෙයක් නොවේ. ඒ බව අවාධාරණය කරගනිමින් කටයුතු කිරීම වඩාත් වැදගත් කොට සැලකිය යුතුයි.

උපදෙස් - ප්‍රවීණ රූපලාවණ්‍ය සහ මැහුම් නිර්මාණ ශිල්පිනී අරුණී සිල්වා (අරුණි බ්‍රයිඩිල්)

ලිව්වේ මංජුලා මල්කාන්ති

උපුටා ගැනීම තරැණි පුවත්පත