This site has features that require javascript. Follow these simple instructions to enable JavaScript in your web browser.
විස්තර ලුහුඩු දැන්වීම්
ඡායාරූප ශිල්පීන් සහ රූපලාවණ්‍ය ශිල්පීන් එකතුව නැකැත් හදන මංගල්ලෙට යන කල
විවාහ මංගල උත්සවයක් සම්බන්ධව සැලැසුම් සකස් කිරීම උත්සවයට මාස ගණනාවකට පෙරදී සිදුවන්නකි. උත්සවයට අදාළ සියලු සංවිධාන කටයුතු එකී සැලැස්ම තුළ ගොනු වේ. එය වරින් වර සංශෝධනය කරමින් වඩාත් සුදුසු සැලැසුම සකස් කෙරේ. කල් වේලා ඇතිව කතාබහ කරගෙන දින වෙන්කරවා ගත යුතු සේවා ගණනාවකි. ඒ අතුරින් ඡායාරූප ශිල්පීන් හමුවීම, රූපලාවන්‍ය ශිල්පිනියන් හමුවීම, කෝකියකු හමුවීම, අෂ්ටක ගායන ශිල්පියකු හමුවීම, මෝටර් රථයක් වෙන් කර ගැනීම, උත්සව ශාලාවක් වෙන් කර ගැනීම, ඇඳුම් නිර්මාණ ශිල්පියකුට ඇණවුම බාර දීම ආදිය වැදගත්ය. ඊට අමතරව කල් වේලා ඇතිව සිදුකර ගත යුතු ඉතාම වැදගත් දෙය නම් මනාල මහතාගේ සහ මනාල මහත්මියගේ ජන්මපත්‍රවලට සීහෙන නැකැත් පවතින දින පිළිබඳ සොයා බලා මංගල උත්සවය එම සුබ දිනයකට යොදා ගැනීමය. මංගල උත්සවයක් සඳහා නැකැත් සෑදීමට භාරගන්නා ජේ‍යාතිර්වේදියා අංශ රාශියක් පිළිබඳව ඉතා දැඩි අවධානයක් යොමු කරමින් දින ගණනාවක් මනස වෙහෙසවමින් අවශ්‍ය අවස්ථා සඳහා සුබ නැකැත් සාදයි. බුලත් දී මඟුල් කීමේ නැකැතේ පටන් තෙල් වළඳ ළිප තැබීම, මඟුල් මඩුව සෑදීම, මඟුල් ඇඳුම් ඇඳීම, වේල් එක තැබීම, මඟුල් මේසය ඉඳුල් කිරීම, ගෙදරින් පිටත් වීම, අත්සන් කිරීම, පෝරුවට නැඟීම, තැලි මුදු මාරුව, පෝරුවෙන් බැසීම, මධු සමය සඳහා පිටත්ව යෑම, හෝටලයෙන් පිටවීම, මනාල මහතාගේ නිවෙසට ඇතුළු වීම ආදී වූ සෑම අවස්ථාවක් දක්වාම නැකැත් සාදා දෙනු ලැබේ. ජේ‍යාතිර්වේදියකු මේ සියලු අවස්ථා සඳහා ඉතාම සුදුසු නැකැත් ලබා දෙනුයේ දැඩි ලෙස මනස වෙහෙසට පත්කරවමිනි. මංගල උත්සවය පැවැත්වෙන දිනයේදී පරිහරණය කරනු ලබන ඉතාම වැදගත් ලියැවිල්ලක් වනුයේ ඉහතින් දැක්වූ නැකැත් සියල්ල සඳහන්ව ඇති නැකැත් පත්‍රයයි. මේ නැකැත් පත්‍රය ඉතා විචිත්‍ර ලෙස නිම කොට තිබීමද දැකිය හැකිය. උත්සවයට පැමිණෙන නෑදෑ හිතමිතුරන්ගෙන් බොහෝ දෙනකු එම නැකැත් පත්‍රය කියවා බලන ආකාරයද මංගල උත්සව අවස්ථාවකදී දැකිය හැකිය. ඉර හඳ තාරකා අතර සැරිසරමින් බොහෝ වෙහෙස මහන්සියෙන් සෑදු නැකැත් අඩංගු නැකැත් පත්‍රයේ සඳහන් සුබ මුහුර්ත මංගල උත්සව දිනයේදී අකාරුණික ලෙස වෙනස් කර දමන ආකාරයක්ද අද දැකිය හැකිය. පැමිණෙනවා යැයි කී වේලාවට පැයකට පමණ පසු පැමිණෙන රූපලාවණ්‍ය ශිල්පිනිය එදිනට යෙදෙන පළමු සුබ මුහුර්තය වෙනස් කර දමන්නට දායක වේ. වේල් එක තබන්නට නැකැත්කරු ලබාදුන් වේලාව වන විට මනාලියට ඇඳුම් අන්දවාගත නොහැකි වූ විට වේල් එක තබන නැකැත සාදනුයේ රූපලාවණ්‍ය ශිල්පිනියයි. මෙසේ කඩන්නට පටන්ගත් නැකැත් වේලාවන් ඊළඟට කැඩෙනුයේ ඡායාරූප ශිල්පීන් හා වීඩියෝ ශිල්පීන් අතිනි. ගෙදරින් පිටත් වන නැකැත කෙසේ වෙතත් ඡායාරූප ගැනීම හා වීඩියෝ කිරීම ඉතා නිවැරැදිව සිදුවිය යුතු බව කාගේත් මතය වන බැවින් නැකැත් වේලාව එහා මෙහා වීම ගැන ‍ෙදාස් පවරන කෙනකු නැත. මංගල උත්සවයේ සියලු අධ්‍යක්‍ෂණයන් ඡායාරූප ශිල්පීන් හා වීඩියෝ ශිල්පීන් ඉතා කුරිරු ලෙස තම ග්‍රහණයට ගනී. නැකැත් වේලාවන් ඔවුනට ප්‍රශ්නයක් නොවන අතර රුපියල් ලක්‍ෂ ගණනක ඇණවුමකට ලබාගත් ඡායාරූප ඇල්බම හා වීඩියෝ පට ඉතා විචිත්‍ර ලෙස නිම කිරීම පමණක් ඔවුන්ගේ ඉලක්කය වේ. මේ ඉලක්කය සාධනය කර ගැනීම අරමුණ මිස නැකැත් වේලාවන්ට අනුකූල වීම ඔවුනට අදාළ නැත. මනාල යුවළ විවිධ ආලිංගනයන්ට යොමු කරමින් නිර්මාණය කරනු ලබන වීඩියෝ පටය නැරැඹීම වැඩිහිටියන්ට පමණක් සීමා විය යුතු තරමට ජුගුප්සාජනකය. දක්‍ෂ ඡායාරූප ශිල්පීන් හා දක්‍ෂ වීඩියෝ ශිල්පීන් මංගල උත්සවය සිදුවන අතරතුර වහ වහා ඡායාරූප ගනු ලබයි. එහෙත් බොහෝ විට අද සිදුවනුයේ ඡායාරූප ශිල්පීන්ගේ අධ්‍යක්‍ෂණය යටතේ මනාල යුවළට නළු නිළියන් වීමටයි. නැකැත් වේලාවන් පිළිබඳ සැලකිල්ල එහිදී බිංදුවට වැටෙන අතර පැමිණ සිටින නෑදෑයන් හා හිත මිතුරන් සමඟ කතාබස් කිරීමට පවා මනාල යුවළට අවස්ථාව ලැබෙනුයේ ඉතා සීමිතව හා කෘත්‍රිම ලෙසටය. පැපරාසීන් බවට පත්වන ඡායාරූප ශිල්පීන්ගෙන් ගැලවීමක් ලැබෙන්නේම නැත. සාම්ප්‍රදායික වතාවත් අනුව සිදු කරනු ලබන පෝරුවේ චාරිත්‍ර සඳහාද මූලික වනුයේ අෂ්ටක ගායනා කරන්නට පැමිණි ශිල්පියා නොව ඡායාරූප ශිල්පීන්ය. ඔවුන්ගේ අධ්‍යක්‍ෂණය යටතේ අෂ්ටක ගායනයද එහා මෙහා කර ගන්නට අෂ්ටක ගායන ශිල්පියාට සිදුවේ. පැමිණ සිටින නෑදෑ හිත මිතුරන්ද ඡායාරූප ශිල්පීන් හා අනුගත වනවා විනා නැකැත් වේලාවන් හා සම්ප්‍රදායන් පිළිබඳ තැකීමක් නැත. සුබ නැකැත් වේලාවන් සඳහන් නැකැත් පත්‍රය මේසයක් මත තනිවී සිටින ආකාරයද මංගල උත්සවවලදී දැකිය හැකිය. වෙහෙස මහන්සියෙන් සැදූ සුබ නැකැත් වේලාවන් පසෙකලා ඡායාරූප ශිල්පීන්ගේ වේලාවන්ට අනුව චාරිත්‍ර සිදු කිරීමෙන් මනාල යුවළට සිදුවන අගතිය පිළිබඳව සියලු දෙනාගේම අවධානය යොමු විය යුතුය. ජීවිතයේ වැදගත් අවස්ථාවක් වන විවාහ මංගල්‍ය සඳහා සාදන ලද නැකැත් වේලාවන්ට නිසි පරිදි අනුකූල වීම මනාල මහතාගේ හා මනාල මහත්මියගේ පාර්ශ්වයන් විසින් ඉතා සැලකිල්ලෙන් සිදුකළ යුතුය. ජීවිතයේ දෙවැනි වර ඉපදීම නිසි නැකැත් වේලාවන්ට සිදු නොවුවහොත් ඉදිරි ජීවිතයේ යම් යම් ගැටලු හටගන්නටද ඉඩ ඇත. එබැවින් මංගල උත්සවවල නැකැත්වලට නිසි ලෙස අනුකූල වීම සියලු දෙනාගේම වගකීමකි. පාඨශාලාචාර්ය අසෝක විජයසේකර තලාව, ගා/වඳුරඹ 076-6827325 උපුටා ගැනීම මව්බිම