මනාලියන් හැඩ ගැන්වීමේ තරගයක දී රූපලාවණ්‍ය ශිල්පිනියන් දැනගත යුතුම කරුණු
නිරූපිකාව මොන වගේද?
මනාලියක් හැඩගැන්වීමේ තරගයකට රූපලාවණ්‍ය ශිල්පිනිය හෝ ශිල්පියා මෙන්ම තෝරාගන්නා නිරූපිකාවද අතිශයින්ම වැදගත්ය. මෙවැනි තරගයකදී කැපීපෙනෙනුයේ ඔබ නොවේ. ඔබේ රූපය කෙසේ වුවත්, ඔබේ වයස කුමක් වුවත් ඒවා විනිශ්චය මණ්ඩලයක අවධානයට යොමුවන කරුණු නොවේ. විනිශ්චය මණ්ඩලයක ඇස නිතරම රැඳී පවතිනුයේ තරගය පවත්වන කාලසීමාව තුළ ඔබ කරන ක්‍රියා පිළිවෙත දෙස සහ එහි අවසන් ප්‍රතිඵලය වන ඔබේ නිරූපිකාව දෙසටය. තරගයකදී රූපලාවණ්‍ය ශිල්පියා යනු නිර්මාණකරුවෙකි. ඒ නිර්මාණය දරා සිටිනුයේ නිරූපණ ශිල්පියාය. ඔබ බොහෝ මහන්සියෙන් සීරුවට කළ නිර්මාණය ප්‍රදර්ශනය කිරීමට තරම් ඔබේ නිරූපණ ශිල්පිනිය සමත්කම් ඇත්තකු විය යුතුය. ඔබ කළ නිර්මාණය ලොවට කියාපානුයේ නිරූපණ ශිල්පිනිය නිසා තරගයට ප්‍රථම ඒ පිළිබඳ අවධානය යොමු කළ යුතුය. ඔබේ නිරූපිකාව අග්‍රගණ්‍ය, සුපිරි තලයේ නිරූපිකාවක් විය යුතු නැත. එහෙත් ඇය ඔබේ නිර්මාණය සිත් ඇදගන්නාසුලු අන්දමට විනිශ්චය මණ්ඩලය හමුවේ ඉදිරිපත් කිරීමට තරම් දක්‍ෂතා ඇත්තියක විය යුතුය.
නිරූපිකාවත් සූදානම් විය යුතුයි, ඔබ තරගයට සූදානම් වෙනවා සේම ඔබේ නිරූපණ ශිල්පිනියද තරගයට සූදානම් විය යුතුය. ඔබ ඔබේ නිර්මාණ ශිල්පිනිය සමඟ තරගයට කලින් පෙරහුරුවක් පැවැත්වීම ඉතා වැදගත්ය. එහිදී තරගය අවස්ථාවේදී ඇයට අන්දන ඇඳුම් ආයිත්තම් නිවැරැදි ලෙසම තහවුරු කරගත යුතුය. සාරි හැට්ටය ඇගේ ශරීරයට ගැළපෙන සේ සකස් කරගැනීම ඉතා වැදගත්ය. බොහෝදෙනකු සාරියේ වර්ණය හා නිරූපිකාව අඳින යට සායේ වර්ණය පරස්පර විරෝධී ලෙස ගළපති. සාරිය නිමැවෙන්නේ ඉතා ගනකම් රෙදිවලින් නොවේ. එය දුහුල් රෙද්දකින් නිමවන නිසා විනිවිද දැකිය හැකිය. නිරූපණ ශිල්පිනිය වේදිකාවට පැමිණි විට සාරිය මෙන්ම යටින් ඇඳ ඇති සායද හොඳින් කැපී පෙනේ. සුදු පැහැති සාරියකට බටර් පැහැති යට සායක් ඇඳි විට සමස්ත පෙනුමම එය අවලස්සනක් එක් කරයි.
