ඔබටම ගැළපෙන යෙහෙළියන් තෝරගන්න
මනාලියක් වීමට දින ගනිමින් සිටින ඔබට සුන්දර රූ සපුවක හිමිකාරියක් වීමට මාස 6ක් පුරාවට සිදු කළ යුතු සත්කාරයන් පිළිබඳ අප පසුගිය ලිපියෙන් දැනුම්වත් කළෙමු. එහෙත් මනාලියක් වන දින ඔබේ සුන්දරත්වය මැනවින් ඔප් නැංවෙන්නේ මනා ලෙස හැඩ ගැන්වීමෙනි. කාගෙත් ආකර්ෂණය දිනා ගනිමින් සුරලියක් ලෙස හැඩ ගැන්වීමට නම් මේ කරුණු පිළිබඳත් ඔබ අවධානය යොමු කිරීම වැදගත්.
හැඩවෙන සම්ප්‍රදාය :
පළමුවෙන්ම මනාලිය ලෙස හැඩ ගැන්වෙන සම්ප්‍රදාය තීරණය කළ යුතුය. එසේම ආගමික, සංස්කෘතික සම්ප්‍රදායද මීට තදින්ම බලපාන්නකි. එමෙන්ම මංගල යුවළගේ මෙන්ම මවුපියන්ගේ කැමැත්තද මෙහිදී සලකා බැලේ. කෙසේ වුවද මේ සියල්ල තීරණය කළ යුත්තේ පළපුරුදු රූපලාවණ්‍ය ශිල්පියෙකුගේ අනුදැනුම මතය.එහිදී මනාලියගේ ශරීරයේ ස්වභාවය වන උස, මහත හා සමේ පැහැයද සලකා බැලේ. මෙම කාරණා සැලකිල්ලට ගනිමින් මංගල ඇඳුමේ වර්ණය, මෝස්තරය හා හැඩතල සේම උඩරට, පහත රටද යන වගද තීරණය වේ.
හැට්ටයේ මෝස්තර :
තෝරා ගත් ඇඳුම මසා ගැනීමද ක්‍රමානුකූලව සිදුවිය යුත්තකි. ඉහත කී කරුණු සලකා බලමින් නවීන මෝස්තරයන්ට අනුව සාරි හැට්ටය නිමවා ගැනීමෙන් මංගල ඇඳුමට මනා පෙනුමක් ගෙනදිය හැකිය. එම නිසා ඇඳුම් නිර්මාණය කරන්නා නිවැරැදිව තෝරා ගැනීමද ඔබ සතු වගකීමකි. කට් වර්ක් Pearl ක්‍රිස්ටල් වර්ගද මංගල සාරි හැඩ ගැන්වීමේදී මේ දිනවල වැඩිපුර භාවිත කරයි. සාරි හැට්ටය නිම කිරීමේදී තරමක් තරබාරු යුවතියකට නම් නිරාවරණය වූ සාරි හැට්ට ගැළපෙන්නේ නැත. සාරියෙ යට සාය මැසීමේදි පොළව මට්ටමේ සිට අගල් 1 1/2ක් පමණ උසට මිම්ම ගැනීම වඩා සුදුසුය. සාරි හැට්ටය සහ යට සාය මනා නිමාවකින් යුක්ත වීම සාරියේ අලංකාරය ඉස්මතු කිරීමට තවත් හේතුවකි.
මනාලියගේ යෙහෙළියන් :
මනාලියගේ පෙනුමට ගැළපෙන දෙවැනි මනාලියන් තෝරා ගැනීමටත් සැලකිලිමත් වෙන්න. මෙහිදී වැඩි ආකර්ෂණයක් හිමි විය යුත්තේ මනාලියටයි. ඒ බව සිහි තබා ගනිමින් යෙහෙළියන් තෝරා ගැනීම මෙන්ම හැඩ ගැන්වීමද සිදු කරන්නකි. යෙහෙළියන්ගේ ඇඳුම්වල වර්ණ ගැළපීමද සැලකිලිමත්ව කළ යුතුයි. මනාලියට Cream වර්ණය තෝරා ගත්තේ නම් එම වර්ණයටම ගැළපෙන වර්ණ රටාවන් වන තැඹිලි හා රන්වන් පැහැය ආදී වර්ණ ගළපා ගත හැකිවේ. නොගැළපෙන වර්ණයන් තෝරාගත් විට මනාලියට වඩා යෙහෙළියන් කැපී පෙනෙනු ඇත. එය ඔබේ මංගල ඡායාරූපවලට ගෙන දෙන්නේ අවලස්සනකි.
උඩරට ඇඳුම් :
නිලමේ ඇඳුමින් සාම්ප්‍රදායිකව හැඩ ගැන්වෙන මංගල යුවළක් නම් යහලු යෙහෙළියන් මෙන්ම මල් කුමර, කුමරියන්ද හැඩ ගැන්විය යුතු වන්නේ ඔසරිය හා ළමා සාරියෙනි. මෙවන් අවස්ථාවකදී වැඩිපුර විලාසිතාවන් කිරීම සුදුසු නොවේ. මෙහිදී සිදුවිය යුත්තේ සාම්ප්‍රදායිකත්වය ආරක්‍ෂා කිරීමය. යෙහෙළියන්ගේ සාරි විලාසිතාද මනාලියන්ගේ සාරි විලාසිතාවට ගැළපෙන අයුරින් සිදු කිරීම වඩාත් සුදුසුයි. මනාලියගේ සාරිය ඡැ්රක හෝ ක්‍රිස්ටල් මගින් හැඩ ගැන්වූයේ නම් යෙහෙළියන්ටද මෝස්තර නිර්මාණ විය යුත්තේ එලෙසින්මය.
ආභරණ :
ආභරණ මගින් මංගල ඇඳුමට වැඩි ඔපයක් එක්වේ. උඩරට, පහතරට හා බටහිර ආදී සම්ප්‍රදායන්ට අනුව ආභරණද සුවිශේෂීි වෙනස්කම් පෙන්වයි. මංගල යුවළ සාම්ප්‍රදායික නිලමේ ඇඳුමෙන් හා ඔසරියෙන් හැඩ ගැන්වේ නම් සාම්ප්‍රදායික ආභරණ කට්ටලයෙන් පමණක් සැරසිය යුතුය. නමුත් මනාලයා බටහිර (කෝට්) ඇඳුමින් සැරැසී මනාලිය ඔසරියෙන් සැරැසේ නම් නවීන අංග මුසු කරමින් වෙනසක් කිරීම ගැටලුවක් නැත. නළල් තලය (ඉන්දියන් ක්‍රමයේ) පැලඳිය යුතුවන්නේද මුහුණේ හැඩයට ගැළපෙන අයුරිනි. සිහින් මනාලියකට නම් වැඩි වශයෙන් ආභරණ පැලඳීම උචිත නොවේ. මනාලියගේ චාම් බව ඇගේ සුන්දරත්වය තවත් ඔප් නංවන්නකි. මෙම ආභරණ මගින් ඇයගේ අගනා බවද දිස්විය යුතුය. මනාලියගේ ගෙල තරමක් කෙටියි නම් උල් හැඩයෙන් යුත් මාලයක් පැලඳීම වඩාත් උචිතය. එමගින් ඇගේ ගෙල තරමක් උස් බවකින් පෙන්විය හැකි වේ. ඛෙල්ල දිග නම් ගෙලටම සවි වන මාලයක් පැලඳීම වඩාත් සුදුසුය. දිගටි මුහුණට නම් කනටම සවි වූ කරාබු ආදිය පැලදීමද වැඩි පෙනුමක් ගෙන දෙන්නකි.
මල් කලඹ :
ශරීරයේ හැඩය අනුව මල් කලඹ නිර්මාණය කළ යුතුයි. සිහින් සිරුරක් හිමි මනාලියකට තරමක් දිගු විශාල මල් කලඹක් නොගැළපේ. උස පිරිපුන් සිරුක් හිමි යුවතියකට නම් උල් හැඩැති මල් කලඹක් මනාව ගැළපේ. බටහිර පන්නයට මංගල ගවුමින් සැරසෙන මනාලිය මල් කිනිත්තක් අතැතිව සිටීම වැඩි සුන්දරත්වයක් ගෙන දෙයි. මල් කලඹ සඳහා මල් හා වර්ණ ගැළපීමද වඩා සැලකිලිමත් විය යුතු දෙයකි.
හිස් පලඳනාව :
මනාලියගේ උස මිටි ස්වරූපද වෙනස් කිරීමට හිස් පලඳනාවට හැකිය. මෙහිදී කොණ්ඩා මෝස්තරය මෙන්ම මල් සැරැසිලිද සිදු කරන විට වඩාත් සැලකිලිමත් විය යුතුමය. කොණ්ඩා මෝස්තරයේ අලංකාරය වැඩි කරවන අයුරින් මල් සැරැසිලි සිදු කළද එය කොණ්ඩා මෝස්තරයට හානියක් නොවීමත් වැදගත්ය. උඩරට සම්ප්‍රදායට හැඩවෙන මනාලියගේ කොණ්ඩය වැඩි වශයෙන් නිරාවරණය වීම නිසා කොණ්ඩය වැසෙන අයුරින් මල් ගැසීම වැඩි අලංකාරයක් පෙන්වයි. එහිදී මල් කලඹ සඳහා යොදා ගත් මල් වර්ගයම කොණ්ඩය සැරැසීමටද භාවිත කිරීම සුදුසුය.
Makeup :
ඔබ මංගල උත්සවය පැවැත්වීමට සූදානම් වන්නේ උදෑසනද, සන්ධ්‍යාවේද යන බව කලින් තීරණය කර ගන්න. ඒ අනුව ඔබේ මේකප් වර්ගද වෙනස් වේ. උදෑසන මංගල උත්සවයට නම් මේකප්ද, සන්ධ්‍යාවේ නම් Gloss මේකප්ද වශයෙන් එය තෝරාගත හැකිය. (රූපලාවණ්‍ය ශිල්පියාගේ අනුදැනුමින්) උදෑසනට මෙම මේකප් දිලිසෙන ස්වභාවයක් නොගනී. ලාංකීය තළෙලු සමට උචිත ස්වභාවික වර්ණ යොදා ගනිමින් මනාලිය හැඩ ගැන්වීම සුදුසුයි. ඇඳුමේ වර්ණයට තොල් ආලේපන ගළපන්න. මනාලියගේ මුහුණේ සුන්දර ඉරියව් (features) කැපී පෙනෙන ලෙස හැඩ ගැන්වීමට තරම් ඔබේ රූපලාවණ්‍ය ශිල්පියා සමත් විය යුතුය. එනම් ඇස් ලොකු නම් තරමක් කුඩා කර පෙන්වීමටත්, වඩා සිහින් වූ තොල් තරමක් විශාල කර පෙන්වීමටත් වේෂ නිරූපණයේදී හැකියාව ඇත. මෙසේ හැඩගැන්වීමෙන් පසු එම මේක් අප් පැය අටක කාලයක්වත් හොඳින් රැඳී තිබිය යුතුය. තවත් විශේෂ කරුණක් වන්නේ අප උෂ්ණ අධික දේශගුණයක සිටින නිසා ඒ බව සිහි තබා ගනිමින් මේකප් සිදු කළ යුතු බවය. මෙහිදී ප්‍රමිතිගත කල් ඉකුත් නොවූ ආලේපන භාවිත කිරීමටද වග බලා ගන්න. පාවහන් මනාලියට පාවහන් තෝරා ගැනීමේදී මනාලයාගේ උස පිළිබඳත් සැලකිලිමත් වන්න. මනාල යුවළ ඇතුළු කණ්ඩායමේ ඡායාරූපයක් ගැනීමේදී පවා ඔවුන් පලඳින පාවහන්වලට විශාල බලපෑමක් කළ හැකිය.
ශාලිකා රංගනී සමරදිවාකර
උපුටා ගැනීම මව්බිම පුවත් පතඇසුරෙනි