අවශ්‍ය ද්‍රව්‍ය සූදානම් කරගන්න
ඔබ රූපලාවණ්‍ය ආලේපන තෝරා ගැනීමේදී වුවද ප්‍රමිතියකින් යුත් ආලේපන තෝරා නොගතහොත් ඔබේ නිර්මාණයේ නිමාව පිළිබඳ ඔබට තෘප්තිමත් විය නොහැකියි.
තරගයකදී මනාලියක් හැඩගැන්වීම සඳහා ලැඛෙනුයේ ඉතා සීමිත කාලයකි. ඒ කාලය තුළ ඔබේ උපරිමය කළ යුතු නිසා කල් තියා සූදානම් වීම ඉතා වැදගත්ය. ඔබට අවශ්‍ය සියලු දේ වෙන වෙනම අසුරා ගන්න. කොණ්ඩ කටු, හැට්ට කටු, රබර් පටි ආදී සියල්ල වෙන වෙනම කුඩා අසුරනයන්හි අසුරන්න. කොණ්ඩ කටු, හැට්ට කටු හා රබර් පටි එකම අසුරනයක තැබූ විට තරගය අතරතුරදී ඒවායෙහි පැටලුම් ලිහා ගැනීමට සිදුවීමෙන් නිරපරාදේ කාලය නාස්ති වී යයි.
කාලයෙන් උපරිම ප්‍රයෝජන ගන්න
තරගය පැවැත්වෙන කාල සීමාව තුළ හැකිතාක් උපරිමයෙන් ප්‍රයෝජන ගැනීමට ඔබ දැනගත යුතුය. ඒ සඳහා ඔබ කල්තියාම සැලැසුම් කරගත යුතුය. බේස් ආලේප කිරීමට ගන්නා ස්පොන්ජ් කැබැල්ල පෙඟවීමට අවශ්‍ය වතුර පවා ඔබ රැගෙන යා යුතුයි. තරගය පවත්වන ස්ථානයේ යම් අයුරකින් ජලය නොමැති වුවොත් තව කෙනකුගෙන් ජලය ඉල්ලීමට යෑම ඔබගේ කාර්යයට බාධා කරවන්නක් විය හැකියි. ආලේපන ගැල්වීමේදී ඇඳ සිටින ඇඳුමේද තැවරිය හැකි නිසා ඇඳුම ආවරණය කිරීම වඩාත් සුදුසුයි. ඔබට කෙතරම් රූපලාවණ්‍ය ආලේපන තිබුණද ඒවා සියල්ලම තරගයට රැගෙන යෑම ඔබව කැලඹිලි ස්වභාවයකට පත්කරවන්නක් විය හැකියි.
පෙරහුරුවක් කරන්න.
එනිසා ඔබේ නිරූපිකාවක සමඟ පෙරහුරුවක් පවත්වද්දී තරගයේදී ඇයට ගල්වන සියලු ආලේපන නිවැරැදිව විනිශ්චය කරගන්න. ඒවා ඇඳුමට, ආභරණ සහ නිරූපිකාවගේ සමට ගැළපේදැයි තහවුරු කොට ගන්න. තරගයට යෑමට පෙර ඔබේ රූපලාවණ්‍ය භාණ්ඩ හා ආලේපන ඇසුරුමට, කල්තියා තෝරාගත් ආලේපන පමණක් තැන්පත් කරන්න. අනවශ්‍ය සියල්ල ඉවත් කරන්න. ආලේපන ගැල්වීමේදී භාවිත කරන පින්සල් සහ ස්පොන්ජ් හොඳින් සෝදා පවිත්‍ර කරගන්න. එසේ නොවුණු විට එහි තැන්පත් වී ඇති වර්ණ තරගය තුළදී ඔබේ නිර්මාණයට බාධා ගෙනදිය හැකිය.
මේකප් කිරීමේදී පළමු කොටම ෆවුන්ඩේෂන් එක ගල්වා එය වියැළෙන තුරු කොණ්ඩා විලාසිතාව කිරීමට ඔබට හැකිය. ඉන්පසු ඉතා ඉක්මනින් අවසන් කර ගැනීමට හැකි දෑ කරන්න. මනාලියගේ වැඩිපුර කැපී පෙනෙනුයේ දෙඇස්ය. එනිසා දෑස් හැඩ කිරීමට කල්ගත වූවාට වරදක් නැත. එහෙත් ඔබ ඉතා කල්පනාකාරී විය යුතුයි. දෑස් හැඩ කිරීමට ගල්වන ආලේපන මුහුණේ සම මත ගෑවුණහොත් ඔබේ මුළු මහන්සියම අපතේ යා හැකිය.
කොණ්ඩා විලාසිතාව කිරීම,
කොණ්ඩා විලාසිතා කිරීමේදී ඒ සඳහා තරගයට කලින් දින පටන් සූදානම් වන්න. තරගයකදී හවරි භාවිත කිරීමට අවසර දෙන්නේ නම් පමණක් කල්තියා හවරියේ ගැට හැර හොඳින් පීරා ගන්න. කොණ්ඩා විලාසිතාවේදී භාවිත කරන විවිධ සැරසිලි ආදිය පුංචි පුංචි කොටස් ලෙස රැගෙන යනවාට වඩා එක් කොටසක් ලෙස රැගෙන යා හැකි නම් තරගය අතරතුර කාලය තවත් ඉතිරි කරගත හැකිය.
ඔබ වේල් එකක් පාවිච්චි කරනවා නම් එය අනිවාර්යයෙන්ම ඇඳුමේ වර්ණය හා ගැළපෙන්නක් විය යුතුය. සාමාන්‍ය තරමේ දිගකින් යුතු වේලයක් පැලඳීම තුළින් වේදිකාව තුළ පහසුවෙන් ඔබේ නිරූපිකාව නිරූපණ කටයුතු කළ හැකිවේ. ඔබ වේලය කිසි විටකත් ඔබේ නිර්මාණය කළ කොණ්ඩා විලාසිතාවට බාධාවක් කරගත යුතු නොවේ. කොණ්ඩා විලාසිතාව හා එයට භාවිත කළ දේ පරයා වේලය කැපී පෙනේ නම් ඔබ අසාර්ථකය. එනිසා සෑම විටකම ඔබ කළ නිර්මාණයට මුල්තැන දිය යුතුය.
උඩරට මනාලිය : ඔබ හැඩගන්වන්නේ උඩරට මනාලියක් නම් මුල් තැන දිය යුත්තේ සම්ප්‍රදායානුකූල බවටය. හිසකෙස් විලාසිතාව එතරම් හැඩගැන්විය යුතු නොවේ. නමුත් පිළිවෙළකට තිබිය යුතුය. ඔබ කොණ්ඩය ආවරණය කිරීමට මල් වැල් භාවිත කරන්නේ නම් පටන්ගත් තැන සිට අවසානය දක්වාම එකම අයුරින් මල්වැල තිබිය යුතුය. මල් වැල දිගින් වැඩි වුවාට කම් නැත. එය කතුරකින් කපා අනවශ්‍ය කොටස ඉවත් කරගත හැකිය. නමුත් මල් වැල කොණ්ඩය ආවරණය කිරීමට තරම් ප්‍රමාණවත් නොවුණහොත් එය ඔබේ නිර්මාණයට අවලස්සනක් එක් කරයි. උඩරට ආභරණ කට්ටලයට පලඳින නිසා මල් කලඹ තරමක් සැහැල්ලු එකක් විය යුතුය. මල් කලඹ මෙන්ම ආභරණද සාරියේ වර්ණයටම ගැළපෙන සේ තෝරා ගන්න.
බටහිර මනාලිය : ඔබ හැඩගන්වන්නේ බටහිර මනාලියක් නම් ඔබට ඕනෑ තරම් නිර්මාණාත්මක දේ කිරීමට නිදහස ඇත. ඇස් වර්ණ ගැන්වීම, ඇහි පිහාටු භාවිතය, ආභරණ, වර්ණ භාවිතය, කොණ්ඩ විලාසිතා ආදිය විවිධත්වයකින් යුතුව කළ හැකිය. නමුත් සමස්තයක් ලෙස ගත් කල මේ සියල්ලක්ම එකකට එකක් ගැළපිය යුතුය. කොණ්ඩා විලාසිතාව කිරීමේදී එය ඔබේම නිර්මාණයක් විය යුතුය. වෙළෙඳ පොළේ විවිධ කොණ්ඩා සැරසිලි මිලදී ගත හැකි වුවත් තරගයකදී එය ඔබේම නිර්මාණයක් විය යුතුය.
ඉන්දියානු මනාලිය : ඔබ හැඩගන්වන්නේ ඉන්දියානු මනාලියක් නම් ඇයට සාරිය ඇන්දවීමේදී සාරියේ උස යට සායෙහි උස හා වර්ණය ගැළපීමට මතක තබා ගන්න. සාරිය දෙපතුල් වැහෙනසේ අන්දන්න. සාරිය ඇන්දවීමේදී එය රඳවා ගැනීමට කටු කොපමණ සංඛ්‍යාවක් භාවිත කළද එය පිටතට නොපෙනෙන සේ රඳවාගත යුතුය. වේලය භාවිත කිරීමේදී තමන් කළ කොණ්ඩා විලාසිතාව වැසී යන සේ එය රඳවා නොතබන්න. වේලය මීටර් හතරක් පමණ දිග වීමේ ගැටලුවක් ඇතිනොවුණහොත් එයට වඩා දිගින් වැඩි වුවොත් සාරියේ ලස්සනද වේලය නිසා නැතිවී යා හැකිය.
නිරූපිකාවගේ වැදගත්කම
තරගයට පවත්වන කාලය අතරතුර ඔබේ වගකීම අකුරටම ඉටුකළද එතැනින් එහාට වේදිකාව මත වගකීම ඇත්තේ ඔබේ නිරූපණ ශිල්පිනියටයි. ඇය ඔබ කළ නිර්මාණය හොඳින් විනිශ්චය මණ්ඩලයට පෙන්විය යුතුය. ඇස් පහළට කොට හිස හරවා ආදී වශයෙන් නිර්මාණය හොඳින් විනිශ්චයට ලක්කිරීමට විනිශ්චය මණ්ඩලයට අවස්ථාව සලසා දිය යුතුය. ඇය පැලඳ සිටින පාවහන් පවා ඇඳුමේ වර්ණයටම ගැළපෙන සේ තිබිය යුතුය. අඳින ඇඳුම දෙපතුල් දක්වා වැසුණද දෙපා තබා ඇවිදින විට පාවහන් යුගලද දිස්වේ.
විනිශ්චය මණ්ඩලයක අවධානය දිනා ගනුයේ පිළිවෙළ, නිමාව, ඇඳුම්, සමස්ත නිර්මාණය, ආභාරණ, කොණ්ඩා විලාසිතාව හා එයට භාවිත කර ඇති සියලු දේය. දේශීය වශයෙන් තරග වැදීමේදී මේ සියලු දේ පිළිබඳ අවධානය යොමු කළත්, විදේශීයව ඔබ තරගවදින්නේ නම් ලෝකයේ නව විලාසිතා පිළිබඳ ඔබ දැනුම්වත් විය යුතුමය.
රූපලාවණ්‍ය ශිල්පී ප්‍රදීප් දර්ශන
සවනි ශේශාධි හර්ෂා
උපුටා ගැනීම මව්බිම
